Yä testigo rä Jeoba fatsꞌi yä mikꞌei ꞌne uti de rä Noya Äjuä ha thogi de 200 yä dähni ꞌne yä luga. Pe ho̱nse̱ 35 yä dähni, nuꞌu̱ tsu̱päbi yä zi bojä ꞌne jutꞌise̱ yä gasto. Nuꞌmu̱, ¿habu̱ bi po̱ni rä bojä pa dri jutꞌi nuꞌu̱ yä gasto ha nuꞌu̱ märꞌa yä dähni habu̱ nuꞌu̱ yä testigo rä Jeoba bi ꞌmu̱hni, hingi tsu̱päbi pa dä gutꞌäse̱ yä gasto?

 Rä Cuerpo Gobernante de yä Testigo rä Jeoba, di nkargo dä hyandi te thogi ꞌne te di japäbi mꞌe̱di yä testigo rä Jeoba de gatꞌho rä Xiꞌmhai. Hänge nuꞌu̱ yä donäsio di resibi, xa di su ꞌne di usa xä ñho. Mu̱ nꞌa rä Ngu de gä ꞌMe̱fi de yä testigo rä Jeoba —tꞌembäbi ꞌnehe yä ngu Betel— häni ndunthi yä donäsio ꞌne pongibi; nuꞌmu̱ pe̱mpäbi nunä bojä nuꞌu̱ märꞌa yä ngu Betel habu̱ bi japäbi mꞌe̱di rä bojä. Geꞌä mi pe̱fi ꞌnehe nuꞌu̱ yä mu̱di kristianu: mi usa näꞌä rä bojä mi pongibi pa mi fatsꞌi nuꞌu̱ mi japäbi mꞌe̱di o mi othobi, ꞌne njabu̱ mi asegura ge gatꞌho mi pe̱ꞌtsi näꞌä mi japäbi mꞌe̱di (2 Corintios 8:14).

 ¿Te di senti nuꞌu̱ yä testigo rä Jeoba ora häni näꞌä pongibi märꞌa yä testigo rä Jeoba de märꞌa yä dähni? Ha rä dähni Tanzania, thogi de mäde nuꞌu̱ yä zi jäꞌi bi ꞌmu̱hni; di ñuni hyaxtho ko ho̱nse̱ 2 yä dolar. Hänge rꞌa de nuꞌu̱ yä ku bi ꞌmu̱hni —por ejemplo nuꞌu̱ yä ku de rä mhuntsꞌi Mafinga—bi usa näꞌä rä bojä bi ꞌme̱mpäbi pa bi hyoki yä Ngu de gä Mhuntsꞌi. Nuꞌu̱ yä zi kuꞌu̱ bi ꞌñenä: «Dende nuꞌmu̱ bi thoki mä Ngu de gä Mhuntsꞌihe, mänꞌa xä ntini mä ndunthi yä zi jäꞌi. Di umbäbihe njamädi rä hnini rä Zi Dada Jeoba ꞌne gatꞌho yä ku de rä Xiꞌmhai ngeꞌä faxkägihe. Nubye̱ hää di pe̱ꞌtsihe nꞌa rä luga xa mähotho habu̱ di xo̱kämbenihe rä Zi Dada Jeoba».

 Nuꞌu̱ yä testigo rä Jeoba bi ꞌmu̱i ha Sri Lanka, xä thogi yä ñꞌäbojä po ränge näꞌä rä COVID-19 xä nja, ꞌne kasi bi othobi te dä zi. Hänge nuyu̱ yä zi ku —entre geꞌu̱ rä zi nju Imara Fernando ꞌne rä zi metsi—, bi hñäni rä mfatsꞌi ko nuꞌu̱ yä donäsio o̱tꞌe märꞌa yä ku de märꞌa yä dähni. ¡Hängu di jamädi yä zi ku! Rä nju Imara ko rä zi bätsi, bi yꞌofo nꞌa rä zi he̱ꞌmi habu̱ bi ꞌñenä: «Di rꞌaꞌäꞌihe ndunthi rä jamädi po näꞌä rä mhäte ꞌne rä mfatsꞌi xkä rꞌakägihe durante nuya yä pa. Hängu di johyahe ngeꞌä di pertenesehe ha nunä dängä familia. Di sigihe di xatuäbihe rä Zi Dada Jeoba pa dä matsꞌi gatꞌho mä zi kuhu̱ durante nuya yä gäxä pa di ꞌmu̱hu̱».

 Hindi mporta habu̱ ꞌmu̱i yä testigo rä Jeoba, gatꞌho xa di ho dä uni de näꞌä pe̱ꞌtsi pa dä matsꞌi märꞌa yä zi ku. Por ejemplo: nꞌa rä testigo rä Jeoba rä thuhu Enosh, bi hyokä nꞌa rä zi tꞌu̱kä kaha habu̱ e̱ntꞌä rä zi ꞌmo̱ñhä ꞌne di muntsꞌi pa dä me̱hni ꞌne njabu̱ drä fatsꞌi nuꞌu̱ yä familia xa thogi rä ñhoya. Mä nꞌa rä testigo rä Jeoba rä thuhu Guadalupe Álvarez ꞌmu̱i ha Mꞌonda, ꞌne mäske hingi tähä ndunthi rä bojä, nunä zi nju ꞌnehe xa di ho dä uni yä zi donäsio pa drä fatsꞌi märꞌaa. Näꞌä enä: «Di umbäbi njamädi rä Zi Dada Jeoba po rä mhäte ꞌne rä ñhojäꞌi. Di pädi ge mä zi donäsio ꞌne yä donäsio märꞌa yä zi ku, ma dä matsꞌi nuꞌu̱ yä zi ku thogi yä xuñha ꞌne yä ñꞌäbojä.

 Nuꞌu̱ yä ngu Betel de märꞌa yä dähni, xa di johya ngeꞌä pe̱hni nuꞌu̱ yä donäsio pongi pa nuꞌu̱ yä testigo rä Jeoba bi ꞌmu̱i ha märꞌa yä dähni de rä Xiꞌmhai. Anthony Carvalho, nꞌa de nuꞌu̱ yä testigo rä Jeoba di forma rä Comité de rä ngu Betel de Brasil, enä: «Durante ndunthi yä je̱ya, märꞌa yä ngu Betel bi maxkägihe ko näꞌä rä bojä mi jakägihe mꞌe̱di. Näꞌä rä bojä bi rꞌakägiheꞌu̱, bi maxkägihe ndunthi ꞌne xa bi hñutsꞌi rä ndunthi nuꞌu̱ yä testigo rä Jeoba ha nunä dähni. Ko rä tiempo, ha nunä dähni bi mpadi yä kosa ꞌne ya hindi thogihe rä ñꞌäbojä. Nubye̱ asta tsa gä unihe mä zi donäsiohe pa gä fatsꞌihe märꞌa yä ku nuꞌu̱ bi ꞌmu̱i ha märꞌa yä luga de rä Xiꞌmhai. Yä ku de nunä dähni, pädi xä ñho ge di tꞌuti de rä Noya Äjuä yä zi jäꞌi de gatꞌho rä Xiꞌmhai, ꞌne ja ngu nuꞌu̱ yä mu̱di kristianu, ko ndunthi rä johya faxte ko yä zi ꞌmo̱ñhä».

 ¿Hanja dä za yä testigo rä Jeoba dä matsꞌi nuꞌu̱ yä ku bi ꞌmu̱i ha märꞌa yä luga ꞌne bi thogi yä xuñha o yä ñꞌäbojä? Hindi debe dä me̱hni directamente yä donäsio ha nuꞌu̱ yä ngu Betel de marꞌa yä dähni. Mänꞌa dä hogi dä yꞌe̱ntꞌä yä zi ꞌmo̱ñhä ha näꞌä rä zi kaha de gä donäsio ja ha yä Ngu de gä Mhuntsꞌi habu̱ enä «Pa näꞌä rä mäkä ꞌme̱fi di tꞌo̱tꞌe po gatꞌho rä xiꞌmhai» o ꞌnehe dä za dä yu̱tꞌi ha näꞌä página habu̱ enä donate.pr418.com pa dä ungä yä zi donäsio. ¡Hindi mporta hängu rä ndunthi näꞌä gi unihu̱; gatꞌho ri zi donäsiohu̱ di bale ꞌne faxte ndunthi!