1, 2. ¿Te mä imbitasio rꞌakägihu̱ rä Zi Dada Jeoba?

 XI NUꞌI, ¿hanja gi handi rä Zi Dada Jeoba? Zäi ge gi enä: «Pa geki, rä Zi Dada Jeoba geꞌä mä Dada, mä Äjuä ꞌne mä Amigo». O tal vez ma gi usa märꞌa yä noya pa gi mää te di signifika rä Zi Dada Jeoba pa geꞌi. Pe, ¿xkä handi nꞌa rä pa rä Zi Dada Jeoba ngu rä dueñu de nꞌa rä nguu habu̱ xä mbitaꞌi gi mꞌu̱i?

² Rä rey David bi ꞌñenä ge näꞌä rä amista pe̱ꞌtsi rä Zi Dada Jeoba ko ngatꞌho nuꞌu̱ yä jäꞌi pe̱päbi, ꞌñenä näꞌä rä hogä amista pe̱ꞌtsi nꞌa rä jäꞌi ko nuꞌu̱ yä amigo xä mbitabi ha rä nguu. Rä rey David bi ꞌñenä: «Oh Jeoba, ¿toꞌo dä za dä mꞌu̱i ha ri nguu? ¿Toꞌo ma dä za dä mꞌu̱i ha ri mäkä tꞌo̱ho̱?» (Sal. 15:1). Nuya yä noya utkägihu̱ ge rä Zi Dada Jeoba dä za dä yꞌo̱tꞌägihu̱ yä amigo. Hää, ¡ꞌñenä go di mbitagihu̱ gä ꞌmu̱ihu̱ ha rä nguu! ¿Hänge xa mähotho nunä imbitasio rꞌakägihu̱ rä Zi Dada Jeoba?

JEOBA DI MBITAGIHU̱ GÄ ꞌMU̱IHU̱ HA RÄ NGUU

3. ¿Toꞌo näꞌä rä mu̱di imbitado bi me̱ꞌtsi rä Zi Dada Jeoba ꞌne te mi senti tanto nꞌaa ngu mä nꞌaa?

³ Änte de dä hyoki gatꞌho yä tꞌo̱tꞌe, rä Zi Dada Jeoba mi ꞌmu̱se̱. Pe mꞌe̱fa bi me̱ꞌtsi näꞌä rä mu̱di imbitado. ¿Toꞌoꞌä? Rä Tꞌu̱. ¿Dä za gi imäjinä hängu rä johya bi umbäbi rä Zi Dada Jeoba? Rä Mäkä Tꞌofo enä ge «kada nꞌa rä pa mi thogi» rä Zi Dada Jeoba «xa mi umbäbi rä johya» ora mi handi näꞌä rä imbitado. ꞌNehe, näꞌä rä imbitado hyaxtho xa mi johya ngeꞌä mi ꞌmu̱i Kongeꞌä (Prov. 8:30).

4. ¿Toꞌo märꞌa bi mbitabi rä Zi Dada Jeoba ha rä nguu?

⁴ Mꞌe̱fa, rä Zi Dada Jeoba bi hyoki yä e̱nxe̱ ꞌne bi mbitabi dä mꞌu̱i Kongeꞌä. Jeoba embäbi nuyu̱ yä e̱nxe̱ «yä tꞌu̱ Äjuä» ꞌne rä Mäkä Tꞌofo udi ge nuyu̱ ꞌmu̱i ko ndunthi rä johya ngeꞌä ꞌmu̱i ha rä lado rä Zi Dada Jeoba (Job 38:7; Dan. 7:10). Po ndunthi yä nthebetho yä je̱ya, rä Zi Dada Jeoba bi ñꞌamigoui ho̱nse̱ nuꞌu̱ mi ꞌmu̱i ha mähetsꞌi. Pe mꞌe̱fa, ꞌnehe bi hyoki yä jäꞌi ꞌne bi yꞌo̱tꞌe yä  amigo. Hää, ꞌñenä go bi mbitabi ꞌnehe dä mꞌu̱i ha rä nguu. Enoc, Noé, Abrahán ꞌne Job, geꞌu̱ rꞌa de nuꞌu̱ yä imbitado. Rä Mäkä Tꞌofo udi ge nuyu̱ yä jäꞌi bi ñꞌo mänjuäntho ha rä ꞌñuu rä Zi Dada Jeoba, hänge näꞌä bi hyandi ngu yä amigo (Gén. 5:24; 6:9; Job 29:4; Is. 41:8).

5. ¿Te utkägihu̱ nuꞌu̱ yä noya hutsꞌi ha Ezequiel 37:​26, 27?

⁵ Durante yä nthebetho yä je̱ya, rä Zi Dada Jeoba xä sigi xä mbitabi ha rä nguu nuꞌu̱ yä amigo. Geꞌä bi mää rä profeta Ezequiel ge ma xä thogi (hñeti Ezequiel 37:​26, 27). Näꞌä bi yꞌofo rä profeta Ezequiel, udi ge Äjuä ja ndunthi rä ganä dä me̱ꞌtsi nꞌa rä hogä amista ko nuꞌu̱ yä jäꞌi pe̱päbi. Rä Zi Dada Jeoba bi promete dä «ja nꞌa rä kohi de nꞌa rä mꞌu̱i temäꞌentho». Nunä mꞌu̱i temäꞌentho ma xä nheki ora tanto nuꞌu̱ to̱ꞌmi dä mꞌu̱i ha mähetsꞌi ngu nuꞌu̱ to̱ꞌmi dä mꞌu̱i ha rä Xiꞌmhai, ma dä mꞌu̱i unido ngu «nꞌadä rä taxo» mbo ha rä ngu rä Zi Dada Jeoba (Juan 10:16). Hää, näꞌä bi yꞌofo rä profeta Ezequiel, ¡di kumpli mäpaya!

MIENTRA HINGÄ PO̱ÑHU̱ DE RÄ NGU RÄ ZI DADA JEOBA, NÄꞌÄ NZÄNTHO MA DÄ SUGÄGIHU̱

6. ¿Hämꞌu̱ di ku̱tꞌihu̱ ha rä ngu rä Zi Dada Jeoba ꞌne habu̱ bi jaꞌä?

⁶ Mäyaꞌmu̱, mäske nꞌa rä nguu xki thoki de gä tela, mi nꞌa rä luga habu̱ mi tsa toꞌo dä ntsaya ꞌne dä ntaki de rä Hyadi, rä tse̱ o de yä bu̱nthi. Ora nꞌa rä jäꞌi mi pe̱ꞌtsi nꞌa rä imbitado ha rä nguu, mi su ꞌne mi atiende xä ñho. Njabu̱, näꞌä imbitado mi tsaya xä ñho ꞌne hinte mi tupäbi rä mu̱i. Njabu̱ ꞌnehe mäpaya, nꞌa rä jäꞌi ku̱tꞌi ha rä ngu rä Zi Dada Jeoba ngu nꞌa rä imbitado dende näꞌä rä ora umbäbi rä te pa dä me̱päbi rä bolunta (Sal. 61:4). Nuju̱ ya xtä ku̱tꞌihu̱ ha rä ngu rä Zi Dada Jeoba, di handihu̱ hängu sugägihu̱. Rꞌakägihu̱ ndunthi rä ñhuni näꞌä bi ehe de rä Noya ꞌne di pe̱ꞌtsihu̱ nꞌa rä hogä amista ko nuꞌu̱ märꞌa yä imbitado. Pe, ¿habu̱ ja nunä rä ngu rä Zi Dada Jeoba? Hingi ja ha nꞌadä rä luga. Sino ja po gatꞌho rä Xiꞌmhai habu̱ ꞌmu̱i nuꞌu̱ yä jäꞌi o̱te ꞌne pe̱päbi. Geꞌä xä hyandi gatꞌho nuꞌu̱ yä ku xä ma ha märꞌa yä dähni pa xä ntini ha nꞌa rä däta mhuntsꞌi. Ha nuya yä däta mhuntsꞌi xä konose märꞌa yä ku nuꞌu̱ ꞌñenä go ꞌmu̱i ha rä ngu rä Zi Dada Jeoba ngeꞌä xä ꞌueke yä bida pa dä me̱päbi (Apoc. 21:3).

7. Ndunthi de nuꞌu̱ bi me̱päbi rä Zi Dada Jeoba ya xä du. Pe, ¿por hanja dä za gä mäñhu̱ ge nuꞌu̱ tobe ꞌmu̱itho ha rä ngu rä Zi Dada Jeoba? (Hyandi ꞌnehe rä foto).

⁷ Pe xi nuꞌu̱ bi me̱päbi rä Zi Dada Jeoba ꞌne ya bi du, ¿sigi ꞌmu̱i ha rä ngu rä Zi Dada Jeoba? Hää. ¿Por hanja di mäñhu̱ njabu̱? Ngeꞌä rä Mäkä Tꞌofo udi ge rä Zi Dada Jeoba hinxä pumfri nuꞌu̱ yä amigo xä du. Rä Hesu bi ꞌñenä: «Nuꞌu̱ xä du, hää ma dä nuhu de rä du. ꞌNe asta Moisés  bi mää ora bi mede hanja nꞌa rä ꞌmai ꞌmini bi nzo̱o̱ nuꞌmu̱ bi ꞌñembäbi rä Zi Dada Jeoba “rä Zi Dada de Abrahán, rä Zi Dada de Isaac ꞌne rä Zi Dada de Jacob”. Näꞌä nꞌa rä Zi Dada de nuꞌu̱ te, hingä de nuꞌu̱ xä du. Ngeꞌä pa Geꞌä, ꞌñenä tobe tetho gatꞌhoꞌu̱» (Luc. 20:​37, 38, TNM).

TE MÄ BENEFISIO ꞌNE TE MÄ RESPONSABILIDA DI PE̱ꞌTSIHU̱

8. ¿Te mä benefisio di hänihu̱ ora di ꞌmu̱ihu̱ mbo rä ngu rä Zi Dada Jeoba?

⁸ Ora di ꞌmu̱ihu̱ mbo ha nꞌa rä nguu, di ntakihu̱ de rä Hyadi, de rä tse̱, de yä bu̱nthi ꞌne de märꞌa yä peligro. Njabu̱ ꞌnehe, ora di ꞌmu̱ihu̱ mbo ha rä ngu rä Zi Dada Jeoba, di ntakihu̱ de nuꞌu̱ yä tꞌo̱tꞌe dä za dä tsꞌoni näꞌä rä amista di pe̱ꞌtsihu̱ ko rä Zi Dada Jeoba. ꞌNehe, ora di ꞌmu̱ihu̱ mbo ha rä ngu rä Zi Dada Jeoba, rꞌakägihu̱ nꞌa rä humu̱i. Mu̱ gä ꞌmu̱ihu̱ mbo ha rä ngu rä Zi Dada Jeoba, rä Zithu hinte dä za dä yꞌo̱tkägihu̱ (Sal. 31:23; 1 Juan 3:8). Ha rä Paraiso, rä Zi Dada Jeoba ma dä sigi dä sugägihu̱ ꞌne hingä ma dä hyopäbi ge yä tsꞌo tꞌo̱tꞌe dä tsꞌoni näꞌä rä ntsitsꞌi di pe̱ꞌtsihu̱ Kongeꞌä. ꞌNehe, rä Zi Dada Jeoba ma dä hñäki asta rä du (Apoc. 21:4).

9. ¿Hanja to̱ꞌmi rä Zi Dada Jeoba gä portahu̱ ha rä nguu?

⁹ Gä pe̱ꞌtsihu̱ nꞌa rä hogä amista ko rä Zi Dada Jeoba ꞌne gä ꞌmu̱ihu̱ ha rä nguu, xi nꞌa rä däta nsu näꞌä di pe̱ꞌtsihu̱. Pe, ¿te di debe gä pe̱fihu̱ mu̱ di ne gä sigihu̱ gä ꞌmu̱ihu̱ mbo ha rä ngu rä Zi Dada Jeoba ngu yä imbitado? Por ejemplo, mu̱ nuꞌi gi mbitabi nꞌa rä jäꞌi pa dä mꞌu̱i ha ri nguu, zäi ge gi to̱ꞌmi ge näꞌä ri imbitado dä porta xä ñho. Njabu̱ ꞌnehe rä Zi Dada Jeoba; ora di mbitagihu̱ pa gä ꞌmu̱ihu̱ ha rä nguu, näꞌä to̱ꞌmi ge nuju̱ gä o̱thu̱ ntsꞌe̱di po gä portahu̱ xä ñho. Otho rä duda ge nuju̱ xa di mädihu̱ rä Zi Dada Jeoba, hänge di o̱thu̱ ntsꞌe̱di po gä pe̱fihu̱ gatꞌho näꞌä di hoꞌä (Col. 1:10). Mäjuäni ge rä Zi Dada Jeoba näꞌä mä amigohu̱. Pe hindi debe gä pumfrihu̱ ge näꞌä mä Dadahu̱ ꞌne mä Äjuähu̱. Po rängeꞌä ri ꞌñepäbi gä umbäbihu̱ gatꞌho näꞌä rä tꞌekꞌei di meresebi (Sal. 25:14). Hää, nunka di debe gä pumfrihu̱ toꞌo rä Zi Dada Jeoba. Mu̱ gä pe̱ꞌspäbihu̱ ndunthi rä mhäte ꞌne rä tꞌekꞌei, geꞌä ma dä maxkägihu̱ pa hingä pe̱fihu̱ nꞌa rä tꞌo̱tꞌe näꞌä ma dä u̱mbäbi rä mfeni. ꞌNehe, näꞌä rä mhäte ꞌne rä tꞌekꞌei di pe̱ꞌspäbihu̱, geꞌä ma dä maxkägihu̱ pa gä ñꞌumildehu̱, gä o̱tehu̱ ꞌne hingä yꞌohu̱ de gä ꞌñexmänsu (Miq. 6:8).

JEOBA BI SU ꞌNE BI TRATA MÄHYE̱GI YÄ ISRAELITA

10, 11. ¿Te dä za gä pädihu̱ de rä Zi Dada Jeoba ora di handihu̱ hanja bi trata yä israelita nuꞌmu̱ bi ñꞌo ha yä yꞌotꞌä hai?

¹⁰ Rä Zi Dada Jeoba di su ꞌne di numäñho gatꞌho nuꞌu̱ yä imbitado ꞌmu̱i ha rä nguu (Rom. 2:11). Geꞌä di handihu̱ po näꞌä rä modo hanja rä Zi Dada Jeoba bi trata yä israelita durante näꞌä rä tiempo bi ñꞌo ha yä yꞌotꞌä hai.

¹¹ Mꞌe̱fa de bi gu̱ki yä israelita de Egipto, rä Zi Dada Jeoba bi hñutsꞌi yä majhä pa go geꞌu̱ dä atiende näꞌä rä jäꞌtsi de gä mhuntsꞌi mi fädi ngu rä tabernáculo. ꞌNehe, bi nkargobi yä levita nuꞌu̱ märꞌa yä ꞌme̱fi mi ja ha näꞌä rä jäꞌtsi de gä mhuntsꞌi. Pe xi rä Zi Dada Jeoba, ¿toꞌo gi kamfri ge mänꞌa mi su ꞌne mi trata xä ñho? ¿Nuꞌu̱ mi faxte ha rä tabernáculo o nuꞌu̱ mi ꞌmu̱i getbu̱ de gehni? Rä Zi Dada Jeoba mi jamäsu ꞌne mi trata xä ñho gatꞌho.

12. ¿Hanja bi trata rä Zi Dada Jeoba yä israelita nuꞌmu̱ bi ñꞌo ha yä yꞌotꞌä hai? (Éxodo 40:38; hyandi ꞌnehe yä foto).

¹² Kada nꞌa rä israelita mi pe̱ꞌtsi rä oportunida de dä me̱ꞌtsi nꞌa rä hogä amista ko rä Zi Dada Jeoba, himi mporta te mä nsu mi pe̱ꞌtsi, mu̱ mi faxte mbo ha rä tabernáculo o mi ꞌmu̱i getbu̱ de gehni. Por ejemplo, ora rä Zi Dada Jeoba mi pe̱hni nꞌa rä gui de gä pa ꞌne nꞌa rä tsibi de gä xui, hingä ho̱nse̱ nꞌa hängutho mi tsa dä hyandi, sino ke gatꞌho rä hnini mi tsa dä hyandi  (hñeti Éxodo 40:38). Njabu̱, ora mi nju̱tsꞌi näꞌä guiꞌä, gatꞌho yä israelita —asta nuꞌu̱ mi ꞌmu̱i tsꞌu̱ zi yabu̱ de näꞌä rä jäꞌtsi de gä mhuntsꞌi o tabernáculo— mi tsa dä hyandi näꞌä guiꞌä ꞌne mi ntiende ge näꞌä oraꞌä mi debe dä gu̱tsꞌi gatꞌho yä kosa, dä xu̱ꞌti nuꞌu̱ yä nguu ꞌne dä de̱ni näꞌä guiꞌä (Núm. 9:​15-23). Pe änte de geꞌä, mꞌe̱tꞌo mi ꞌmistꞌi yoho yä corneta de gä plata. Mi geꞌä nꞌa rä anunsio näꞌä mi udi ge näꞌä oraꞌä, mi debe dä nju̱tsꞌi gatꞌho pa dä ma. Nunä anunsio himi o̱de ho̱nse̱ nꞌa hängutho, sino ke kada nꞌa rä israelita mi tsa dä yꞌo̱de (Núm. 10:2). Ja ngu di handihu̱, mu̱ mi ꞌmu̱i getbu̱ de näꞌä rä jäꞌtsi de gä mhuntsꞌi o tabernáculo, hindi signifika ge rä Zi Dada Jeoba mänꞌa mi numäñho ke nuꞌu̱ mi ꞌmu̱i tsꞌu̱ zi yabu̱. Sino ke gatꞌho nuꞌu̱ mi o mbo ha rä hnini, mi tsa dä me̱ꞌtsi nꞌa rä hogä amista ko rä Zi Dada Jeoba. Hää, nuꞌu̱ yä jäꞌiꞌu̱ ꞌñenä go mi ꞌmu̱i mbo rä ngu rä Zi Dada Jeoba ꞌne näꞌä mi nkargo de dä su ꞌne dä umbäbi näꞌä mi japäbi mꞌe̱di. Njabu̱ ꞌnehe mäpaya, hindi mporta habu̱ di ꞌmu̱ihu̱, rä Zi Dada Jeoba xa di mäkägihu̱, di sugägihu̱ ꞌne rꞌakägihu̱ näꞌä jakägihu̱ mꞌe̱di.

MÄPAYA, JEOBA DI MÄDI ꞌNE DI JAMÄSU GATꞌHO YÄ AMIGO

13. ¿Hanja udi mäpaya rä Zi Dada Jeoba ge di mädi ꞌne di jamäsu gatꞌho yä amigo?

¹³ Mäpaya, rꞌa yä testigo rä Jeoba ꞌmu̱i getbu̱ de habu̱ ꞌmu̱i rä Cuerpo Gobernante o getbu̱ de habu̱ ja nꞌa rä ngu Betel. Märꞌaa ꞌmu̱i ha nuya yä luga, ꞌne pe̱ꞌtsi rä oportunida de dä mfaxte ko nuꞌu̱ yä ꞌme̱fi di tꞌo̱tꞌeni. ꞌNehe, pe̱ꞌtsi rä oportunida de dä konose nuꞌu̱ yä ku gu̱tꞌi rä ꞌñuu ha rä hnini rä Zi Dada Jeoba. Märꞌaa xä ꞌueke mäxo̱ge de yä tiempo pa pe̱päbi rä Zi Dada Jeoba, ngu yä superintendente de gä circuito o pa di ja nuꞌu̱ märꞌa yä ꞌme̱fi di tꞌo̱tꞌe ha rä hnini rä Zi Dada Jeoba. Pe kasi gatꞌho märꞌa yä ku, hingi tsa dä umbäbi mäxo̱ge de rä tiempo rä Zi Dada Jeoba pa dä me̱päbi. Mu̱ geꞌä gi thogi, ogi turimu̱i. Rä Zi Dada Jeoba di balora näꞌä gi umbäbi ꞌne xa di numäñhoꞌi ngu nꞌa rä imbitado ha rä nguu. ꞌNehe ꞌmu̱i dispuesto dä jamäsuꞌi ꞌne rä rꞌaꞌi näꞌä di jaꞌi mꞌe̱di (1 Ped. 5:7). Hää, rä Zi Dada Jeoba xa di mäꞌi ꞌne ma dä rꞌaꞌi gatꞌho näꞌä rä ñhuni bi ehe de rä Noya, ma dä rꞌaꞌi näꞌä rä  gia gi honi ꞌne ma dä jamäsuꞌi ja ngu di jamäsu gatꞌho yä amigo.

14. ¿Ndaꞌä mä nꞌa rä forma de hanja udi rä Zi Dada Jeoba ge hingi huahnitho toꞌo dä yꞌo̱tꞌe rä amigo ꞌne dä mbitabi ha rä nguu?

¹⁴ Rä Zi Dada Jeoba udi ge ꞌnehe hingi huahnitho toꞌo dä yꞌo̱tꞌe yä amigo. ¿Hanja di mäñhu̱ njabu̱? Ngeꞌä rä Zi Dada Jeoba xä nkargo de dä japäbi dä zo̱ni rä Mäkä Tꞌofo po gatꞌho rä Xiꞌmhai. Nuꞌu̱ yä mu̱di Mäkä Tꞌofo bi thoki, bi tꞌofo ha rä idioma hebreo, arameo ꞌne griego. ¿Signifika ge nuꞌu̱ heti rä Mäkä Tꞌofo ha nuya yä idioma, geꞌu̱ mänꞌa pe̱ꞌtsi nꞌa rä hogä ntsitsꞌi ko rä Zi Dada Jeoba? Hinä (Mat. 11:25).

15. ¿Ndaꞌä mä nꞌa rä prueba di pe̱ꞌtsihu̱ näꞌä udi ge rä Zi Dada Jeoba hingi huahnitho toꞌo dä yꞌo̱tꞌe yä amigo? (Hyandi ꞌnehe yä foto).

¹⁵ ¿Toꞌo di huahni rä Zi Dada Jeoba pa dä yꞌo̱tꞌe yä amigo? ¿Nuꞌu̱ xä estudia ha yä däta ngunsadi o ha yä universidad? ¿Nuꞌu̱ pädi dä ñä rä hebreo, rä arameo ꞌne rä griego ngeꞌä gehya yä idioma bi tꞌofo nuꞌu̱ yä mu̱di Mäkä Tꞌofo? Hinä. Rä Zi Dada Jeoba xä japäbi dä tꞌofo rä Mäkä Tꞌofo ha yä mꞌotho yä idioma, pa njabu̱ gatꞌho yä jäꞌi dä me̱ꞌtsä rä oportunida de dä ntiende te udi rä Mäkä Tꞌofo ꞌne njabu̱ dä me̱ꞌtsi nꞌa rä hogä amista ko rä Zi Dada Jeoba (2 Tim. 3:​16, 17).

MA GÄ SIGI GÄ ꞌMU̱IHU̱ MBO HA RÄ NGU RÄ ZI DADA JEOBA

16. ¿Toꞌo di asepta rä Zi Dada Jeoba ha rä nguu? (Hechos 10:​34, 35).

¹⁶ Otho mä nꞌa rä däta nsu ngu näꞌä xä rꞌakägihu̱ rä Zi Dada Jeoba de gä ꞌmu̱ihu̱ mbo ha rä nguu de gä imbitado. Näꞌä rä ñhojäꞌi, rä mhäte ꞌne rä tsaya rꞌakägihu̱ mismo rä Zi Dada Jeoba ha rä nguu, hindi tinihu̱ ha mä nꞌa rä luga. Rä Zi Dada Jeoba di resibi gatꞌho ko ndunthi rä mhäte, hindi mporta habu̱ yä mengu, ua yä riko o yä hyoya, mu̱ yä ꞌme̱hñä o yä ñꞌo̱ho̱, nixi di mporta habu̱ yä mengu, yä rasa, o te mä idioma ñä. Rä Zi Dada Jeoba ho̱nse̱ adi ge gä pe̱ꞌspäbihu̱ ndunthi rä tꞌekꞌei, tanto Nuꞌä ngu nuꞌu̱ yä mhända (hñeti Hechos 10:​34, 35, TNM).

17. ¿Te ma gä pädihu̱ ha näꞌä rä ntꞌudi xä ꞌñepu̱?

¹⁷ Ha rä Salmo 15:1 di handihu̱ hanja rä rey David bi yꞌo̱tꞌe nuya yä ntꞌani ꞌne bi ꞌñenä: «Oh Jeoba, ¿toꞌo dä za dä mꞌu̱i ha ri nguu? ¿Toꞌo ma dä za dä mꞌu̱i ha ri mäkä tꞌo̱ho̱?». Rä Zi Dada Jeoba bi usa rä rey David pa bi dädise̱ nuya yä ntꞌani. Ha näꞌä Rä ntꞌudi pa gä nxadihu̱ 24, ma gä pädihu̱ te mä rekisito adi rä Zi Dada Jeoba pa dä sigi dä nugägihu̱ ngu yä imbitado ha rä nguu.