Ora ya gi huadi gi nxadi rä Mäkä Tꞌofo o mä nꞌa rä he̱ꞌmi, ¿di jaꞌi xä ñhei gi beni te gä nxadi? Zäi ge gatꞌho xtä thogihu̱ njabu̱. ¿Te dä za gi pe̱fi pa gi beni näꞌä gi nxadi? Ma gä handihu̱ te dä za dä maxꞌäꞌi.

Mentä gi nxadi rä Mäkä Tꞌofo o mä nꞌa rä he̱ꞌmi, ꞌmai nꞌa zi tu̱i ꞌne nubye̱ ntso̱ꞌmi näꞌä ja huadi gä heti. Geꞌä rä konseho bi umbäbi rä apostol Pablo nuꞌu̱ yä kristianu xki me̱mpäbi nꞌa rä karta. Näꞌä bi ꞌñembäbiꞌu̱: «Gatꞌho nunä xtä mäñhu̱, ho̱nse̱nä di ne dä zo ri mfenihu̱» (Heb. 8:​1, Ár ꞌRaꞌyo Nkohi Jö). Ko nuya yä noya, rä apostol Pablo bi matsꞌi nuꞌu̱ yä kristianu pa bi ntso̱ꞌmi ꞌne bi hyandi te mi ne dä ꞌñuti ko näꞌä karta xki me̱mpäbi ꞌne hanja mi nthe̱e̱ ko näꞌä ya xki tꞌuti änte.

ꞌNehe, ora gi huadi gi nxadi rä Mäkä Tꞌofo o mä nꞌa rä he̱ꞌmi, dä hogi gi ꞌueke nꞌa hängu minuto —ngu rꞌe̱tꞌa minuto— pa gi ntso̱ꞌmi te gä pädi de näꞌä ja huadi gä heti. Mu̱ hingi beni xä ñho, dä za gi hñeti mänꞌaki nuꞌu̱ yä subtítulo o nuꞌu̱ yä mu̱di noya ehe ha kada nꞌa rä parrafo. Ora gi handi ge jabu̱ nꞌa rä rꞌayꞌo tꞌo̱tꞌe näꞌä ja gä pädi, yꞌo̱tꞌe ntsꞌe̱di po gi esplika te gä ntiende pe nsinke gi heti rä he̱ꞌmi. Mu̱ gi ꞌueke nꞌa hängu minuto pa gi yo handi nuꞌu̱ yä noya xa mähyoni, hingä ma dä jaꞌi xä ñhei gi beni te gä nxadi ꞌne geꞌä ma dä maxꞌäꞌi gi hyandi hanja gi pe̱fi ha ri bida näꞌä ja huadi gä pädi.