Ya pe̱ꞌtsi 28 yä je̱ya dende nuꞌmu̱ thogi de 11.000 yä testigo rä Jeoba xä zoogi yä nguu pa xä mfaxte ha nuꞌu̱ yä ꞌme̱fi de gä construcción ha 120 yä dähni. Ko rä johya nuyu̱ xä uni de yä tsꞌe̱di, yä mfädi ꞌne yä tiempo nsinke xä yꞌadi dä dähä nixi nꞌa rä be̱xo.

Ndunthi de geꞌu̱ jutꞌäse̱ yä pasaje pa tso̱ni ha nuꞌu̱ yä luga habu̱ bi faxte. Rꞌa de geꞌu̱ di usa yä bakasion, ꞌne märꞌa adi nse̱ki ha yä ꞌme̱fi, mäske nuꞌu̱ xä gohi nsinke nꞌa rä thähä po geꞌä.

Nixi nꞌa de geꞌu̱ hinto bi obligabi xä me̱fi njabu̱; gatꞌho xä nese̱ xä mfaxte ko rä johya pa njabu̱ mänꞌa dä tꞌungä ntꞌo̱de nuꞌu̱ yä rꞌayꞌo hogä noya de rä Tsꞌu̱tꞌhui Äjuä po gatꞌho rä Xiꞌmhai (Mateo 24:14). Yä testigo rä Jeoba xä hyoki yä ofisina, yä nguu ꞌne yä däta ngu de gä ꞌme̱fi habu̱ di imprimi yä Mäkä Tꞌofo ꞌne yä he̱ꞌmi udi de rä Noya Äjuä. ꞌNehe xä hyoki yä Ngu de gä Däta Mhuntsꞌi habu̱ dä za dä ntini asta 10.000 yä jäꞌi, ꞌne yä Ngu de gä Mhuntsꞌi habu̱ di ñꞌe̱ni asta 300 yä jäꞌi.

ꞌNe nunä ꞌme̱fi hingä ja huadiua tobe di sigi di te. Näꞌä rä däta ngu de gä ꞌme̱fi ja ha nuꞌu̱ yä dähni geꞌä umbäbi gatꞌho te di japä mꞌe̱di nuꞌu̱ yä me̱fi. Di tꞌumbäbi habu̱ dä ñꞌoxi, te dä zi ꞌne di ꞌmembäbi yä dutu. Nuꞌu̱ yä Testigo ꞌmu̱i ha nuꞌu̱ yä luga ꞌnehe faxte ko ndunthi rä johya ha nuꞌu̱ yä ꞌme̱fiꞌu̱.

Pa dä bo̱ni ꞌne dä thoki mänꞌa xä ñho nuꞌu̱ yä ꞌme̱fi ha näꞌä rä je̱ya 1985, bi thutsꞌi nꞌa rä programä internacional de gä construcción. Pa nuꞌu̱ toꞌo ne dä mfaxte, mähyoni dä me̱ꞌtsi 19 asta 55 yä je̱ya ꞌne di pe̱ꞌtsi nꞌa tu̱i rä mfädi de nuꞌu̱ yä ꞌme̱fi de gä construcción. Kasi gatꞌho nuꞌu̱ yä Testigo faxte ha nuya yä ꞌme̱fi pa po yoho yä semänä o hñu nzänä. Rꞌa de geꞌu̱ pa po nꞌa nje̱ya o thogi de nꞌa nje̱ya.

Yä ꞌme̱hñä nuꞌu̱ yä ku di tꞌuti hanja dä dätꞌi yä alambre ha yä bariya, dä yꞌu̱i yä loseta, dä lija ꞌne dä pinta. ꞌNehe dä za dä hyoki yä ñhuni pa nuꞌu̱ yä me̱fi o dä maxtꞌi nuꞌu̱ yä ngu habu̱ oxi.

Nuꞌmu̱ nuꞌu̱ yä Testigo pengi ha yä nguu rꞌa de geꞌu̱ ofo yä karta habu̱ di ungä njamädi ngeꞌä bi tsꞌohni pa bi mfaxte ha nuꞌu̱ yä ꞌme̱fi. Nꞌa rä medinthäti bi yꞌofo: «Nuje di ne gä rꞌaꞌäꞌihe ndunthi njamädi ngeꞌä bi za dä mfaxtehe ha näꞌä rä däta ngu de gä ꞌme̱fi ha rä hnini Budapest, nuje dä handihe ngu nꞌa rä däta nsu. Nuꞌu̱ yä testigo rä Jeoba de rä hnini Hungría xa ja yä njamädi ꞌne xa yä hojäꞌi. Mi uadi näꞌä rä zänä dä yꞌoheni xa bi jakägihe xä ñhei dä tsoheni nuꞌu̱ mä kuhe. ¡Pe nzäntho thogi njabu̱! Pe mu̱ dä za, di ne gä pe̱fihe njabu̱ mänꞌaki nuꞌmu̱ xti zo̱ho̱ rä primavera. Kada nꞌa de nuꞌu̱ yä zänä xtä mfaxtehe ha nuya yä ꞌme̱fi, xtä handihe ngu nꞌa rä zänä näꞌä mänꞌa xa mähotho de gatꞌho».