Rä pa 25 de rä oktubre de rä 2019, xa bi johya ndunthi nuꞌu̱ 6.500 yä ku ñä rä idioma maya. Näꞌä rä paꞌä bri presenta rä Traducción del Nuevo Mundo ha rä idioma maya. Go bi presenta rä ku Esteban Bunn, de rä Comité de rä ngu Betel de Centroamérica ha nꞌa rä däta mhuntsꞌi regional ha Mérida (Yucatán, Mꞌonda). Nunä rä programä bi tꞌo̱tꞌe ha rä Ngu de gä Däta Mhuntsꞌi de gehni Mérida, pe ꞌnehe bri thoꞌtsi po Internet pa njabu̱ nuꞌu̱ yä ku xki muntsꞌi ha rä auditorio Polifórum Zamná bi za bi hyandi ꞌnehe. Nunä rä Mäkä Tꞌofo xa ma dä mfaxte ndunthi ha rä predicación, ngeꞌä ꞌmu̱i ngu 762.000 yä jäꞌi nuꞌu̱ ñä rä idioma maya, tanto nuua Mꞌonda ngu ha Estados Unidos.

Nuꞌu̱ yä ku ñä rä idioma maya, mi pe̱ꞌtsi ho̱nse̱ rä Traducción del Nuevo Mundo de las Escrituras Griegas Cristianas ha yä idioma. Nunä parte de rä Mäkä Tꞌofo bri presenta rä 14 de rä disiembre de rä je̱ya 2012. Asta mäpaya, xä imprimi ngu 29.000 yä Mäkä Tꞌofo.

Nꞌa rä traductor bi ꞌñenä: «Gatꞌho nuꞌu̱ yä jäꞌi ñä rä idioma maya pe̱ꞌspäbi ndunthi rä tꞌekꞌei rä Mäkä Tꞌofo, ngeꞌä handi ngu rä Noya Äjuä. Ndunthi yä jäꞌi hinxä ma rä skuela hänge xa di japäbi xä ñhei dä ntiende yä testo. Po rängeꞌä, xa dä o̱tꞌehe ntsꞌe̱di po dä usahe nuꞌu̱ yä noya usa yä jäꞌi hyaxtho pa njabu̱ hinto dä japäbi xä ñhei dä ntiende».

Koꞌmu̱ rä idioma maya pe̱ꞌtsi ndunthi yä bariante, yä traductor xa bi japi xä ñhei dä dini nuꞌu̱ yä noya dä za dä ntiende gatꞌho yä jäꞌi. Po rängeꞌä bi thahni nꞌa rä titulo näꞌä hingi hei, bi thuꞌspäbi: Biblia ich maya, di signifika «Biblia en maya». Nunä rä Mäkä Tꞌofo ꞌnehe di ñꞌoui thogi de 6.000 yä nota, ꞌne ha rꞌa de nuya yä nota ehe märꞌa yä opción de hanja mängä yä jäꞌi rꞌa yä noya, pa njabu̱ gatꞌho nuꞌu̱ yä zi jäꞌi ñä rä idioma maya dä za dä ntiendebi xä ñho rä Mäkä Tꞌofo.

Nunä rꞌayꞌo Mäkä Tꞌofo ma dä matsꞌi ndunthi nuꞌu̱ yä ku ñä rä idioma maya pa dä nxadi ꞌne dä predika. Hinte mä duda di pe̱ꞌtsihu̱ ge Äjuä te pädi xä ñho te japäbi mꞌe̱di mä kuhu̱ (Mateo 24:45).