Durante rä je̱ya 2024, po gatꞌho rä Xiꞌmhai mänꞌa ma dä nja yä botasio ke nuꞌu̱ yä je̱ya xä thogi. Pe ndunthi yä jäꞌi ya hingi pe̱ꞌspäbi rä komfiansa nuꞌu̱ yä politiko.

•   Ha Estados Unidos bi tꞌo̱tꞌe nꞌa rä encuesta ꞌne ndunthi de nuꞌu̱ yä jäꞌi bi ꞌñenä ge «kasi gatꞌho nuꞌu̱ yä politiko di mpe̱fi pa yä ñhose̱» hingä po yä ñho yä jäꞌi (centro de investigación Pew Research Center, 19 de rä septiembre de rä 2023). a

 ꞌNehe ndunthi de nuꞌu̱ yä bäsjäꞌi ya hingi pe̱ꞌspäbi rä komfiansa yä politiko.

•   «Mäpaya yä bäsjäꞌi yꞌo ri nzäi dä hyoni hanja dä arregla nuꞌu̱ yä däta xuñha di nheki, pe yä encuesta udi ge nuꞌu̱ xä hyandi ge yä politiko hinte pe̱fi pa dä mfaxte» (The New York Times, 29 de rä enero de rä 2024).

•   «Ha nꞌa rä encuesta bi tꞌo̱tꞌe, bi ꞌñudi ge nuꞌu̱ yä bäsjäꞌi mänꞌa pe̱ꞌspäbi rä komfiansa nuꞌu̱ yä youtubers o nuꞌu̱ yä jäꞌi xa yä famoso ha internet ke nuꞌu̱ yä politiko» (The Korea Times, 22 de rä enero de rä 2024). 

 Nuꞌmu̱, ¿dä za dä hä nꞌa rä mꞌu̱i temäꞌentho pa xudi ndämäni nuꞌu̱ yä politiko? ¿Toꞌo dä za gä pe̱ꞌspäbihu̱ rä komfiansa?

 Mähyoni gä huahnihu̱ habu̱ di huxä mä komfiansahu̱. Rä Biblia enä ge «nꞌa rä dondo kamfri gatꞌho näꞌä sipäbi, pe toꞌo ja rä mfeni mꞌe̱tꞌo handi xä ñho te ma dä me̱fi» (Proverbios 14:15).

•   Pa gi pädi mu̱ nꞌa rä imformäsio xa mäjuäni o rä kꞌuamba, hñeti rä artículo «Cómo protegerse de la información falsa».

 ꞌNehe asta nuꞌu̱ yä politiko yä onrado hängu dä nehmä dä matsꞌi yä jäꞌi, pe nuꞌu̱ hingi pe̱ꞌtsi rä tsꞌe̱di pa dä me̱fi njabu̱. Hänge rä Biblia engägihu̱:

•   «Ogi hutsꞌi ri komfiansa ko nuꞌu̱ toꞌo di mända, nixi ko yä jäꞌi, ngeꞌä nuꞌu̱ hindä za dä ñäni ri te» (Salmo 146:3, La Biblia Latinoamérica).

 Rä Biblia xikägihu̱ ge Äjuä xä hñutsꞌi nꞌa rä lider näꞌä xa ja rä tsꞌe̱di ꞌne dä za gä pe̱ꞌspäbihu̱ rä komfiansa. Näꞌä rä lider geꞌä Ñhesukristo (Lucas 1:32, 33). Rä Hesu geꞌä rä Rey de rä Tsꞌu̱tꞌhui Äjuä, nꞌa rä gobiernu näꞌä bi ja ha mähetsꞌi (Mateo 6:10).

•   Pa gi pädi por hanja dä za gi pe̱ꞌspäbi rä komfiansa rä Hesu ꞌne te ma dä me̱fi pa dä hñäki gatꞌho nuꞌu̱ yä xuñha di thogihu̱ mäpaya, hñeti nuꞌu̱ yä artículo «¿Quién es el Rey del Reino de Dios?» ꞌne «¿Qué hará el Reino de Dios?».