Yä testigo rä Jeoba bi me̱ꞌtsi rꞌa yä däta mhuntsꞌi xa mähotho ha Brasil, Costa Rica, Hong Kong, Irlanda, Israel, Nueva Zelanda ꞌne Suecia. Näꞌä rä mu̱di däta mhuntsꞌi bi tꞌo̱tꞌe ha Suecia ha näꞌä rä zänä julio de rä je̱ya 2012 ꞌne de nuꞌu̱ yoto, hñuu bi tꞌo̱tꞌe ha näꞌä rä zänä enero de rä je̱ya 2013 ha Costa Rica ꞌne Nueva Zelanda.

Ha nuya yä däta mhuntsꞌi di tꞌuni yä thoꞌtsi, yä demostrasion ꞌne yä drama, ja ngu thogi ha nuꞌu̱ märꞌa yä däta mhuntsꞌi de gä hñupa o̱tꞌe yä testigo rä Jeoba tatꞌä je̱ya.

Ha nuya yä däta mhuntsꞌi bi ntini yä jäꞌi de märꞌa yä dähni. Änte ꞌne mꞌe̱fa de kada nꞌa de nuya yä däta mhuntsꞌi nuꞌu̱ yä zo̱nte bi tsꞌitsꞌi dä bädi rꞌa de nuꞌu̱ yä luga xa mähotho de näꞌä hniniꞌä.

Nꞌa de nuꞌu̱ yä zo̱nte bi ntini ha näꞌä däta mhuntsꞌi bi tꞌo̱tꞌe ha Brasil bi ꞌñenä: «Xa dä johya ndunthi nuꞌmu̱ dä handi hängu rä mhäte pe̱ꞌtsi nuꞌu̱ yä ku ꞌne xa yä hojäꞌi. Dä tsa ge ngu nse̱kitho bi xu mä familia».

ꞌNe nꞌa de nuꞌu̱ yä zo̱nte bi ntini ha näꞌä däta mhuntsꞌi bi tꞌo̱tꞌe ha Hong Kong bi ꞌñenä: «Xa dä tsa ndunthi rä ehya ha mä koraso nuꞌmu̱ dä handi hanja nuꞌu̱ yä ku bi hñäni nuꞌu̱ yä rꞌayꞌo he̱ꞌmi ha rä idioma mandarin, mi hu̱fi nuꞌu̱ yä he̱ꞌmi ꞌne asta mi zoni ko rä johya».

Tatꞌä je̱ya yä testigo rä Jeoba o̱tꞌe yä däta mhuntsꞌi po gatꞌho rä Xiꞌmhai ꞌne yä miyontho nuꞌu̱ yä jäꞌi di ntini.

Ha nuya yä däta mhuntsꞌi di nheki näꞌä rä mhäte, rä johya ꞌne rä hogä ntsitsꞌi pe̱ꞌtsi gatꞌho yä Testigo. Geꞌä mänꞌa di nheki nuꞌmu̱ di tꞌo̱tꞌe nuꞌu̱ yä däta mhuntsꞌi internacional. Nuꞌmu̱ tso̱ho̱ rä ora de rä ñhuni gatꞌho nuꞌu̱ yä Testigo di ñuni mähye̱gi, di nupä mfeni nꞌa ngu mänꞌaa, ju̱ki yä foto, di mpatä regalo, di ñꞌumbä dato nꞌa ngu mänꞌaa, di nze̱njua ꞌne di ñhu̱fi ko ndunthi rä johya.

ꞌNe ja ngu thogi ha nuꞌu̱ märꞌa yä däta mhuntsꞌi, nuꞌu̱ hingä yä testigo rä Jeoba ꞌnehe dä za dä ntini.