¡ÑHOKI ꞌNE NDO̱ꞌMIHU̱!
¿Te di mbeni Äjuä ora handi yä jäꞌi di adora yä imagen ꞌne yä santo? | ¿Te udi rä Biblia?
Nꞌa rä agencia de yä notisia rä thuhu Catholic News Service bi ꞌñenä ge rä 25 de märso de rä 2022, bi tꞌo̱tꞌe nꞌa rä mixa ha rä Basílica de San Pedro. Ha näꞌä mixaꞌä, rä papa Francisco bi ndandiñähmu ante nꞌa rä imagen de María pa bi xatuäbi ꞌne bi yꞌapäbi dä hñäki yä gerra ꞌne märꞌa yä tuhni. Ha rä página de internet rä thuhu Vatican News bi ꞌñenä ge rä papa Francisco bi xatuäbi näꞌä rä imagen fädi ngu rä Inmaculado Corazón de María ꞌne bi nkargobi dä hñäki näꞌä rä gerra ja entre Rusia ꞌne Ucrania.
Xi nuꞌi, ¿te gi mbeni? ¿Xä ñho toꞌo dä xatuäbi yä imagen o yä santo? ¿Xä ñho toꞌo dä usa yä imagen pa dä adora Äjuä? Hyandi te udi rä Biblia:
«Nuꞌi hindi debe gi hyoki nꞌa rä imagen de nuꞌu̱ yä kosa ja ha mähetsꞌi, nixi nꞌa rä imagen de nuꞌu̱ yä kosa ja ha rä xiꞌmhai o ja ha yä dehe. Hindi debe gi ndäne, nixi ogi hopi toꞌo dä kombenseꞌi pa gi pe̱päbiꞌu̱. Ngeꞌä nuga Jeoba go ri Zi Dadagi ꞌne di mända ge ho̱nse̱gi drä adoragi. Po nuꞌu̱ yä tsꞌoki yä dada, di japäbi ge näꞌä rä kastigo di merese dä ꞌñepäbi ꞌnehe yä bätsi, asta rä hñuu rä generación ꞌne rä goho rä generación, pe nuꞌu̱ toꞌo di u̱tsagi» (Éxodo 20:4, 5). a
«Nuꞌu̱ yä imagen de gä plata ꞌne de gä oro, go xä hyokise̱ yä jäꞌi. Nuꞌu̱ yä imagen ja yä ne pe hingi tsa dä ñä. Ja yä da, pe hingi tsa dä hyandi. Ja yä gu, pe hingi tsa dä yꞌo̱de. Ja yä xiñu, pe hingi ja yä fähä. Ja yä yꞌe̱, pe hingi tsa te dä me̱fi. Ja yä ua, pe hingi tsa dä ñꞌo. Nixi hinte mä ruido po̱ni de yä yꞌu̱ga. Toꞌo hoki nuꞌu̱ yä imagen ꞌne toꞌo pe̱ꞌspäbi rä komfiansa, ma dä uadi dä nja nguꞌu̱» (Salmo 115:4-8).
«Nuga drä Jeoba. Geꞌä mä thuhu; nuga hinto di umbäbi mä nsu, nixi mä nsunda hindi umbäbi nuꞌu̱ yä imagen xä thoki» (Isaías 42:8).
«Ogri nsundahu̱ yä kꞌoi. ꞌUegehu̱ de nuꞌä rä nzäiꞌä» (1 Corintios 10:14).
«Mä zi bätsiꞌihu̱, nsuhu̱ de yä idolo» (1 Juan 5:21).
Mu̱ gi ne gi pädi mä nꞌa tu̱i te di mbeni Äjuä ora handi hanja yä jäꞌi di adora yä imagen o yä santo, hñeti rä artikulo «El punto de vista bíblico: Las imágenes» o hyandi rä bideo ¿Te di senti Äjuä ora handi ge yä jäꞌi di ndäne yä imagen?
Tal vez ꞌnehe gi ho gi hyandi te mää rä Biblia de nuya yä ntꞌani:
Photo credit: Vincenzo Pinto/AFP via Getty Images
a Jeoba, geꞌä rä thuhu Äjuä (Salmo 83:18). Hyandi rä artikulo «¿Toꞌoꞌä Jeoba?».