¡ÑHOKI ꞌNE NDO̱ꞌMIHU̱!
Xa ja ndunthi rä seka | ¿Te udi rä Biblia?
«Rä dähni China xi xä sufri ndunthi yä pahyadi ꞌne ha nuꞌu̱ hñu nje̱ya xä thogi mänꞌa xi xä nja yä seka» (The Guardian, 7 de septiembre de rä 2022).
«Tꞌenä ge ha rä Gran Cuerno de África ya tsixä ku̱tꞌa nje̱ya xi ja ndunthi rä seka» (Yä notisia de rä ONU, 26 de agosto de rä 2022).
«Xä thandi ge thogi de mäde de nuꞌu̱ yä luga bi ja ha Europa ma dä ñhandui ndunthi yä seka, tꞌenä ge hixki thogi nꞌa rä seka näꞌä xa xki ziꞌti dende o̱tꞌe 500 yä je̱ya» (BBC News, 23 de agosto de rä 2022).
Ndunthi yä bämhñä jäꞌi enä ge nuꞌu̱ yä seka ma dä sigi o mänꞌa xa ma dä nja ndunthi. ¿Ma dä zo̱ho̱ rä pa dä uadi nuꞌu̱ yä seka? ¿Te udi rä Biblia?
Rä Biblia ya xki no̱ni de nuꞌu̱ yä seka
Gehnä ya xki mängä rä Biblia ge ma xä nheki ha nuya yä pa:
«Ma dä nja ndunthi […] yä dängä thuhu» (Lucas 21:11).
Di pädihu̱ ge rä seka, japi dä nja rä thuhu. ꞌNe nuꞌu̱ yä profecía de rä Biblia ñä de rä thuhu ꞌne de nuꞌu̱ xuñha bi hä: ja ngu rä sufrimiento ꞌne rä du (Apocalipsis 6:6, 8).
¿Por hanja mänꞌa xa ja ndunthi yä seka?
Rä Biblia xikägihu̱ por hanja nuꞌmu̱ enä:
«Nꞌa rä jäꞌi näꞌä yꞌo, hingo ri ꞌñepäbi dä yꞌe̱nse̱ rä paso» (Jeremías 10:23).
Nuya yä noya di signifika ge mu̱ yä mexiꞌmhai dä «yꞌe̱nse̱ yä paso» o dä mändase̱, hingä ma dä mabi xä ñho. ꞌNe koꞌmu̱ nuꞌu̱ hindi desidi xä ñho, otho rä dehe ꞌne ja yä seka.
Ndunthi yä científico xä mää, ge näꞌä pe̱fi yä jäꞌi xä japi xä patꞌi rä Xiꞌmhai. ꞌNe geꞌä japi dä nja yä seka po gatꞌho rä Xiꞌmhai.
Ya kasi ma dä thege rä dehe. ¿Por hanja? Po rä nkꞌatꞌä bojä yä jäꞌi ꞌne yä politiko, geꞌä xpä hä ndunthi yä xuñha. Por ejemplo: ja ndunthi rä contaminación, xä tsꞌe̱ki ndunthi yä zaa ꞌne hingi pädi dä usa xä ñho nuꞌu̱ yä hogä tꞌo̱tꞌe uni rä Xiꞌmhai.
Pe rä Biblia uni nꞌa rä humu̱i.
¿Te di to̱ꞌmihu̱ dä thogi xudi ndämäni?
Rä Biblia mää ge Äjuä ma dä japi dä nja ndunthi rä dehe. ¿Hanja ma dä ja?
1. Äjuä ma dä “huati nuꞌu̱ toꞌo di tsꞌoni rä Xiꞌmhai” (Apocalipsis 11:18). Ma dä huati nꞌa de nuꞌu̱ yä xuñha japi dä ꞌme̱di rä dehe: nuꞌu̱ yä tsꞌomꞌu̱i jäꞌi tsꞌoni rä Xiꞌmhai (2 Timoteo 3:1, 2).
2. «ꞌNe ha nuꞌu̱ yä hai xä yꞌotꞌi po rä pahyadi ma dä ñutsꞌi ko yä ndu̱xo» (Isaías 35:1, 6, 7). Äjuä ma dä hñäki gatꞌho nuꞌu̱ yä xuñha xpä hä rä seka. ꞌNe ma dä hyoki de rä Xiꞌmhai nꞌa rä uädri habu̱ xa di ja ndunthi rä dehe.
3. «Nuꞌi gi su rä xiꞌmhai ꞌne gi japi xa dä uni ndunthi yä ñho» (Salmo 65:9). Ko rä jäpi Äjuä, po gatꞌho rä Xiꞌmhai xa ma dä nja ndunthi yä hogä ñhuni ꞌne rä dehe pa gatꞌho yä jäꞌi.