¡ÑHOKIHU̱ ꞌNE NDO̱ꞌMIHU̱!
Ya bi uadi nꞌa nje̱ya de bi mu̱di rä gerra ha Ucrania | ¿Te udi rä Biblia?
Rä pa mbehe 24 de rä febrero de rä 2023, bi uadi nꞌa nje̱ya dende nuꞌmu̱ bi mu̱di rä gerra entre Ucrania ꞌne Rusia. Segun rꞌa yä imforme enä ge po gatꞌho nuꞌu̱ yä soldado ꞌmu̱i erido ꞌne nuꞌu̱ xä du —tanto de yä soldado Rusia ꞌne Ucrania—, ya tsu̱di ngu 300.000. Pe ꞌnehe, ya xä du thogi de 30.000 yä jäꞌi. Pe tꞌenä ge mänꞌa thogi rä ndunthi nuꞌu̱ yä jäꞌi ꞌne yä soldado xä du po ränge nunä rä gerra.
Asta mäpaya, hinte mä seña ja ge mänꞌitꞌho ma dä udi nunä rä gerra.
«Kasi nꞌa nje̱ya mꞌe̱fa dende nuꞌmu̱ Rusia bi mu̱ti rä gerra kontra Ucrania, hinte mä seña ja de ke mänꞌitꞌho ma dä uadi nunä gerra. Nixi fädi xä ñho toꞌo yꞌo ri ntäte ꞌne ninꞌa de geꞌu̱ hingi ꞌmu̱i dispuesto dä ja nꞌa rä kohi pa dä uadi nunä rä gerra (NPR [radio pública nacional de Estados Unidos], 19 de rä febrero de rä 2023).
Po gatꞌho rä xiꞌmhai, yä mꞌotho yä zi jäꞌi xa tuyämu̱i ꞌne di sufri ndunthi po ränge nunä rä gerra ꞌne märꞌa yä tuhni. ¿Te mä humu̱i uni rä Mäkä Tꞌofo pa xudi ndämäni? ¿Ma dä zo̱ho̱ rä pa habu̱ dä mꞌe̱di yä gerra?
Äjuä ma dä hñäki yä gerra
Rä Mäkä Tꞌofo udi ge Äjuä ma dä hä nꞌa rä gerra, pe hingä pa dä huati gatꞌho yä jäꞌi, sino pa dä salba nuꞌu̱ yä zi jäꞌi di numäñho. Nunä rä gerra fädi ngu rä Armagedón, ꞌne po mäde de gehnä, Äjuä ma dä hñämpäbi ngue̱nda yä jäꞌi (Apocalipsis 16:14, 16). Hää, Äjuä ma dä hñämpäbi ngue̱nda o ma dä huati nuꞌu̱ yä gobiernu ja mäpaya, ngeꞌä po yä tsꞌokiꞌu̱ ndunthi yä zi jäꞌi xa di sufri. Pa gi pädi hanja rä gerra de Armagedón ma dä hä nꞌa rä mꞌu̱i temäꞌentho, hyandi nuya yä artikulo: