1. ¿Te dä pädihu̱ ha rä reunión anual de rä 2023?

 HA RÄ reunión anual de rä 2023, a xa bi nja ndunthi rä johya ngeꞌä bri esplikagihu̱ mänꞌa xä ñho rꞌa yä ntꞌudi de rä Mäkä Tꞌofo ꞌne bri ja rꞌa yä mpadi de näꞌä rä modo hanja di predikahu̱. Por ejemplo, dä pädihu̱ ge ha rä däta tribulación ora xti uadi drä huati gatꞌho yä hyate relijion, tal vez rꞌa yä jäꞌi xti hyandi njabu̱ ma dä desidi dä mꞌu̱i de rä lado rä Zi Dada Jeoba. ꞌNehe dä pädihu̱ ge dende rä nobiembre de rä 2023, yä publicador ya hingä ma dä ntrega nꞌa rä imforme de gatꞌho näꞌä bi me̱fi ha rä tꞌungä ntꞌo̱de. Nuya yä mpadi bi tꞌo̱tꞌe, ¿signifika ge ya hindi urje gä predikahu̱? Hinä, hingä geꞌä bi sikägihu̱.

2. Ngu ri thogi kada nꞌa rä pa, ¿por hanja mänꞌa xa mähyoni gä predikahu̱? (Marcos 13:10).

² Kada thogi nꞌa rä pa, mänꞌa xa di urje gä predikahu̱. ¿Por hanja? Ngeꞌä rä tiempo yꞌo ri uadi. Mähyoni hingä pumfrihu̱ näꞌä bi mää rä Hesu de hängu ma xrä predika ha nuya yä gäxä pa di ꞌmu̱ihu̱ (hñeti Marcos 13:​10, TNM). Nuꞌu̱ yä noya bi mää rä Hesu, ꞌnehe di tinihu̱ ha mä nꞌa rä testo ora bi ꞌñenä ge nuꞌu̱ yä hogä notisia de rä Noya Äjuä, ma dä tꞌungä ntꞌo̱de po gatꞌho rä Xiꞌmhai änte de dä zo̱ho̱ «rä fin» (Mat. 24:​14, TNM). Ora bi ꞌñenä rä Hesu «rä fin», signifika ora ma dä uadi gatꞌho nuꞌu̱ yä tsꞌo tꞌo̱tꞌe xä me̱fi rä Zithu nuua ha rä Xiꞌmhai. Rä Zi Dada Jeoba ya xä hñutsꞌi rä pa ꞌne rä ora de hämꞌu̱ ma dä thogi gatꞌho nuꞌu̱ yä tꞌo̱tꞌe bi mää (Mat. 24:36; 25:13; Hech. 1:7). Kada thogi nꞌa rä pa, mänꞌa di thege näꞌä rä tiempo xä tꞌumbäbi yä jäꞌi pa dä yꞌo̱de de rä Noya Äjuä (Rom. 13:11). Pe mientra tobe hinxä zo̱ho̱ rä fin, xa mähyoni gä sigihu̱ gä predikahu̱.

3. ¿Por hanja di predikahu̱?

 ³ Mähyoni ge njatꞌä gä hudihu̱ gä ntso̱ꞌmihu̱ ꞌne gä benihu̱ ge nuju̱ di predikahu̱ rä Noya Äjuä, ngeꞌä di sentihu̱ ndunthi rä mhäte po nuꞌu̱ yä hogä notisia ehe ha rä Mäkä Tꞌofo, po yä jäꞌi, ꞌne po rä Zi Dada Jeoba ꞌne rä thuhu. Pe mꞌe̱tꞌo ma gä ñähu̱ de näꞌä rä mhäte di sentihu̱ po nuꞌu̱ yä hogä notisia xtä pädihu̱ ha rä Mäkä Tꞌofo.

DI PREDIKAHU̱, NGEꞌÄ XA DI MÄDIHU̱ NUꞌU̱ YÄ HOGÄ NOTISIA EHE HA RÄ MÄKÄ TꞌOFO

4. ¿Te di sentihu̱ ora di o̱dehu̱ nꞌa rä hogä notisia?

⁴ Xi nuꞌi, ¿dä za gi beni hämꞌu̱ bi tꞌaꞌi nꞌa rä hogä notisia? Tal vez gä o̱de hanja ha nꞌa ri familia bi mꞌu̱i nꞌa rä zi ꞌue̱ne, o tal vez bri ofreseꞌi nꞌa rä ꞌme̱fi näꞌä xa ngi honi. ¿Te gä senti? Zäi ge xa gä johya ꞌne mäntꞌä xa ngi ne gi xipäbi märꞌaa. ¿Hänge geꞌä rä johya gä senti ora po ri mu̱di gä o̱de nuꞌu̱ yä hogä notisia de rä Tsꞌu̱tꞌhui Äjuä?

5. ¿Te gä senti ora gä fu̱di gä nxadi rä Mäkä Tꞌofo? (Hyandi ꞌnehe yä foto).

⁵ ¿Dä za gi beni te gä senti ꞌnehe ora gä fu̱di gä nxadi rä Mäkä Tꞌofo? Zäi ge xa gä johya ora gä pädi hanja rä Zi Dada Jeoba xa di mäꞌi, hängu mi ne gi pertenese ha rä familia, hanja di promete dä hñäki gatꞌho yä sufrimiento, hanja gi pe̱ꞌtsi rä humu̱i de gi hyandi mänꞌaki nuꞌu̱ xä du, ꞌne gä pädi mä ndunthi yä hogä notisia (Mar. 10:​29, 30; Juan 5:​28, 29; Rom. 8:​38, 39; Apoc. 21:​3, 4). Zäi ge näꞌä gä pädi ha rä Mäkä Tꞌofo bi tso̱ni asta mbo ha ri koraso (Luc. 24:32). Hää, ¡xa gä mädi näꞌä gä pädi de rä Mäkä Tꞌofo ꞌne mäntꞌä gä honi rä modo hanja gi pete märꞌaa nuꞌu̱ yä hogä notisiaꞌu̱! (Hyandi ꞌnehe te mää Jeremías 20:9).

6. ¿Te dä za gä pädihu̱ de rä esperiensia Ernest ꞌne Rose?

⁶ Nꞌa rä zi ku rä thuhu Ernest b pede ge nuꞌmu̱ mi pe̱ꞌtsi rꞌe̱tꞌa nje̱ya, rä dada bi du ꞌne njatꞌä mi ñꞌanise̱: «Xi mä dada, ¿bi ma ha mähetsꞌi o ya bi du pa nzäntho? Ndi pe̱ꞌspäbi rä embidia märꞌa yä bätsi ora ndi handi ge tobe mi te yä dada. Kasi hyaxtho ndi pa ha rä pantio, ndi  ndandiñähmu ha rä ntꞌagi mä dada, ndi xatuäbi Äjuä ꞌne ndi embäbi: “Di bänteꞌi Zi Dada, di ne gä pädi habu̱ bi ꞌmu̱i mä dada”». Nuꞌmu̱ Ernest ya mi pe̱ꞌtsi ngu 27 nje̱ya, bri ofresebi nꞌa rä curso de rä Mäkä Tꞌofo ꞌne mäntꞌä bi asepta. Xa bi johya nuꞌmu̱ bi bädi ge nuꞌu̱ xä du ya hinte pädi, ya hinte di senti ꞌne ꞌñenä go ähätho. ꞌNehe xa bi johya nuꞌmu̱ bi hyandi ge rä Mäkä Tꞌofo enä ge Äjuä ma dä gu̱tsꞌi nuꞌu̱ xä du (Ecl. 9:​5, 10; Hech. 24:15). ¡Por fin bi dimbäbi rä mpengi nuꞌu̱ yä ntꞌani xki dupäbi rä mu̱i po ndunthi yä je̱ya! Nubye̱ xa bi johya mi bädi näꞌä udi rä Mäkä Tꞌofo. Näꞌä rä ꞌme̱hñä rä thuhu Rose, ꞌnehe bi mu̱di bi nxadi rä Mäkä Tꞌofo kongeꞌä ꞌne xa bi johya ꞌnehe po näꞌä mi tꞌuti. Mꞌe̱fa, po rä je̱ya 1978, tanto Ernest ngu Rose bi nxixtehe. Ko ndunthi rä johya mi pete näꞌä xki bädi de rä Mäkä Tꞌofo yä pariente, yä amigo ꞌne gatꞌho nuꞌu̱ mi ne dä bädi. Durante nuya yä je̱ya xä thogi, Ernest ꞌne Rose xä matsꞌi thogi de 70 yä jäꞌi dä bädi de rä Zi Dada Jeoba ꞌne xä nxixtehe.

7. ¿Hanja di nheki mu̱ di mädihu̱ näꞌä xtä pädihu̱ ha rä Mäkä Tꞌofo? (Lucas 6:45).

⁷ Mu̱ ha mä korasohu̱ ja ndunthi rä mhäte po näꞌä xtä pädihu̱ de rä Mäkä Tꞌofo, geꞌä ma dä jakägihu̱ gä ñähu̱ ꞌne gä petehu̱ märꞌaa näꞌä xtä pädihu̱ (hñeti Lucas 6:​45, TNM). Mu̱ di sentihu̱ ndunthi rä mhäte po näꞌä xtä pädihu̱, ma gä sentihu̱ ja ngu bi senti nuꞌu̱ yä mu̱di kristianu nuꞌmu̱ bi ꞌñenä: «Nuje hindä za gä he̱gihe de gä mäñhe nuꞌu̱ yä tꞌo̱tꞌe xtä handihe ꞌne xtä o̱dehe» (Hech. 4:​20, TNM). Koꞌmu̱ xa di mädihu̱ nuꞌu̱ yä hogä notisia xtä tinihu̱ ha rä Mäkä Tꞌofo, hänge ko ndunthi rä johya di ne gä petehu̱ gatꞌho nuꞌu̱ yä zi jäꞌi ne dä yꞌo̱de.

DI PREDIKAHU̱ NGEꞌÄ XA DI MÄDIHU̱ YÄ JÄꞌI

8. ¿Te jakägihu̱ gä häꞌtsuäbihu̱ yä jäꞌi nuꞌu̱ yä hogä notisia de rä Noya Äjuä? (Hyandi rä recuadro « Mädi yä jäꞌi—Fatsꞌi dä me̱päbi Äjuä»; hyandi ꞌnehe rä foto).

⁸ Ja ngu rä Zi Dada Jeoba ꞌne rä Hesu, nuju̱ ꞌnehe xa di mädihu̱ yä jäꞌi (Prov. 8:31; Juan 3:16). Di sentihu̱ rä nhuekäte po gatꞌho nuꞌu̱ yä jäꞌi hingi pädi Äjuä ꞌne hinte mä humu̱i pe̱ꞌtsi (Efes. 2:12). Yä jäꞌi di ñhandui ndunthi yä xuñha ꞌne yä dumu̱i ꞌne ꞌñenä go xä zo ha yä dehe ꞌne ya dä jätꞌi. Pe ora di utihu̱ nuꞌu̱ yä hogä notisia de rä Tsꞌu̱tꞌhui Äjuä, ꞌñenä go di fatsꞌihu̱ dä bo̱ni de rä dehe pa hindä jätꞌi. Hää, näꞌä rä mhäte ꞌne rä nhuekäte di sentihu̱ po geꞌu̱, geꞌä jakägihu̱ xa gä o̱tꞌehu̱ ntsꞌe̱di po gä predikabihu̱ gatꞌho yä jäꞌi. ¿Te mä benefisio ma dä hñäni nuꞌu̱ yä jäꞌi o̱de nuya yä hogä notisia? Dende mäpaya ma dä za dä mꞌu̱i ko rä johya mäske di ñhandui yä xuñha, ꞌne ma dä tꞌumbäbi rä oportunida de dä me̱ꞌtsi nꞌa rä te pa nzäntho ha näꞌä rä rꞌayꞌo xiꞌmhai xä ꞌñepu̱ (1 Tim. 6:19).

9. ¿Te mä abiso di umbäbihu̱ yä jäꞌi ꞌne por hanja? (Ezequiel 33:​7, 8).

⁹ Rä mhäte geꞌä jakägihu̱ gä abisabihu̱ yä jäꞌi ge mänꞌitꞌho ma dä gätsꞌi nuꞌu̱ yä tsꞌo tꞌo̱tꞌe ja ha rä Xiꞌmhai (hñeti Ezequiel 33:​7, 8). Hängu di  rꞌakägihu̱ rä dumu̱i gä handihu̱ ge yä jäꞌi o mä familiahu̱ tsitsꞌi yä bida ꞌne hindi da ngue̱nda näꞌä ma dä ꞌñepu̱ mänꞌitꞌho. Ha Mateo 24:21 enä: «Ma dä nja nꞌa rä däta mbidi ja ngu näꞌä nunka xä nheki dende bi mu̱di rä xiꞌmhai asta mäpaya, ꞌne nunka ma dä nheki mä nꞌa nguꞌä». Nuju̱ di nehu̱ ge gatꞌho yä jäꞌi dä bädi ge xti hä rä juisio rä Zi Dada Jeoba nuua ha rä xiꞌmhai, mꞌe̱tꞌo ma dä huati nuꞌu̱ yä relijion hinxä ꞌñudi näꞌä mäjuäni de Äjuä, ꞌnepu̱ ma dä ꞌñehe näꞌä rä gerra de Armagedón habu̱ ma dä huati gatꞌho nuꞌu̱ yä tsꞌo tꞌo̱tꞌe di nheki (Apoc. 16:​14, 16; 17:​16, 17; 19:​11, 19, 20). Di xatuäbihu̱ rä Zi Dada Jeoba pa njabu̱ yä jäꞌi dä yꞌo̱de näꞌä rä abiso di umbäbihu̱ ꞌne dä desidi dä me̱päbi rä Zi Dada Jeoba kongekhu̱. Pe, ¿te ma dä thogi ko nuꞌu̱ yä jäꞌi ꞌne mä familiahu̱ hingi ne dä jamäsu näꞌä rä abiso di umbäbihu̱?

10. ¿Por hanja xa di urje mäpaya gä sigihu̱ gä o̱thu̱ ntsꞌe̱di po gä abisabihu̱ yä jäꞌi näꞌä ma dä ꞌñehe mänꞌitꞌho?

¹⁰ Ja ngu ya dä handihu̱ ha näꞌä Rä ntꞌudi pa gä nxadihu̱ 19, xti zo̱ho̱ näꞌä rä däta mbidi o tribulación, tal vez rä Zi Dada Jeoba ma dä desidi dä salba rꞌa yä jäꞌi ora dä hyandi ge ma dä paatä yä mfeni ꞌne nubye̱ hää ma dä gamfri ꞌne ma dä mꞌu̱i de rä lado rä Zi Dada Jeoba. ¿Gi handi por hanja xa mähyoni gä sigihu̱ gä o̱thu̱ ntsꞌe̱di po gä predikabihu̱ gatꞌho yä jäꞌi? Hää, tal vez näꞌä di xipäbihu̱ nubye̱, geꞌä ma dä beni mꞌe̱fa (hyandi ꞌnehe te mää Ezequiel 33:33). Näꞌä di utihu̱ ꞌne näꞌä rä abiso di umbäbihu̱ mäpaya yä jäꞌi, tal vez mꞌe̱fa geꞌä ma dä beni rꞌaa ꞌne ma dä desidi dä me̱päbi rä Zi Dada Jeoba kongekhu̱ änte dä uadi näꞌä rä tiempo xä hñutsꞌi rä Zi Dada Jeoba. Rä Mäkä Tꞌofo pede ge ha yä pa nuꞌu̱ yä mu̱di kristianu, nꞌa rä jäꞌi näꞌä mi su rä fadi ha rä hnini Filipos bi asepta rä Noya Äjuä ora bi hyandi ge bi nja nꞌa rä däta mbiꞌmhai. Njabu̱ ꞌnehe mäpaya, ndunthi yä jäꞌi hingi ne dä asepta rä Noya Äjuä, pe xti xotꞌi näꞌä rä däta mbidi habu̱ ma dä uadi nuꞌu̱ yä hyate relijion, tal vez rꞌa yä zi jäꞌi nubye̱ hää ma dä gamfri ꞌne ma dä mꞌu̱i de rä lado rä Zi Dada Jeoba (Hech. 16:​25-34).

DI PREDIKAHU̱ NGEꞌÄ XA DI MÄDIHU̱ RÄ ZI DADA JEOBA ꞌNE RÄ THUHU

11. ¿Hanja di eꞌspäbihu̱ rä nsu rä Zi Dada Jeoba, di pe̱ꞌtsuäbihu̱ rä tꞌekꞌei ꞌne di umbäbihu̱ rä tsꞌe̱di? (Apocalipsis 4:11; hyandi ꞌnehe yä foto).

¹¹ Pe ja mä nꞌa rä däta raso de por hanja di predikahu̱: ngeꞌä di sentihu̱ rä mhäte po rä Zi Dada Jeoba ꞌne rä mäkä thuhu. Ora di predikahu̱ di eꞌspäbi rä nsu. Hinte mä duda di pe̱ꞌtsihu̱ de näꞌä mää rä Mäkä Tꞌofo ora enä: «Mä Zi Dadaꞌihe Jeoba, nuꞌi di mereseꞌi dä tꞌetsꞌä ri nsu, dä ꞌme̱tsꞌäꞌi rä tꞌekꞌei ꞌne dä tꞌaꞌi rä tsꞌe̱di» (hñeti Apocalipsis 4:​11, TNM). ¿Te di pe̱fihu̱ pa di eꞌspäbihu̱ rä nsu rä Zi Dada Jeoba ꞌne di umbäbihu̱ rä tꞌekꞌei? Di esplikabihu̱ yä jäꞌi nuꞌu̱ yä prueba ja de ke rä Zi Dada Jeoba go geꞌä bi hyoki  gatꞌho yä tꞌo̱tꞌe ꞌne go geꞌä bi rꞌakägihu̱ rä te. ¿Te di pe̱fihu̱ pa di umbäbihu̱ rä tsꞌe̱di? Di o̱thu̱ ntsꞌe̱di po gä unihu̱ de näꞌä tsu̱kägihu̱ ngu mä tiempohu̱, mä tsꞌe̱dihu̱ ꞌne gatꞌho näꞌä di pe̱ꞌtsihu̱ pa di faxtehu̱ di uñhu̱ ntꞌo̱de rä Noya Äjuä (Mat. 6:33; Luc. 13:24; Col. 3:23). Xa di ho gä xipäbihu̱ märꞌa yä jäꞌi de mä Zi Dadahu̱ Jeoba. Pe, ¿por hanja xa mähyoni gä utihu̱ te di signifika rä thuhu?

12. Ora di predikahu̱, ¿hanja di nsundabihu̱ rä thuhu rä Zi Dada Jeoba?

¹² Koꞌmu̱ xa di mädihu̱ rä Zi Dada Jeoba, di ne gä nsundabihu̱ rä thuhu (Mat. 6:9). Hää, di ne gä partisipahu̱ pa gä xu̱kuäbihu̱ rä thuhu rä Zi Dada Jeoba ꞌne gä udihu̱ ge hingä mäjuäni nuꞌu̱ yä nkꞌuamba xä mää rä Zithu kontra Geꞌä (Gén. 3:​1-5; Job 2:4; Juan 8:44). Ora di predikahu̱, ko ndunthi mä ganähu̱ di defendebihu̱ rä thuhu rä Zi Dada Jeoba ꞌne di utihu̱ yä zi jäꞌi näꞌä mäjuäni de Geꞌä. Di nehu̱ ge gatꞌho yä jäꞌi dä bädi ge näꞌä xa di mäkägihu̱, ge näꞌä nꞌa rä Gobernante näꞌä udi rä justisia, ꞌne ge mänꞌitꞌho ma dä hä rä Gobiernu nuua ha rä Xiꞌmhai pa dä hñäki yä sufrimiento, yä tuhni ꞌne pa dä hä nꞌa rä mꞌu̱i temäꞌentho pa gatꞌho yä jäꞌi (Sal. 37:​10, 11, 29; 1 Juan 4:8). Ora di pe̱fihu̱ njabu̱, di nsundabihu̱ rä thuhu rä Zi Dada Jeoba. ¡Hängu rä johya di rꞌakägihu̱ gä ntestigohu̱ de rä Zi Dada Jeoba ꞌne gä xipäbihu̱ yä jäꞌi näꞌä mäjuäni de Geꞌä!

13. ¿Por hanja xi nꞌa rä däta nsu pa gekhu̱ dä tꞌengägihu̱ yä testigo rä Jeoba? (Isaías 43:​10-12).

¹³ ¿Dä za gi kamfri? ¡Rä Zi Dada Jeoba xä huankägihu̱ pa gä ntestigohu̱ de geꞌä! (Hñeti Isaías 43:​10-12). O̱tꞌe rꞌa yä je̱ya rä Cuerpo Gobernante bi ꞌñenä ha nꞌa rä karta: «Xi nꞌa rä däta nsu dä fäkägihu̱ ngu yä testigo rä Jeoba. ¿Hänge otho mä nꞌa rä däta nsu ngu nunä?». c Ma gä huxu̱ nꞌa rä ejemplo: Imäjinä ge toꞌo bi demandagihu̱ ꞌne di ꞌmaihu̱ ante yä autorida  ngeꞌä nꞌa rä tsꞌomꞌu̱i jäꞌi xä mängä nꞌa rä nkꞌuamba de gekhu̱ ꞌne bi akusagihu̱. Yä autorida xiꞌi ge mähyoni gi hyoni ri testigo. Zäi ge ma gi huahni nꞌa rä jäꞌi näꞌä päꞌi xä ñho, näꞌä dä za dä ꞌme̱ꞌspäbi rä komfiansa, näꞌä fädi ge mää näꞌä mäjuäni ꞌne ꞌme̱ꞌspäbi rä tꞌekꞌei. Njabu̱ ꞌnehe rä Zi Dada Jeoba, koꞌmu̱ näꞌä xa päkägihu̱ xä ñho ꞌne pe̱skägihu̱ rä komfiansa, xä huankägihu̱ ngu yä testigo pa gä mäñhu̱ ge näꞌä go geꞌä rä Zi Dada xa mäjuäni. ¿Hänge xi nꞌa rä däta nsu pa gekhu̱ dä huankägihu̱ rä Zi Dada Jeoba ngu yä testigo? Po geꞌä, di aprobechahu̱ gatꞌho yä oportunida pa gä mämbäbihu̱ rä thuhu ꞌne gä mäñhu̱ näꞌä mäjuäni de Geꞌä. Ora di pe̱fihu̱ njabu̱, di kumplihu̱ ko näꞌä rä däta nsu di pe̱ꞌtsihu̱ de gä ntestigohu̱ pa rä Zi Dada Jeoba (Sal. 83:18; Rom. 10:​13-15).

MA GÄ SIGIHU̱ GÄ PREDIKAHU̱ ASTA HABU̱ GO DÄ ꞌÑENÄ RÄ ZI DADA JEOBA

14. ¿Te di to̱ꞌmihu̱ dä thogi mänꞌitꞌho?

¹⁴ Ya mänꞌitꞌho xä ꞌñepu̱ rä däta mbidi o däta tribulación ꞌne näꞌä rä juisio ma dä hä rä Zi Dada Jeoba. Hängu di to̱ꞌmihu̱ ge märꞌa yä jäꞌi dä asepta dä me̱päbi rä Zi Dada Jeoba mähye̱gi kongekhu̱ änte de dä zo̱ho̱ näꞌä rä däta mbidi o tribulación mää rä Mäkä Tꞌofo. Xa di nupkägihu̱ mä mfenihu̱ gä pädihu̱ ge xti zo̱ho̱ näꞌä rä däta mbidiꞌä, tal vez märꞌa yä jäꞌi tobe ma dä me̱ꞌtsi rä oportunida de dä rechaza nuꞌu̱ yä tꞌo̱tꞌe xä ofrese rä Zithu pa go dä mꞌu̱i de rä lado rä Zi Dada Jeoba (Hech. 13:48).

15, 16. ¿Te di ꞌmu̱ihu̱ desidido gä pe̱fihu̱ ꞌne asta hämꞌu̱?

¹⁵ Pe mientra di to̱ꞌmihu̱ dä zo̱ho̱ näꞌä rä paꞌä, tobe di pe̱ꞌtsihu̱ rä däta nsu de gä uñhu̱ ntꞌo̱de nuꞌu̱ yä hogä notisia de rä Tsꞌu̱tꞌhui Äjuä po gatꞌho rä Xiꞌmhai. Al mismo tiempo di ja mꞌe̱di gä sigi gä abisabihu̱ yä jäꞌi ge mänꞌitꞌho ma dä zo̱ho̱ rä fin habu̱ ma dä uadi gatꞌho nuꞌu̱ yä tsꞌo tꞌo̱tꞌe di handihu̱ mäpaya. Xti zo̱ho̱ näꞌä rä juisio rä Zi Dada Jeoba, yä jäꞌi ma dä hyandi ge hää mäjuäni bi ehe de rä Zi Dada Jeoba gatꞌho näꞌä di xipäbihu̱bye̱ ora di predikabihu̱ (Ezeq. 38:23).

¹⁶ ¿Te di ꞌmu̱ihu̱ desidido gä pe̱fihu̱? Koꞌmu̱ di pe̱ꞌspäbihu̱ rä mhäte nuꞌu̱ yä hogä notisia hutsꞌi ha rä Mäkä Tꞌofo, di mädihu̱ yä jäꞌi, ꞌne mänꞌa di mädihu̱ rä Zi Dada Jeoba ꞌne rä thuhu, hänge di ꞌmu̱ihu̱ desidido gä sigihu̱ gä nxo̱nihu̱ gä predikahu̱ ko ndunthi rä johya ꞌne ko ngatꞌho mä ganähu̱ asta ora dä ꞌñenä rä Zi Dada Jeoba: «¡Ya ja gekuatho!».