Ha näꞌä rä zänä nobiembre de rä je̱ya 2011, rꞌa yä testigo rä Jeoba bi dini nꞌa rꞌayꞌo mfatsꞌi pa dä za dä ꞌñuti yä jäꞌi te udi rä Mäkä Tꞌofo. Pa geꞌä, bi mu̱di bi usa rꞌa yä zi mexa habu̱ xä yꞌu̱xä yä he̱ꞌmi ꞌne yä mfistꞌofo. Nunä ꞌme̱finä bi mu̱di ha näꞌä rä bajo Manhattan de rä hnini Nueva York, nunä nꞌa rä luga ja dende mäyaꞌmu̱ habu̱ nzäntho ja ꞌne thogi xa ndunthi yä jäꞌi.

Ha gatꞌho Manhattan bi thahni goho yä luga pa bi tꞌegi nuꞌu̱ yä zi mexa ko ndunthi yä he̱ꞌmi nuꞌu̱ udi de rä Mäkä Tꞌofo ꞌne pa rꞌa yä Testigo de näꞌä lugaꞌä pa ungä ntꞌo̱de. Pa gatꞌho dä za dä hyandi, kasi gatꞌho nuꞌu̱ yä mexa bi tꞌegi getbu̱ de habu̱ tso̱ho̱ ꞌne thogi nuꞌu̱ yä mꞌotho yä jäꞌi hyaxtho.

Ha nuya yä luga yä jäꞌi dä za dä bädi nuꞌu̱ yä mpengi uni rä Mäkä Tꞌofo pa nuꞌu̱ yä ntꞌani pe̱ꞌtsi. ꞌNe pa nuꞌu̱ xa di xo̱ni dä za dä hñätsꞌi nꞌa rä he̱ꞌmi ꞌnepu̱ dä hñetäse̱.

Ha nuya yä mexa ja yä he̱ꞌmi udi de rä Mäkä Tꞌofo ha ndunthi yä idioma, ꞌne mu̱ nꞌa rä jäꞌi honi nꞌa rä he̱ꞌmi ha nꞌa rä idioma näꞌä hingi ja näꞌä oraꞌä, dä za dä te̱ti ꞌne mꞌe̱fa de rꞌa yä pa dä za dä thogi po geꞌä.

Yä tsꞌu̱tꞌhui xä hyandi ge nunä xa nꞌa rä hogä ꞌme̱fi. Nꞌa rä polisia bi ꞌñenä njaua: «¡Ya dende mäyaꞌmu̱ mi ja mꞌe̱di xkä pe̱fihu̱ njabu̱! Nuꞌähu̱ gi pe̱ꞌtsihu̱ gatꞌho nuꞌu̱ yä he̱ꞌmi honi yä jäꞌi».

Nꞌa rä ñꞌo̱ho̱ nse̱kitho bi mꞌai nuꞌmu̱ mi hyandi näꞌä rä mfistꞌofo ¿Qué enseña realmente la Biblia? Näꞌä xki hyandi hanja ndunthi yä jäꞌi ha rä metro mi heti näꞌä mfistꞌofo pe hingä mi pädi habu̱ xki dini. Pe nubye̱ ya mi pädi habu̱.

Pa mi pa ha rä ꞌme̱fi nꞌa rä tsꞌu̱ntꞌu̱ mi thogi hyaxtho getbu̱ de nꞌa de nuꞌu̱ yä mexa. Pe mꞌe̱fa de rꞌato semänä näꞌä bi mꞌai ꞌne bi xipäbi nuꞌu̱ yä Testigo ge mi honi rä mfatsꞌi. Nuꞌu̱ ko ndunthi rä johya bi umbäbi rä mfatsꞌi, nꞌa rä Mäkä Tꞌofo ꞌne bi ꞌñuti hanja xä za xä hñäni yä ñho de geꞌä.

Ndunthi yä jäꞌi xä mꞌai pa ko rä johya xä ñäui nuꞌu̱ yä Testigo de rä Mäkä Tꞌofo. Ho̱nse̱ ha nꞌadä rä zänä ko nunä rꞌayꞌo mfatsꞌi, bi tꞌuni 3.797 yä rebista ꞌne 7.986 yä mfistꞌofo.