Koꞌmu̱ rä Hesu bi tꞌo̱tꞌpäbi yä ntsꞌomꞌu̱i, näꞌä di ntiendebi yä zi jäꞌi. Bri ju̱ꞌspäbi yä nkꞌuamba, bri nhaꞌmpäbi, bri juzga, bri kondenä nsinke nꞌa rä raso, ꞌne asta bi tho. Mäske hinte mä tsꞌoki xki yꞌo̱tꞌe, bi uni rä te po märꞌaa «ngu nꞌa rä rescate po ndunthi yä jäꞌi» (Mateo 20:28; Juan 15:13). Mäpaya, go geꞌä rä Rey de rä Tsꞌu̱tꞌhui Äjuä. Mänꞌitꞌho ma dä huati pa nzäntho rä ntsꞌomꞌu̱i ꞌne ma dä yꞌo̱tꞌe rä justisia po gatꞌho rä Xiꞌmhai (Isaías 42:3).

 Rä Mäkä Tꞌofo udi tengu ma dä nheki rä Xiꞌmhai nuꞌmu̱ rä Hesu dä huati rä ntsꞌomꞌu̱i:

•   «ꞌNe tsꞌu̱tho yä pa di ꞌme̱di pa dä uadi gatꞌho yä tsꞌomꞌu̱i jäꞌi; ꞌne ma gi hyoni habu̱ mi ꞌmu̱i, pe ya hingä ma gi hyandi. Pe nuꞌu̱ yä mänxo jäꞌi, geꞌu̱ ma dä mꞌu̱i ha rä xiꞌmhai, ꞌne ma dä me̱ꞌtsi nꞌa rä mꞌu̱i temäꞌentho ko ndunthi rä johya» (Salmo 37:10, 11).

 ¿Hanja dä za gä udihu̱ ge di jamädibihu̱ rä Hesu po gatꞌho näꞌä ya xä me̱fi ꞌne po gatꞌho näꞌä ma dä sigi dä me̱fi po gekhu̱ xudi ndämäni? Ha Lucas 22:19, rä Hesu bi ꞌñembäbi yä de̱ni dä yꞌo̱tꞌe nꞌa rä Fenäte de rä du. Po rängeꞌä, tatꞌä je̱ya yä testigo rä Jeoba di ntini pa dä yꞌo̱tꞌe nunä Fenäte. Di mbitaꞌihe gi ntini kongekhe ha rä Fenäte de rä du rä Hesu nunä rä je̱ya. Ma dä tꞌo̱tꞌe rä pa ndomingo 24 de rä märso de rä 2024.

Hyoni habu̱ ma dä tꞌo̱tꞌe rä Fenäte