Rä Mäkä Tꞌofo mää ge rä Zi Dada Jeoba hää tsa dä bädi te ma dä thogi xudi ndämäni (Is. 45:21). Pe mähyoni gä benihu̱ ge rä Mäkä Tꞌofo hingi xikägihu̱ ndunthi yä detalle de hanja o hämꞌu̱ pädi te ma dä thogi xudi ndämäni. Nixi mää hängu desidi rä Zi Dada Jeoba dä bädi te ma dä thogi. Mäske hingi tsa gä pädihu̱ te gatꞌho o ha rä mfeni rä Zi Dada Jeoba, ja rꞌa yä tꞌo̱tꞌe nuꞌu̱ hää dä za gä pädihu̱.

Rä Zi Dada Jeoba tsa dä bädi te ma dä thogi xudi ndämäni, pe rꞌabu̱ desidi hindä bädi. Koꞌmu̱ rä Zi Dada Jeoba pe̱ꞌtsi gatꞌho rä mfädi, mu̱ dä ne, dä za dä bädi te gatꞌho ma dä thogi (Rom. 11:33). Pe koꞌmu̱ Jeoba pädi dä dominä xä ñho rä mfeni, tsa dä desidi hindä bädi rꞌa yä tꞌo̱tꞌe (hyandi ꞌnehe te mää Isaías 42:14).

Rä Zi Dada Jeoba tsa dä me̱fi gatꞌho näꞌä go dä ne. Kongehnä utkägi ge näꞌä tsa dä bädi te ma dä thogi xudi ndämäni. Isaías 46:10 enä: «Dende ri mu̱di Nuga di mää hanja ma dä uadi, ꞌne dende mäyaꞌmu̱ dä mää nuꞌu̱ yä tꞌo̱tꞌe tobe hinxä thogi. Nuga di enä: “Näꞌä xtä desidi gä pe̱fi geꞌä ma dä njabu̱, ꞌne ma gä pe̱fi gatꞌho näꞌä go di ne”».

Rä Zi Dada Jeoba tsa dä bädi te ma dä thogi ngeꞌä tsa dä me̱fi gatꞌho näꞌä go dä ne. Kongehnä hindi signifika ge rä Zi Dada Jeoba ꞌñenä go heti nꞌa rä libro ꞌnepu̱ xaꞌtsi yä nxii pa handi hanja huadi nunä libro. Hinä, hingi njabu̱. Rä Zi Dada Jeoba tsa dä huahni dende änte nꞌa rä fecha habu̱ ne dä thogi nꞌa rä tꞌo̱tꞌe. Xti datꞌi näꞌä fecha, japi dä thogi näꞌä ya xki mbeni (Éx. 9:​5, 6; Mat. 24:36; Hech. 17:31).

Po geꞌä ha rä Mäkä Tꞌofo di tinihu̱ hanja rä Zi Dada Jeoba rꞌabu̱ usa yä noya «dä hoki» o «dä forma» ꞌne rä noya «xtä beni» pa dä mää de nuꞌu̱ yä tꞌo̱tꞌe ma dä thogi mꞌe̱fa (2 Rey. 19:​25, ꞌne rä nota; Is. 46:11). Ha rä idioma hebreo dri usa nuya yä noya ora no̱ni nꞌa rä «hyokä xano» (Jer. 18:4). ¿Por hanja? Ngeꞌä ja ngu nꞌa rä hyokä xano tsa dä gu̱ rä bo̱hai pa dä umbäbi rä forma ꞌne dä hyoki nꞌa xano ja ngu go dä ne, njabu̱ ꞌnehe rä Zi Dada Jeoba tsa dä japäbi yä tꞌo̱tꞌe dä bo̱ni ja ngu xä beni (Efes. 1:11).

Rä Zi Dada Jeoba he̱gägihu̱ gä huahnise̱hu̱ te mä ꞌñuu di ne gä ju̱hu̱. Näꞌä hinxä hñutsꞌi ndaꞌä mä destinuhu̱, nixi japäbi yä jäꞌi dä me̱fi yä tsꞌo tꞌo̱tꞌe pa dä dagi ha yä xuñha. Pe hää utkägihu̱ ndaꞌä rä ꞌñuu xä ñho ꞌne he̱gi gä desidise̱hu̱ mu̱ di ne gä de̱nihu̱ näꞌä rä ꞌñuu utkägihu̱.

Ma gä handihu̱ yoho yä ejemplo habu̱ udi ge rä Zi Dada Jeoba hingo hutsꞌi mä destinuhu̱. Nꞌaa, ma gä ñähu̱ de nuꞌu̱ yä jäꞌi mi ꞌmu̱i ha rä hnini Nínive. Rä Zi Dada Jeoba bi mää ge ma xä huati näꞌä hniniꞌä ngeꞌä nuꞌu̱ yä jäꞌi mi ꞌmu̱hni xa myä tsꞌomꞌu̱i. Pe koꞌmu̱ nuꞌu̱ yä me Nínive bi arrepenti, rä Zi Dada Jeoba «bi yo mbeni ꞌne bi desidi ge ya hindä me̱mpäbi näꞌä rä kastigo xki mää» (Jon. 3:​1-10). Ja ngu di handihu̱, rä Zi Dada Jeoba bi paati näꞌä xki mbeni dä me̱fi. ¿Por hanja? Ngeꞌä yä me Nínive bi desidi bi jamäsu näꞌä xki mää rä Zi Dada Jeoba ꞌne bi paati yä mꞌu̱i.

Gehnä rä yoho rä ejemplo: dende änte rä Zi Dada Jeoba bi mää ge ma xä mꞌu̱i nꞌa rä jäꞌi rä thuhu Ciro näꞌä ma xä hye̱gi libre yä judío ꞌne ge ma xä mända dä thokuäbi mänꞌaki rä templo rä Zi Dada Jeoba (Is. 44:26–45:4). ꞌNe geꞌä bi thogi: bi mꞌu̱i nꞌa rä rey mrä thuhu Ciro de rä dähni Persia näꞌä bi me̱fi ja ngu xki mängä rä Zi Dada Jeoba (Esd. 1:​1-4). Mäske rä Zi Dada Jeoba xä za xä obligabi rä rey Ciro xä xo̱kämbenibi ꞌne xä me̱päbi, rä Zi Dada Jeoba bi hye̱gi nunä rey dä desidise̱ toꞌo mi ne dä xo̱kämbeni. Ciro nunka bi xo̱kämbeni rä Zi Dada Jeoba. Pe mäske njabu̱, Jeoba bi usa nunä rey pa bi kumpli rä bolunta (Prov. 21:1).

Xtä handihu̱ ho̱nse̱ nꞌa zi tu̱i de näꞌä o̱tꞌe ngue̱nda rä Zi Dada Jeoba ora mää te ma dä thogi xudi ndämäni. Pe ja mä ndunthi, ꞌne yä jäꞌi nunka ma dä za dä ntiende gatꞌho näꞌä rä mfädi ꞌne rä tsꞌe̱di pe̱ꞌtsi rä Zi Dada Jeoba, nixi hanja di ja pa dä bädi te ma dä thogi mꞌe̱fa (Is. 55:​8, 9). Pe ko näꞌä ya xtä pädihu̱ de rä Zi Dada Jeoba, dä za gä mꞌu̱ihu̱ seguro ge näꞌä nzäntho pe̱fi näꞌä xä ñho, asta ora desidi dä bädi te ma dä thogi xudi ndämäni.