Pa gä johyabihu̱ rä koraso rä Zi Dada Jeoba, mähyoni gä pe̱ꞌspäbihu̱ rä jamfri ꞌne rä komfiansa. Pe rä Mäkä Tꞌofo mää ge «hingä gatꞌho pe̱ꞌtsä rä jamfri» (2 Tes. 3:2). Nuꞌmu̱ rä apostol Pablo bi mängä nuya yä noya, mi referi nuꞌu̱ yä bo̱ka jäꞌi mi honi hanja dä yꞌo̱tpäbi «yä ntsꞌomꞌu̱i» rä apostol Pablo. Pe gatꞌho yä jäꞌi debe dä jamäsu nuya yä noya ora bi ꞌñenä «hingä gatꞌho pe̱ꞌtsä rä jamfri». ¿Por hanja? Ngeꞌä mäpaya, ndunthi yä jäꞌi hingi ne dä asepta nuꞌu̱ yä prueba udi ge Äjuä mäjuäni ꞌmu̱i ꞌne ge go geꞌä bi hyoki gatꞌho yä tꞌo̱tꞌe tanto ha mähetsꞌi ngu ha rä Xiꞌmhai (Rom. 1:20). Märꞌa yä jäꞌi ho̱nse̱ enä: «Zäi ge ꞌmu̱i toꞌo mänꞌa pe̱ꞌtsi rä tsꞌe̱di ke yä mexiꞌmhai». Pe hingä geꞌä rä jamfri adi rä Zi Dada Jeoba gä pe̱ꞌtsihu̱ pa gä johyabihu̱ rä koraso.

Pa gä johyabihu̱ rä koraso rä Zi Dada Jeoba, mähyoni ge hinte mä duda gä pe̱ꞌtsihu̱ ge hää mäjuäni ꞌmu̱i ꞌne ge ma dä umbäbi nꞌa rä njutꞌi nuꞌu̱ kamfri ꞌne pe̱ꞌspäbi rä komfiansa ko ngatꞌho yä koraso (Heb. 11:6). Pe dä za gä pe̱ꞌspäbihu̱ rä jamfri ꞌne rä komfiansa Äjuä, ho̱nse̱ mu̱ di pe̱ꞌtsihu̱ rä mäkä tsꞌe̱di o espiritu santo rä Zi Dada Jeoba. Hänge xa mähyoni gä xatuäbihu̱ ꞌne gä apäbihu̱ ge dä rꞌakägihu̱ rä espiritu santo (Luc. 11:​9, 10, 13). Pa gä pe̱ꞌtsihu̱ rä espiritu santo rä Zi Dada Jeoba, xa mähyoni ge ꞌnehe gä nxadihu̱ rä Mäkä Tꞌofo ꞌne gä pe̱fihu̱ ha mä bidahu̱ näꞌä utkägihu̱. Njabu̱, rä espiritu santo rä Zi Dada Jeoba, ma dä gia mä bidahu̱ ꞌne ma dä maxkägihu̱ gä pe̱ꞌtsihu̱ nꞌa rä däta jamfri.