Ha yä notisia di handihu̱ hanja yä jäꞌi xa di ñꞌu̱tsa nꞌa ngu mänꞌaa, ꞌne po rängeꞌä nuꞌu̱ di ñho, di ntuhni ꞌne o̱tꞌe yä gerra.

•   «Po näꞌä rä gerra bi ja entre Israel ꞌne Gaza, di handihu̱ hanja yä jäꞌi mänꞌa xa di ñꞌu̱tsa. Di pädihu̱ njabu̱, po näꞌä mää ꞌne ofo ha Internet» (The New York Times, 15 de rä nobiembre de rä 2023).

•   «Dende rä 7 de rä oktubre, yä mexiꞌmhai xä hyandi hanja mänꞌa xä xu ꞌne xä nja yä ntꞌu̱tsate, tꞌuni yä discurso habu̱ yä jäꞌi udi ge xa di u̱tsa märꞌaa, ꞌnehe xä tꞌo̱tꞌe xa ndunthi yä delito po ränge rä ntꞌu̱tsate» (Dennis Francis, rä presidente de rä Asamblea General de las Naciones Unidas, 3 de rä nobiembre de rä 2023).

 Pe rä ntꞌu̱tsate, yä tuhni ꞌne yä gerra hingä ja getya xä nheki. Rä Biblia mää ge dende mäyaꞌmu̱ mi ꞌmu̱i yä bo̱ka jäꞌi nuꞌu̱ mi apoya yä gerra, ꞌne nuꞌu̱ yä noya mi usa xa mi u̱nte hänge di kompara ko yä flecha (Salmo 64:3; 120:7; 140:1). Pe rä Biblia ya xki mää ge ha nuya yä pa mänꞌa ma xä nheki yä ntꞌu̱tsate.

 Rä Biblia uni yoho yä raso de por hanja mäpaya di nheki ndunthi yä ntꞌu̱tsate.

1.  1. Bi mää ge ma xä zo̱ho̱ nꞌa rä tiempo habu̱ «ma xä mꞌe̱di rä mhäte» (Mateo 24:12). Hänge yä jäꞌi en vez de dä mädi nꞌa ngu mänꞌaa, ko näꞌä pe̱fi mänꞌa japi dä nja yä ntꞌu̱tsate (2 Timoteo 3:1-5).

2.  2. Rä Biblia enä ge «gatꞌho rä xiꞌmhai o ha rä yꞌe̱ rä tsꞌondähi» o rä Zithu (1 Juan 5:19; Apocalipsis 12:9, 12). Po rängeꞌä, mäpaya mänꞌa xä xu yä ntꞌu̱tsate ngeꞌä rä Zithu geꞌä di mända rä xiꞌmhai ꞌne hatꞌi yä jäꞌi.

 Pe rä Biblia ꞌnehe udi ge mänꞌitꞌho Äjuä ma dä huati gatꞌho yä ntꞌu̱tsate, ꞌne ma dä hñäki nuꞌu̱ yä dumu̱i xä zoogi rä ntꞌu̱tsate. Rä Biblia di promete:

•   «Äjuä ma dä dukuäbi gatꞌho yä gidaꞌu̱. Ya hindä nja rä du, ni yä tsꞌoni, ni yä dumu̱i, nixi yä u̱gi, ngeꞌä nu yä tꞌo̱tꞌe mi ja mä mꞌe̱tꞌo, nubye̱ ya otho» (Apocalipsis 21:4).