¡ÑHOKI ꞌNE NDO̱ꞌMIHU̱!
Rä ejército Rusia bi yu̱tꞌi ha Ucrania
Rä pa 24 de rä febrero de rä 2022, dende xa mi nꞌitꞌho, rä ejército Rusia bi mu̱di bi yu̱tꞌi ha yä territorio de rä dähni Ucrania. Mäske ndunthi de nuꞌu̱ yä jäꞌi di representa kada nꞌa rä dähni bi tsapihmä dä ebita nunä gerra, pe himbi logra. ¿Ndaꞌu̱ rꞌa de nuꞌu̱ yä xuñha ma dä nja po gatꞌho rä Xiꞌmhai po ränge nunä gerra? António Guterres, rä sekretario de las Naciones Unidas, bi ꞌñenä: «Asta nubye̱ tobe hinto pädi xä ñho hängu yä dañu ma dä nja. Pe hää di pädihu̱ ge ndunthi yä jäꞌi xi ma dä sufri, ma dä mꞌe̱di gatꞌho näꞌä pe̱ꞌtsi ꞌne tanto nuꞌu̱ yä jäꞌi ꞌmu̱i habu̱ ja nunä gerra, ngu yä jäꞌi de gatꞌho rä Xiꞌmhai ya hingä ma dä senti seguro».
¿Te mä profecía de rä Biblia di kumpli?
Rä Hesu bi ꞌñenä ge ma xä zo̱ho̱ rä tiempo habu̱ ma xä nja yä gerra. Näꞌä bi ꞌñenä: «Yä dähni ma dä nju̱tsꞌi kontra märꞌa yä dähni ꞌne yä gobiernu kontra märꞌa yä gobiernu» (Mateo 24:7). Pa gi hyandäse̱ hanja di kumpli mäpaya näꞌä bi mängä rä Hesu de yä gerra, hyandi rä artikulo «¿Te mä seña ma dä nheki ha yä “gäxä pa”?».
Ha rä mfistꞌofo Apocalipsis pede de nꞌa rä to̱ge ko «nꞌa rä the̱ngä fani», ꞌne nunä rä to̱ge «bi tꞌumbä rä tsꞌe̱di pa dä japi dä nja yä tuhni ha rä xiꞌmhai» (Apocalipsis 6:4). Mu̱ gi ne gi pädi mä nꞌa tu̱i de gehnä, hyandi rä artikulo «¿Qué representan los jinetes del Apocalipsis?». Geꞌä ma dä maxꞌäꞌi gi pädi hanja nuꞌu̱ yä gerra ja mäpaya, kumpli rꞌa yä profecía de rä Mäkä Tꞌofo.
Ha rä mfistꞌofo Daniel no̱ni «rä rey de rä norte» ꞌne «rä rey de rä sur», ꞌne udi ge nuya yoho yä rey ma dä ñꞌu̱tsa nꞌa ngu mänꞌaa (Daniel 11:25-45). Pa dä za gi ntiende por hanja Rusia ꞌne nuꞌu̱ yä dähni di mfaxkui fädi ngu «rä rey de rä norte», a hyandi rä bideo Mäpaya di kumpli näꞌä profecía hutsꞌi ha Daniel 11.
Ha rä mfistꞌofo Apocalipsis ꞌnehe no̱ni de mä nꞌa rä gerra. Nunä rä gerra tꞌembäbi «rä gerra Äjuä, Näꞌä pe̱ꞌtsi Gatꞌho rä tsꞌe̱di» (Apocalipsis 16:14, 16). Pe nunä rä gerra di nꞌañꞌo de nuꞌu̱ yä gerra xä nja ha rä Xiꞌmhai. Mu̱ gi ne gi pädi mä nꞌa tu̱i de nunä gerra, hyandi rä artikulo «¿Te me̱ꞌä rä Armagedón?».
¿Hanja di pädihu̱ ge mänꞌitꞌho ma dä nja nꞌa rä mꞌu̱i temäꞌentho?
Rä Mäkä Tꞌofo enä ge Äjuä «ma dä hñäki yä gerra po gatꞌho rä xiꞌmhai» (Salmo 46:9). Mu̱ gi ne gi pädi te mä mꞌu̱i ma dä nja ha rä Xiꞌmhai xti kumpli Äjuä yä promesa, hyandi rä artikulo «Äjuä ma dä ha nꞌa rä mꞌu̱i temäꞌentho».
Rä Hesu bi ꞌñuti nuꞌu̱ yä de̱ni ge xa mähyoni dä yꞌadi ha yä sadi dä ehe rä Tsꞌu̱tꞌhui Äjuä (Mateo 6:9, 10). ¿Te me̱ꞌä rä Tsꞌu̱tꞌhui Äjuä? Näꞌä nꞌa rä gobiernu näꞌä bi kohi ha mähetsꞌi. Po mäde de nunä gobiernu, Äjuä ma dä hñäki gatꞌho nuꞌu̱ yä tsꞌo tꞌo̱tꞌe ja mäpaya ꞌne ma dä ha nꞌa rä mꞌu̱i temäꞌentho nuua ha rä Xiꞌmhai. Pa gi pädi te ma dä me̱fi rä Tsꞌu̱tꞌhui Äjuä po geꞌi, hyandi rä bideo ¿Te me̱ꞌä rä Tsꞌu̱tꞌhui Äjuä?
Ha rä dähni Ucrania bi ꞌmu̱i thogi de 129.000 yä testigo rä Jeoba. Yä testigo rä Jeoba de̱mbäbi rä ejemplo rä Hesu, hänge hingi nthintꞌi ha yä politika ꞌne nixi partisipa ha yä gerra (Juan 18:36). ¿Por hanja? Ngeꞌä nuꞌu̱ ꞌmu̱i seguro ge ho̱nse̱ rä gobiernu Äjuä ma dä za dä hñäki yä gerra ꞌne gatꞌho nuꞌu̱ yä sufrimiento ja mäpaya. Hää, po gatꞌho rä Xiꞌmhai yä testigo rä Jeoba predika nuꞌu̱ yä hogä notisia hutsꞌi ha rä Mäkä Tꞌofo (Mateo 24:14). Mu̱ gi ne gi pädi mä nꞌa tu̱i de nuꞌu̱ yä jäpi ma dä ha rä Tsꞌu̱tꞌhui Äjuä, yꞌadi gi ñäui nꞌa rä testigo rä Jeoba.
a Mu̱ gi ne gi pädi xä ñho hanja di kumpli nunä profecía mäpaya, hyandi yä artikulo «“El rey del norte” en el tiempo del fin» ꞌne «¿Quién es “el rey del norte” hoy en día?».