¡ÑHOKI ꞌNE NDO̱ꞌMIHU̱!
Po gatꞌho rä Xiꞌmhai xi xä patꞌi ndunthi rä Hyadi | ¿Te udi rä Biblia?
Po gatꞌho rä Xiꞌmhai, durante rä zänä julio de rä 2022 xi xä patꞌi ndunthi rä Hyadi.
«70 yä hnini de rä dähni China bi tꞌapäbi xa dä nsu ngeꞌä ha nunä zänä xi xä patꞌi ndunthi rä Hyadi ꞌne tobe mä dä ꞌñehe märꞌa yä pahyadi» (25 de rä julio de rä 2022, yä notisia de rä CNN).
«Ha Europa xa nja ndunthi yä nzätꞌi ꞌne po geꞌä tobe mänꞌa xi xä patꞌi» (17 de rä julio de rä 2022, The Guardian).
«Mä ndomingo, ha rä lado este ꞌne ha rꞌa yä luga de rä lado sur ꞌne de rä Medio Oeste de Estados Unido xi bi patꞌi ndunthi rä Hyadi ja ngu nunka xki nheki» (24 de rä julio de rä 2022, The New York Times).
¿Ne dä mää ge po ränge nuꞌu̱ yä pahyadi xudi ndämäni ya hinto ma dä za dä mꞌu̱i ha rä Xiꞌmhai? ¿Te udi rä Biblia de gehnä?
¿Xki mängä rä Biblia ge ma xä nja yä pahyadi?
Hää, nuꞌu̱ yä pahyadi di thogihu̱bye̱ udi ge mäjuäni näꞌä mängä rä Biblia. Por ejemplo, rä Hesu bi mää ge «ha nu mäñä mähetsꞌi ma dä nheki rꞌa yä ntꞌudi nuꞌu̱ asta dri ungä rä ntsu» (Lucas 21:11, Ra ꞌRaꞌyo Testamento). Ndunthi yä jäꞌi xa tsu ngeꞌä handi ge rä Xiꞌmhai yꞌo ri mpadi, ꞌne asta di mbeni ge mänꞌitꞌho ya hinto ma dä za dä mꞌu̱i nuua ha rä Xiꞌmhai.
Pe, ¿mäjuäni ge yä hinto ma dä mꞌu̱i nuua ha rä Xiꞌmhai?
Hinä. Ngeꞌä Äjuä bi hyoki rä Xiꞌmhai pa nzäntho dä mꞌu̱i yä jäꞌi (Salmo 115:16; Eclesiastés 1:4) Äjuä hingä ma dä hyopi ge yä jäꞌi dä huati rä Xiꞌmhai. En lugar de geꞌä, rä Biblia mää ge mänꞌitꞌho Äjuä ma «dä huati nuꞌu̱ toꞌo xä tsꞌokä rä Xiꞌmhai» (Apocalipsis 11:18).
Ma gä handihu̱ mä yoho de nuꞌu̱ yä tꞌo̱tꞌe ma dä me̱fi Äjuä ko rä Xiꞌmhai:
«Rä yꞌotꞌä hai xä ma dä ndo̱ni ko rä johya, ꞌne yä däta yꞌotꞌä ꞌmatha xä ma dä johya ꞌne ma dä ndo̱ni ngu rä azafrán» (Isaías 35:1). Äjuä hingä ma dä hyopi ge rä Xiꞌmhai dä gohi ngu nꞌa rä yꞌotꞌä ꞌmatha, Näꞌä xä promete ge ma dä hyoki mähotho mänꞌaki rä Xiꞌmhai habu̱ xä tsꞌoki.
«Nuꞌi gi su rä xiꞌmhai ꞌne gi pe̱hnä rä yꞌee pa dä nja ndunthi rä ꞌmotꞌi» (Salmo 65:9). Äjuä ma dä hyoki de rä Xiꞌmhai nꞌa rä uädri xa mähotho.
Pa gi pädi mä nꞌa tu̱i por hanja xi xä mpadi ndunthi rä clima ꞌne te mä profecía de rä Biblia di kumpli, hñeti rä artikulo «¿Qué dice la Biblia sobre el cambio climático y nuestro futuro?».
Pa gi pädi mä nꞌa tu̱i te mää rä Biblia de hanja Äjuä ma dä hyoki mänꞌaki rä Xiꞌmhai habu̱ xä tsꞌoki, hñeti rä artikulo «¿Quién salvará el planeta?».