Ha rä je̱ya 2023, nuꞌu̱ yä bämhñä jäꞌi bi da ngue̱nda ge xa mähyoni dä tꞌumbäbi rä mfatsꞌi nuꞌu̱ yä zi jäꞌi di sentise̱. Pe, ¿dä za nuya yä bämhñä jäꞌi dä matsꞌi nuꞌu̱ di sentise̱?

•   «Nuꞌu̱ yä jäꞌi di sentise̱ ꞌne nuꞌu̱ hindi ho dä kombibi ko märꞌaa dä za dä hñeni, dä zo̱päbi märꞌa yä xuñha o asta dä dagi ha yä bisio. Pe, pa dä za gä täpäbihu̱ nuya yä xuñha, mähyoni ge hyaxtho gä japäbihu̱ dä ze̱di näꞌä rä ntsitsꞌi di pe̱ꞌtsihu̱ ko märꞌaa». (Vivek Murthy, director general de Salud Pública de Estados Unidos). a

 Ndunthi yä jäꞌi xä zo̱ho̱ xä sentise̱ mäske ꞌmu̱hui o di ñꞌoui mä ndunthi yä jäꞌi. Mäske hindi pädihu̱ por hanja yä jäꞌi di senti njabu̱, rä Mäkä Tꞌofo uni yä hogä tsꞌofo de hanja dä za dä japi dä ze̱di rä ntsitsꞌi ko nuꞌu̱ yä amigo pa njabu̱ hindä sentise̱.

 Xipäbi märꞌa näꞌä gi senti ꞌne pädi gi yꞌo̱de ora märꞌaa go xiꞌi te senti. Ora gi ñäui nꞌa ri amigo hingä ho̱nse̱ gi xipäbi näꞌä gi senti, ꞌnehe dä hogi gi ꞌueke rä tiempo pa gi yꞌo̱de te senti ꞌne te tupäbi rä mu̱i. Mu̱ gi pe̱fi njabu̱, mänꞌa ma dä te näꞌä rä ntsitsꞌi gi pe̱ꞌtsihu̱.

•   Näꞌä udi rä Mäkä Tꞌofo: «Ogi hoñhu̱ rä ñho pa geꞌäse̱hu̱, hyoñhu̱ pa märꞌa ꞌnehe» (Filipenses 2:4).

 Hyoni gi pe̱ꞌtsi märꞌa yä amigo. Ogi honi yä amigo se̱he̱ de ri je̱ya. Hyoni gi ntsitsꞌi ko yä bätsi, yä zi däta jäꞌi o asta ko yä jäꞌi de märꞌa yä dähni.

•   Näꞌä udi rä Mäkä Tꞌofo: «Xoki ri korasohu̱» (2 Corintios 6:13).

 Pa gi pädi hanja gi pe̱ꞌtsi yä hogä amigo, hñeti rä artículo «Cómo saciar la sed de amistad».