Pa nunä 27 de rä enero de rä 2023 ma dä zo̱te 75 yä je̱ya dende nuꞌmu̱ bi nja nꞌa rä dängä nthote ha Alemania. Asta mäpaya, ndunthi yä jäꞌi o̱tꞌe nꞌa rä ngo ha nunä fecha pa dä beni gatꞌho nuꞌu̱ yä zi jäꞌi bi du. Pe zäi ge nuꞌi gi ñꞌani por hanja Äjuä bi hyopi bi nja nuya yä tsꞌo thogi.

•   Mu̱ gi ne gi pädi te udi rä Biblia de nunä tsꞌo thogi, hyandi rä artikulo «¿Por qué sucedió el Holocausto judío? ¿Por qué Dios no lo impidió?».

 Ndunthi yä judío xa bi thogi po yä ntsꞌomꞌu̱i, bi sufri ndunthi ꞌne bi tho rꞌa mä nꞌaa. Pe hingä se̱he̱ yä judío, ꞌnehe bi mꞌu̱pu̱ märꞌa yä jäꞌi nuꞌu̱ bi thogi po yä ntꞌu̱tsate ꞌne asta bi tho durante näꞌä tiempoꞌä. Entre nuꞌu̱ yä jäꞌiꞌu̱, ꞌnehe bi mꞌu̱pu̱ rꞌa yä testigo rä Jeoba. Nuꞌu̱ bi tꞌo̱tꞌpäbi yä ntsꞌomꞌu̱i ꞌne bi tho po ränge yä jamfri.

•   Pa gi pädi mä nꞌa tu̱i näꞌä bi thogi, hyandi rä artikulo «¿Qué les ocurrió a los testigos de Jehová durante el Holocausto?».

 Ndunthi yä zi jäꞌi tsu dä nja nꞌa rä dängä nthote ja ngu näꞌä bi nja mäyaꞌmu̱. Pe rä Noya Äjuä hubgä mä mu̱ihu̱ ora enä ge ya mänꞌitꞌho ya hingä ma dä nja yä tsꞌo thogi.

•   «Nuga di pädi xä ñho nuꞌu̱ yä mfeni di beni pa ko nuꞌähu̱ —geꞌä mängä Jeoba—, yä mfeni de gä hogä mꞌu̱i ꞌne de gä tsaya, ꞌne hingä de gä xuñha, pa hingi hñäkihu̱ de ha ri mfenihu̱ näꞌä rä hogä mꞌu̱i ma gä häñꞌähu̱» (Jeremías 29:11). a

 Nuya yä noya mänꞌitꞌho ma dä kumpli. Rä Zi Dada Jeoba ma dä hñäki gatꞌho nuꞌu̱ yä u̱gi ꞌne yä sufrimiento bi hä yä tsꞌo thogi. Hyandi te xä promete dä me̱fi Äjuä:

•   Ma dä hñäki nuꞌu̱ yä tsꞌomꞌu̱i jäꞌi japi dä sufri märꞌaa (Proverbios 2:22).

•   Ma dä dukuäbi yä gida gatꞌho yä jäꞌi ꞌne ma dä umbäbi nꞌa rä mꞌu̱i temäꞌentho (Apocalipsis 21:4).

•   Ma dä koꞌspäbi yä te mänꞌaki nuꞌu̱ yä zi jäꞌi xä du pa dä mꞌu̱i nuua ha rä Xiꞌmhai (Juan 5:28, 29).

 Nuꞌi dä za gi ꞌmu̱i seguro ge Äjuä ma dä kumpli nuya yä promesa xä yꞌo̱tꞌe. Mu̱ gi ne gi pädi mä nꞌa tu̱i de nuya yä promesa, di mbitaꞌihe gi yꞌadi nꞌa rä curso de rä Mäkä Tꞌofo.