1. Mää por hanja xä ñho gä dehahu̱ dä giagihu̱ rä Zi Dada Jeoba.

 IMÄJINÄ ge gi ne gi tso̱ni ha nꞌa rä luga. Pa geꞌä pe̱ꞌtsi te gi thogi po nꞌa rä däta boza. Ha nunä däta boza ja ndunthi yä ꞌmini, yä zate, yä kꞌeñä ꞌne märꞌa yä zuꞌue nuꞌu̱ tsate. Pe hingä ho̱nse̱ꞌä, rä ꞌñuu xa xä ntsꞌo ꞌne xa ja ndunthi yä do. ¿Te ma gi senti mu̱ gi nthe̱ui nꞌa rä zi jäꞌi näꞌä dä xii ge pädi rä ꞌñuu ꞌne dä za dä zixäꞌi asta habu̱ gi ne gi tso̱ni? Njabu̱ ꞌnehe ha nunä xiꞌmhai habu̱ di ꞌmu̱ihu̱, ꞌñenä näꞌä rä däta boza habu̱ xa ja ndunthi yä peligro. Nuꞌu̱ yä peligro dä za dä huati näꞌä rä ntsitsꞌi di pe̱ꞌtsihu̱ ko rä Zi Dada Jeoba. Pe ha nunä ꞌñuu hindi yꞌose̱hu̱. Rä Zi Dada Jeoba go geꞌä mä giahu̱ ꞌne ꞌmu̱i dispuesto dä maxkägihu̱ gä ebitahu̱ nuꞌu̱ yä peligro, ꞌne dä maxkägihu̱ pa gä tso̱nihu̱ ha näꞌä rä rꞌayꞌo xiꞌmhai xä ꞌñepu̱ habu̱ ma dä za gä mꞌu̱ihu̱ pa nzäntho.

2. ¿Hanja di giagihu̱ rä Zi Dada Jeoba?

² ¿Hanja di giagihu̱ rä Zi Dada Jeoba? Di giagihu̱ po mäde de rä Mäkä Tꞌofo. ꞌNehe usa rꞌa yä ñꞌo̱ho̱ ngu yä representante pa dä giagihu̱. Por ejemplo, rä Mäkä Tꞌofo udi ge Jeoba usa näꞌä embäbi «rä ꞌme̱go rä hogä yꞌo̱de ꞌne xa ja rä mfeni», pa rꞌakägihu̱ näꞌä imformäsio faxkägihu̱ gä huahnihu̱ yä hogä desision (Mat. 24:​45, TNM). Rä Zi Dada Jeoba hingä ho̱nse̱ di usa nuya yä ñꞌo̱ho̱ pa dä giagihu̱, ꞌnehe di usa yä superintendente de gä circuito ꞌne yä anciano de rä mhuntsꞌi, pa di nupkägihu̱ mä mfenihu̱ ꞌne pa rꞌakägihu̱ yä tsꞌofo nuꞌu̱ ma dä maxkägihu̱ ora di thogihu̱ yä däta xuñha. ¡Hängu di jamädibihu̱ rä Zi Dada Jeoba po nunä rä gia rꞌakägihu̱ ha nuya yä gäxä pa! Nunä gia faxkägihu̱ gä pe̱fihu̱ näꞌä di ho rä Zi Dada Jeoba ꞌne faxkägihu̱ pa hingä ꞌuengihu̱ de nunä ꞌñuu tsitsꞌi ha rä te pa nzäntho.

3. ¿Ndaꞌu̱ nuꞌu̱ hñu yä ntꞌani ma gä thädihu̱?

³ Mäske njabu̱, rꞌabu̱ dä za dä jakägihu̱ xä ñhei gä jamäsuhu̱ näꞌä rä gia rꞌakägihu̱ rä Zi Dada Jeoba ngeꞌä yä imperfecto nuꞌu̱ yä ñꞌo̱ho̱ xä  hñutsꞌi pa dä gu̱nkägihu̱. Mäske näꞌä rä gia rꞌakägihu̱ nuya yä ku bi ehe de rä Zi Dada Jeoba, rꞌabu̱ dä za gä mbenihu̱ ge nuꞌu̱ yä tsꞌofo hingä geꞌä di honihu̱ ꞌne dä za gä enähu̱: «Nuꞌu̱ yä tsꞌofo hindi kamfri ge bi ehe de rä Zi Dada Jeoba». Pe ora thogi njabu̱, mähyoni gä benihu̱ ge rä Zi Dada Jeoba go geꞌä gu̱hni rä hnini ꞌne ge pa mä ñhouihu̱ mu̱ gä dehahu̱ dä giagihu̱. Pa mänꞌa gä kamfrihu̱ ge rä Zi Dada Jeoba go geꞌä di gia rä hnini, ma gä thädihu̱ nuya hñu yä ntꞌani: 1) ¿Hanja bi gia rä Zi Dada Jeoba rä hnini mäyaꞌmu̱? 2) ¿Hanja di giagihu̱ rä Zi Dada Jeoba mäpaya? ꞌne 3) ¿te mä benefisio di hänihu̱ ora di he̱gihu̱ rä Zi Dada Jeoba dä giagihu̱?

HANJA BI GIA JEOBA MÄYAꞌMU̱ RÄ HNINI ISRAEL

4, 5. ¿Te mä seña bi umbäbi rä Zi Dada Jeoba yä israelita pa dä gamfri ge xki huahni Moisés pa dä giabi? (Hyandi rä kꞌoi de rä mu̱di nxii).

⁴ Rä Zi Dada Jeoba bi hñutsꞌi Moisés pa go geꞌä dä gu̱tꞌi rä ꞌñuu ꞌne dä gu̱ki yä israelita de rä dähni Egipto. Pa geꞌä, rä Zi Dada Jeoba bi umbäbi nꞌa rä seña pa xä bädi ge go geꞌä mi umbäbi rä gia. De gä pa mi japäbi dä bo̱ho̱ nꞌa rä gui näꞌä mi pa ndelante de geꞌu̱, ꞌne de gä xui mi japäbi dä bo̱ho̱ nꞌa rä tsibi näꞌä mi pa ndelante de geꞌu̱ pa mi yotpäbi rä ꞌñuu (Éx. 13:21). Moisés go geꞌä bi gu̱ꞌtuäbi rä ꞌñuu yä israelita pa bi de̱ni näꞌä rä gui ꞌne näꞌä rä tsibi asta xa bi tso̱ni ha rä mar Rojo. Pe nꞌa rä pa, ora yä israelita bi hyandi ge ya mi otho rä ꞌñuu ꞌne yä egipcio ya mi ꞌme̱fa, yä israelita xa bi ntsu ꞌne bi hñuyämu̱i ge ja ma xä thoni gatꞌho. Hänge bi reklamäbi Moisés ꞌne bi ꞌñembäbi por hanja xki gu̱ki de Egipto. Pe rä Zi Dada Jeoba hixki kiboka nuꞌmu̱ bi huahni Moisés ngu rä representante ꞌne bi ja nꞌa rä milagro pa bi ñäni de yä yꞌe̱ yä egipcio (Éx. 14:​2, 26-28).

⁵ Durante 40 nje̱ya, Moisés himbi hye̱gi de bi de̱ni näꞌä rä gui xki umbäbi rä Zi Dada Jeoba pa bi matsꞌi yä israelita bi rꞌani ha nuꞌu̱ yä yꞌotꞌä hai. a Koꞌmu̱ rä jäꞌtsi Moisés mi egi tsꞌu̱ zi yabu̱ de habu̱ mi ntsaya märꞌa yä israelita, rꞌabu̱ rä Zi Dada Jeoba mi japäbi dä bo̱ho̱ näꞌä rä gui mäñä de rä jäꞌtsi Moisés pa njabu̱ gatꞌho märꞌa yä israelita mi handi (Éx. 33:​7, 9, 10). Dende nunä gui rä Zi Dada Jeoba mi zofo Moisés ꞌne mi xipäbi näꞌä mi debe dä me̱fi yä israelita. Mꞌe̱fa Moisés mi umbäbi ntꞌo̱de gatꞌho yä israelita näꞌä xki mängä rä Zi Dada Jeoba (Sal. 99:7). Ko näꞌä rä gui, yä israelita mi pe̱ꞌtsi nꞌa rä dängä prueba näꞌä mi udi ge rä Zi Dada Jeoba mi usa Moisés pa mi giabi.

6. ¿Tengu bi hyandi yä israelita näꞌä rä gia mi uni rä Zi Dada Jeoba pa geꞌu̱? (Números 14:​2, 10, 11).

⁶ Pe mäske rä Zi Dada Jeoba xki uni yä däta seña pa dä ꞌñudi ge xki huahni Moisés ngu rä representante, kasi gatꞌho yä israelita bi ja godatho ꞌne bi rechaza Moisés (hñeti Números 14:​2, 10, 11). Koꞌmu̱ nuyu̱ yä israelita bi rechaza Moisés ngu rä representante, rä Zi Dada Jeoba himbi hyopäbi bi yu̱tꞌi ha näꞌä rä Hogä Hai xki prometebi (Núm. 14:30).

7. ¿Toꞌo nuꞌu̱ bi asepta rä gia rä Zi Dada Jeoba? (Números 14:24; hyandi ꞌnehe rä foto).

⁷ Pe hingä gatꞌho yä israelita bi rechaza näꞌä rä gia bi uni rä Zi Dada Jeoba. Por ejemplo, rä Zi Dada Jeoba bi ꞌñenä: «Caleb [ . . . ] bi sigi bi de̱ngägi ko ngatꞌho rä koraso» (hñeti Números 14:24). Koꞌmu̱ Caleb bi hyopäbi rä Zi Dada Jeoba dä giabi, näꞌä bi hñäni ndunthi yä jäpi. Mi tso̱ni Caleb ha rä hnini Canaán, rä Zi Dada Jeoba bi hyopäbi dä huahni habu̱ mi ne dä mꞌu̱i (Jos. 14:​12-14). Ja ngu Caleb, gatꞌho nuꞌu̱ märꞌa yä israelita bi yu̱tꞌi ha näꞌä rä Hogä Hai bi tꞌumbäbi, ꞌnehe bi asepta näꞌä rä gia bi umbäbi rä Zi Dada Jeoba. Rä Mäkä Tꞌofo enä ge nuꞌu̱ «bi me̱ꞌspäbi rä tꞌekꞌei Josué durante rä bida». Hää, nuꞌu̱ yä israelita bi hyandi Josué ngu rä representante rä Zi Dada Jeoba mꞌe̱fa de bi du Moisés (Jos. 4:14). Po geꞌä rä Zi Dada Jeoba bi jäpi nuya yä israelita ꞌne bi hyopäbi bi yu̱tꞌi ha näꞌä rä Hogä Hai xki prometebi (Jos. 21:​43, 44).

8. ¿Hanja bi gia Jeoba rä hnini durante nuꞌu̱ yä je̱ya bi mända yä rey ha Israel? (Hyandi ꞌnehe rä foto).

⁸ Mi thogi yä je̱ya, rä Zi Dada Jeoba bi hñutsꞌi  yä nzaya pa bi umbäbi rä gia rä hnini. Mꞌe̱fa, durante näꞌä rä tiempo bi mända yä rey ha Israel, rä Zi Dada Jeoba nubye̱ bi hñutsꞌi yä profeta pa dä umbäbi rä gia rä hnini. Nuꞌu̱ yä rey bi asepta näꞌä rä gia mi uni rä Zi Dada Jeoba, bi jamäsu nuꞌu̱ yä konseho mi uni yä profeta. Por ejemplo rä rey David bi asepta nuꞌu̱ yä tsꞌofo bi uni rä profeta Natán (2 Sam. 12:​7, 13; 1 Crón. 17:​3, 4). Rä rey Jehosafat bi jamäsu näꞌä bi mää rä profeta Jahaziel ꞌne bi nupäbi yä mfeni yä jäꞌi de Judá ꞌne bi matsꞌi pa dä me̱ꞌspäbi rä jamfri ꞌne rä komfiansa nuꞌu̱ yä profeta rä Zi Dada Jeoba (2 Crón. 20:​14, 15, 20). ꞌNehe, nuꞌmu̱ bi thogi yä däta xuñha rä hnini Israel, rä rey Ezequías bi yꞌapäbi rä mfatsꞌi rä profeta Isaías (Is. 37:​1-6). Nuꞌmu̱ yä rey de Israel mi honi ne mi de̱ni näꞌä rä gia mi uni rä Zi Dada Jeoba, rä Zi Dada Jeoba mi jäpi ꞌne mi su de yä nkontra (2 Crón. 20:​29, 30; 32:22). Hinte mä duda mi ja ge rä Zi Dada Jeoba mi usa yä profeta pa mi giabi rä hnini. Pe kasi gatꞌho nuꞌu̱ yä rey bi mꞌu̱i ha Israel bi rechaza näꞌä rä gia mi umbäbi rä Zi Dada Jeoba (Jer. 35:​12-15).

HANJA BI GIA JEOBA NUꞌU̱ YÄ MU̱DI KRISTIANU

9. ¿Te bi me̱fi rä Zi Dada Jeoba pa bi gia nuꞌu̱ yä mu̱di kristianu? (Hyandi ꞌnehe rä foto).

⁹ Ha yä pa nuꞌu̱ yä mu̱di kristianu, nubye̱ rä Zi Dada Jeoba bi hñutsꞌi yä congregación. Pe, ¿te bi me̱fi rä Zi Dada Jeoba pa umbäbi rä gia nuya yä congregación? Bi hñutsꞌi Ñhesukristo ngu rä ñäxu de yä congregación (Efes. 5:23). ¿Signifika ge rä Hesu ma xä zofo kada nꞌa de nuꞌu̱ yä kristianu pa xä xipäbi te mi debe dä me̱fi? Hinä. Rä Hesu bi usa yä apostol ꞌne nuꞌu̱ yä anciano mi ꞌmu̱i ha Jerusalén pa bi diriji nuꞌu̱ yä mhuntsꞌi ꞌne bi xipäbi te dä me̱fi (Hech. 15:​1, 2). ꞌNehe ha kada nꞌa rä mhuntsꞌi bi thutsꞌi yä anciano pa dä umbäbi rä gia gatꞌho yä ku (1 Tes. 5:12; Tito 1:5).

10. a) ¿Hanja bi dädi nuꞌu̱ yä mu̱di kristianu ko näꞌä rä gia bi tꞌumbäbi? (Hechos 15:​30, 31). b) ¿Por hanja mäyaꞌmu̱ rꞌaa bi rechaza nuꞌu̱ yä representante rä Zi Dada Jeoba? (Hyandi rä rekuadro « ¿Por hanja rꞌaa di rechaza näꞌä rä gia bi ehe de rä Zi Dada Jeoba?»).

¹⁰ Nꞌa rä pa, nuꞌu̱ yä mu̱di kristianu bi ꞌme̱mpäbi nꞌa rä karta habu̱ bi sipäbi te mi debe dä me̱fi. ¿Hanja bi dädi nuꞌu̱ yä mu̱di kristianu ko näꞌä rä gia bi tꞌumbäbi? Ko ndunthi rä johya, kasi gatꞌho nuꞌu̱ yä kristianu bi me̱fi näꞌä bi sipäbi. Rä Mäkä Tꞌofo enä ge nuꞌu̱ yä kristianu xa bi johya ngeꞌä nuꞌu̱ yä noya xa bi nupäbi yä mfeni (hñeti Hechos 15:​30, 31, TNM). Xi mäpaya, ¿hanja di gia Jeoba rä hnini?

HANJA DI GIAGIHU̱ RÄ ZI DADA MÄPAYA

11. ¿Te mä prueba di pe̱ꞌtsihu̱ ge rä Zi Dada Jeoba usa rꞌa yä jäꞌi ngu yä representante mäpaya?

¹¹ Mäpaya, rä Zi Dada Jeoba sigi umbäbi rä gia  rä hnini po mäde de rä Mäkä Tꞌofo ꞌne rä Tꞌu̱, näꞌä xä hñutsꞌi ngu rä ñäxu de gatꞌho yä mhuntsꞌi. Pe, ¿te mä prueba di pe̱ꞌtsihu̱ ge rä Zi Dada Jeoba ꞌnehe sigi usa yä jäꞌi ngu yä representante? Por ejemplo, ma gä handihu̱ te bi thogi rꞌa yä je̱ya änte de xä zo̱ho̱ rä je̱ya 1900; Charles Russell ꞌne nuꞌu̱ yä maxte, bi ntiende ge po rä je̱ya 1914 rä Tsꞌu̱tꞌhui Äjuä ma xä mu̱di xä mända ha mähetsꞌi (Dan. 4:​25, 26). ¿Por hanja bi bädiꞌu̱ näꞌä ma xä thogi ha nunä je̱ya? Ngeꞌä nuꞌu̱ xa bi hñudi bi nxadi rä Mäkä Tꞌofo ꞌne rä Zi Dada Jeoba bi matsꞌi pa bi ntiendeꞌu̱ ge rä Mäkä Tꞌofo ya mi mää näꞌä ma xä thogi. Näꞌä bi thogi ha rä je̱ya 1914 bi ꞌñudi ge hää mäjuäni ya bi mu̱di bi mända rä Tsꞌu̱tꞌhui Äjuä. Ha nunä je̱ya, bi xotꞌi nꞌa rä gerra näꞌä fädi ngu rä Primera Guerra Mundial, bi nja yä däta ñheni, yä mbiꞌmhai ꞌne yä thuhu (Luc. 21:​10, 11). Kongehnä udi ge rä Zi Dada Jeoba sigi usa rꞌa yä jäꞌi ngu yä representante pa umbäbi rä gia rä hnini.

12, 13. Durante rä Segunda Guerra Mundial, ¿te bi me̱fi rä Zi Dada Jeoba pa bi matsꞌi rä hnini ꞌne njabu̱ bi za bi predika ha märꞌa yä luga?

¹² Ma gä handihu̱ mä nꞌa rä tꞌo̱tꞌe näꞌä bi thogi, pe nubye̱ durante rä Segunda Guerra Mundial. Nuꞌu̱ yä ku mi gu̱tꞌi rä ꞌñuu ha rä hnini rä Zi Dada Jeoba, xa bi xeni te mi udi Apocalipsis 17:8 ꞌne bi zo̱ho̱ bi ntiende ge xti uadi rä Segunda Guerra Mundial, hingä mäntꞌä ma xä ꞌñehe näꞌä rä gerra de Armagedón, sino ke ma xä nja nꞌa rä tiempo habu̱ ma xä tsaya yä tuhni ꞌne ma xä za xä tꞌuti mä ndunthi yä jäꞌi de rä Noya Äjuä. Po geꞌä rä hnini rä Zi Dada Jeoba, bi hñutsꞌi nꞌa rä ngunsadi näꞌä bi fädi ngu rä Colegio Superior Bíblico de la Watchtower de Galaad. b Ha nunä ngunsadi bri capacita rꞌa yä ku ꞌne bi ꞌme̱hni de gä misionero ha märꞌa yä luga de rä Xiꞌmhai pa dä ꞌñuti yä zi jäꞌi de rä Noya Äjuä. Hää, mäske mi ja näꞌä rä däta gerra, bi ꞌme̱hni nuꞌu̱ yä ku ha märꞌa yä dähni pa dä predika. ꞌNehe rä Cuerpo Gobernante bi hñutsꞌi näꞌä rä ngunsadi mi fädi ngu rä Curso en el Ministerio Teocrático c pa dä tꞌuti gatꞌho yä ku hanja dä ꞌñuti yä jäꞌi de rä Noya Äjuä. Njabu̱, rä hnini rä Zi Dada Jeoba bi ñhoki pa gatꞌho näꞌä rä ꞌme̱fi ma xä ꞌñehe mꞌe̱fa.

¹³ Ora di handihu̱ gatꞌho näꞌä bi thogi, ꞌnehe dä za gä handihu̱ ge hinte mä duda ja ge rä Zi Dada Jeoba, go geꞌä bi umbäbi rä gia rä hnini pa bi bädi te bi me̱fi mäske mi ñhandui yä däta xuñha. Dende nuꞌmu̱ bi uadi rä Segunda Guerra Mundial, yä testigo rä Jeoba xä za xä predika ha mä ndunthi yä luga. Hää, ndunthi yä zi jäꞌi xä zo̱ho̱ xä bädi de  rä Zi Dada Jeoba ꞌne mäpaya di tꞌungä ntꞌo̱de de rä Noya Äjuä po gatꞌho rä Xiꞌmhai.

14. ¿Por hanja debe gä pe̱ꞌspäbihu̱ rä komfiansa näꞌä rä gia rꞌakägihu̱ rä Zi Dada Jeoba po mäde de rä hnini ꞌne yä anciano? (Apocalipsis 2:1; hyandi ꞌnehe rä foto).

¹⁴ Mäpaya, nuꞌu̱ yä ku forma rä Cuerpo Gobernante sigi honi näꞌä rä gia uni rä Kristo. Nuyu̱ yä ku, nzäntho di asegura ge näꞌä rä gia uni, geꞌä rä gia bi ehe de rä Zi Dada Jeoba ꞌne de rä Kristo. Po mäde de yä superintendente de gä circuito ꞌne yä anciano, rä Cuerpo Gobernante pe̱mpäbi rä gia gatꞌho yä mhuntsꞌi. d Nuꞌu̱ yä kristianu to̱ꞌmi dä ma ha mähetsꞌi ꞌne gatꞌho yä anciano de yä mhuntsꞌi, o ha rä yꞌe̱ rä Kristo (hñeti Apocalipsis 2:1). Pe koꞌmu̱ nuyu̱ yä ku ꞌnehe yä imperfecto, rꞌabu̱ di komete yä error ja ngu bi thogi ko Moisés, Josué ꞌne yä apostol (Núm. 20:12; Jos. 9:​14, 15; Rom. 3:23). Pe di pädihu̱ ge rä Hesu, go geꞌä xrä nkargobi dä umbäbi rä gia rä Cuerpo Gobernante ꞌne yä anciano, ꞌne geꞌä ma dä sigi dä me̱fi «gatꞌho yä pa asta xti zo̱ho̱ rä fin de nuꞌu̱ yä tsꞌo tꞌo̱tꞌe ja ha rä xiꞌmhai» (Mat. 28:​20, TNM). Po geꞌä, di pe̱ꞌtsihu̱ ndunthi yä raso pa gä pe̱ꞌspäbihu̱ rä komfiansa näꞌä rä gia rꞌakägihu̱ rä Zi Dada Jeoba po mäde de nuyu̱ yä ku.

TE MÄ BENEFISIO DI HÄNIHU̱ ORA DI JAMÄSUHU̱ NÄꞌÄ RÄ GIA RꞌAKÄGIHU̱ JEOBA

15, 16. ¿Te dä za gi pädi de nuꞌu̱ yä ku xä asepta näꞌä rä gia uni rä Zi Dada Jeoba?

¹⁵ Dende nubye̱, di hänihu̱ ndunthi yä benefisio ora di aseptahu̱ näꞌä rä gia rꞌakägihu̱ rä Zi Dada Jeoba. Por ejemplo, rä hnini rä Zi Dada Jeoba njatꞌä di animägihu̱ gä ꞌuekehu̱ de ha mä bidahu̱ nuꞌu̱ yä tꞌo̱tꞌe hingä mähyoni pa njabu̱ dä za gä pe̱päbihu̱ mä ndunthi rä Zi Dada Jeoba. Rä ku Andy ꞌne rä zi nju Robyn, nunä nꞌa rä medinthäti näꞌä bi jamäsu nunä konseho (Heb. 13:5). Njabu̱ nunä medinthäti xä za xä ma de gä boluntario pa xä mfaxte xä thoki yä Ngu de gä Mhuntsꞌi ꞌne märꞌa yä ꞌme̱fi ha rä hnini rä Zi Dada Jeoba. Rä zi nju Robyn enä: «Xä toka stä ꞌmu̱ihe ha yä zi tꞌu̱kä nguu habu̱ hingi pe̱ꞌtsi gatꞌho ja ngu xti nzäihe. Näꞌä rä pa dä pahe nuꞌu̱ mä erramienta ndi pe̱ꞌtsi pa ndi häi yä foto, xa dä nzoni ngeꞌä xa ndi ho nunä ꞌme̱fi. Pe ja ngu Abrahán ꞌne Sara, nuje ya xti tomähe nunä desision ꞌne hinto ma xä hñägägihe» (Heb. 11:15). ¿Te xä senti nunä medinthäti po näꞌä xä me̱fi? Rä zi nju Robyn enä: «Xtä tinihe ndunthi rä johya ngeꞌä nubye̱ hää di sentihe ge xtä umbäbihe rä Zi Dada Jeoba gatꞌho näꞌä di pe̱ꞌtsihe. Ora di faxtehe ha nuya yä ꞌme̱fi pa rä Zi Dada Jeoba, ya di handihe nꞌa tu̱i tenguꞌä näꞌä rä mꞌu̱i ma gä pe̱ꞌtsihu̱ ha rä rꞌayꞌo xiꞌmhai». Rä zi ku Andy enä: «Otho mä nꞌa rä ꞌme̱fi habu̱ dä za gä tinihu̱ xi ndunthi rä johya ja ngu näꞌä rä johya di tinihu̱ ora di  umbäbihu̱ gatꞌho de mä tiempohu̱ rä Zi Dada Jeoba».

¹⁶ Pe ja mä nꞌa rä benefisio näꞌä di pe̱ꞌtsihu̱ ora di jamäsuhu̱ näꞌä rä gia uni rä Zi Dada Jeoba. Por ejemplo, mi huati yä estudio nꞌa rä zi nju näꞌä rä thuhu Marcia, bi jamäsu näꞌä rä konseho uni rä hnini rä Zi Dada Jeoba de dä me̱päbi ngu de gä precursora (Mat. 6:33; Rom. 12:11). Nunä zi nju enä: «Nꞌa rä universidad bi ofresegi nꞌa rä beca po goho nje̱ya. Pe nuga ndi ne gä pe̱päbi mä nꞌa tu̱i rä Zi Dada Jeoba. Hänge dä honi mä nꞌa rä skuela habu̱ bi tꞌuktägi nꞌa rä ofisio näꞌä ma xä maxkägi xtä mäntene de gä precursora. ¡Hindi arrepenti po nunä desision! Nubye̱ di pe̱päbi rä Zi Dada Jeoba de gä precursora regular ꞌne näꞌä rä ꞌme̱fi di pe̱ꞌtsi, hokägi gä ma de gä boluntaria ha rä ngu Betel. ¡Rꞌakägi ndunthi rä johya nuꞌu̱ yä mäkä ꞌme̱fi xä tꞌakägi ha rä hnini rä Zi Dada Jeoba!».

17. ¿Ndaꞌu̱ märꞌa yä benefisio di hänihu̱ ora di aseptahu̱ rä gia rä Zi Dada Jeoba? (Isaías 48:​17, 18).

¹⁷ Rꞌabu̱, rä hnini rä Zi Dada Jeoba rꞌakägihu̱ yä konseho nuꞌu̱ sugägihu̱ pa hingä tumämu̱ihu̱ ndunthi po yä bojä o po märꞌa yä nkꞌatꞌi nuꞌu̱ dä za dä jakägihu̱ gä ꞌuengihu̱ de rä ꞌñuu rä Zi Dada Jeoba. Ora di jamäsuhu̱ nuya yä konseho, di pe̱ꞌtsihu̱ nꞌa rä konsiensia xä ntꞌaxi ꞌne di ꞌuegehu̱ de yä u̱gi ꞌne yä dumu̱i (1 Tim. 6:​9, 10). Geꞌä faxkägihu̱ pa hinto di distraegihu̱ de gä pe̱päbihu̱ rä Zi Dada Jeoba ko ngatꞌho mä korasohu̱. ꞌNehe, rꞌakägihu̱ ndunthi rä johya ꞌne hinte mä tꞌo̱tꞌe hägägihu̱ mä tꞌähähu̱ (hñeti Isaías 48:​17, 18).

18. Xi nuꞌi, ¿por hanja gi ne gi sigi gi asepta näꞌä rä gia uni rä Zi Dada Jeoba?

¹⁸ Xti zo̱ho̱ näꞌä rä däta mbidi o däta tribulación, ꞌne durante näꞌä 1.000 yä je̱ya ma dä mända rä Kristo, rä Zi Dada Jeoba ma dä sigi dä usa rꞌa yä ku ngu yä representante (Sal. 45:16). Hänge xa dä hogi gä ñꞌanise̱hu̱: «¿Xi xti zo̱ho̱ näꞌä rä paꞌä, ma gä sigi gä aseptabi rä gia rä Zi Dada Jeoba ꞌne hingä ma gä pe̱fi näꞌä go ma gä häkse̱ mä mfeni?». Dä za gä enähu̱ ge hää mu̱ dende nubye̱ di aseptahu̱ näꞌä rä gia uni rä Zi Dada Jeoba. Hänge ma gä sigihu̱ gä o̱thu̱ ntsꞌe̱di po gä aseptahu̱ näꞌä rä gia rꞌakägihu̱ rä Zi Dada Jeoba po mäde de rä hnini ꞌne nuꞌu̱ yä ku xä hñutsꞌi ngu yä representante (Is. 32:​1, 2; Heb. 13:17). Näꞌä rä gia rꞌakägihu̱ rä Zi Dada Jeoba hindi faya, ꞌuegägihu̱ de yä peligro, ꞌne faxkägihu̱ pa gä yꞌohu̱ ha näꞌä rä ꞌñuu tsitsꞌi ha rä rꞌayꞌo xiꞌmhai habu̱ ma dä za gä ꞌmu̱ihu̱ pa nzäntho.