Yä testigo rä Jeoba de Mariúpol, Járkov, Hostomel ꞌne märꞌa yä hnini de Ucrania, thogi ndunthi yä xuñha ngeꞌä njatꞌä tꞌe̱i yä bomba ha nuya yä luga. Rꞌa yä zi ku tsitsꞌi ya ngu nꞌa semänä nsinke xä bo̱ni de habu̱ xä ñꞌägi. Ya kasi otho rä ñhuni, njatꞌä pa rä ñotꞌi, rä internet ꞌne rä telefono, hänge yä zi ku ya kasi hingi tsa dä ñä entre geꞌu̱.

Ko ndunthi rä dumu̱i di ne gä xiꞌähu̱ ge mä zi kuhu̱ Dimitro Rozdorski bi du nuꞌmu̱ bi netꞌi nꞌa rä tꞌu̱kä bomba, näꞌä penä mi pe̱ꞌtsi 28 yä je̱ya ꞌne mrä anciano ha rä mhuntsꞌi Myrnohrad. Xa di bäntebihu̱ rä Zi Dada Jeoba ge dä hñuꞌmpäbi yä mu̱i nuꞌu̱ mä zi kuhu̱ xä ꞌme̱di nꞌa rä zi jäꞌi ha rä du, ꞌne ge dä su nuꞌu̱ yä zi ku bi ꞌmu̱i ha nuꞌu̱ yä luga habu̱ njatꞌä tꞌe̱i yä bomba (2 Tesalonicenses 3:1).

Pa rä 7 de rä märso de rä 2022, gehnä mi thogi ha rä dähni Ucrania:

• 2 yä testigo rä Jeoba bi du.

• 8 yä testigo rä Jeoba bi ñꞌerido.

• 20.617 yä testigo rä Jeoba bi bo̱ni de yä nguu pa bi ma ha mä nꞌa rä luga de Ucrania habu̱ tobe hingi tso̱ni rä gerra.

• 25 yä nguu xä yo̱tꞌe xo̱ge.

• 29 yä nguu kasi bi yꞌo̱tꞌe xo̱ge.

• 173 yä nguu bi thogi yä dañu, pe himbi tsꞌoki ndunthi.

• 5 yä Ngu de gä Mhuntsꞌi bi thogi yä dañu.

• 27 yä Comité de Socorro sigi uni rä mfatsꞌi ha Ucrania.

• Rä Comité de Socorro bi matsꞌi 6.548 yä testigo rä Jeoba pa bi dini nꞌa rä luga habu̱ dä ꞌmu̱i.

• 7.008 yä testigo rä Jeoba bi bo̱ni de rä dähni Ucrania, ꞌne yä ku de märꞌa yä dähni ya umbäbi rä mfatsꞌi.

• Koꞌmu̱ ndunthi yä zi ku bi bo̱ni de yä nguu, ha rꞌa yä luga de rä oeste de Ucrania ngu Chernovtsi, Ivano-Frankovsk, Lviv (o Leópolis) ꞌne Transcarpatia bi thutsꞌi gatꞌho näꞌä mi ja mꞌe̱di ha nꞌa rä Ngu de gä Däta Mhuntsꞌi ꞌne ha 30 yä Ngu de gä Mhuntsꞌi pa di tꞌumbäbi rä mfatsꞌi nuꞌu̱ mä zi kuhu̱.