Ha nuꞌu̱ 30 yä je̱ya xä thogi yä jäꞌi xä senti ge ndunthi yä dähni mi ntsitsꞌi xä ñho entre geꞌu̱ ꞌne mi ja rä orden. Pe po gatꞌho nuꞌu̱ yä xuñha di nheki mäpaya, yä jäꞌi tuyämu̱i po näꞌä te dä za dä thogi.

•   «Yä jäꞌi tuyämu̱i ge po näꞌä rä gerra bi ja ha Gaza dä afektabi nuꞌu̱ yä hnini kohi getbu̱ de gehni, ngeꞌä Israel ꞌne Hizbulá fo̱te yä bomba habu̱ di nzo̱te ko rä Líbano» (Reuters, 6 de rä enero de rä 2024).

•   «Nuꞌu̱ yä grupo di kontrola rä hnini Irán xä mu̱di xä yꞌo̱tꞌe yä tuhni ko märꞌa yä luga, ꞌne Irán xä mu̱di xä hyoki mänꞌaki yä bomba nuꞌu̱ xä o̱tꞌe ndunthi rä dañu. Ha nubye̱ Rusia ꞌne China di umbäbi rä mfatsꞌi Irán pa dä ntuhni ko nuꞌu̱ yä dähni de rä Occidente» (The New York Times, 7 de rä enero de rä 2024).

•   «Po näꞌä rä gerra ja entre Rusia kontra Ucrania, sigi o̱tpäbi ndunthi rä dañu rä dähni Ucrania» (UN News, 11 de rä enero de rä 2024).

•   «Ko rä ndunthi näꞌä rä bojä ꞌne yä soldado pe̱ꞌtsi China, po näꞌä rä orgullo senti rä hnini Taiwán, ꞌne po näꞌä rä kue̱ ja entre Pekín ꞌne Washington dä za dä japi dä nja nꞌa rä tuhni» (The Japan Times, 9 de rä enero de rä 2024).

 ¿Te mängä rä Biblia de nuꞌu̱ yä tuhni ja entre yä hnini mäpaya? ¿Ma dä japi dä nja nꞌa rä gerra ha gatꞌho rä Xiꞌmhai?

 Rä Biblia himbi mää habu̱ ma xä nja o toꞌo ma xä yꞌo̱tꞌe nuꞌu̱ yä gerra thogi mäpaya. Pe hää bi mää ge po nuꞌu̱ yä tuhni di nheki mäpaya, hingä ma xä nja rä paz ha rä Xiꞌmhai (Apocalipsis 6:4).

 Rä mfistꞌofo Daniel bi mää ge «ha nuꞌu̱ yä gäxä pa», nuꞌu̱ yä gobiernu de yä dähni ma xä nju̱tsꞌi nꞌa ngu mä nꞌaa ꞌne mä xä ntuhni pa xä nheki toꞌo ri ꞌñepäbi dä mända. Ora ja nꞌa rä tuhni ja di nhekibu̱ hängu yä soldado pe̱ꞌtsi ꞌne hängu rä bojä ꞌmu̱i dispuesto dä gasta (Daniel 11:40, 42, 43).

 Rä Biblia enä ge nuꞌu̱ yä xuñha di nheki ha nunä rä xiꞌmhai mänꞌa ma dä ndunthi. Rä Hesu bi ꞌñenä: «Ma dä nja nꞌa rä däta tribulación ja ngu näꞌä nunka xä nheki dende bi mu̱di rä xiꞌmhai asta mäpaya, hinä, nixi ma dä nheki mä nꞌa nguꞌä» (Mateo 24:21). Näꞌä «rä däta tribulación» ma dä uadi ora xti zo̱ho̱ näꞌä rä gerra rä thuhu Armagedón, geꞌä rä gerra Äjuä «Näꞌä pe̱ꞌtsi gatꞌho rä tsꞌe̱di» (Apocalipsis 16:14, 16).

 Pe rä Armagedón hingä ma dä huati yä mexiꞌmhai, sino ke ma dä ñäni. Ko nunä rä gerra, Äjuä ma dä huati gatꞌho yä gobiernu, ngeꞌä po yä tsꞌokiꞌu̱ xa nja ndunthi yä gerra. Mu̱ gi ne gi pädi mä nꞌa tu̱i hanja rä Armagedón ma dä hä rä paz pa nzäntho hñeti nuya yä artículo:

•   «¿Qué es el Armagedón?»

•   «La llegada de Armagedón es una buena noticia»