1, 2. Mu̱ tobe hixkä ñhoki pa gi nxixtehe, ¿por hanja hindi debe gi desanimä? (Hyandi nuꞌu̱ yä kꞌoi de rä mu̱di nxii).

 MU̱ NUꞌI ya gi ne gi nxixtehe, di felisitaꞌihe. Pe nubye̱ thädise̱ nunä rä ntꞌani: «¿Ya xtä ñhoki pa gä nxixtehe?». Mu̱ gi handi ge hää ꞌne yä anciano ya bi ꞌñenä ge hää dä za, hyoni rä oportunida de gi nxixtehe nguntꞌä. Gi nuhmä ge ma gi pe̱ꞌtsi nꞌa rä mꞌu̱i temäꞌentho ha rä hnini rä Zi Dada Jeoba.

² ¿Pe xiꞌmu̱ yä anciano bi ꞌñeñꞌäꞌi ge tobe hindä za gi nxixtehe, o mu̱ nuꞌi gi senti ge tobe hixkä ñhoki pa geꞌä? ¡Ogi desanimä! Hindi mporta ua grä bäsjäꞌi o ya grä däta jäꞌi, nuꞌi dä za gi sigi gi kumpli nuꞌu̱ yä rekisito di ja mꞌe̱di pa dä za gi nxixtehe.

3. ¿Te mi ne dä me̱fi näꞌä rä zi ñꞌo̱ho̱ mrä me Etiopía ꞌne te mä ntꞌani ma gä umbäbihu̱ rä mpengi? (Hechos 8:36, 38).

³ (Hñeti Hechos 8:36, 38). Rä Biblia mää ge nꞌa rä ñꞌo̱ho̱ mrä me Etiopía bi ꞌñembäbi rä Felipe: «Jani nꞌa rä zi mothe po rä dehe. ¿Ha hindä za ja gä nxixteheni?». Mi otho rä duda ge näꞌä zi ñꞌo̱ho̱ hää mi ne dä nxixtehe. Pe, ¿ya xki ñhoki pa dä uni nunä rä däta paso? Ma gä handihu̱ rä mpengi nunä ntꞌani.

4. ¿Hanja bi ꞌñudi näꞌä rä zi ñꞌo̱ho̱ mrä mengu Etiopía ge mi ne dä sigi dä bädi de rä Noya Äjuä?

⁴ Rä Biblia enä ge näꞌä rä me Etiopía xki mengi xki xo̱kämbeni Äjuä nuni Jerusalén (Hech. 8:27). Zäi ge näꞌä zi ñꞌo̱ho̱ꞌä, himrä judío pe xki asepta Jeoba ngu rä Zi Dada. Mi pädi näꞌä mi udi nuꞌu̱ yä mu̱di mfistꞌofo de rä Mäkä Tꞌofo ꞌne xki bädi de rä Zi Dada Jeoba, pe tobe mi ne dä bädi mä nꞌa tu̱i. Nuꞌmu̱ bi nthe̱ui Felipe, näꞌä zi ñꞌo̱ho̱ꞌä mi heti rä mfistꞌofo Isaías (Hech. 8:28). Mäske xä ñhei toꞌo dä ntiende nuꞌu̱ yä profecíaꞌu̱, näꞌä zi ñꞌo̱ho̱ꞌä mi ne dä sigi dä bädi.

5. ¿Te bi japäbi bi me̱fi näꞌä rä zi ñꞌo̱ho̱ mrä mengu Etiopía näꞌä rä mfädi mi pe̱ꞌtsi de Äjuä?

⁵ Candace, näꞌä rä reina de Etiopía, xki nkargobi näꞌä zi ñꞌo̱ho̱ dä supäbi gatꞌho näꞌä rä bojä mi pe̱ꞌtsi (Hech. 8:27). Zäi ge näꞌä zi ñꞌo̱ho̱ xa mi pe̱ꞌtsi ndunthi yä responsabilida. Pe mäske njabu̱, näꞌä bi ꞌueke rä tiempo pa bi ma bä xo̱kämbeni rä Zi Dada Jeoba. Näꞌä hingä ho̱nse̱ bi komformä ko dä bädi de Äjuä, sino ke ꞌnehe bi ne bi me̱fi näꞌä mi mända rä Zi Dada Jeoba, ꞌne bi mꞌu̱i dispuesto dä biaja dende rä dähni Etiopía asta ha näꞌä rä templo mi ja ha Jerusalén pa bi xo̱kämbeni rä Zi Dada Jeoba. Hää, xa mi ne dä xo̱kämbeni rä Zi Dada Jeoba ꞌne himbi mportabi hängu rä yabu̱ nixi hängu rä bojä ma xä gasta.

6, 7. ¿Hanja bi japi bi te näꞌä rä mhäte mi senti po rä Zi Dada Jeoba näꞌä rä ñꞌo̱ho̱ mrä mengu Etiopía?

⁶ Felipe bi matsꞌi näꞌä rä ñꞌo̱ho̱ mrä mengu Etiopía pa bi ntiende xä ñho rä Noya Äjuä. Por ejemplo, bi matsꞌi bi ntiende ge rä Hesu mi geꞌä rä Mesia (Hech. 8:34, 35). Zäi ge bi tso̱ni ha rä koraso mi bädi näꞌä xki me̱fi rä Hesu po geꞌä. Näꞌä xä za xä sigi xä xo̱kämbeni Jeoba ja ngu ya mi pe̱fi. Pe hinä. Näꞌä rä mhäte mi pe̱ꞌspäbi rä Zi Dada Jeoba ꞌne rä Hesu mänꞌa bi te, hänge bi xipäbi Felipe ge mi ne dä nxixtehe. Mi hyandi Felipe ge hää ya mi kumpli yä rekisito nunä ñꞌo̱ho̱, nubye̱ bi matsꞌi bi nxixtehe.

⁷ Rä ejemplo näꞌä rä ñꞌo̱ho̱ mrä mengu Etiopía, dä za dä maxꞌäꞌi pa njabu̱ ꞌnehe dä za gi kumpli nuꞌu̱ yä rekisito di ja mꞌe̱di ꞌne dä za gi nxixtehe ꞌnehe. Ja ngu näꞌä ñꞌo̱ho̱, nuꞌi dä za gi uni nuya hñuu yä paso: Nꞌaa, dä za gi sigi gi pädi de Äjuä. Yoho, gi pe̱fi näꞌä ya xkä pädi. ꞌNe hñuu, dä za gi japi dä te näꞌä ri mhäte po rä Zi Dada Jeoba.

8. ¿Te dä za gi pädi de Juan 17:3?

⁸ (Hñeti Juan 17:3). Zäi ge nuꞌmu̱ gä heti po ri mu̱di nunä testo, bi nupꞌäꞌi ri mfeni pa njabu̱ gä ne gä konose toꞌo Äjuä ja ngu xä thogi ko mä ndunthi yä jäꞌi. Pe nunä testo ꞌnehe di nupkägihu̱ mä mfenihu̱ pa njabu̱ gä sigihu̱ gä konosehu̱ Äjuä. Hää, mähyoni gä benihu̱ ge nzäntho ja te gä pädihu̱ de Äjuä ꞌne nunka ma gä huadihu̱ gä hänihu̱ gatꞌho näꞌä rä mfädi de Geꞌä (Ecl. 3:11). Po nzäntho ma gä sigihu̱ gä pädihu̱ Jeoba ꞌne entremäs gä konosehu̱, mänꞌa ri te näꞌä rä mhäte ꞌne näꞌä rä hogä ntsitsꞌi di pe̱ꞌtsihu̱ Kongeꞌä (Sal. 73:28).

9. Mu̱ ya xtä pädihu̱ nuꞌu̱ yä ntꞌudi hingi hei de rä Biblia, ¿te mähyoni gä pe̱fihu̱bye̱?

⁹ Ora di fu̱di di nxadihu̱ rä Biblia, di fu̱dihu̱ ko nuꞌu̱ yä ntꞌudi hingi hei. Rä apostol Pablo bi ꞌñembäbi nuya yä ntꞌudi ngu «yä mu̱di ntꞌutuäte hingi hei de rä Mäkä Tꞌofo». Hindi signifika ge hinte di bale, sino ke di signifika ge ora nꞌa rä jäꞌi fu̱di di nxadi rä Biblia, ꞌñenä näꞌä nꞌa rä zi  ꞌue̱ne fu̱di tsi rä ꞌma (Heb. 5:12; 6:1). Rä apostol Pablo bi ꞌñembäbi nuꞌu̱ yä mu̱di kristianu ge hindä komformä ko ho̱nse̱ nuya yä ntꞌudi. Sino ke mi debe dä sigi dä hyoni ꞌne dä imbestiga mä nꞌa tu̱i. Xi nuꞌi, ¿xa gi ne gi imbestiga nuꞌu̱ yä ntꞌudi xä ñhei hutsꞌi ha rä Biblia ꞌne gi ne gi sigi gi pädi de rä Zi Dada Jeoba ꞌne de näꞌä ma dä me̱fi?

10. ¿Por hanja ndunthi japäbi xä ñhei dä hñeti ꞌne dä nxadi yä he̱ꞌmi?

¹⁰ Pa ndunthi, jakägihu̱ xä ñhei gä nxadihu̱ yä he̱ꞌmi. Xi nuꞌi, ¿ha rä skuela gä pädi hanja gi hñeti ꞌne gi nxadi yä he̱ꞌmi? ¿Gi ho gi nxadi yä mfistꞌofo? ¿O rꞌaꞌi rä mfada ꞌne gi kamfri ge hingä mꞌu̱i pa gi hñeti yä he̱ꞌmi ꞌne yä mfistꞌofo? Mu̱ gi mbeni njabu̱, ogi turimu̱i. Ndunthi märꞌaa di mbeni njabu̱ ꞌnehe. ¿Pe gi pädi? Rä Zi Dada Jeoba ꞌmu̱i pa dä maxꞌäꞌi. Koꞌmu̱ näꞌä pe̱ꞌtsi gatꞌho rä mfädi, näꞌä dä za dä zo̱ho̱ dä nja nꞌa rä Xahnäte pa geꞌi.

11. ¿Hanja udi rä Zi Dada Jeoba ge go geꞌä rä «Dängä Xahnäte»?

¹¹ Jeoba go geꞌä mänse̱ ge näꞌä rä «Dängä Xahnäte» (Is. 30:20, 21). Näꞌä pe̱ꞌtsi rä pasensia, rä hojäꞌi, pädi dä komprendebi yä alumno ꞌne di ho dä hyandi nuꞌu̱ yä hogä tꞌo̱tꞌe pe̱fi kada nꞌa de geꞌu̱ (Sal. 130:3). Beni ge rä Zi Dada Jeoba go geꞌä xä rꞌakägihu̱ mä bo̱yꞌohu̱ ꞌne näꞌä hingi to̱ꞌmi gä pe̱fihu̱ näꞌä hindä za (Sal. 139:14). ꞌNehe bi hyogägihu̱ pa gä deseahu̱ gä pe̱ꞌtsihu̱ rä mfädi. Hänge rä Zi Dada Jeoba ne gä sigihu̱ gä konosehu̱ toꞌoꞌä ꞌne ko rä johya gä sigihu̱ gä honihu̱ rä mfädi de Geꞌä. Pa geꞌä, mähyoni gä tedehu̱ näꞌä rä nkꞌatꞌi di pe̱ꞌtsihu̱ de gä pädihu̱ de rä Noya Äjuä (1 Ped. 2:2). ¿Te ma dä maxꞌäꞌi? Dä hogi gi desidi gi ꞌueke rä tiempo pa gi nxadi rä Noya Äjuä ꞌne gi yꞌantsꞌi nuꞌu̱ yä ntꞌudi tꞌägi. Pa geꞌä, mähyoni gi hyoki nꞌa rä programä habu̱ gi hñutsꞌi te mä pa ꞌne te mä ora ma gi ꞌueke näꞌä rä tiempo pa gi hñudi gi nxadi rä Biblia (Jos. 1:8). Ko rä mfatsꞌi rä Zi Dada Jeoba, rꞌamätsꞌu̱u̱ ma gi tsamäku̱hi de gi nxadi rä Mäkä Tꞌofo ꞌne ma gi tini ndunthi rä johya de gi konose mänꞌa xä ñho.

12. ¿Por hanja mähyoni gä ꞌuekehu̱ rä tiempo pa gä nxadihu̱ rä Biblia ꞌne gä handihu̱ näꞌä bi me̱fi rä Hesu mi mꞌu̱kua ha rä Xiꞌmhai?

¹² ꞌUeke rä tiempo pa gi hñudi gi ntso̱ꞌmi te bi me̱fi rä Hesu mi mꞌu̱kua ha rä Xiꞌmhai. Pa dä za gä pe̱päbihu̱ rä Zi Dada Jeoba ja ngu ri ꞌñehe ha nuya yä gäxä pa di ꞌmu̱hu̱, mähyoni gä de̱mbäbi yä paso rä Kristo (1 Ped. 2:21). Rä Hesu bi mää ge nuꞌu̱ yä de̱ni ma dä ñhandui ndunthi yä xuñha (Luc. 14:27, 28). Pe ꞌnehe, rä Hesu bi mää ge hindi mporta te mä xuñha dä ñhandui nuꞌu̱ yä de̱ni, dä za dä däpäbi ja ngu bi jaꞌä (Juan 16:33). Hänge xa mähyoni gi ꞌueke rä tiempo pa gi nxadi rä Biblia ꞌne gi pädi näꞌä bi me̱fi rä Hesu ꞌne gi yꞌo̱tꞌe ntsꞌe̱di po gi de̱mbäbi rä ejemplo.

13. ¿Te mähyoni gi sigi gi yꞌapäbi rä Zi Dada Jeoba ꞌne por hanja?

¹³ Ora di nxadihu̱ rä Mäkä Tꞌofo, hingä ho̱nse̱ di nehu̱ gä pe̱ꞌtsihu̱ rä mfädi ha mä ñäxuhu̱, sino ke di nehu̱ gä konosehu̱ rä Zi Dada Jeoba, gä mädihu̱ ꞌne gä pe̱ꞌspäbihu̱ rä komfiansa (1 Cor. 8:1-3). Hänge ora gi nxadi rä Mäkä Tꞌofo, mähyoni gi sigi gi yꞌapäbi rä Zi Dada Jeoba ge dä maxꞌäꞌi pa dä te näꞌä rä jamfri ꞌne näꞌä rä komfiansa gi pe̱ꞌspäbi. Gi nuhmä ge näꞌä ma dä yꞌo̱de ri sadi (Luc. 17:5). Mu̱ näꞌä rä mfädi xkä häni de rä Mäkä Tꞌofo xä jaꞌi gi pe̱ꞌspäbi ndunthi rä komfiansa rä Zi Dada Jeoba, geꞌä ma dä maxꞌäꞌi gi pe̱fi näꞌä di mändaꞌi (Sant. 2:26).

14. ¿Te bi usa rä apostol Pedro pa bi esplika por hanja xa mähyoni gä pe̱fihu̱ näꞌä ya xtä pädihu̱? (Hyandi ꞌnehe rä foto).

¹⁴ Rä apostol Pedro bi mää ge nuꞌu̱ yä de̱ni rä Kristo, xa mähyoni dä sigi dä me̱fi näꞌä ya xä bädi. Pa geꞌä bi no̱ni näꞌä bi thogi ha yä  pa rä Noé, nuꞌmu̱ Jeoba bi ꞌñembäbi ge ma xä hä nꞌa rä däta Däyꞌe pa xä huati gatꞌho nuꞌu̱ yä tsꞌomꞌu̱i jäꞌi mi ꞌmu̱i ha näꞌä rä tiempoꞌä. Pe Noé ꞌne rä familia, himbi komformä ko ho̱nse̱ bi bädi näꞌä ma xä me̱fi rä Zi Dada Jeoba. Rä apostol Pedro bi mää ge Noé ꞌne rä familia, bi hyokä nꞌa rä arca änte de xä zo̱ho̱ näꞌä rä Däta däyꞌeꞌä (1 Ped. 3:20). Hää, Noé ꞌne rä familia, bi mfatsꞌi bi hyoki nꞌa rä däta arca ja ngu xki mändabi rä Zi Dada Jeoba pa njabu̱ bi ñäni yä bida (Heb. 11:7). ꞌNepu̱, rä apostol Pedro bi ꞌñenä: «Geꞌä ri bo̱ni rä xixtehe ꞌne nubye̱ geꞌä di salbaꞌihu̱ ꞌnehe» (1 Ped. 3:21, TNM). Nuua di handihu̱ ge rä apostol Pedro bi kompara näꞌä bi me̱fi Noé ko rä xixtehe. ¿Por hanja? Ngeꞌä gatꞌho näꞌä gi pe̱fi dende nubye̱ pa gi kumpli yä rekisito ꞌne njabu̱ dä za gi nxixtehe, ꞌñenä näꞌä bi me̱fi Noé ꞌne rä familia durante yä je̱ya pa bi za bi hyoki rä arca. Pe zäi ge gi ñꞌani: «¿Te mä rekisito di debe gä kumpli pa njabu̱ dä za gä nxixtehe?».

15. ¿Te mähyoni dä me̱fi nꞌa rä jäꞌi näꞌä xa mäjuäni di arrepenti de nuꞌu̱ yä pekado xä yꞌo̱tꞌe?

¹⁵ Gä arrepentihu̱ de nuꞌu̱ yä pekado xtä o̱tꞌehu̱, geꞌä nꞌa rä rekisito to̱ꞌmi rä Zi Dada Jeoba gä kumplihu̱ (Hech. 2:37, 38). Nꞌa rä jäꞌi pe̱ꞌtsi te dä paati rä mꞌu̱i mu̱ xa mäjuäni di arrepenti. Mu̱ mä mꞌe̱tꞌo ngi o̱tꞌe yä pekado ko ri ndoyꞌo o ngi tsi yä yꞌu̱i, ngi nti, ngi mängä yä tsꞌone o yä ñhädondo, ¿ya xkä ꞌuege ꞌne xkä tsopu̱ nuya yä pekado? (1 Cor. 6:9, 10; 2 Cor. 7:1; Efes. 4:29). Mu̱ tobe hinä, mähyoni gi sigi gi yꞌo̱tꞌe ntsꞌe̱di asta xa gi logra gi tsopu̱ nuya yä tsꞌo tꞌo̱tꞌe. Mu̱ gi honi rä mfatsꞌi ꞌne yä konseho, dä za gi xipäbi ri xahnäte o yä anciano de rä mhuntsꞌi. Mu̱ grä bäsjäꞌi ꞌne tobe gi ꞌmu̱i ko nuꞌu̱ ri dada, dä hogi gi yꞌapäbi rä mfatsꞌi pa gi täpäbi nuꞌu̱ yä tsꞌo tꞌo̱tꞌe hu̱kꞌäꞌi gi nxixtehe.

16. ¿Ndaꞌä mä nꞌa rä rekisito udi rä Biblia ge mähyoni gä kumplihu̱ pa dä za gä nxixtehehu̱?

¹⁶ Gi ꞌueke rä tiempo pa gi xo̱kämbeni rä Zi Dada Jeoba geꞌä mä nꞌa rä rekisito di debe gi kumpli. Por ejemplo, mähyoni gi ntini ꞌne gi partisipa ha yä mhuntsꞌi (Heb. 10:24, 25). ꞌNe ora gi fu̱di gi mpublicador mäske tobe hixkä nxixtehe, dä hogi gi yꞌo̱tꞌe ntsꞌe̱di po gi predika njatꞌä. Ma gi hyandi ge entremäs gi predika, mänꞌa ma gi ho gi ꞌñudi de rä Noya Äjuä ꞌne ma gi tini rä johya (2 Tim. 4:5). Mu̱ grä bäsjäꞌi ꞌne tobe gi ꞌmu̱i ko nuꞌu̱ ri dada, ñꞌanise̱: «¿Di bense̱ gä po̱ni gä predika ꞌne gä ma ha yä mhuntsꞌi o mꞌe̱tꞌo pe̱ꞌtsi te dä bengägi nuꞌu̱ mä dada?».  Mu̱ gi bense̱ gi pe̱päbi rä Zi Dada Jeoba ko ngatꞌho ri koraso, gi udi ge gi pe̱ꞌspäbi ndunthi rä komfiansa, ge gi mädi ꞌne ge gi umbäbi njamädi. Ora gi pe̱fi njabu̱, rä Zi Dada Jeoba handi ngu yä däta regalo näꞌä gi umbäbi (2 Ped. 3:11; Heb. 13:15). Näꞌä ne gä umbäbihu̱ yä regalo ngeꞌä di mädihu̱ hingä ngeꞌä toꞌo di obligagihu̱ (hyandi te mää 2 Corintios 9:7). Hää, nuju̱ di sentihu̱ ndunthi rä johya ora di pe̱päbihu̱ rä Zi Dada Jeoba ꞌne di jahu̱ yä sacrificio po geꞌä.

17, 18. ¿Te ma dä maxꞌäꞌi pa gi logra gi nxixtehe ꞌne por hanja? (Proverbios 3:3-6).

¹⁷ Ora gi o̱tꞌe ntsꞌe̱di po gi pe̱fi näꞌä adi rä Zi Dada Jeoba pa njabu̱ dä za gi nxixtehe, ꞌnehe ma gi ñhandui yä xuñha. Rꞌa yä jäꞌi ma dä deñꞌäꞌi o asta ma dä u̱tsaꞌi ngeꞌä xkä desidi gi pe̱päbi rä Zi Dada Jeoba (2 Tim. 3:12). Mu̱ gi o̱tꞌe ntsꞌe̱di po gi täpäbi nꞌa rä tsꞌo nzäi o nꞌa rä pekado pe ꞌnepu̱ gi tagi mänꞌaki, zäi ge gi desanimä ꞌne gi senti ge xi xä ñhei gi kumpli nuꞌu̱ yä rekisito pa dä za gi nxixtehe. ¿Te ma dä maxꞌäꞌi pa gi sigi yꞌo̱tꞌe ntsꞌe̱di asta xa gi logra gi nxixtehe? Näꞌä rä mhäte gi pe̱ꞌspäbi rä Zi Dada Jeoba.

¹⁸ Näꞌä rä mhäte gi senti po rä Zi Dada Jeoba geꞌä nꞌa rä tꞌo̱tꞌe xa mähotho gi pe̱ꞌtsi ꞌne otho rä presio (hñeti Proverbios 3:3-6). Näꞌä rä mhäte gi senti po rä Zi Dada Jeoba, geꞌä ma dä maxꞌäꞌi gi tse̱ti ꞌne gi täpäbi yä xuñha. Rä Biblia udi ge rä Zi Dada Jeoba senti nꞌa rä mhäte näꞌä hingi faya po gatꞌho yä amigo. Signifika ge nunka di bandonägihu̱ ꞌne nunka ma dä hye̱gi de dä mäkägihu̱ (Sal. 100:5). Beni ge rä Zi Dada Jeoba bi hyogägihu̱ pa gä udihu̱ näꞌä rä mꞌu̱i udiꞌä (Gén. 1:26). Nuꞌmu̱, ¿hanja dä za gi ꞌñudi näꞌä rä mhäte udi Jeoba?

19. ¿Hanja dä za gi ꞌñudi ge gi jamädibi Jeoba po näꞌä pe̱fi po geꞌi? (Gálatas 2:20).

¹⁹ Mꞌe̱tꞌo, mähyoni gi pädi gi jamädibi Äjuä (1 Tes. 5:18). Dä hogi ge hyaxtho gi ñꞌanise̱: «Xi nunä pa, ¿hanja bi ꞌñudi rä Zi Dada Jeoba ge di mäkägi?». ꞌNepu̱, ora gi xatuäbi umbäbi njamädi po gatꞌho näꞌä xä rꞌaꞌi näꞌä rä paꞌä. Ja ngu rä apostol Pablo, beni ge rä Zi Dada Jeoba xa di mäꞌäꞌi, hänge rꞌaꞌäꞌi kada nꞌa de nuꞌu̱ yä tꞌo̱tꞌeꞌu̱ (hñeti Gálatas 2:20, TNM). ꞌNehe mähyoni gi ñꞌani: «Xi nuga, ¿di ne gä uti rä Zi Dada Jeoba ge di mädi ꞌnehe?». Näꞌä rä mhäte gi senti po geꞌä, geꞌä ma dä maxꞌäꞌi gi tse̱ti yä tentasio, gi täpäbi yä xuñha ꞌne geꞌä ma dä maxꞌäꞌi pa hingi hye̱gi de gi xo̱kämbeni rä Zi Dada Jeoba ja ngu adiꞌä. Mu̱ gi pe̱fi njabu̱, ma gi ꞌñudi hyaxtho hängu gi mädi rä Zi Dada Jeoba.

20. ¿Te signifika gi umbäbi ri te rä Zi Dada Jeoba ꞌne por hanja xa mähyoni gi tomä nunä rä desision?

²⁰ Ko rä tiempo, näꞌä rä mhäte gi senti po rä Zi Dada Jeoba ma dä jaꞌäꞌi gi ja nꞌa rä sadi näꞌä nꞌañꞌo de gatꞌho märꞌa yä sadi xkä ja. Hää, ha nunä rä sadi ma gi xipäbi ge nubye̱ gi umbäbi ri te pa gi pe̱päbi. Dende näꞌä rä ora gi umbäbi ri te Jeoba, nubye̱ gi pe̱ꞌtsi rä oportunida de gi pertenesebi pa nzäntho. Ha nunä sadi, gi prometebi rä Zi Dada Jeoba gi pe̱päbi tanto nuꞌmu̱ dä ꞌñehe yä pa xä ñho ngu nuꞌmu̱ dä ꞌñehe yä pa xä ntsꞌo. Nunä promesa ho̱nse̱ nꞌa mꞌiki dä za gi ja durante gatꞌho ri bida. Mäjuäni ge nunä nꞌa rä dängä responsabilida, pe beni ge mu̱ gi umbäbi ri te Jeoba ꞌne gi pe̱päbi, gehnä rä ꞌñuu mänꞌa xä ñho gi ju̱u̱ (Sal. 50:14). Rä Zithu ma dä trata dä japi dä käni näꞌä rä mhäte gi senti po rä Zi Dada Jeoba pa njabu̱ gi ꞌuege de Geꞌä. Pe ogi hopäbi dä ntäte rä Zithu (Job 27:5). Näꞌä rä dängä mhäte gi senti po rä Zi Dada Jeoba, geꞌä ma dä maxꞌäꞌi gi kumpli ko näꞌä promesa ma gi ja. ꞌNe ngu ri thogi yä pa, mänꞌa ma dä te näꞌä rä ntsitsꞌi gi pe̱ꞌtsi Kongeꞌä.

21. ¿Por hanja nu xki nxixtehe, hindi signifika ge ya ja ma gi huadibu̱ gi pe̱päbi rä bolunta Jeoba?

²¹ Mu̱ ya gä ja nꞌa rä sadi habu̱ gä umbäbi ri te rä Zi Dada Jeoba, nubye̱ mähyoni gi ñä ko yä anciano pa dä xiꞌäꞌi mu̱ ya dä za gi nxixtehe o tobe hinä. Nu xki nxixtehe, hindi signifika ge ya gä huadi gä pe̱päbi rä bolunta Jeoba, sino ke ja penä fu̱di näꞌä rä ꞌñuu habu̱ ma gi pe̱päbi pa nzäntho. Hänge dende nubye̱, tede näꞌä rä mhäte gi senti po rä Zi Dada Jeoba ꞌne jamäsu, pa njabu̱ mänꞌa dä te näꞌä mhäteꞌä. Geꞌä ma dä maxꞌäꞌi pa gi logra gi nxixtehe. Xti zo̱ho̱ nunä rä pa, ¡xi ma dä johya tanto Jeoba ngu nuꞌi! Hängu di nehe ge näꞌä ri mhäte gi senti po rä Zi Dada Jeoba ꞌne po rä Hesu, dä sigi dä te ngu thogi kada nꞌa rä pa.