¡ÑHOKI ꞌNE NDO̱ꞌMIHU̱!
Rä gerra ha Ucrania japi mänꞌa dä mäki yä ñhuni ha gatꞌho rä Xiꞌmhai
Rä 19 de mäyo de rä 2022, rä Consejo Mundial de Seguridad de yä Naciones Unidas bi me̱ꞌtsi nꞌa rä mhuntsꞌi. Ha nunä mhuntsꞌi bi ntini thogi de 75 yä jefe de yä soldado nuꞌu̱ pe̱ꞌtsi yä däta nsu. Nuꞌu̱ bi ꞌñenä ge yä ñhuni mänꞌa bi mäki po ränge rä COVID-19, rä pa hyadi ꞌne yä yꞌee. Pe nubye̱, po ränge näꞌä rä gerra bi ja ha Ucrania, tho̱ꞌmi mänꞌa xa dä mäki yä ñhuni ꞌne dä ntu̱ngi yä thuhu po gatꞌho rä Xiꞌmhai. Mꞌe̱fa, rä revista The Economist bi ꞌñenä ge ha rä Xiꞌmhai ya mi ja yä thuhu. Pe po ränge rä gerra, mänꞌa ma dä ntu̱ngi po gatꞌho rä Xiꞌmhai. Rä Mäkä Tꞌofo ya xki mää ge ma xä nja yä thuhu, pe hingä ho̱nse̱ꞌä, ꞌnehe xikägihu̱ te debe gä pe̱fihu̱ pa gä ñhanduihu̱, ꞌne rꞌakägihu̱ rä humu̱i pa xudi ndämäni.
Rä Mäkä Tꞌofo ya xki mää ge ma xä nja yä thuhu
Rä Hesu bi ꞌñenä: «Ngeꞌä yä dähni ma dä nju̱tsꞌi kontra märꞌa yä dähni ꞌne yä gobiernu kontra märꞌa yä gobiernu, ꞌne ma dä nja yä thuhu» (Mateo 24:7).
Ha rä mfistꞌofo Apocalipsis no̱ni goho yä to̱ge ko yä fani. Nꞌa de geꞌu̱ di representa rä gerra ꞌne näꞌä mä nꞌaa di representa rä thuhu. Rä Mäkä Tꞌofo bi ꞌñenä ge ma xä nja tsꞌu̱tho yä ñhuni ꞌne ge ma xä mäki. «Dä handä nꞌa rä to̱ge mri to̱ge nꞌa rä mꞌofri, ꞌne mi hä nꞌa rä mbe̱xo. ꞌNe dä o̱de nꞌa rä noya mädetho de habu̱ mi mꞌai nuꞌu̱ goho yä dä e̱nxe̱, mi enä: “Nꞌa huada rä trigo o hñu huada rä sebada dä mꞌa pa rä thähä nꞌa rä mꞌe̱mäpa”» (Apocalipsis 6:5, 6).
Nuya yä profecía de yä thuhu di kumpli mäpaya. Nunä rä tiempo fädi ngu «yä ngätsꞌi yä pa» (2 Timoteo 3:1). Mu̱ gi ne gi pädi mätsꞌu̱ de yä gäxä pa, ꞌne de hanja di sigi di yꞌo nuya yä to̱ge ko yä fani, hyandi rä bideo Rä xiꞌmhai bi mpadi ndunthi dende rä je̱ya 1914 ꞌne hñeti rä artikulo «¿Qué representan los jinetes del Apocalipsis?».
Hanja faxkägihu̱ rä Mäkä Tꞌofo
Rä Mäkä Tꞌofo rꞌakägihu̱ yä tsꞌofo pa gä ñhanduihu̱ yä xuñha. Xikägihu̱ te debe gä pe̱fihu̱ nuꞌmu̱ di mäki yä ñhuni ꞌne nuꞌmu̱ kasi otho. Dä za gi hñeti rꞌa de geꞌu̱ ha rä artikulo «¿Hanja dä za gi ꞌmu̱i ko tsꞌu̱tho rä bojä?».
Rä Mäkä Tꞌofo rꞌakägihu̱ rä humu̱i ge ma dä uadi yä thuhu. Di promete ge «ma dä nja ndunthi yä ꞌmotꞌi ha rä xiꞌmhai» ꞌne hinto ma dä thogi yä thuhu (Salmo 72:16). Pa gi pädi mä nꞌa tu̱i de näꞌä rä humu̱i rꞌakägihu̱ rä Mäkä Tꞌofo, hñeti rä artikulo «Äjuä ma dä hä nꞌa rä mꞌu̱i temäꞌentho».