1. ¿Por hanja xa bi durämu̱i Abrahán ꞌne te bi xipäbi rä Zi Dada Jeoba?

 NꞌA RÄ pa, Abrahán bi ñäui nꞌa rä e̱nxe̱. Zäi ge nunka bi pumfri näꞌä rä platika bi me̱ꞌtsi kongeꞌä. Rä Zi Dada Jeoba xki me̱hni nꞌa rä e̱nxe̱ pa dä xipäbi Abrahán ge ma xä maxtꞌi Sodoma ꞌne Gomorra. Abrahán xa bi durämu̱i hänge bi ꞌñembäbi rä Zi Dada Jeoba: «¿Hage ma gi paxtꞌä mähye̱gi tanto yä hojäꞌi ngu yä tsꞌomꞌu̱i? [ . . . ] ¿Hage näꞌä rä Nzaya de gatꞌho rä xiꞌmhai hingä ma dä me̱fi näꞌä xä ñho?». Rä Zi Dada Jeoba ko ndunthi rä pasensia bi xipäbi ge näꞌä nunka ma xä huati yä hojäꞌi. ¿Hänge näꞌä bi xipäbi Abrahán ꞌnehe di nupkägihu̱ mä mfenihu̱ mäpaya? (Gén. 18:​23-33).

2. ¿Por hanja dä za gä mꞌu̱ihu̱ seguro ge nuꞌu̱ yä juisio rä Zi Dada Jeoba di ja ko rä justisia ꞌne rä nhuekäte?

² ¿Por hanja dä za gä mꞌu̱ihu̱ seguro ge ora rä Zi Dada Jeoba di juzga yä jäꞌi, di juzga ko rä justisia ꞌne rä nhuekäte? Ngeꞌä rä Zi Dada Jeoba pädi xä ñho te ja mbo ha yä koraso yä jäꞌi (1 Sam. 16:7). Hää, pädi te ja mbo ha rä koraso kada nꞌa rä jäꞌi (1 Rey. 8:39; 1 Crón. 28:9). Rä Zi Dada Jeoba mänꞌa pe̱ꞌtsi xi ndunthi rä mfädi ke yä jäꞌi, hänge hingi tsa gä ntiendehu̱ te gatꞌho o̱tꞌe ngue̱nda ora di juzga yä jäꞌi o nuꞌmu̱ tomä nꞌa rä desision. Rä apostol Pablo bi ꞌñenä: «Hindä za toꞌo dä bädi gatꞌho nuꞌä te beni Äjuä» (Rom. 11:33).

3, 4. ¿Rꞌabu̱ te di ñꞌanihu̱ ꞌne te ma gä handihu̱ ha nunä ntꞌudi di nxadihu̱? (Juan 5:​28, 29).

³ Mäske di pädihu̱ xä ñho ge rä Zi Dada Jeoba nzäntho pe̱fi näꞌä xä ñho, zäi ge rꞌabu̱ di pe̱ꞌtsihu̱ rꞌa yä ntꞌani ngu nuꞌu̱ bi me̱ꞌtsi Abrahán. Por ejemplo, di pädihu̱ ge rä Mäkä Tꞌofo mää ge ꞌnehe «ma dä nangi de rä du [ . . . ] nuꞌu̱ bi me̱fi näꞌä xä ntsꞌo». Hänge zäi ge rꞌabu̱ di ñꞌanihu̱ mu̱ rä Zi Dada Jeoba ma dä gu̱tsꞌi ꞌnehe nuꞌu̱ yä jäꞌi bi huati mäyaꞌmu̱, ngu nuꞌu̱ yä jäꞌi mi ꞌmu̱i ha Sodoma ꞌne Gomorra (Hech. 24:15).

⁴ Ma gä handihu̱ mänꞌaki te mää rä Mäkä Tꞌofo de nuꞌu̱ yä jäꞌi ma  dä nangi de rä du. O̱tꞌe rꞌa yä zänä, rä hnini rä Zi Dada Jeoba bi esplikagihu̱ mänꞌa xä ñho te di signifika ora rä Mäkä Tꞌofo enä ge nuꞌu̱ xä du, rꞌaa «ma dä nangi pa dä te» ꞌne märꞌaa «ma dä nangi pa drä juzga» (hñeti Juan 5:​28, 29, TNM). a Po geꞌä rä hnini rä Zi Dada Jeoba xä ja märꞌa yä mpadi de näꞌä ndi ntiendehu̱ mä mꞌe̱tꞌo. Ha nunä ntꞌudi di nxadihu̱ ꞌne näꞌä xä ꞌñepu̱, ma gä handihu̱ te mä mpadiꞌu̱. Mäske di pädihu̱ ge rä Zi Dada Jeoba nzäntho di juzga xä ñho, ma gä handihu̱ te hindi pädihu̱ ꞌne te hää di pädihu̱ de näꞌä rä modo hanja di juzga.

TE HINDI PÄDIHU̱

5. ¿Te ndi kamfrihu̱ mä mꞌe̱tꞌo de nuꞌu̱ yä jäꞌi bri huati ha rä hnini Sodoma ꞌne Gomorra?

⁵ Mäyaꞌmu̱ rä Zi Dada Jeoba mismo bi huati rꞌa yä jäꞌi ngeꞌä xa myä tsꞌomꞌu̱i, ngu nuꞌu̱ yä jäꞌi mi ꞌmu̱i ha Sodoma ꞌne Gomorra. ¿Te ma dä thogi kongeꞌu̱? Mä mꞌe̱tꞌo ndi kamfrihu̱ ge nuꞌu̱ ya himi pe̱ꞌtsi rä oportunida de drä ju̱tsꞌi de rä du. Pe näꞌä «rä ꞌme̱go, rä hogä yꞌo̱de ꞌne xa ja rä mfeni» di usa rä Zi Dada Jeoba pa dä gu̱nkägihu̱, xä imbestiga mänꞌa xä ñho te mää rä Mäkä Tꞌofo. ꞌNe xä da ngue̱nda ge hindä za gä mäñhu̱ ge ya hingä ma dä nuhu de rä du nuꞌu̱ yä jäꞌi mismo rä Zi Dada Jeoba bi huati mäyaꞌmu̱. ¿Por hanja hindä za gä mäñhu̱ njabu̱?

6. Mää rꞌa de nuꞌu̱ yä mꞌiki habu̱ rä Zi Dada Jeoba bi huati yä tsꞌomꞌu̱i jäꞌi, ꞌne te hingi mää rä Mäkä Tꞌofo de geꞌu̱.

⁶ Rä Mäkä Tꞌofo pede de nuꞌu̱ yä mꞌiki habu̱ rä Zi Dada Jeoba bi huati rꞌa yä jäꞌi ngeꞌä xa myä tsꞌomꞌu̱i. Por ejemplo, nuꞌmu̱ bä ha nꞌa rä Diluvio ꞌne bi du gatꞌho nuꞌu̱ yä jäꞌi mi ꞌmu̱i ha rä Xiꞌmhai ꞌne ho̱nse̱ Noé ꞌne rä familia bi bongi. Mä nꞌa rä pa, rä Zi Dada Jeoba bi mändabi yä israelita xä yu̱tꞌi ha rä dähni Canaán ꞌne xä hyo gatꞌho nuꞌu̱ yä jäꞌi mi ꞌmu̱hni pa go ja xä mꞌu̱hniꞌu̱. Mä nꞌa rä mꞌiki, rä Zi Dada Jeoba bi mändabi nꞌa de nuꞌu̱ yä e̱nxe̱ dä hyo 185.000 yä soldado de rä dähni Asiria (Gén. 7:23; Deut. 7:​1-3; Is. 37:​36, 37). Pe rä Mäkä Tꞌofo hingi mää mu̱ rä Zi Dada Jeoba bi huati nuꞌu̱ yä jäꞌi pa nzäntho. Hänge nuju̱ hindä za gä mäñhu̱ ge nuꞌu̱ yä jäꞌiꞌu̱ ya hingä ma dä nuhu de rä du.

7. ¿Te hingi mää rä Mäkä Tꞌofo de nuꞌu̱ yä jäꞌi bi du ha rä Diluvio ꞌne de nuꞌu̱ yä jäꞌi bi tho ha Canaán? (Hyandi rä kꞌoi de rä mu̱di nxii).

⁷ Nuju̱ hindi pädihu̱ hanja mi handi rä Zi Dada Jeoba kada nꞌa de nuꞌu̱ yä jäꞌi. ꞌNehe, hindi pädihu̱ mu̱ nuꞌu̱ yä jäꞌiꞌu̱ bi me̱ꞌtsi o hinä rä oportunida de dä bädi de rä Zi Dada Jeoba ꞌne dä arrepenti. Por ejemplo, rä Mäkä Tꞌofo mää ge Noé bi predika (2 Ped. 2:5). Pe rä Mäkä Tꞌofo hingi mää mu̱ Noé bi predikabi kada nꞌa rä jäꞌi de näꞌä tiempoꞌä. ꞌNehe, rä Mäkä Tꞌofo hingi mää mu̱ nuꞌu̱ yä jäꞌi mi ꞌmu̱i ha Canaán bi me̱ꞌtsi o hinä rä oportunida de dä bädi de rä Zi Dada Jeoba ꞌne dä paati yä mꞌu̱i.

8. ¿Te hingi mää rä Mäkä Tꞌofo de nuꞌu̱ yä jäꞌi bi huati rä Zi Dada Jeoba ha Sodoma ꞌne Gomorra?

⁸ ¿Pe xi te di pädihu̱ de nuꞌu̱ yä jäꞌi mi ꞌmu̱i ha Sodoma ꞌne Gomorra? Rä Mäkä Tꞌofo mää ge ha näꞌä lugaꞌä, mi ꞌmu̱i nꞌa rä amigo rä Zi Dada Jeoba mrä thuhu Lot. Pe rä Mäkä Tꞌofo hingi mää mu̱ Lot bi predikabi o hinä gatꞌho nuꞌu̱ yä jäꞌiꞌu̱. Rä Zi Dada Jeoba bi huati nuꞌu̱ yä jäꞌi ngeꞌä xa myä tsꞌomꞌu̱i. Pe hindi pädihu̱ mu̱ nuꞌu̱ mi pädi ndaꞌä xmä ñho ꞌne ndaꞌä hinä ante yä da Äjuä. Po̱de himi pädi. Ngeꞌä rä Mäkä Tꞌofo mää ge nꞌa rä pa ndunthi yä ñꞌo̱ho̱ de Sodoma mi ne dä biola nuꞌu̱ yä ñꞌo̱ho̱ xki ñꞌoxi ha rä ngu Lot. Rꞌa de nuꞌu̱ yä tsꞌomꞌu̱i jäꞌi xa myä bäsjäꞌitho ꞌne zäi ge himi pädi ge xi nꞌa mrä däta pekado näꞌä mi pe̱fi (Gén. 19:4; 2 Ped. 2:7). Mäjuäni ge rä Zi Dada Jeoba bi ꞌñembäbi Abrahán ge ma xä huati nuꞌu̱ yä jäꞌi ngeꞌä xa myä tsꞌomꞌu̱i ꞌne ge ha nuꞌu̱ yä hniniꞌu̱ himi ꞌmu̱i nisiquiera 10 yä jäꞌi nuꞌu̱ myä hojäꞌi (Gén. 18:32). Rä Zi Dada Jeoba bi huati nuꞌu̱ yä tsꞌomꞌu̱i jäꞌi, ngeꞌä näꞌä nꞌa rä Zi Dada de gä justisia. Pe nuyu̱ yä jäꞌi himbi me̱ꞌtsi rä oportunida de dä bädi ndaꞌä xä ñho ꞌne ndaꞌä hinä ante yä da rä Zi Dada Jeoba. Po geꞌä hindä za gä mäñhu̱ ge rä Zi Dada Jeoba hingä ma dä gu̱tsꞌi de rä du rꞌa de nuꞌu̱ yä jäꞌi. Mähyoni gä benihu̱ ge rä Zi Dada Jeoba o̱tꞌe rä justisia ꞌne udi ndunthi rä nhuekäte.

9. ¿Por hanja hindi pädihu̱ te ma dä thogi ko Salomón?

 ⁹ Rä Mäkä Tꞌofo ꞌnehe pede de rꞌa yä jäꞌi nuꞌu̱ bi me̱päbi rä Zi Dada Jeoba, pe mꞌe̱fa bi ꞌuengi de rä ꞌñuu ja ngu rä rey Salomón. Näꞌä bi tꞌuti hanja dä me̱päbi rä Zi Dada Jeoba ꞌne dä ñꞌo ha rä ꞌñuu. Hänge po nꞌa rä tiempo Salomón bi me̱päbi rä Zi Dada Jeoba ko ngatꞌho rä koraso, pe mꞌe̱fa näꞌä bi ꞌuengi de rä ꞌñuu ꞌne bi xo̱kämbeni yä hyate zidada. Hänge rä Zi Dada Jeoba xa bi nkue̱, ngeꞌä ko näꞌä bi me̱fi Salomón bä epäbi xi ndunthi yä xuñha rä hnini Israel ꞌne po yä nthebetho yä je̱ya yä jäꞌi xa bi sufri. Rä Mäkä Tꞌofo mää ge mi du rä rey Salomón, bi tꞌagi habu̱ xki ntꞌagi rä rey David ꞌne yä xita (1 Rey. 11:​5-9, 43; 2 Rey. 23:13). Koꞌmu̱ Salomón bi tꞌagi ja ngu bi tꞌagi rä dada, ¿signifika ge ma drä nju̱tsꞌi de rä du? Rä Mäkä Tꞌofo hingi mää. Rꞌaa dä za dä mbeni ge Salomón hää ma drä ju̱tsꞌi de rä du ngeꞌä ha Romanos 6:7 enä: «Ora nꞌa rä jäꞌi dä du, dende näꞌä oraꞌä ya bi gutꞌi yä pekado». Pe nunä testo hingi ne dä mää ge gatꞌho nuꞌu̱ xä du pe̱ꞌtsi nderecho drä ju̱tsꞌi de rä du. Hinä, ngeꞌä rä Zi Dada Jeoba go geꞌä di desidi toꞌo dä umbäbi nunä regalo. Hää, go geꞌä di desidi toꞌo dä umbäbi mänꞌaki nunä oportunida de dä nuhu de rä du pa dä me̱päbi pa nzäntho (Job 14:​13, 14; Juan 6:44). ¿Dä za gä eñhu̱ ge Salomón ma dä hñäni nunä regalo? Hindi pädihu̱, ho̱nse̱ rä Zi Dada Jeoba go geꞌä pädi. Pe di pädihu̱ xä ñho ge rä Zi Dada Jeoba hingä ma dä komete yä injustisia xti desidi toꞌo dä gu̱tsꞌi de rä du.

TE HÄÄ DI PÄDIHU̱

10. ¿Te senti rä Zi Dada Jeoba pa ko nuꞌu̱ yä tsꞌomꞌu̱i jäꞌi? (Ezequiel 33:11; hyandi ꞌnehe rä foto).

¹⁰ (Hñeti Ezequiel 33:11). Ora rä Zi Dada Jeoba hudi ngu nꞌa rä nzaya pa dä juzga yä jäꞌi, näꞌä xikägihu̱ te di senti. Rä apostol Pedro bi yꞌofo rꞌa yä noya ngu nuꞌu̱ bi yꞌofo rä profeta Ezequiel nuꞌmu̱ bi ꞌñenä: «Jeoba [ . . . ] hingi ne dä hyandi dä du ninꞌa rä jäꞌi» (2 Ped. 3:​9, TNM). ¿Hänge di nupkägihu̱ mä mfenihu̱ nuya yä noya? Kongehnä utkägihu̱ ge rä Zi Dada Jeoba hingä ya xtä du dä huati nuꞌu̱ yä tsꞌomꞌu̱i jäꞌi pa nzäntho. Sino ke mꞌe̱tꞌo honi te mä hogä tꞌo̱tꞌe ja mbo ha yä koraso kada nꞌa de geꞌu̱ pa dä umbäbi rä nhuekäte.

11. ¿Toꞌo nuꞌu̱ hingä ma dä nuhu de rä du ꞌne por hanja di pädihu̱?

¹¹ ¿Toꞌo nuꞌu̱ hää di pädihu̱ ge hingä ma dä nuhu de rä du? Rä Mäkä Tꞌofo hingi no̱ni ndunthi yä jäꞌi. b Rä Hesu bi mää ge Judas Iscariote hingä ma dä nuhu de rä du (Mar. 14:21; hyandi ꞌnehe Juan 17:​12, TNM ꞌne rä nota de estudio). ¿Por hanja? Ngeꞌä Judas Iscariote hää mi pädi xä ñho näꞌä mi pe̱fi ꞌne bi neꞌä bi traisionä rä Hesu ꞌne bi nkontraui rä Zi Dada Jeoba (hyandi te mää Marcos 3:​29, TNM ꞌne yä nota de estudio). Rä Hesu ꞌnehe bi mää ge rꞌa de nuꞌu̱ yä jäꞌi mi gu̱tꞌi rä ꞌñuu ha yä nijä ha näꞌä rä tiempoꞌä, hingä ma dä nuhu de rä du. ¿Por hanja? Ngeꞌä nuꞌu̱ xa bi u̱tsa rä Hesu ꞌne bi yꞌo̱tpäbi ndunthi yä ntsꞌomꞌu̱i (Mat. 23:33; hyandi te mää Juan 19:​11, TNM ꞌne rä nota de estudio habu̱ enä «del hombre»). ꞌNehe, rä apostol Pablo bi mää ge nuꞌu̱ yä jäꞌi di desidi dä nkontraui rä Zi Dada Jeoba ꞌne rä hnini, mu̱ hindä arrepenti de näꞌä pe̱fi, nuꞌu̱ ꞌnehe hingä ma drä ju̱tsꞌi de rä du (Heb. 6:​4-8; 10:29).

12. ¿Por hanja di pädihu̱ ge rä Zi Dada Jeoba udi ndunthi rä nhuekäte? Mää nꞌa rä ejemplo.

¹² Ja ngu ya dä handihu̱, rä Zi Dada Jeoba xa di mäkägihu̱ ꞌne di huegägihu̱, ꞌne «hingi ne dä hyandi dä du ninꞌa rä jäꞌi». Rä Mäkä Tꞌofo pede hanja rä Zi Dada Jeoba bi ꞌñudi rä nhuekäte ko rꞌa yä jäꞌi nuꞌu̱ bi yꞌo̱tꞌe yä däta pekado. Por ejemplo, rä rey David bi zimbäbi rä ꞌme̱hñä nꞌa rä jäꞌi ꞌne bi mända dä tho näꞌä ñꞌo̱ho̱ꞌä. Näꞌä bi yꞌo̱tꞌe xi nꞌa rä däta pekado, pe rä rey David bi ꞌñudi ge xa mäjuäni bi arrepenti de näꞌä bi yꞌo̱tꞌe. Hänge rä Zi Dada Jeoba bi ꞌñudi rä nhuekäte pa kongeꞌä ꞌne bi pumbäbi (2 Sam. 12:​1-13). Rä rey Manasés bi yꞌo̱tꞌe yä däta pekado durante kasi gatꞌho rä bida. Pe nꞌa rä pa, xa bi arrepenti ko ngatꞌho rä koraso po gatꞌho näꞌä xki yꞌo̱tꞌe. Hänge rä Zi Dada Jeoba bi hueki ꞌne bi pumbäbi (2 Crón. 33:​9-16). Kongehnä di handihu̱  ge rä Zi Dada Jeoba nzäntho udi rä nhuekäte ora handi te ja mbo ha rä koraso nꞌa rä jäꞌi. Rä Zi Dada Jeoba ma dä gu̱tsꞌi de rä du rä rey David ꞌne rä rey Manasés, ngeꞌä nuꞌu̱ bi rekonose ge xki yꞌo̱tꞌe yä däta pekado, xa bi arrepenti ꞌne bi paatä yä mꞌu̱i.

13. a) ¿Por hanja rä Zi Dada Jeoba bi hueki nuꞌu̱ yä me Nínive? b) ¿Te bi mää rä Hesu de nuꞌu̱ yä me Nínive?

¹³ ꞌNehe, rä Mäkä Tꞌofo mää ge rä Zi Dada Jeoba bi hueki nuꞌu̱ yä jäꞌi mi ꞌmu̱i ha Nínive. Rä Zi Dada Jeoba bi ꞌñembäbi Jonás: «Gi ma ha rä hnini Nínive ꞌne mää näꞌä rä juisio ma gä pe̱mpäbi po nuꞌu̱ yä tsꞌo tꞌo̱tꞌe pe̱fi». Mi bädi nuꞌu̱ yä jäꞌi te ma xä thogi, xa bi arrepenti ko ngatꞌho yä koraso po nuꞌu̱ yä pekado xki yꞌo̱tꞌe. Hänge rä Zi Dada Jeoba bi hueki ꞌne bi pumbäbi yä bida. Rä Zi Dada Jeoba mänꞌa bi ꞌñudi rä nhuekäte ke rä profeta Jonás. ¿Por hanja di mäñhu̱ njabu̱? Ngeꞌä mi hyandi rä profeta Jonás ge rä Zi Dada Jeoba ya himbi huati nuꞌu̱ yä jäꞌi de Nínive, näꞌä xa bi nkue̱. Pe rä Zi Dada Jeoba bi bembäbi Jonás ge nuꞌu̱ yä jäꞌi mi o̱tꞌe nuꞌu̱ yä pekado, ngeꞌä himi «pädi ndaꞌä xä ñho ꞌne ndaꞌä xä ntsꞌo» (Jon. 1:​1, 2; 3:10; 4:​9-11). Mꞌe̱fa, rä Hesu bi no̱ni nuꞌu̱ yä me Nínive ngu nꞌa rä ejemplo pa dä ꞌñudi ge ora rä Zi Dada Jeoba bi ha nꞌa rä juisio, udi rä justisia ꞌne rä nhuekäte. Näꞌä bi ꞌñenä: «Ha näꞌä rä pa de gä juisio, nuꞌu̱ yä jäꞌi de Nínive ma dä nangi» (Mat. 12:​41, TNM).

14. ¿Te mä oportunida ma dä tꞌumbäbi nuꞌu̱ yä me Nínive xti zo̱ho̱ näꞌä rä pa de gä juisio?

¹⁴ ¿Hämꞌu̱ ma «drä juzga» yä me Nínive xti nuhu de rä du? Rä Hesu bi mää ge nuꞌu̱ ma «drä juzga» xti ꞌñepu̱ nꞌa «rä pa de gä juisio» (Juan 5:​29, TNM). Nunä pa de gä juisio, signifika näꞌä nꞌa mꞌo yä je̱ya habu̱ ma dä mända rä Kristo ngu nꞌa rä Rey. Durante nunä tiempo «ma dä nangi de rä du tanto nuꞌu̱ bi yꞌo̱tꞌe näꞌä xä ñho ꞌne nuꞌu̱ bi me̱fi näꞌä xä ntsꞌo» (Hech. 24:​15, TNM). ¿Te di signifika ora rä Mäkä Tꞌofo enä ge nuꞌu̱ «bi me̱fi näꞌä ntsꞌo» ma dä nangi pa «drä juzga»? Ngeꞌä xti nuhu de du, rä Zi Dada Jeoba ꞌne rä Hesu ma dä hyandi nuyu̱ yä jäꞌi mu̱ ꞌmu̱i dispuesto dä yꞌo̱te nuꞌu̱ yä mhända o hinä. Mu̱ nꞌa rä me Nínive ma dä nuhu de rä du pe hingä ma dä ne dä yꞌo̱te ꞌne dä xo̱kämbeni rä Zi Dada Jeoba, nuꞌmu̱ nubye̱ hää ma drä huati pa nzäntho (Is. 65:20). Pe mu̱ näꞌä jäꞌiꞌä hää ma dä mꞌu̱i dispuesto dä bädi de rä Zi Dada Jeoba ꞌne dä me̱päbi rä bolunta, nuꞌmu̱ rä Zi Dada Jeoba ma dä hyandi ngu nꞌa rä hojäꞌi ꞌne ma dä umbäbi rä oportunida de mꞌu̱i pa nzäntho (Dan. 12:2).

15. a) ¿Por hanja hindä za gä mäñhu̱ ge hingä ma drä ju̱tsꞌi de rä du nuꞌu̱ yä jäꞌi bri huati ha Sodoma ꞌne Gomorra? b) ¿Hanja di debe gä ntiendehu̱ nuꞌu̱ yä noya hutsꞌi ha Judas 7? (Hyandi rä recuadro « ¿Te signifika näꞌä bi yꞌofo Judas?»).

¹⁵ Rä Hesu bi mää ge xti zo̱ho̱ näꞌä «rä Pa de gä  Juisio mänꞌa ma dä mabi xä ñho Sodoma ꞌne Gomorra» ke nuꞌu̱ yä jäꞌi bi u̱tsa rä Hesu ꞌne himbi ne bi yꞌo̱de näꞌä mi udi (Mat. 10:​14, 15, TNM; 11:​23, 24; Luc. 10:12). Mä mꞌe̱tꞌo ndi kamfrihu̱ ge nuꞌu̱ yä jäꞌi bi tho ha Sodoma ꞌne Gomorra, ya himi pe̱ꞌtsi rä oportunida de dä nuhu de rä du. ꞌNehe ndi kamfrihu̱ ge rä Hesu bi no̱ni nuya yä hnini, ho̱nse̱ pa dä ꞌñudi ge nuꞌu̱ yä jäꞌi bi rechaza rä Hesu mänꞌa xa myä tsꞌomꞌu̱i ke nuꞌu̱ yä jäꞌi de Sodoma ꞌne Gomorra. Pe hingi njabu̱, sino ke rä Hesu mi mää ge ma dä nuhu de rä du rꞌa de nuꞌu̱ yä jäꞌi bri huati ha Sodoma ꞌne Gomorra. Näꞌä rä pa de gä juisio bi mää rä Hesu ha Mateo 10:​15, geꞌä mismo rä pa de gä juisio bi mää ora bi no̱ni nuꞌu̱ yä me Nínive. Hää, tanto nuꞌu̱ yä jäꞌi de Nínive ngu nuꞌu̱ yä jäꞌi de Sodoma ꞌne Gomorra bi me̱fi yä tꞌo̱tꞌe xa xä ntsꞌo. Hänge nuꞌu̱ yä jäꞌiꞌu̱ ku̱tꞌi ha näꞌä rä grupo bi mää rä Hesu ge «bi yꞌo̱tꞌä näꞌä xä ntsꞌo» pe ma dä me̱ꞌtsi rä oportunida de «dä nangi pa drä juzga» (Juan 5:​29, TNM). Mähyoni gä benihu̱ ge nuꞌu̱ yä jäꞌi de Nínive bi tꞌumbäbi rä oportunida pa dä arrepenti. Hänge tal vez rä Zi Dada Jeoba ꞌnehe ma dä gu̱tsꞌi rꞌa yä jäꞌi de Sodoma ꞌne Gomorra ꞌne ma dä umbäbi rä oportunida de arrepenti ꞌne dä mꞌu̱i ja ngu di mända rä Zi Dada Jeoba. Hää, tal vez asta nuju̱ ma gä pe̱ꞌtsihu̱ rä oportunida de gä utihu̱ de rä Zi Dada Jeoba ꞌne de rä Hesu.

16. ¿Te handi rä Zi Dada Jeoba de nꞌa rä jäꞌi pa dä desidi mu̱ dä gu̱tsꞌi de rä du o hinä? (Jeremías 17:10).

¹⁶ (Hñeti Jeremías 17:10). Ha nunä testo tsoogi claro näꞌä udi rä Mäkä Tꞌofo ora enä: «Nuga Jeoba, di xeni te ja mbo ha rä koraso nꞌa rä jäꞌi ꞌne di xeni te ja mbo ha rä mfeni». Hänge xti zo̱ho̱ näꞌä rä pa de dä gu̱tsꞌi nuꞌu̱ xä du, rä Zi Dada Jeoba ma dä «umbäbi näꞌä di merese, segun näꞌä xä me̱fi» kada nꞌa rä jäꞌi. Mähyoni gä benihu̱ ge rä Zi Dada Jeoba nzäntho di kumpli näꞌä di promete. Pe näꞌä hinto ma dä hyatꞌi ꞌne handi ora nꞌa rä jäꞌi di meresebi dä umbäbi rä nhuekäte. Ja ngu di handihu̱, nuju̱ di pädihu̱ ho̱nse̱ näꞌä tsoogi claro rä Mäkä Tꞌofo ꞌne hingo ri ꞌñekägihu̱ gä mäñhu̱ mu̱ nꞌa rä jäꞌi ma dä nuhu de rä du o hinä.

«NÄꞌÄ RÄ NZAYA DE GATꞌHO RÄ XIꞌMHAI» NZÄNTHO «MA DÄ ME̱FI NÄꞌÄ XÄ ÑHO»

17. ¿Te ma dä thogi ko nuꞌu̱ yä jäꞌi xä du?

¹⁷ Dende nuꞌmu̱ Adán ꞌne Eva bi mfaxhui rä Zithu ꞌne bi ꞌuengi de rä ꞌñuu rä Zi Dada Jeoba, xä du yä miyontho yä jäꞌi. Rä du näꞌä nꞌa mä nkontrahu̱ näꞌä xä hñäkuäbi rä te xi ndunthi yä jäꞌi (1 Cor. 15:26). ¿Pe te ma dä thogi ko gatꞌho nuꞌu̱ yä jäꞌi xä du? Rä Mäkä Tꞌofo mää ge 144.000 ma dä nuhu de rä du pa dä ma dä mꞌu̱i ha mähetsꞌi ngu yä e̱nxe̱  (Apoc. 14:1). Pe yä miyontho nuꞌu̱ yä ñꞌo̱ho̱ ꞌne yä ꞌme̱hñä ma dä nuhu pa dä mꞌu̱i nuua ha rä Xiꞌmhai. ¿Toꞌoꞌu̱? Ja yoho yä grupo: 1) Nunä mu̱di grupo rä Mäkä Tꞌofo embäbi «nuꞌu̱ bi yꞌo̱tꞌe näꞌä xä ñho». ¿Por hanja? Ngeꞌä nuyu̱ bi bädi ꞌne bi me̱päbi rä Zi Dada Jeoba. Nuyu̱ ma dä nuhu de rä du pa dä mꞌu̱i ha rä Paraiso durante näꞌä nꞌa mꞌo yä je̱ya ma dä mända rä Kristo. ꞌNe mu̱ hindä ꞌuengi de rä ꞌñuu rä Zi Dada Jeoba ma dä me̱ꞌtsi rä oportunida de mꞌu̱i pa nzäntho (Dan. 12:13; Heb. 12:1). 2) Nunä rä yoho rä grupo rä Mäkä Tꞌofo embäbi «nuꞌu̱ bi me̱fi näꞌä xä ntsꞌo». ¿Toꞌoꞌu̱? Geꞌu̱ nuꞌu̱ yä zi jäꞌi bi yꞌo̱tꞌe näꞌä xä ntsꞌo asta xä bi du, pe ngeꞌä nuꞌu̱ nunka bi me̱ꞌtsi rä oportunida de dä bädi de rä Zi Dada Jeoba. Po geꞌä rä Zi Dada Jeoba ma dä gu̱tsꞌi de rä du pa dä umbäbi rä oportunida de bädi de Geꞌä ꞌne de nuꞌu̱ yä mhända (Luc. 23:​42, 43). Pe xä mꞌu̱i rꞌa yä jäꞌi nuꞌu̱ xa xä ntsꞌomꞌu̱i ꞌne xä desidi dä hyandi rä Zi dada Jeoba ngu rä nkontra. Po geꞌä rä Zi Dada Jeoba hingä ma dä gu̱tsꞌi nuyu̱ yä jäꞌi de rä du (Luc. 12:​4, 5).

18, 19. a) ¿Por hanja dä za gä pe̱ꞌspäbihu̱ rä komfiansa rä Zi Dada Jeoba ge näꞌä hingä ma dä kiboka toꞌo ma dä gu̱tsꞌi de rä du ꞌne toꞌo hinä? (Isaías 55:​8, 9). b) ¿Te ma gä handihu̱ ha näꞌä Rä ntꞌudi pa gä nxadihu̱ 19?

¹⁸ Di pe̱ꞌtsihu̱ ndunthi yä raso pa gä kamfrihu̱ ge rä Zi Dada Jeoba nzäntho o̱tꞌe rä justisia asta nuꞌmu̱ bi ha nꞌa rä juisio kontra yä tsꞌomꞌu̱i jäꞌi. Ja ngu Abrahán, nuju̱ ꞌnehe dä za gä pe̱ꞌspäbihu̱ rä komfiansa rä Zi Dada Jeoba ge näꞌä nunka di kiboka ꞌne udi rä mfädi ꞌne rä nhuekäte ora bi hämpäbi rä juisio nꞌa rä jäꞌi. Nubye̱ rä Zi Dada Jeoba xä umbäbi rä autorida rä Tꞌu̱ ꞌne xä nkargobi dä juzga yä jäꞌi ꞌne otho rä duda ge xä ꞌñuti hanja dä ja (Juan 5:22). Tanto rä Zi Dada Jeoba ngu rä Hesu tsa dä hyandi te ja mbo ha rä koraso kada nꞌa rä jäꞌi (Mat. 9:4). Hänge di pädihu̱ xä ñho ge nuꞌu̱ hingä ma dä kiboka näꞌä ma dä me̱fi ko kada nꞌa de gekhu̱. Hää, otho rä duda ge nuꞌu̱ ma dä me̱fi näꞌä xä ñho.

¹⁹ Dende nubye̱, mähyoni gä desidihu̱ gä pe̱ꞌspäbihu̱ rä komfiansa rä Zi Dada Jeoba ꞌne näꞌä di desidi dä me̱fi. Mähyoni gä rekonosehu̱ ge näꞌä pädi hanja dä juzga hingä ngu nuju̱ (hñeti Isaías 55:​8, 9). ¡Hinte mä raso di pe̱ꞌtsihu̱ pa gä ntsuhu̱! Rä Zi Dada Jeoba ꞌne rä Tꞌu̱ nunka di kiboka ora ja nꞌa rä juisio. ꞌNehe hinte mä duda di pe̱ꞌtsihu̱ ge rä Hesu näꞌä mä Reyhu̱, udi xä ñho rä justisia ꞌne rä nhuekäte ja ngu rä Dada (Is. 11:​3, 4). Ha näꞌä Rä ntꞌudi pa gä nxadihu̱ 19, ma gä ñähu̱ de näꞌä hindi pädihu̱ ꞌne de näꞌä hää di pädihu̱ de hanja ma dä juzga yä jäꞌi rä Zi Dada Jeoba ꞌne rä Hesu durante näꞌä rä däta mbidi o tribulación xä ꞌñepu̱.