Ha näꞌä rä imforme bi uni rä presidente de rä Grupo Banco Mundial, bi ꞌñenä: «Ja rä peligro de ke yä jäꞌi de gatꞌho rä xiꞌmhai dä thogi yä ñꞌäbojä. Nunä mꞌiki mänꞌa ma dä mäki gatꞌho yä kosa ꞌne yä jäꞌi di othobi rä bojä pa dä ntai».

 Nuꞌu̱ yä jäꞌi di mpe̱fi ha rä Fondo Monetario Internacional enä ge «koꞌmu̱ nse̱kitho bi bo̱tsꞌe ndunthi rä presio gatꞌho yä kosa, ngu rä gasolina ꞌne yä ñhuni, mänꞌa xä afektabi nuꞌu̱ yä jäꞌi bi ꞌmu̱i ha nuꞌu̱ yä luga habu̱ yä me̱fi hingi tähä ndunthi».

 Rä Mäkä Tꞌofo faxkägihu̱ gä ntiendehu̱ por hanja mäpaya xa ja rä ñhoya, hanja dä za gä ñhanduihu̱ ꞌne te mä humu̱i ja pa xudi ndämäni.

•   Rä Mäkä Tꞌofo embäbi rä «ngätsꞌi yä pa» nuya yä pa di ꞌmu̱hu̱ (2 Timoteo 3:1).

•   Rä Hesu bi ꞌñenä ge ha nuya yä pa, ma xä nheki ndunthi yä tꞌo̱tꞌe «nuꞌu̱ asta dri ungä rä ntsu» (Lucas 21:11). Ora di mäki gatꞌho yä kosa, yä jäꞌi xa ntsu ngeꞌä hingi pädi te ma dä thogi xudi ndämäni o habu̱ ma dä dini rä bojä pa dä mäntene yä familia.

•   Rä mfistꞌofo Apocalipsis ꞌnehe ya xki mää ge ha «nu yä ngätsꞌi yä pa» mänꞌa ma xä mäki yä kosa. Apocalipsis 6:6 enä: «Dä o̱de nꞌa rä noya mädetho de habu̱ mi ꞌmai nuꞌu̱ yoho yä dä e̱nxe̱, mi enä: “Nꞌa huada rä trigo o hñu huada rä sebada dä ꞌma po rä thähä nꞌa rä me̱mäpa”».

 Pa gi pädi mä nꞌa tu̱i de «nu yä ngätsꞌi yä pa» ꞌne de nuꞌu̱ yä profecía hutsꞌi rä mfistꞌofo Apocalipsis, hyandi rä bideo Rä xiꞌmhai bi mpadi ndunthi dende rä je̱ya 1914 o hñeti rä artikulo ¿Qué representan los jinetes del Apocalipsis?

•   «Ma dä hyoki yä nguu pa go dä mꞌu̱hniꞌu̱; ꞌne nuꞌu̱ ma dä gätsꞌi yä obxi ꞌne dä zipäbi yä fruta. Nuꞌu̱ hingä ma dä hyoki yä nguu pa go dä mꞌu̱i märꞌaa» (Isaías 65:21, 22).

•   «Ma dä nja ndunthi yä ꞌmotꞌi ha rä xiꞌmhai; asta ha yä ndehe yä tꞌo̱ho̱ xa ma dä nja yä sofo» (Salmo 72:16).

•   «Xtä handi näꞌä rä ntsꞌomꞌu̱i tꞌo̱tꞌpäbi yä hyoya, ꞌne yä tsꞌoni nuꞌu̱ hinte pe̱ꞌtsi. Hänge nubye̱ ma gä fatsꞌiꞌu̱, enä Jeoba» (Salmo 12:5). a

 Po gatꞌho rä xiꞌmhai, Äjuä mänꞌitꞌho ma dä hñäki yä injustisia ꞌne rä ñhoya. Pa gi pädi hanja ma dä ja, hyandi rä artikulo ¡Mänꞌitꞌho ya hinto ma dä ñhoya!

 Pe mientra dä zo̱ho̱ näꞌä paꞌä, nuꞌu̱ yä hogä tsꞌofo ehe ha rä Mäkä Tꞌofo dä za dä maxꞌäꞌi pa gi pädi hanja dä za gi usa xä ñho ri bojä (Proverbios 23:4, 5; Eclesiastés 7:12). Pa gi pädi mä nꞌa tu̱i, hyandi nuya yä artikulo «Cuide su economía» ꞌne «¿Hanja dä za gi ꞌmu̱i ko tsꞌu̱tho rä bojä?».