Rä Tribunal de Distrito de Léninsk, ha Rostov del Don, mänꞌitꞌho ma dä mää hämꞌu̱ ma drä kondenä rä ku Arsén Avanésov, Vilén Avanésov ꞌne rä ku Alexánder Párkov. a

Arsén Avanésov

• Näꞌä rä je̱ya bi mꞌu̱i: 1983 (Bakú, Azerbaiyán).

• Märꞌa yä dato: Bi estudia rä carrera de gä ingeniero ꞌne bi mpe̱fi ha rä construcción. Nuꞌmu̱ mrä tꞌu̱kä bätsi, mi ho nꞌa rä ntꞌeni rä thuhu rugby. Pädi dä ñä inglés ꞌne francés.

  Rä dada ꞌne rä nänä bi matsꞌi dä mädi rä Zi Dada Jeoba. Ha rä je̱ya 2005 bi nxixtehe ngu nꞌa rä testigo rä Jeoba.

Vilén Avanésov

• Näꞌä rä je̱ya bi mꞌu̱i: 1952 (Bakú, Azerbaiyán).

• Märꞌa yä dato: Bi mpe̱fi de gä electricista ꞌne ha rä construcción. ꞌNehe di ho dä hyoki yä komida, yä thuhme ꞌne dä hñeti yä he̱ꞌmi. Dende brä bäsjäꞌi xa di ho dä hñeti rä Biblia.

  Ha rä je̱ya 1980 bi nthäti ko nꞌa rä nxutsi rä thuhu Stela. Nubye̱ pe̱ꞌtsi nꞌa rä tꞌu̱ rä thuhu Arsén, ꞌne nꞌa rä tꞌixu rä thuhu Elina. Ha rä je̱ya 1988, bi bo̱ni de yä hnini ꞌne bi ma pa Armenia, pe ha nunä luga xa mi ja rä ñhoya. Hänge nunä familia bi ma bä ꞌmu̱i ha Rostov del Don (Rusia). Ha rä je̱ya 2006, rä ku Vilén bi nxixtehe ngu rä testigo rä Jeoba.

Alexánder Párkov

• Näꞌä rä je̱ya bi mꞌu̱i: 1967 (Spassk, región de Kémerovo).

• Märꞌa yä dato: Nuꞌmu̱ mrä bäsjäꞌi mi su nꞌa rä rancho ꞌne yä mboꞌni. ꞌNehe mi maneja yä tractor ꞌne mi ja yä ꞌme̱fi de gä kobre.

  Ha rä je̱ya 1990, bi nthäti ko nꞌa rä nxutsi rä thuhu Galina. Bi mu̱di bi nxadi rä Biblia mähye̱gi ko rä zi ꞌme̱hñä. Nubye̱ pe̱ꞌtsi hñuu yä tꞌixu ꞌne yoho yä ꞌme̱to. Alexánder bi nxixtehe ha rä je̱ya 1992.

Rä 22 de rä mäyo de rä 2019, yä polisia de Rostov del Don bi yu̱tꞌi ha yä ngu rꞌa yä testigo rä Jeoba pa bi nxeni. Rä ku Vilén, Arsén ꞌne Alexánder bi tsixä ante yä autorida ꞌne bri jotꞌi kasi yo nje̱ya. Pe ha rä zänä märso de rä je̱ya 2021, nuyu̱ hñuu yä ku bi tsꞌitsꞌi pa ha mä nꞌa rä luga.

Rä nju Stela, rä zi ꞌme̱hñä rä ku Vilén hinxä za xä hyandi rä däme nixi rä tꞌu̱. ꞌNehe, nubye̱ joꞌo toꞌo dä matsꞌi ko yä gasto. Rä nju Galina, rä zi ꞌme̱hñä rä ku Alexánder, ꞌnehe bi tsꞌixä ante yä autorida po rä jamfri. Rä tribunal bi kondenä pa dä ñꞌo fadi yo nje̱ya ꞌne hñu nzänä.

Gatꞌho yä testigo rä Jeoba xa di tumämu̱ihu̱ po näꞌä xä tꞌo̱tꞌpäbi nuyu̱ mä zi kuhu̱. Po rängeꞌä, ma gä sigi gä pe̱fihu̱ näꞌä bi mängä rä apostol Pablo ora bi ꞌñenä: «Oxki pumfrihu̱ yä yꞌofadi, yꞌo̱thu̱ rä ue̱nda ge go gi ohu̱ fadi» (Hebreos 13:3).