YOMARA, Marcelo ꞌne Hiver di nku ꞌne yä zi xada. Nuyu̱ ꞌmu̱i ha nꞌa rä tꞌu̱kä luga de rä dähni Guatemala. Yomara bi mu̱di bi nxadi rä Biblia ko yä testigo rä Jeoba, ꞌne mꞌe̱fa nuꞌu̱ yoho yä ku ꞌnehe bi mu̱di bi nxadi rä Biblia. Pe ninꞌa de gehyu̱ himi pädi hanja dä hñeti yä he̱ꞌmi ko yä dedo. Hänge näꞌä rä xahnäte, pe̱ꞌtsi te mi hetuäbi kada nꞌa rä parrafo ꞌne nuꞌu̱ yä testo de rä Biblia.

Mi japäbi xä ñhei dä ntini ha yä mhuntsꞌi, ngeꞌä himi tsa dä mase̱ ꞌne mi kohi 40 minuto rä yabu̱ de habu̱ mi ꞌmu̱i. Hänge yä ku mi mfatsꞌi pa mi tsitsꞌi ha yä mhuntsꞌi ꞌne mi fatsꞌi dä mengi ha yä nguu. Nuꞌmu̱ di hñuu bi mu̱di bi thogi ha rä plataforma, yä ku mi fatsꞌi mi nsaya pa dä mepye̱ näꞌä ma dä mää.

Po rä mäyo de rä 2019, yä testigo rä Jeoba bi mu̱di bi ja yä mhuntsꞌi ha näꞌä rä luga habu̱ yä mengu nuyu̱ yä bäsjäꞌi. Nꞌa rä medinthäti nuꞌu̱ myä precursor bi ma bä ꞌmu̱i ha näꞌä rä lugaꞌä. Mäske nunä rä medinthäti himi pädi dä hñeti yä he̱ꞌmi ko yä dedo, bi desidi dä ꞌñuti nuyu̱ yä bäsjäꞌi hanja dä ja. Pa geꞌä, bi ma ha nꞌa rä biblioteka pa dä nxadi hanja dä hñeti yä he̱ꞌmi de gä braille ꞌne hanja dä za dä ꞌñuti märꞌaa.

Nuyu̱ yä bäsjäꞌi nguntꞌä bi bädi bi hñeti yä he̱ꞌmi de gä braille ꞌne geꞌä bi matsꞌi pa mänꞌa bi me̱päbi xä ñho rä Zi Dada Jeoba. a Nubye̱ Yomara, Marcelo ꞌne Hiver yä precursor regular, ꞌne Marcelo rä siervo ministerial. Tatꞌä semänä, nuyu̱ dedika ndunthi de yä tiempo pa pe̱päbi rä Zi Dada Jeoba, ꞌne asta kontajiabi märꞌaa näꞌä rä johya udi nuyu̱ yä bäsjäꞌi.

Nuyu̱ hñuu yä bäsjäꞌi xa umbäbi ndunthi rä jamädi yä ku de rä mhuntsꞌi po gatꞌho näꞌä xä me̱fi po geꞌu̱. Yomara enä: «Dende näꞌä rä pa dä nkonosehe, yä ku xä ꞌñudi ndunthi rä mhäte po gekhe». ꞌNe Marcelo enä: «Di pe̱ꞌtsihe ndunthi yä amigo ha rä mhuntsꞌi ꞌne di pertenesehe ha näꞌä rä familia ja po gatꞌho rä Xiꞌmhai». Yomara ꞌne nuꞌu̱ yoho yä ku, ya xtä du dä zo̱ho̱ näꞌä rä pa habu̱ gatꞌho rä Xiꞌmhai ma dä mparaiso (Sal. 37:10, 11; Is. 35:5).