Mꞌe̱fa de bi hyandi nuꞌu̱ yä serie de gä bideo: Yꞌo̱tꞌe ri amigo Jeoba, nꞌa rä dada de rä hnini Malasia bi mää: «ꞌÑenä ge rä Zi Dada Jeoba mi pädi te mi ja ha yä koraso yä dada».

Ha nuya yä bideo xä hyoki yä testigo rä Jeoba, po̱ni nꞌa rä zi bätsi rä thuhu Caleb ꞌne rä familia. Gatꞌho nuꞌu̱ yä bideo dä za gi tini ha nunä luga jw.org ꞌne nuyu̱ yä bideo uti yä zi bätsi dä me̱ꞌtsi nꞌa rä hogä mꞌu̱i ꞌne dä bädi de Äjuä. Nꞌa de nuꞌu̱ yä bideo udi por hanja hinxä ñho dä mpe ꞌne mä nꞌa de geꞌu̱, udi hanja dä xatuäbi Äjuä.

Pa dä za dä matsꞌi yä bätsi de gatꞌho rä xiꞌmhai, näꞌä rä mu̱di bideo ya xä ntradusi ha 131 yä idioma.

Nꞌa rä nänä pe̱ꞌtsi ku̱tꞌa yä bätsi bi mää: «Ha näꞌä semänä bi thogi bi tꞌakägihe näꞌä rä DVD Jehová bendice al que escucha y obedece ꞌne ¡ya xtä hanthe ngu yo nꞌate mä rꞌe̱tꞌa yä mꞌiki!».

Millie, pe̱ꞌtsi 12 nje̱ya ꞌne ꞌmu̱i ha rä hnini Inglaterra, ꞌne pe̱ꞌtsi nꞌa rä ku rä thuhu Thomas, näꞌä pe̱ꞌtsi 15 nje̱ya ꞌne tsu̱di nꞌa rä ñheni rä thuhu síndrome de Down. Millie bi yꞌofo: «Thomas pe̱ꞌtsi nuꞌu̱ yä bideo Caleb ha rä iPad [o tablet], ꞌne uti gatꞌho nuꞌu̱ märꞌa yä yꞌo skuela. Xa di ho nuꞌu̱ yä thuhu ꞌne xa pädi dä ntuhu xä ñho. Nꞌa rä nju de rä mhuntsꞌi bi yꞌo̱de hanja mi tuhu ꞌne asta bi nzoni. ¡Xa di rꞌaꞌi rä johya gi yꞌo̱de dä ntuhu!».

Ha nꞌa rä karta bi yꞌofo Ava mää ge pe̱ꞌtsi 8 nje̱ya, 9 nzänä ꞌne 25 yä pa. Näꞌä bi ꞌñenä: «Caleb ꞌne rä nju xa pädi dä ꞌñuti yä bätsi».

ꞌNe ha rä karta Mikaylah bi yꞌofo: «Di pe̱ꞌtsi 6 nje̱ya. Jamädi po näꞌä rä DVD Jehová bendice al que escucha y obedece. Di pädi ge mu̱ gä o̱te mä dada ꞌne mä nänä, rä Zi Dada Jeoba xa ma dä johya».

Nꞌa rä bäsjäꞌi näꞌä pädi dä hyoki yä bideo pe hingä rä testigo rä Jeoba, bi hyandi rä bideo Robar es malo ri mu̱di ngu hingä mi kamfri näꞌä bi hyandi, mänꞌa nuꞌmu̱ mi bädi ge nꞌa hängutho nuꞌu̱ yä jäꞌi xki hyoki näꞌä bideoꞌä. Näꞌä bi ꞌñenä: «Di pädi rꞌa yä jäꞌi nuꞌu̱ di mpe̱fi ha yä däta ꞌne yä tꞌu̱kä estudio de gä bideo, ꞌne rꞌabu̱ di ñꞌanise̱, te tsa nuꞌu̱ yä jäꞌi di mpe̱hni. Di pädi ge nuꞌmu̱ xti uadi rä pa, gatꞌho näꞌä bi me̱fi ho̱nse̱ di japi dä nthede yä jäꞌi po nꞌa tu̱itho. Pe nuꞌu̱ yä bideo gi hokhu̱, fatsꞌi yä bätsi, uti näꞌä xä ñho ꞌne näꞌä hinä ꞌne fatsꞌi pa dä huahni dä me̱fi yä hogä tꞌo̱tꞌe. Näꞌä gi hokhu̱ bi hä yä ñho pa yä jäꞌi ꞌne nuꞌu̱ hää xa ja yä muui».

Ndunthi yä dada de gatꞌho rä xiꞌmhai ꞌnehe xä mää hängu di jamädi po nuꞌu̱ yä serie de gä bideo. Nꞌa rä nänä bi yꞌofo: «Mä zi bätsi rä thuhu Quinn ꞌne pe̱ꞌtsi hñu nje̱ya, nꞌa rä pa mi handi rä bideo La amistad con Jehová. Ora mi pa mädee bi kuati rä yꞌe̱ ha rä tiñä ꞌne bi ꞌñengägi: “Zi nänä, nunä thuhu di japi dä johya mä koraso”».