1, 2. ¿Te mä jäpi häni nꞌa rä jäꞌi dende nuꞌmu̱ di nxixtehe?

 NÄꞌÄ rä pa gä nxixtehe ꞌne gä pädi ge rä Zi Dada Jeoba dende geꞌmu̱ bi hyantꞌäꞌi ngu de rä familia, zäi ge xa gä senti ndunthi rä johya. Zäi ge gä senti ja ngu bi senti rä rey David nuꞌmu̱ bi ꞌñembäbi rä Zi Dada Jeoba: «Pe̱ꞌtsi ndunthi rä johya nꞌa rä jäꞌi näꞌä gi huahni pa dä joni kongeꞌi ꞌne pa dä mꞌu̱i ha rä patio ri nguu» (Sal. 65:4).

² ¿Toꞌo di huahni rä Zi Dada Jeoba pa dä mꞌu̱i ha rä patio rä nguu ꞌne dä hyandi ngu de rä familia? Ja ngu dä handihu̱ ha Rä ntꞌudi pa gä nxadihu̱ 9, rä Zi Dada Jeoba di huahni nuꞌu̱ yä zi jäꞌi udi ge ne dä me̱ꞌtsi nꞌa rä hogä amista Kongeꞌä (Sant. 4:8). Hänge nuꞌmu̱ gä ꞌueke ri bida pa gä umbäbi Jeoba ꞌne gä nxixtehe, dende geꞌmu̱ gä fu̱di gä pe̱ꞌtsi nꞌa rä hogä amista Kongeꞌä. Rä Zi Dada Jeoba ne gi pädi ꞌne hingi duda nunä promesa ora eñꞌäꞌi: «Ma gä xoki nuꞌu̱ yä goxthi ja ha mähetsꞌi pa gä pe̱nꞌähu̱ yä jäpi pa hinte dä ꞌme̱ꞌähu̱» (Mal. 3:10; Jer. 17:​7, 8).

3. ¿Te mä responsabilida pe̱ꞌtsi gatꞌho nuꞌu̱ xä nxixtehe? (Eclesiastés 5:​4, 5).

³ Nꞌa rä jäꞌi näꞌä di nxixtehe ja penä fu̱di yꞌo ha rä ꞌñuu rä Zi Dada Jeoba. Ngeꞌä mꞌe̱fa de dä nxixtehe, ma dä ja mꞌe̱di dä sigi dä yꞌo̱tꞌe ntsꞌe̱di po dä kumpli ko näꞌä bi prometebi rä Zi Dada Jeoba. ꞌNehe, pe̱ꞌtsi te dä sigi dä yꞌo̱tꞌe ntsꞌe̱di po dä däpäbi yä tentasio ꞌne gatꞌho nuꞌu̱ yä xuñha ma dä ñhandui (hñeti Eclesiastés 5:​4, 5). Nꞌa rä jäꞌi näꞌä di nxixtehe, mähyoni dä de̱mbäbi rä ejemplo rä Hesu ꞌne dä yꞌo̱tꞌe ntsꞌe̱di po dä me̱fi gatꞌho näꞌä bi mända (Mat. 28:​19, 20; 1 Ped. 2:21). Mu̱ nuꞌi ya gä nxixtehe, ma dä maxꞌäꞌi ndunthi nunä imformäsio.

 SIGI GI DE̱MBÄBI YÄ PASO RÄ HESU MÄSKE GI ÑHANDUI YÄ XUÑHA ꞌNE YÄ TENTASIO

4. ¿Te di signifika näꞌä bi mää rä Hesu ora bi ꞌñenä ge kada nꞌa rä pa, mähyoni gä ju̱hu̱ “mä zaahu̱ de gä kastigo”? (Lucas 9:23).

⁴ Toꞌo di nxixtehe hindi signifika ge nunka ma dä me̱ꞌtsi yä xuñha. Al contrario, rä Hesu bi ꞌñenä ge kada nꞌa rä pa, mähyoni gä ju̱hu̱ “mä zaahu̱ de gä kastigo” (hñeti Lucas 9:​23, TNM). ¿Te di signifika nuya yä noya bi mängä rä Hesu? Ge mäske ma gä pe̱ꞌtsihu̱ ndunthi yä jäpi, ꞌnehe ma dä ꞌñekägihu̱ yä xuñha ꞌne yä u̱gi (2 Tim. 3:12).

5. ¿Te mä jäpi bi promete rä Hesu pa nuꞌu̱ di prokura dä me̱päbi rä Zi Dada Jeoba, mäske pa geꞌä di ja yä sacrificio?

⁵ Tal vez di u̱tsaꞌi ri familia ngeꞌä gi pe̱päbi rä Zi Dada Jeoba, o tal vez ya gä renunsia nꞌa rä ꞌme̱fi o märꞌa yä kosa kontal gi pe̱päbi mꞌe̱tꞌo rä Zi Dada Jeoba (Mat. 6:33). Mu̱ gi thogi njabu̱, rä Zi Dada Jeoba ne gi pädi ge näꞌä handi gatꞌho näꞌä gi pe̱fi (Heb. 6:10). Tal vez ya xkä handi ꞌnehe ge mäjuäni näꞌä bi mängä rä Hesu ora bi ꞌñenä: «Toꞌo xä zoogi rä nguu, o yä ku, o yä nju, o rä nänä, o rä dada, o yä bätsi, o yä hai po geki ꞌne po nuꞌu̱ yä hogä notisia, ma dä hñäni nubye̱ ha nunä tiempo mä 100 po kada nꞌa de näꞌä xä ꞌme̱di —ngu yä nguu, yä ku, yä nju, yä nänä, yä bätsi, ꞌne yä hai mäske di ja yä ntꞌu̱tsate— ꞌne ha näꞌä rä rꞌayꞌo xiꞌmhai xä ꞌñepu̱, nꞌa rä te pa nzäntho» (Mar. 10:​29, 30, TNM). Otho rä duda ge nuꞌu̱ yä jäpi xkä häni, mänꞌa ndunthi ke nuꞌu̱ yä sacrificio xkä ja (Sal. 37:4).

6. ¿Te ma dä ja mꞌe̱di gi pe̱fi mꞌe̱fa de gi nxixtehe ꞌne por hanja?

⁶ Koꞌmu̱ gatꞌho dyä imperfectohu̱, mꞌe̱fa de gi nxixtehe pe̱ꞌtsi te gi sigi gi yꞌo̱tꞌe ntsꞌe̱di po gi täpäbi yä tsꞌo nkꞌatꞌi (1 Juan 2:16). Tal vez rꞌabu̱ ma gi senti ja ngu bi senti rä apostol Pablo nuꞌmu̱ bi ꞌñenä: «Mä mfeni ꞌne mä koraso xa mäjuäni di mädi rä ley Äjuä, pe ha mä ndoyꞌo ja mä nꞌa rä ley näꞌä di ntunkui mä mfeni ꞌne geꞌä tsixkägi ngu nꞌa rä esclavo ha näꞌä rä ley rä pekado di ñꞌoui mä ndoyꞌo» (Rom. 7:​22, 23, TNM). Rꞌabu̱ dä za gi desanimä ora gi handi ge pe̱ꞌtsi te gi ntsaui yä tsꞌo nkꞌatꞌi ꞌne yä tsꞌo mfeni. Pe ora gi thogi njabu̱, beni näꞌä gä prometebi rä Zi Dada Jeoba ora gä umbäbi ri bida ꞌne gä nxixtehe. ¿Gi pädi? Pa rä ñhouise̱ nꞌa rä jäꞌi näꞌä umbäbi rä bida rä Zi Dada Jeoba ꞌne di nxixtehe. Ma gä handihu̱ por hanja.

7. Ora gi ꞌueke ri bida ꞌne gi umbäbi rä Zi Dada Jeoba, ¿por hanja geꞌä ma dä maxꞌäꞌi pa gi yꞌo mänjuäntho ha rä ꞌñuu?

⁷ Ora nꞌa rä jäꞌi ꞌueke rä bida ꞌne umbäbi rä Zi Dada Jeoba, di «renunsiase̱ rä bida». ¿Por hanja? Ngeꞌä näꞌä jäꞌiꞌä, desidi dä rechaza nuꞌu̱ yä mfeni ꞌne yä nkꞌatꞌi di nkontraui ko rä bolunta rä Zi Dada Jeoba (Mat. 16:24). Po geꞌä, mu̱ nuꞌi ya gä nxixtehe ꞌne ma gi ñhandui nꞌa rä tentasio, ya hingä ma gi tege ri bida pa gi mbeni te ma gi pe̱fi. Pa geꞌi ma dä nja ho̱nse̱ nꞌatho rä ꞌñuu: Gi pe̱fi rä bolunta rä Zi Dada Jeoba ꞌne gi johyabi rä koraso. Ora gä umbäbi ri bida rä Zi Dada Jeoba, gä xipäbi ge ya gä renunsia gatꞌho nuꞌu̱ märꞌa yä tꞌo̱tꞌe pa gi pe̱päbi rä bolunta. Hänge ora gi ñhandui nꞌa rä xuñha o nꞌa rä tentasio, ma gi pe̱fi näꞌä bi me̱fi Job ora bi ꞌñenä: «¡Nunka ma gä ꞌuengi de Äjuä!» (Job 27:5).

8. ¿Hanja ma dä maxkägihu̱ mu̱ njatꞌä gä hudihu̱ gä ntso̱ꞌmihu̱ pa gä benihu̱ näꞌä dä prometebihu̱ rä Zi Dada Jeoba?

⁸ Mu̱ njatꞌä gä hudihu̱ gä ntso̱ꞌmihu̱ ꞌne gä benihu̱ näꞌä dä prometebihu̱ rä Zi Dada Jeoba, geꞌä ma dä maxkägihu̱ pa hingä tagihu̱ ha yä tentasio. Por ejemplo, nꞌa rä jäꞌi näꞌä ya xä nthäti, ya hingä ma dä ñꞌobu̱ dä koketeabi mä nꞌa rä jäꞌi. Njabu̱ ꞌnehe, ora di umbäbihu̱ mä bidahu̱ rä Zi Dada Jeoba, hingä ma gä mpu̱ntsꞌihu̱ pa gä nu̱ꞌtihu̱ nuꞌu̱ yä tꞌo̱tꞌe di nkontraui ko rä bolunta. Hänge ora tso̱kägihu̱ yä tsꞌo mfeni o yä tsꞌo nkꞌatꞌi, mähyoni ge nguntꞌä gä e̱nihu̱ de ha mä mfenihu̱, pa njabu̱ hindä gu̱ yä yꞌu̱u̱ ꞌne dä  jakägihu̱ gä pe̱fihu̱ näꞌä xä ntsꞌo. Mu̱ hingä konsentihu̱ nuꞌu̱ yä tsꞌo mfeni ha mä ñäxuhu̱ ꞌne nguntꞌä gä e̱nihu̱, hingä ma gä tagihu̱ ha yä «ꞌñuu yä tsꞌomꞌu̱i jäꞌi» ꞌne yä yꞌo̱tꞌä tsꞌoki (Prov. 4:​14, 15).

9. ¿Hanja ma dä maxꞌäꞌi mu̱ njatꞌä gi beni näꞌä gä prometebi rä Zi Dada Jeoba nuꞌmu̱ gä xatuäbi ꞌne gä xipäbi ge gi umbäbi ri bida?

⁹ ¿Te ma gi pe̱fi mu̱ toꞌo dä ofreseꞌi nꞌa rä ꞌme̱fi näꞌä ma dä hñäkꞌäꞌi de gi ntini ha yä mhuntsꞌi? Hinte mä duda gi pe̱ꞌtsi de te di debe gi pe̱fi. Dende änte nuꞌi ya xkä desidi ge hingä ma gi asepta nꞌa rä ꞌme̱fi njabu̱. Hää, gi pädi xä ñho ge mu̱ gi asepta näꞌä ꞌme̱fiꞌä, ma dä hñäkꞌäꞌi de gi pe̱päbi mꞌe̱tꞌo rä bolunta rä Zi Dada Jeoba. Ja ngu rä Hesu mi ꞌmu̱i desidido dä me̱päbi rä bolunta rä Zi Dada Jeoba, nuꞌi ꞌnehe debe gi mꞌu̱i desidido gi rechaza nguntꞌä yä tentasio ꞌne märꞌa yä tꞌo̱tꞌe nuꞌu̱ dä za dä hñäkꞌäꞌi de gi kumpli ko näꞌä gä prometebi rä Zi Dada Jeoba (Mat. 4:10; Juan 8:29).

10. ¿Hanja debe gä handihu̱ yä xuñha ꞌne te di prometegihu̱ rä Zi Dada Jeoba?

¹⁰ Ora tso̱kägihu̱ nꞌa rä xuñha o nꞌa rä tentasio, mähyoni gä handihu̱ ngu nꞌa rä oportunida pa gä udihu̱ ge di ꞌmu̱ihu̱ desidido gä de̱mbäbihu̱ yä paso rä Hesu. Ja ngu ya xkä handi, rä Zi Dada Jeoba nunka ma dä hye̱kꞌäse̱. Rä Mäkä Tꞌofo enä: «Äjuä nzäntho sugägihu̱, ꞌne nuꞌä hindä hokhu̱ gä thohu̱ yä tsꞌo thogi nuꞌu̱ dä hyandiꞌä ge hindä za gä tse̱tꞌhu̱. Ha nu rä ora di thohu̱ nꞌa rä thogi, nuꞌä di rꞌakhu̱ rä tsꞌe̱di pa gä tse̱tꞌhu̱» (1 Cor. 10:13).

TE DÄ HOGI GI PE̱FI PA NJABU̱ GI SIGI GI DE̱MBÄBI YÄ PASO RÄ HESU

11. ¿Te xa mähyoni gä pe̱fihu̱ pa gä sigi gä de̱mbäbihu̱ yä paso rä Kristo? (Hyandi ꞌnehe yä foto).

¹¹ ¿Te bi matsꞌi rä Hesu pa bi me̱päbi rä Zi Dada Jeoba ko ngatꞌho rä koraso? Rä Hesu mi nzäi dä xatuäbi rä Dada ꞌne njabu̱ mi ja nꞌa rä hogä amista entre geꞌu̱ (Luc. 6:12). Hänge pa gi  sigi gi de̱mbäbi yä paso rä Hesu, mähyoni gi tede näꞌä rä hogä ntsitsꞌi gi pe̱ꞌtsi ko rä Zi Dada Jeoba. Pa geꞌä mähyoni gi pe̱fi nuꞌu̱ yä tꞌo̱tꞌe di hoꞌä. Rä Mäkä Tꞌofo enä: «Hindi mporta hängu ya xtä bansahu̱, pe̱ꞌtsi te gä sigihu̱ gä yꞌohu̱ ha nunä rä ꞌñuu xtä tinihu̱» (Filip. 3:​16, TNM). Rꞌabu̱, ma gi yꞌo̱de hanja rꞌa yä ku bi hyoni märꞌa yä forma de hanja dä me̱päbi mä nꞌa tu̱i rä Zi Dada Jeoba. Rꞌaa bi ma ha rä Ngunsadi pa yä Evangelizador de rä Tsꞌu̱tꞌhui Äjuä o bi ma ha nuꞌu̱ yä mhuntsꞌi habu̱ mi ja mꞌe̱di rä mfatsꞌi. Yä testigo rä Jeoba nzäntho honi yä forma de hanja dä me̱päbi mä nꞌa tu̱i rä Zi Dada Jeoba. Nuꞌi dä za gi pe̱fi njabu̱ ꞌnehe (Hech. 16:9). ¿Pe xiꞌmu̱ nuꞌi xa gi ne gi umbäbi mä nꞌa tu̱i rä Zi Dada Jeoba pe gi handi ge nubye̱ hingi tsa? Ogi mbeni ge gi bale menu. Pa rä Zi Dada Jeoba gi ze̱ti ꞌne gi sigi gi yꞌo ha rä ꞌñuu, geꞌä mänꞌa xa ja ndunthi rä muui (Mat. 10:22). Ogi pumfri ge rä Zi Dada Jeoba di balora ndunthi ora handi ge gi umbäbi gatꞌho näꞌä tsu̱ꞌi. Ora gi pe̱fi njabu̱, gi udi ꞌnehe ge gi sigi gi de̱mbäbi yä paso rä Kristo (Sal. 26:1).

12, 13. ¿Te dä za gi pe̱fi mu̱ gi ꞌmu̱i desanimädo ꞌne otho ri ganä gi pe̱fi näꞌä di ho rä Zi Dada Jeoba? (1 Corintios 9:​16, 17; hyandi ꞌnehe rä recuadro « Sigi gi yꞌo ha rä ꞌñuu rä Zi Dada Jeoba»).

¹² ¿Pe rꞌabu̱ gi senti ge ya hingi xatuäbi rä Zi Dada Jeoba ko ngatꞌho ri koraso ja ngu ngi ja mä mꞌe̱tꞌo? ¿Ya hingi tini rä johya ora gi po̱ni gi ungä ntꞌo̱de? ¿Ya hingi tini rä johya ora gi nxadi rä Mäkä Tꞌofo? Mu̱ ya xkä nxixtehe ꞌne gi senti njabu̱, ogi mbeni ge rä Zi Dada Jeoba ya hingi rꞌaꞌäꞌi rä espiritu santo. Koꞌmu̱ gatꞌho dyä imperfectohu̱, nꞌandi gatꞌho dä za gä sentihu̱ o gä thogihu̱ njabu̱. Pe, ¿te dä za dä maxꞌäꞌi mu̱ gi handi ge ri johya ꞌne ri mhäte yꞌo ri käni? Dä maxꞌäꞌi ndunthi gi hyandi te bi senti rä apostol Pablo ꞌne te bi me̱fi. Mäske rä apostol Pablo mi o̱tꞌe ntsꞌe̱di po dä de̱mbäbi yä paso rä Hesu, rꞌabu̱ mi otho rä ganä pa dä me̱fi näꞌä xä ñho  (hñeti 1 Corintios 9:​16, 17, TNM). Näꞌä bi ꞌñenä: «Pe mu̱ di pe̱fi njabu̱ mäske hingi ja mä paha nixi mä ganä, di pe̱fi njabu̱ ngeꞌä di pädi ge gehnä rä responsabilida xä tꞌakägi». Ja ngu di handihu̱, rä apostol Pablo mi ꞌmu̱i desidido dä sigi dä de̱mbäbi yä paso rä Hesu, mäske rꞌabu̱ mi otho rä ganä o mi ꞌmu̱i desanimädo.

¹³ Ja ngu rä apostol Pablo, ogi hopäbi ge nuꞌu̱ ri mfeni dä dominäꞌi ora gi ꞌmu̱i desanimädo. Yꞌo̱tꞌe ntsꞌe̱di ꞌne pe̱fi näꞌä gi pädi ge di ho rä Zi Dada Jeoba mäske otho ri ganä. Gi nuhmä ge ngu ri thogi rä tiempo, ma gi hyandi ge gatꞌho näꞌä gi pe̱fi ma dä paati näꞌä gi senti ꞌne näꞌä gi mbeni. Mu̱ gi yꞌo̱tꞌe ntsꞌe̱di ꞌne hingi hye̱gi de gi xatuäbi rä Zi Dada Jeoba, gi ntini ha yä mhuntsꞌi, gi po̱ni gi ungä ntꞌo̱de ꞌne gi nxadi rä Mäkä Tꞌofo, geꞌä ma dä maxꞌäꞌi pa gi sigi gi de̱mbäbi yä paso rä Hesu mꞌe̱fa de gi nxixtehe. ꞌNehe, xa ma dä nupäbi yä mfeni yä ku de rä mhuntsꞌi ora dä hyandi gatꞌho näꞌä gi pe̱fi po gi sigi gi de̱mbäbi yä paso rä Hesu (1 Tes. 5:11).

«SIGI GI HYANDIHU̱ TE GI PE̱FIHU̱»

14. Mäske ya xkä nxixtehe, ¿por hanja dä hogi ge njatꞌä gi hyandi hanja gi pe̱päbi rä Zi Dada Jeoba ꞌne por hanja? (2 Corintios 13:5).

¹⁴ Mäske ya gä nxixtehe, dä hogi ge njatꞌä gi hyandi te mä bida gi tsitsꞌi ꞌne hanja gi pe̱päbi rä Zi Dada Jeoba (hñeti 2 Corintios 13:​5, TNM). Dä za gi hyandi mu̱ hyaxtho gi xatuäbi rä Zi Dada Jeoba, gi heti ꞌne gi nxadi rä Mäkä Tꞌofo, mu̱ gi ntini ha yä mhuntsꞌi ꞌne gi predika. Pa gi da ngue̱nda mu̱ gi pe̱päbi mänꞌa xä ñho rä Zi Dada Jeoba, dä hogi gi ñꞌanise̱: «¿Di pädi gä esplikabi märꞌa yä zi jäꞌi näꞌä udi rä Mäkä Tꞌofo? ¿Mänꞌa xä ñho nuꞌu̱ yä platika di pe̱ꞌtsi ko rä Zi Dada Jeoba ora di xatuäbi, ꞌne di udi ge di pe̱ꞌspäbi ndunthi rä komfiansa? ¿Di o̱tꞌe ntsꞌe̱di po gä ntini ha gatꞌho yä mhuntsꞌi? ¿Te dä za gä pe̱fi pa njabu̱ hindä ñꞌodä mä mfeni ora di ntini ha yä mhuntsꞌi ꞌne gä uni mänꞌa xä ñho mä komentario?». Nuya yä ntꞌani ma dä maxꞌäꞌi gi hyandi hanja dä za gi pe̱päbi mänꞌa xä ñho rä Zi Dada Jeoba ꞌne geꞌä ma dä rꞌaꞌi ndunthi rä johya.

15, 16. Mäske rä ku Robert bi rechaza nꞌa rä tentasio, ¿te bi da ngue̱nda ꞌne te dä za gä pädihu̱ de geꞌä?

¹⁵ ꞌNehe dä hogi ge njatꞌä gi hyandi ngu te mä tsꞌo nkꞌatꞌi gi pe̱ꞌtsi o ngu te mä tentasio gi handi ge ma dä jaꞌi xä ñhei gi ze̱ti. Ma gä handihu̱ te bi thogi nꞌa rä ku rä thuhu Robert. Nuni ku enä: «Nuꞌmu̱ ndi pe̱ꞌtsi 20 nje̱ya, nꞌa rä pa ha mä ꞌme̱fi, nꞌa rä ꞌme̱hñä bi ꞌñengägi: “Kabu̱ nubye̱ hinto bi ꞌmu̱i ha mä nguu, maha di mbitaꞌi. Gi nuhmä ge ma gä dibertihu̱ nꞌa tu̱i”. Ri mu̱di ngu hindä pädi te gä xipäbi. Pe mꞌe̱fa dä ju̱ rä balo pa dä xipäbi por hanja hingä ma gä ma». Di felisitahu̱ nuni ku ngeꞌä bi ze̱ti nunä tentasio. Pe mꞌe̱fa nuni ku bi hñudi bi ntso̱ꞌmi ꞌne bi hyandi  habu̱ bi fayabi. Nuni ku enä: «Di handi ge hingä mäntꞌä dä rechaza näꞌä tentasioꞌä ja ngu bi me̱fi José ora rä ꞌme̱hñä Potifar mi xaxi (Gén. 39:​7-9). Bi jakägi xä ñhei gä rechaza nunä ꞌme̱hñä. Näꞌä bi thogi, bi maxkägi pa dä da ngue̱nda ge mi ja mꞌe̱di gä japäbi mänꞌa dä ze̱di näꞌä mä amista ndi pe̱ꞌtsi ko rä Zi Dada Jeoba».

¹⁶ Zäi ge nuꞌi ꞌnehe xkä rechaza yä tentasio ꞌne di felisitaꞌihe po geꞌä. Pe näꞌä bi thogi rä ku Robert, dä za dä maxꞌäꞌi pa gi ñꞌanise̱: «¿Dä tarda o mäntꞌä dä rechaza näꞌä tentasioꞌä?». Mu̱ gi handi ge bi fayaꞌi ꞌne gä tarda nꞌa tu̱i pa gä rechaza näꞌä tentasioꞌä, ogi desanimä. Xä ñhoꞌä gi rekonose habu̱ di fayaꞌi. Xipäbi rä Zi Dada Jeoba näꞌä gi senti ꞌne hyandi te dä za gi pe̱fi pa njabu̱ nguntꞌä gi rechaza nuꞌu̱ yä tentasio ma gi ñhandui mꞌe̱fa (Sal. 139:​23, 24).

17. Ora di ze̱tihu̱ yä tentasio ja ngu bi ja rä ku Robert, ¿hanja kohi rä thuhu rä Zi Dada Jeoba?

¹⁷ Pe hingä ja huapu̱tho näꞌä bi thogi rä ku Robert. Näꞌä ku sigi pede: «Ora dä ju̱ rä balo ꞌne dä rechaza näꞌä imbitasio, näꞌä ꞌme̱hñä bi ꞌñenä: “Xä ñhoꞌä hingä tagi”. Dä ambäbi te mi ne dä mää kongeꞌä. Näꞌä ꞌme̱hñä bi ꞌñengägi: “Di pe̱ꞌtsi nꞌa mä amigo näꞌä ya hingrä testigo rä Jeoba ꞌne xä xikägi ge gatꞌho nuꞌu̱ yä bäsjäꞌi yä testigo rä Jeoba, hingä mäjuäni tsitsꞌi nꞌa rä bida xä ntꞌaxi. Hänge nuga dä hutsꞌäꞌi näꞌä tentasio pa gä handi mu̱ xa mäjuäni näꞌä bi xikägi o hinä”». Ora beni näꞌä bi thogi, rä zi ku Robert enä: «¡Hängu di johya ngeꞌä hindä mänchabi rä thuhu rä Zi Dada Jeoba!».

18. Nuꞌi ya gä nxixtehe, ¿te gi ꞌmu̱i desidido gi pe̱fi? (Hyandi ꞌnehe rä recuadro « Nunä imformäsio ma dä maxꞌäꞌi»).

¹⁸ Ora gi ꞌueke ri bida pa rä Zi Dada Jeoba ꞌne gi nxixtehe, gi udi ge gi ne gi nsundabi rä thuhu rä Zi Dada Jeoba hindi mporta te mä xuñha o te mä tentasio gi ñhandui. Rä Zi Dada Jeoba ne gi pädi ge näꞌä handi gatꞌho nuꞌu̱ yä xuñha gi ñhandui ꞌne nuꞌu̱ yä tentasio gi ze̱ti. Näꞌä handi hängu gi o̱tꞌe ntsꞌe̱di po gi yꞌo mänjuäntho ha rä ꞌñuu ꞌne di prometeꞌi dä rꞌaꞌi ndunthi yä jäpi. Rä Zi Dada Jeoba ꞌnehe ne gi pädi ge näꞌä hingi he̱kꞌäse̱ ꞌne rꞌaꞌi de rä espiritu santo ꞌne rä tsꞌe̱di pa dä za gi pe̱fi näꞌä xä ñho (Luc. 11:​11-13). Ko näꞌä rä mfatsꞌi rꞌaꞌi rä Zi Dada Jeoba, nuꞌi dä za gi sigi gi de̱mbäbi yä paso rä Hesu mꞌe̱fa de gi nxixtehe.