Mi mꞌu̱kua ha rä Xiꞌmhai, Ñhesukristo bi mää te mä rekisito debe dä kumpli nꞌa rä jäꞌi pa dä za dä ntestigo rä Jeoba. Di tinihu̱ ha Mateo 28:19, 20. Ha nunä testo no̱ni nꞌa rä rekisito pa nuꞌu̱ toꞌo ne dä de̱ni rä Hesu: pe̱ꞌtsi te dä predika ꞌne dä ñä de rä Zi Dada Jeoba. Pe jaua märꞌa yä rekisito:

 1) Pe̱ꞌtsi te gi pädi mꞌe̱tꞌo näꞌä udi rä Biblia. Rä Hesu bi ꞌñembäbi yä apostol: «ꞌÑutihu̱ yä jäꞌi de gatꞌho yä dähni pa dä zo̱ho̱ dä de̱ngägi» (Mateo 28:19, 20). Rä noya «de̱ngägi» o «de̱ni» signifika nꞌa rä jäꞌi «näꞌä ja fu̱di di nxadi» o nꞌa rä jäꞌi «näꞌä tꞌuti». Ha rä Biblia ja ma gi tinini näꞌä bi ꞌñudi rä Hesu, ꞌne hutsꞌi yä tsꞌofo nuꞌu̱ ma dä maxꞌäꞌi gi mꞌu̱i ko rä johya ꞌne gi hyandi ge rä te ja ndunthi rä muui. Dä rꞌakägihe ndunthi rä johya gä utꞌähe hanja di unihe yä curso hinte di njutꞌi de rä Mäkä Tꞌofo (Mateo 10:7, 8; 1 Tesalonicenses 2:13).

 2) Pe̱fi ha ri mꞌu̱i näꞌä utꞌäꞌi rä Biblia. Rä Hesu bi ꞌñenä: «ꞌÑutihu̱ dä me̱fi gatꞌho nuꞌu̱ yä tꞌo̱tꞌe xtä mändaꞌihu̱» (Mateo 28:20). Nuya yä noya di signifika ge Äjuä to̱ꞌmi gi tsopu̱ nuꞌu̱ yä tsꞌo tꞌo̱tꞌe ngi pe̱fi mä mꞌe̱tꞌo ꞌne nubye̱ gi mꞌu̱i ja ngu di mända rä Biblia (Hechos 10:42; Efesios 4:22-29; Hebreos 10:24, 25). Toꞌo ya o̱tꞌe ntsꞌe̱di po dä me̱fi nuꞌu̱ yä mhända bi uni rä Hesu, nubye̱ ya dä za dä jase̱ nꞌa rä sadi habu̱ dä xipäbi rä Zi Dada Jeoba ge dende näꞌä oraꞌä, xä desidi dä umbäbi rä te pa dä me̱päbi rä bolunta (Mateo 16:24).

 3) Nxixtehe (Mateo 28:19). Ha rä Biblia di kompara rä xixtehe ngu ora toꞌo agi nꞌa rä jäꞌi näꞌä xä du (hyandi Romanos 6:2-4). Hää, toꞌo di nxixtehe udi ge näꞌä rä mꞌu̱i mi tsitsꞌi mä mꞌe̱tꞌo ya bi du, ꞌne nubye̱ ma dä me̱ꞌtsi nꞌa rä rꞌayꞌo mꞌu̱i ja ngu di mända Äjuä. Hänge toꞌo di nxixtehe, udi ante yä thandi gatꞌho yä jäꞌi ge ya di kumpli nuꞌu̱ yä rekisito 1 ꞌne 2 ja ngu bi mända rä Hesu, ꞌne ge nubye̱ apäbi Äjuä dä matsꞌi dä me̱ꞌtsi nꞌa rä konsiensia xä ntꞌaxi ante geꞌä (Hebreos 9:14; 1 Pedro 3:21).

 Dä hogi gi ñäui nuꞌu̱ yä ansiano de näꞌä rä mhuntsꞌi habu̱ gi ntini. Nuꞌu̱ yä ansiano ma dä ñä kongeꞌi pa dä hyandi ge hää ya gä ntiende xä ñho näꞌä udi rä Biblia, ge ya gi pe̱fi ha ri mꞌu̱i näꞌä xkä pädi, ꞌne ge po ri boluntase̱ ya gä umbäbi ri te rä Zi Dada Jeoba pa gi pe̱päbi rä bolunta (Hechos 20:28; 1 Pedro 5:1-3).

 Hää. Nuꞌu̱ yä dada yä testigo rä Jeoba, o̱tꞌe ntsꞌe̱di po dä tede yä bätsi «ha rä disciplina ꞌne ja ngu udi Jeoba» (Efesios 6:4). Pe ora xti te nuꞌu̱ yä bätsi, pe̱ꞌtsi te dä huahnise̱ dä bädi, dä asepta ꞌne dä me̱fi ha yä mꞌu̱i näꞌä udi rä Biblia pa njabu̱ dä za dä nxixtehe (Romanos 12:2). Hää, kada nꞌa rä jäꞌi di debe dä desidise̱ mu̱ dä me̱päbi rä Zi Dada Jeoba o hinä (Romanos 14:12; Gálatas 6:5).