Gatꞌho yä je̱ya, ndunthi de nuꞌu̱ toꞌo umbäbi Äjuä gatꞌho de yä tiempo po mäxo̱ge rä Xiꞌmhai, di ntini ha näꞌä rä Ngunsadi Galaad de rä Watchtower. Nunä di tꞌo̱tꞌe ha rä Centro Educativo de rä Watchtower, bi ja ha Patterson (Nueva York). * Ha nunä ngunsadi, nuꞌu̱ yä estudiante di tꞌuti hanja dä za dä kumpli mänꞌa xä ñho nuꞌu̱ yä ꞌme̱fi xä tꞌumbäbi ha rä hnini Äjuä. Näꞌä di nxadi ha Galaad nupäbi yä mfeni pa dä mfaxte ha yä mhuntsꞌi ꞌne ha yä ngu Betel de gatꞌho rä Xiꞌmhai.

 Ha rä Ngunsadi Galaad dä za dä ma yä Testigo de gatꞌho rä Xiꞌmhai. Ja ngu ha näꞌä rä clase 147 bi tꞌo̱tꞌe ha rä je̱ya 2019, bi ntini 56 yä estudiante de 29 yä dähni. Nuꞌu̱ yä estudiante pa ha nunä ngunsadi pe̱päbi Äjuä ngu yä betelita, yä misionero, yä precursor especial o yä superintendente de gä circuito.

 Pe änte de dä mu̱di nunä rä ngunsadi di thandi te gatꞌho ma dä ja mꞌe̱di. Näꞌä rä Departamento de Viajes de rä Central Mundial tai nuꞌu̱ yä boleto de gä avión pa toꞌo ma dä ntini ha nunä ngunsadi. Ha näꞌä rä clase 147, po kada nꞌa de nuꞌu̱ yä estudiante xpi ꞌñehe de mä nꞌa rä dähni, bi gasta 1.075 yä dolar pa bri thambäbi yä boleto de gä avión pa bi ma ꞌne pa bä pengi de Patterson. Nuꞌu̱ yä estudiante de yä isla Salomón bi gu̱ 4 yä avión pa bi za bi zo̱ni asta Patterson ꞌnepu̱ bi gu̱ mä 3 pa bi mengi ha yä nguu. Bi ja nꞌa rä biahe de gä 35.400 yä kilometro (22.000 millas). Kada nꞌa rä boleto bi bale 2.300 yä dolar. Pa bri orra rä bojä, näꞌä rä Departamento de Viajes bi usa nꞌa rä programä pa bi dini rꞌa yä boleto mänꞌa hinxä mädi. Rä Departamento de Viajes ꞌnehe di usa nuꞌu̱ yä crédito uni yä avión o nuꞌu̱ yä milla di tꞌumbäbi nuꞌu̱ xa di biaha njatꞌä.

 Ndunthi de nuꞌu̱ yä estudiante di japäbi mꞌe̱di nꞌa rä visa pa dä yu̱tꞌi ha Estados Unidos. Hänge rä Departamento de Asuntos Legales de rä central mundial fatsꞌi pa dä gu̱ki nꞌa rä visa de gä estudiante. Pa dä thoki nuya yä he̱ꞌmi tsitsꞌi ngu 510 yä dolar po kada nꞌa rä jäꞌi.

 ¿Te mä jäpi di hänihu̱ de nuꞌu̱ yä estudiante? Hendra Gunawan faxte de gä anciano ha nꞌa rä mhuntsꞌi ha rä Sureste Asiático habu̱ di ntini nꞌa de nuꞌu̱ yä medinthäti bi ma ha rä Ngunsadi Galaad, enä: «Mä mꞌe̱tꞌo himi ja yä precursor regular ha rä mhuntsꞌi. Pe nuꞌmu̱ bi zo̱ho̱ nunä medinthäti ꞌne ko näꞌä rä johya bi ꞌñudi, bi nupäbi yä mfeni märꞌaa pa bi mprekursor ꞌnehe. Mꞌe̱fa nꞌa rä nju de mä mhuntsꞌihe bi ma ha näꞌä rä Ngunsadi pa yä Evangelizador de rä Tsꞌu̱tꞌhui Äjuä».

 Sergio Panjaitan de rä ngu Betel Sureste Asiático ꞌne di mpe̱fi ko rꞌa de nuꞌu̱ yä ku xä ntini ha rä Ngunsadi Galaad, enä: «Näꞌä rä ntꞌudi xä hñäni nuya yä ku xa nꞌa rä dängä jäpi pa gehyu̱ ꞌne pa gekägihe ꞌnehe. ¡Nuyu̱ xa pädi ndunthi! Pe en lugar de dä senti ge mänꞌa xa pädi ke märꞌaa, nuyu̱ utkägihe näꞌä pädi. Njabu̱ di nupkä mä mfenihe ꞌne nuje di nupäbihe yä mfeni märꞌaa».

 ¿Hanja di njutꞌi gatꞌho nuꞌu̱ yä gasto de nunä ngunsadi? Ko nuꞌu̱ yä donäsio gi unihu̱ pa mä mäkä ꞌme̱fihu̱. Ndunthi de geꞌu̱ di tꞌo̱tꞌe po mäde de donate.pr418.com o de märꞌa yä forma. Di jamädiꞌihe ndunthi po gatꞌho nuꞌu̱ yä donäsio gi unihu̱. Kongehya tsa di tꞌo̱tꞌe nunä rä ngunsadi pa yä ku de gatꞌho rä Xiꞌmhai.