¡ÑHOKI ꞌNE NDO̱ꞌMIHU̱!
2023: ¿Dä za gä to̱ꞌmihu̱ nꞌa rä hogä mꞌu̱i? | ¿Te udi rä Biblia?
Nubye̱ bi mu̱di rä je̱ya 2023, di nehu̱ ge tanto nuju̱ ngu mä familia dä magihu̱ xä ñho. Pe, ¿mäjuäni dä za gä to̱ꞌmihu̱ dä nja yä hogä tꞌo̱tꞌe?
Rä Biblia rꞌakägihu̱ nꞌa rä humu̱i
Rä Mäkä Tꞌofo udi ge nuꞌu̱ yä xuñha di thogihu̱ mäpaya mänꞌitꞌho ma dä uadi. ¿Hänge xi nꞌa rä hogä notisia? Ha Romanos 15:4 enä: «Ngeꞌä gatꞌho näꞌä bi tꞌofo mäyaꞌmu̱, bi tꞌofo pa dä ꞌñutkägihu̱, [...] ꞌne njabu̱ gä e̱ntꞌä ha mä mfenihu̱ näꞌä di to̱ꞌmihu̱».
Mu̱ gi ne gi pädi mä nꞌa tu̱i rä imformäsio de nuꞌu̱ yä promesa xä ja Äjuä, hyandi rä artikulo «Äjuä ma dä hä nꞌa rä mꞌu̱i temäꞌentho».
Gä pe̱ꞌtsihu̱ nꞌa rä humu̱i näꞌä rꞌakägihu̱ rä tsꞌe̱di
Näꞌä rä humu̱i rꞌakägihu̱ rä Mäkä Tꞌofo ꞌñenä ngu nꞌa «rä ancla» (Hebreos 6:19). Näꞌä rä humu̱i di pe̱ꞌtsihu̱ pa xudi ndämäni faxkägihu̱ ora di thogihu̱ po yä xuñha, rꞌakägihu̱ rä tsꞌe̱di pa gä ze̱tihu̱ yä tsꞌo thogi ꞌne faxkägihu̱ pa gä ꞌmu̱ihu̱ ko rä johya dende mäpaya. Hyandi nuya yä ejemplo:
Pädi hanja rä Biblia bi matsꞌi nꞌa rä jäꞌi pa bi däpäbi nꞌa rä bisio. Hyandi rä bideo Dä u̱tsa näꞌä mä mꞌu̱i ndi pe̱ꞌtsi.
Pädi hanja näꞌä rä humu̱i di pe̱ꞌtsihu̱ pa xudi ndämäni faxkägihu̱ ora tu nꞌa mä jäꞌihu̱ näꞌä xa di mädihu̱. Hyandi nunä bideo rä thuhu Rä du bi hä ndunthi rä u̱gi.
Japi dä ze̱di ri komfiansa ha nuꞌu̱ yä promesa Äjuä
Ndunthi yä jäꞌi pe̱ꞌtsi rä humu̱i ge nunä je̱ya ma dä mabi mänꞌa xä ñho, pe nixi nꞌa dä geꞌu̱ pädi mu̱ ma dä njabu̱ o hinä. Pe hingi thogi njabu̱ ko näꞌä rä humu̱i rꞌakägihu̱ rä Mäkä Tꞌofo. ¿Por hanja hinä? Ngeꞌä nuꞌu̱ yä promesaꞌu̱ go xä yꞌo̱tꞌe rä Zi Dada Jeoba, a ꞌne näꞌä «hingi pädi dä ñhate» (Tito 1:2). Jeoba hingä ho̱nse̱ pe̱ꞌtsi rä tsꞌe̱di pa dä kumpli gatꞌho näꞌä xä promete, ꞌnehe «tsa dä me̱fi gatꞌho näꞌä go dä neꞌä» (Salmo 135:5, 6).
Nuꞌi dä za gi pe̱ꞌspäbi rä komfiansa nuꞌu̱ yä promesa Äjuä hutsꞌi ha rä Mäkä Tꞌofo. Di mbitaꞌihe gi nxadi rä Noya Äjuä pa gi japi dä ze̱di ri komfiansa po Äjuä (Hechos 17:11). ¿Gi hohmä gi hñäni nꞌa rä curso de rä Mäkä Tꞌofo nsinke te gi jutꞌi? ¡Ha nunä je̱ya 2023 dä za gi tsu̱di nꞌa rä humu̱i xa mähotho!
a Jeoba geꞌä rä thuhu Äjuä (Salmo 83:18).