1, 2. a) ¿Te di handihu̱ ge thogi ora nꞌa rä jäꞌi di nxixtehe ngu rä testigo rä Jeoba? b) ¿Te ma gä handihu̱?

 HA NꞌA rä däta mhuntsꞌi, ¿xkä handi hanja thädi nuꞌu̱ ma dä nxixtehe ora näꞌä rä ku uni rä discurso o̱tpäbi yä ntꞌani? Di ntꞌo̱de ge hinte mä duda pe̱ꞌtsi. Nuꞌu̱ yä familia ꞌne yä amigo xa di johya. ꞌNe ora po̱ni de rä dehe, hingi tsa dä ꞌñägi näꞌä rä johya di senti ꞌne di ntꞌo̱de yä ꞌme̱tꞌye̱. Tatꞌä semänä di nxixtehe yä mꞌotho yä jäꞌi nuꞌu̱ ne dä fädi ngu yä testigo rä Jeoba.

² Ora nꞌa rä jäꞌi ne dä nxixtehe, signifika ge honi rä Zi Dada Jeoba. Ante yä da rä Zi Dada Jeoba, nunä jäꞌi ꞌñenä di hue̱xki ha nunä xiꞌmhai habu̱ xä ñudi rä ꞌme̱xui (Sal. 14:1, 2). Nunä imformäsio xä thoki tanto pa yä bäsjäꞌi ngu yä däta jäꞌi. Ha nunä ntꞌudi ma gä nxadihu̱, ma gä handihu̱ hñuu de nuꞌu̱ yä däta raso di pe̱ꞌtsihu̱ pa gä pe̱päbihu̱ rä Zi Dada Jeoba. Nunä imformäsio ꞌnehe ma dä maxkägihu̱ nuju̱ ya xtä nxixtehehu̱, pa njabu̱ gä sigihu̱ gä nehu̱ gä pe̱päbihu̱ rä Zi Dada Jeoba pa nzäntho.

3. ¿Por hanja nuju̱ di pe̱päbihu̱ Jeoba di mädihu̱ näꞌä mäjuäni ꞌne näꞌä xä ñho ante yä da? (Salmo 119:128, 163).

³ Rä Zi Dada Jeoba bi mändabi rä hnini ge dä mädi näꞌä mäjuäni (Zac. 8:19). Rä Hesu ꞌnehe bi mändabi nuꞌu̱ yä de̱ni ge dä mädi rä justisia (Mat. 5:6). Signifika ge di debe gä nehu̱ ko ngatꞌho mä korasohu̱ gä pe̱fihu̱ näꞌä ri ꞌñehe, näꞌä xä ñho ꞌne näꞌä xä ntꞌaxi ante yä da Äjuä. Xi nuꞌi, ¿gi mädi näꞌä mäjuäni ꞌne näꞌä xä ñho ante yä da Jeoba? Di pädihe ge hää. Po rängeꞌä gi u̱tsa nuꞌu̱ yä nkꞌuamba, näꞌä hingä mäjuäni ꞌne gatꞌho nuꞌu̱ yä tꞌo̱tꞌe xä ntsꞌo (hñeti Salmo 119:128, 163). Toꞌo mängä yä nhemhñä o nkꞌuamba di de̱mbäbi rä mꞌu̱i rä Zithu, näꞌä rä gobernante de nunä rä xiꞌmhai (Juan 8:44; 12:31). Rä Zithu honi hanja dä tsꞌombäbi rä thuhu rä Zi Dada Jeoba. Dende nuꞌmu̱ Adán ꞌne Eva bi mꞌu̱i ha rä jardin de Edén, rä Zithu bi gu̱ꞌspäbi yä nkꞌuamba  rä Zi Dada Jeoba. Bi japäbi dä mbeni Adán ꞌne Eva ge rä Zi Dada Jeoba, Näꞌä nꞌa rä kꞌuamba ꞌne nꞌa rä egoista gobernante (Gén. 3:1, 4, 5). Nubye̱ ndunthi yä jäꞌi hingi numäñho rä Zi Dada Jeoba po nuꞌu̱ yä kꞌuamba bi mää rä Zithu. ¿Pe gi pädi? Ora yä jäꞌi hingi mädi näꞌä mäjuäni, rä Zithu di johya ꞌne dä za dä japäbi nuꞌu̱ yä jäꞌi dä me̱fi yä injustisia ꞌne märꞌa yä tsꞌo tꞌo̱tꞌe (Rom. 1:25-31).

4. ¿Hanja xä ꞌñudi Jeoba ge näꞌä nꞌa rä Zi Dada de näꞌä mäjuäni? (Hyandi ꞌnehe rä foto).

⁴ Jeoba näꞌä nꞌa rä Zi Dada de näꞌä mäjuäni ꞌne hingi yꞌu̱ya dä ꞌñuti nuꞌu̱ yä amigo (Sal. 31:5). Njabu̱ xokuäbi yä da ꞌne nuꞌu̱ di xotꞌi de nuꞌu̱ yä nkꞌuamba xä ꞌñudi rä Zithu. Rä Zi Dada Jeoba uti nuꞌu̱ yä amigo dä ñꞌonrado ꞌne dä mädi rä justisia pa njabu̱ nuyu̱ dä me̱ꞌtsi nꞌa rä mꞌu̱i temäꞌentho (Prov. 13:5, 6). ¿Xä thogi njabu̱ ha ri mꞌu̱i dende nuꞌmu̱ gä fu̱di gä nxadi rä Noya Äjuä? Nuꞌi ya xkä pädi ge joꞌo mä nꞌa toꞌo dä ꞌñutkägihu̱ hanja gä ꞌmu̱ihu̱ xä ñho ja ngu utkägihu̱ rä Zi Dada Jeoba (Sal. 77:13). Hänge zäi ge po geꞌä gi ne gi pe̱fi nuꞌu̱ yä tsꞌofo ꞌne nuꞌu̱ yä mhända rꞌakägihu̱ (Mat. 6:33). ꞌNehe, zäi ge gi ne gi defende näꞌä mäjuäni ꞌne gi ꞌñudi ge gatꞌho näꞌä xä mängä rä Zithu kontra rä Zi Dada Jeoba, hingä mäjuäni. Pe, ¿xi hanja dä za gi logra gi pe̱fi njabu̱?

5. ¿Te dä za gi pe̱fi pa njabu̱ gi ꞌñudi ge gi defende näꞌä mäjuäni ꞌne näꞌä xä ñho ante yä da Jeoba?

⁵ Mu̱ ma gi usa ri te pa gi ꞌmu̱i ja ngu di ho rä Zi Dada Jeoba, ma gi ꞌñudi ge gi rechaza nuꞌu̱ yä nkꞌuamba xä mängä rä Zithu, ma gi ꞌñudi ge gi defende näꞌä mäjuäni, ge gi handi Jeoba ngu ri Gobernante ꞌne ge gi ꞌmu̱i dispuesto gi pe̱fi näꞌä di mända. Pa gi ꞌñudi ge gi pe̱fi njabu̱, mähyoni gi ja nꞌa rä sadi ꞌne gi xipäbi rä Zi Dada Jeoba ge gi umbäbi ri bida pa gi pe̱päbi rä bolunta. ꞌNepu̱ mähyoni ge ante märꞌaa gi nxixtehe. Hää, näꞌä rä mhäte gi senti po näꞌä mäjuäni ꞌne po näꞌä xä ñho ante yä da Jeoba, geꞌä ma dä jaꞌäꞌi gi ne gi nxixtehe.

6. Ja ngu di handihu̱ ha rä Salmo 45:4, ¿te mä däta raso di pe̱ꞌtsihu̱ pa gä mädihu̱ Ñhesukristo?

⁶ ¿Por hanja gi mädi Ñhesukristo? Rä Biblia rꞌakägihu̱ yä däta raso (hñeti Salmo 45:4). Rä Hesu di defende näꞌä mäjuäni, u̱tsa rä ntꞌexmänsu ꞌne mädi näꞌä xä ñho ante yä da Jeoba. Po geꞌä, gi mädi rä Hesu ngeꞌä nuꞌi ꞌnehe gi mädi näꞌä mäjuäni ꞌne näꞌä xä ñho ante yä da Jeoba. Por ejemplo, rä Biblia udi hanja rä Hesu bi gu̱ rä balo ꞌne himbi ntsu pa bi defende näꞌä mäjuäni ꞌne näꞌä xä ñho ante yä da Jeoba (Juan 18:37). Pe nubye̱, ma gä handihu̱ hanja rä Hesu bi ꞌñudi ge mi u̱tsa rä ntꞌexmänsu.

7. ¿Te jaꞌi gi senti ora gi handi tenguꞌä rä mꞌu̱i rä Hesu?

⁷ Po näꞌä bi mää ꞌne bi me̱fi rä Hesu, bi ꞌñudi ge mi u̱tsa rä ntꞌexmänsu. Por ejemplo, näꞌä nzäntho bi ꞌñeꞌspäbi rä nsu rä Dada ꞌne nunka bi ne ge go dä tꞌespäbi rä nsu (Mar. 10:17, 18; Juan 5:19). Xi nuꞌi, ¿te jaꞌi gi senti ora gi handi tenguꞌä rä mꞌu̱i rä Hesu? ¿Jaꞌi gi senti rä mhäte po geꞌä ꞌne gi ne gi de̱mbäbi rä mꞌu̱i? Zäi ge hää. Pe, ¿por hanja rä Hesu näꞌä hingä rä ꞌñexmänsu? Ngeꞌä rä Zi Dada Jeoba hingä rä ꞌñexmänsu. Rä Hesu de̱mbäbi rä mꞌu̱i rä Zi Dada Jeoba ngeꞌä xa di mädi (Sal. 18:35; Heb. 1:3). ¿Hänge gehnä mä nꞌa rä däta raso di pe̱ꞌtsihu̱ pa gä mädihu̱ rä Hesu?

8. ¿Por hanja xa di sentihu̱ rä johya ora di pädihu̱ ge rä Hesu go geꞌä mä Reyhu̱ ꞌne mä gobernantehu̱?

⁸ Nuju̱ di mädihu̱ rä Hesu ngu mä Reyhu̱ ngeꞌä näꞌä xi nꞌa rä hogä gobernante. Rä Zi Dada Jeoba go geꞌä mismo bi ꞌñuti rä Hesu hanja dä mända ꞌne bi hñutsꞌi de gä Rey (Is. 50:4, 5). Beni hanja rä Hesu bi ꞌñudi rä mhäte po gekhu̱ (Juan 13:1). Koꞌmu̱ rä Hesu go geꞌä mä Reyhu̱ ꞌne mä gobernantehu̱, ri ꞌñepäbi gä mädihu̱. Rä Hesu bi ꞌñenä ge nuꞌu̱ xa mäjuäni yä amigo o̱te näꞌä bi mända (Juan 14:15; 15:14, 15). ¡Xi nꞌa rä däta nsu di pe̱ꞌtsihu̱ de gä ñꞌamigouihu̱ rä Hesu näꞌä rä Tꞌu̱ Jeoba!

9. ¿Pa te bi nxixtehe rä Hesu ꞌne pa te di nxixtehe nuꞌu̱ yä de̱ni?

⁹ Rä Hesu bi ꞌñenä ge nuꞌu̱ toꞌo ne dä de̱ni, mähyoni dä nxixtehe (Mat. 28:19, 20). Nuꞌäse̱ bi hñuxä rä ejemplo ꞌne bi nxixtehe. Pa bi za bi nxixtehe rä Hesu ya himbi ja mꞌe̱di dä kumpli märꞌa yä rekisito ja ngu di ja mꞌe̱di dä kumpli nuꞌu̱ yä de̱ni. Pe näꞌä rä raso bi me̱ꞌtsi rä Hesu pa bi nxixtehe, geꞌätho rä raso pe̱ꞌtsi nuꞌu̱ yä de̱ni ora di nxixtehe (hyandi ꞌnehe rä rekuadro « Pa bi nxixtehe rä Hesu, ¿te himbi ja mꞌe̱di dä me̱fi? ¿Te di ja mꞌe̱di dä me̱fi nuꞌu̱ yä de̱ni rä Hesu pa dä za dä nxixtehe?»). Por ejemplo, nuꞌmu̱ rä Hesu bi nxixtehe, kongeꞌä bi ꞌñudi ge xki desidi dä me̱päbi rä bolunta rä Dada (Heb. 10:7). Geꞌä pe̱fi ꞌnehe nuꞌu̱ yä de̱ni. Ora di nxixtehe nꞌa rä jäꞌi ante märꞌaa, kongeꞌä udi ge ya xä ntregabi rä bida rä Zi Dada Jeoba ꞌne ge dende näꞌä rä oraꞌä ma dä mꞌu̱i pa dä me̱päbi rä bolunta. Njabu̱, de̱mbäbi rä ejemplo Ñhesukristo.

10. a) ¿Te mä raso gi pe̱ꞌtsi pa gi mädi rä Hesu? b) Näꞌä rä mhäte gi senti po rä Hesu, ¿te dä za dä jaꞌäꞌi gi pe̱fi?

¹⁰ Nuꞌi ya gi pädi ge rä Hesu go geꞌä rä Tꞌu̱ Jeoba ꞌne ge go geꞌä rä Rey xä hñutsꞌi pa dä mända rä Xiꞌmhai. ꞌNehe ya gi pädi ge rä Hesu hingä rä ꞌñexmänsu ꞌne de̱mbäbi näꞌä rä hogä mꞌu̱i pe̱ꞌtsi rä Dada. Ya xkä pädi hanja rä Hesu ꞌnehe bi mädi ꞌne bi hueki yä zi jäꞌi, bi umbäbi te dä zi nuꞌu̱ mi hyoya, bi nupäbi yä mfeni nuꞌu̱ mi thogi yä dumu̱i ꞌne asta bi yꞌo̱the nuꞌu̱ mi hñeni (Mat. 14:14-21). Nuꞌise̱ ꞌnehe ya xkä da ngue̱nda ge rä Hesu go geꞌä di gu̱hni nuꞌu̱ yä mhuntsꞌi ja po gatꞌho rä Xiꞌmhai (Mat. 23:10). Koꞌmu̱ Jeoba go geꞌä xä hñutsꞌi rä Hesu de gä gobernante, mänꞌitꞌho ma dä hä ndunthi yä jäpi pa gatꞌho yä mexiꞌmhai. Pe mu̱ gi ne gi ꞌñudi ge xa mäjuäni gi mädi rä Hesu, mähyoni gi de̱mbäbi rä mꞌu̱i ꞌne rä ejemplo (Juan 14:21). Pa geꞌä, di ja mꞌe̱di gi umbäbi ri te rä Zi Dada Jeoba ꞌne gi nxixtehe.

11. ¿Ndaꞌä rä raso mänꞌa xi rä däta de por hanja mähyoni gi nxixtehe?

¹¹ Tobe ja mä nꞌa rä raso xi rä däta de por hanja mähyoni gi nxixtehe. Rä Hesu bi ꞌñenä ge pe̱ꞌtsi te gä mädihu̱ rä Zi Dada Jeoba ko ngatꞌho mä korasohu̱, mä tehu̱, mä mfenihu̱ ꞌne mä tsꞌe̱dihu̱. Bi ꞌñenä ge nunä rä mhändanä, gehnä xi rä däta de gatꞌho (Mar. 12:30). Xi nuꞌi, ¿gehnä rä mhäte gi senti po rä Zi Dada Jeoba?

12. ¿Por hanja gi mädi rä Zi Dada Jeoba? (Hyandi ꞌnehe yä foto).

¹² Xi ndunthi nuꞌu̱ yä raso di pe̱ꞌtsihu̱ pa gä mädihu̱ rä Zi Dada Jeoba. Por ejemplo, nuꞌi  xkä pädi ge rä Zi Dada Jeoba go geꞌä xä rꞌakägihu̱ rä te, rä Hyadi, rä zänä ꞌne gatꞌho nuꞌu̱ märꞌa yä hogä tꞌo̱tꞌe ja ha rä Xiꞌmhai (Sal. 36:9; Sant. 1:17). Hää, rä Zi Dada Jeoba hingrä yꞌu̱ya ꞌne xä rꞌakägihu̱ ndunthi yä hogä tꞌo̱tꞌe ngeꞌä xa di mäkägihu̱.

13. Rä Zi Dada Jeoba bä pe̱hni rä Tꞌu̱ pa bi du po gekhu̱. ¿Por hanja otho mä nꞌa rä regalo näꞌä ja ndunthi rä balo ja ngu näꞌä bi uni rä Zi Dada Jeoba?

¹³ Jeoba bi uni rä Tꞌu̱ pa bi du po gekhu̱. ¿Por hanja gehnä rä regalo mänꞌa xi rä däta de gatꞌho? Ho̱nse̱ beni näꞌä rä mhäte pe̱ꞌspäbi rä Zi Dada Jeoba rä Tꞌu̱. Rä Hesu bi ꞌñenä: «Äjuä mä Dada xi di mäkägi». ꞌNehe bi ꞌñenä: «Di mädi mä Dada» (Juan 10:17; 14:31). Änte de dä ehe rä Hesu ha rä Xiꞌmhai, ya mi o̱tꞌe yä miyontho yä je̱ya de mi ꞌmu̱i ko rä Dada ha mähetsꞌi. Hänge näꞌä rä mhäte ꞌne rä hogä ntsitsꞌi mi ja entre geꞌu̱, mänꞌa xki ze̱di ꞌne xki te ko rä tiempo (Prov. 8:22, 23, 30). ¿Dä za gi imäjinä te bi senti Jeoba mi hyandi ge rä Tꞌu̱ bi sufri ꞌne bi du? Pe koꞌmu̱ rä Zi Dada Jeoba di mädi yä jäꞌi ꞌne di mäꞌi, bi mꞌu̱i dispuesto bi uni rä Tꞌu̱ pa bi du po gekhu̱ ꞌne njabu̱ dä za gä pe̱ꞌtsihu̱ nꞌa rä te pa nzäntho (Juan 3:16; Gál. 2:20). ¿Hingi kamfri ge nunä nꞌa rä däta raso näꞌä di pe̱ꞌtsihu̱ pa gä mädihu̱ rä Zi Dada Jeoba?

14. ¿Ndaꞌä rä ꞌñuu mänꞌa xä ñho gi huahni?

¹⁴ Zäi ge näꞌä rä tiempo gi tsitsꞌi de gi nxadi rä Mäkä Tꞌofo, ri mhäte po rä Zi Dada Jeoba mänꞌa xä te ꞌne xä ze̱di. Pe näꞌä rä mhäte ꞌne näꞌä rä  hogä ntsitsꞌi gi pe̱ꞌtsi Kongeꞌä, dä za dä sigi dä te ꞌne dä za dä dura pa nzäntho. Ko näꞌä gi mää ꞌne ko näꞌä gi pe̱fi, dä za gi johyabi rä koraso. Ko ndunthi rä mhäte rä Zi Dada Jeoba geꞌä xikägihu̱ gä pe̱fihu̱ (Prov. 23:15, 16). Näꞌä gi desidi gi pe̱fi ko ri bida, ma dä ꞌñudi mu̱ xa mäjuäni gi mädi rä Zi Dada Jeoba o hinä (1 Juan 5:3). Gi usa ri bida pa gi johyabi rä koraso rä Zi Dada Jeoba, geꞌä rä ꞌñuu mänꞌa xä ñho gi huahni.

15. ¿Hanja dä za gi ꞌñudi ge xa mäjuäni gi mädi rä Zi Dada Jeoba?

¹⁵ ¿Hanja dä za gi ꞌñudi ge gi mädi rä Zi Dada Jeoba? Nꞌaa, dä hogi gi xatuäbi rä Zi Dada Jeoba ꞌne gi xipäbi ge gi umbäbi ri te pa gi pe̱päbi rä bolunta (Sal. 40:8). ꞌNepu̱, gi nxixtehe ante yä da märꞌaa. Ja ngu dä mäñhu̱ ri mu̱di, näꞌä rä pa ma gi nxixtehe xi ma dä nja ndunthi rä johya. ¿Por hanja? Ngeꞌä dende näꞌä rä oraꞌä, bi thogi näꞌä rä mꞌu̱i gä pe̱ꞌtsi mä mꞌe̱tꞌo ꞌne ma dä mu̱di nꞌa rä rꞌayꞌo mꞌu̱i ante yä da rä Zi Dada Jeoba. Nubye̱, dende näꞌä oraꞌä ma gi ꞌmu̱i pa gi pe̱päbi rä bolunta, hingä pa gi pe̱fi ri bolunta (Rom. 14:8; 1 Ped. 4:1, 2). Zäi ge gi enä: «Nunä xi nꞌa rä däta responsabilida». Hää, pe mu̱ gi nxixtehe, ma dä xogi nꞌa rä goxthi habu̱ ma gi tini xi ndunthi yä jäpi. Ma gä handihu̱ por hanja.

16. Ja ngu udi rä Salmo 41:12, ¿te mä jäpi umbäbi rä Zi Dada Jeoba nuꞌu̱ toꞌo usa yä bida pa dä me̱päbi?

¹⁶ Rä Zi Dada Jeoba hingrä yꞌu̱ya ꞌne joꞌo mä nꞌa Nguꞌä. Hindi mporta hängu ma gi umbäbi, näꞌä ma dä kotsꞌäꞌi ko mä ndunthi (Mar. 10:29, 30). Mäske di ꞌmu̱ihu̱ ha yä gäxä pa habu̱ di nheki ndunthi yä tsꞌo tꞌo̱tꞌe, dende nubye̱ rä Zi Dada Jeoba rꞌakägihu̱ nꞌa rä mꞌu̱i temäꞌentho ko rä johya ꞌne ndunthi yä jäpi. Pe mäpaya, ja penä fu̱di nuya yä jäpi di pe̱ꞌtsihu̱. Nunä ꞌñuu ma gi ju̱u̱ xki nxixtehe, otho rä uadi. ¿Por hanja? Ngeꞌä nuꞌi dä za gi pe̱päbi rä Zi Dada Jeoba pa nzäntho. Näꞌä rä mhäte ja entre nuꞌi ꞌne rä Zi Dada Jeoba, ma dä sigi dä te, ꞌne ja Nguꞌä, nuꞌi ꞌnehe ma dä za gi ꞌmu̱i pa nzäntho (hñeti Salmo 41:12).

17. ¿Te mä tꞌo̱tꞌe hingi pe̱ꞌtsi rä Zi Dada Jeoba ꞌne nuꞌi dä za gi umbäbi?

¹⁷ Ora gi kumpli nuꞌu̱ yä rekisito di ja mꞌe̱di pa gi umbäbi ri te rä Zi Dada Jeoba ꞌne gi nxixtehe, geꞌä mä nꞌa rä däta regalo näꞌä dä za gi umbäbi rä Zi Dada Jeoba. Näꞌä xä rꞌaꞌi ndunthi yä  jäpi ꞌne nꞌa rä te ko ndunthi rä johya. Pa gi udi ge gi jamädibi, dä za gi umbäbi nꞌa rä däta regalo näꞌä hingi pe̱ꞌtsi. ¿Te mä regaloꞌä? Ri te pa gi yꞌo ha rä ꞌñuu ꞌne gi pe̱päbi pa nzäntho (Job 1:8; 41:11; Prov. 27:11). Geꞌä rä ꞌñuu mänꞌa xä ñho. Otho rä duda ge näꞌä rä mhäte gi senti po rä Zi Dada Jeoba, geꞌä rä däta raso gi pe̱ꞌtsi pa gi nxixtehe ꞌne gi pe̱päbi pa nzäntho.

18. ¿Te mä ntꞌani dä hogi gi thädi?

¹⁸ Ko näꞌä ya dä handihu̱, ¿ma gi nxixtehe? Nuꞌi go gi pe̱ꞌtsi rä mpengi nunä rä ntꞌani. Pe dä za dä maxꞌäꞌi gi thädise̱ nunä rä ntꞌani: «Xi nuga, ¿ya xtä ñhoki pa gä uni nunä rä däta paso?» (Hech. 8:36). Beni nuya hñuu yä däta raso di pe̱ꞌtsihu̱ pa gä nxixtehehu̱: Nꞌaa, ri mhäte po näꞌä mäjuäni ꞌne po näꞌä di ho rä Zi Dada Jeoba. Ñꞌanise̱: «¿Ya di ne dä zo̱ho̱ näꞌä rä pa habu̱ gatꞌho yä jäꞌi ma dä mää näꞌä mäjuäni ꞌne dä me̱fi näꞌä di ho rä Zi Dada Jeoba?». Yoho, ri mhäte po Ñhesukristo. Ñꞌanise̱: «¿Xa di ne gä handi rä Tꞌu̱ Äjuä ngu mä Rey ꞌne di ne gä de̱mbäbi rä mꞌu̱i ꞌne rä ejemplo?». ꞌNe hñuu, ri mhäte po rä Zi Dada Jeoba. Ñꞌanise̱: «¿Di ne gä pe̱päbi rä Zi Dada Jeoba pa gä johyabi rä koraso?». Mu̱ nuya hñuu yä ntꞌani gä thädi ge hää, ¿te hu̱kꞌäꞌi? ¿Por hanja hingi desidi ya gi nxixtehe? (Hech. 16:33).

19. ¿Por hanja hindi debe gi duda nixi gi ntsu gi nxixtehe ꞌne konte dä za gä komparahu̱? (Juan 4:34).

¹⁹ Mu̱ ngu gi duda o gi tsu gi nxixtehe, beni hanja bi hyandi rä Hesu näꞌä rä däta nsu mi pe̱ꞌtsi de dä me̱päbi rä Zi Dada Jeoba (hñeti Juan 4:34). Rä Hesu bi hyandi ngu rä ñhuni dä me̱päbi rä paha rä Dada. ¿Por hanja? Di pädihu̱ ge rä ñhuni o̱tkägihu̱ rä ñho. Njabu̱ ꞌnehe, rä Hesu mi pädi xä ñho ge gatꞌho näꞌä adi rä Zi Dada Jeoba gä pe̱fihu̱, nzäntho pa mä ñhohu̱. Rä Zi Dada Jeoba nunka ma dä mändagihu̱ gä pe̱fihu̱ nꞌa rä tꞌo̱tꞌe näꞌä ma dä u̱ngägihu̱. Hänge di mändaꞌi gi nxixtehe ngeꞌä pädi xä ñho ge pa ri ñhoui (Hech. 2:38). ꞌÑenä ora gi asepta nꞌa rä ñhuni näꞌä xa xä ku̱hi ꞌne hingi arrepenti. Njabu̱ ꞌnehe ma dä thogi mu̱ gi nxixtehe.

20. ¿Te ma gä handihu̱ ha näꞌä mä nꞌa rä ntꞌudi xä ꞌñepu̱?

²⁰ Rꞌaa hingi ne dä nxixtehe ngeꞌä senti ge tobe hinxä ñhoki. Mäjuäni ge gi umbäbi ri te rä Zi Dada Jeoba ꞌne gi nxixtehe; nꞌa rä däta responsabilida ꞌne gehnä mänꞌa rä däta desision ma gi huahni durante ri bida. Pa geꞌä, tsitsꞌi rä tiempo ꞌne pe̱ꞌtsi te gi yꞌo̱tꞌe ntsꞌe̱di po gi kumpli nuꞌu̱ yä rekisito tꞌadi. Pe mu̱ hää gi ne gi nxixtehe, ¿te dä za gi pe̱fi dende nubye̱ pa gi ñhoki ꞌne dä za gi uni nunä rä däta paso? Ha näꞌä rä ntꞌudi xä ꞌñepu̱ ma gä thädihu̱ nunä rä ntꞌani.