NXA̱DI 04
¿Toʼoʼä Ojä?
Desde na mu̱di nuʼu̱ yu̱ jäʼi xi thänne xi ngü yu̱ ojä o yu̱ dähmü. Pe̱ nuʼä Biblia ma nangeʼä ʼna Ojä ge manʼna ja ra ʼtse̱di ge di geʼu̱ miʼra (2 Crónicas 2:5). ¿Toʼoʼä? ¿ʼNe hanja geʼä manʼna ja ra ʼtse̱di ge dä geʼu̱ yu̱ dähmü ge thänneʼu̱ yu̱ jäʼi? Dä mi nxa̱di nuʼä ne Ojä ge gi pädi nangeʼä.
1. ¿Ndaʼä na thüʼä Ojä, ʼne hanja di pähmu̱ ge nuʼä ne gä pähmu̱ʼä na thü?
Nubu̱ Biblia, nuʼä Ojä xikju̱ toʼoze̱he̱ʼä: “Nuga̱ di Jeoba. Geʼä ma thüga̱ʼä” (dä mi nu Isaías 42:5, 8). Jeoba ʼna ra thü ge ni ʼyëhë nuʼä ra nhma ge ebreo, xi ngüʼu̱ yu̱ bäsu̱kuä ëna ge nuʼä na thü Ojä, ne dä ma “nuʼä o̱ʼte di nja nuʼä ne ge di nja”. Nuʼä Jeoba ne ge gä pähmu̱ʼä na thü (Éxodo 3:15). ¿Hanja di manhmu̱ ngübu̱? Geʼtho nuʼä bi ʼyo̱ʼte ge nubu̱ Biblia dä hyüxpu̱ na thü thogi 7,000 yu̱ nidi. a “Nuʼä Ojä majuäni ge nubu̱ mahëʼtsi ʼne nuua ha̱i” na thü Jeoba (Deuteronomio 4:39).
2. ¿ʼBe̱ʼä xikju̱ʼä Biblia nangeʼä Jeoba?
Madägeʼä nuʼu̱ yu̱ jäʼi di thänne xi ngü yu̱ ojä o yu̱ dähmü, pe̱ nuʼä Biblia ma ge ho̱nʼtä ʼna Ojä majuäni ʼbu̱i, geʼä Jeoba. Gä nuhu̱ hanja. Nuʼä Jeoba thogi ja ra nʼtëdiʼä, geʼtho geʼä thogi xi nhëʼtsi o “Nuixtetho ga̱ʼthoua ra ha̱i” (dä mi nu Salmo 83:18). Ho̱nʼtä thogi ja na ʼtse̱diʼä, nuna ne dä ma ge sa̱ dä ʼyo̱ʼte ga̱ʼtho nuʼä ʼbe̱ʼä ne o nuʼä dä numanho. Kextä geʼä bi za̱nni o bi hoki ga̱ʼtho nuʼä ʼbe̱ʼä ja: nuʼä ra neki, ra nximha̱i, ga̱ʼtho ʼbe̱ʼä jaua ha̱i (Apocalipsis 4:8, 11). Nuʼä Jeoba ho̱nʼtä nzäntho xi mʼbu̱i ʼne njämʼbu̱ dä düʼä (Salmo 90:2).
GÄ PÄHMU̱ MANʼNA NANGEHNA
Xi ngü ʼbe̱pu̱ ʼtëmbi o siʼä Ojä, pe̱ gä nuhu̱ ʼbe̱pu̱ di hye̱ʼtsi ko nuʼä na thü, ʼna thü ge na thüse̱ʼä Ojä. Gä pähmu̱ ʼbe̱pu̱ ürkähu̱ na thü ʼne hanja ne ge gä pähmu̱ʼä.
3. Xi ngü ʼbe̱pu̱ ʼtëmbi o siʼä Ojä, pe̱ ho̱ntho ʼnatho na thüʼä
Pa gä nuhu̱ ʼbe̱pu̱ di hye̱ʼtsi na thü ʼna ra jäʼi ko nangeʼä sifi o ʼtëmbi, dä mi nuui ä BIDEO ʼne manhmi nangehna:
-
Tengü ʼna ra jäʼi, madägeʼä ʼtëmbi jäʼi, pe̱ ¿ha geʼä na thüʼä?
Nuʼä Biblia ma ge yu̱ jäʼi di thänne xi ngü yu̱ ojä o yu̱ dähmü. Dä mi nuui Salmo 136:1-3 ʼne manhmi nangehna:
-
¿Toʼoʼä ra Ojä ge manʼna ja ra nʼtëdi ʼne ra ʼtse̱di ge di geʼu̱ miʼra yu̱ ojä o yu̱ dähmü?
4. Jeoba ne ge gi pädi ʼne gi mambäʼä na thü
¿Hanja di pähmu̱ ge Jeoba ne ge nuʼi gi pädi nuʼä na thü? Dä mi nuui ä BIDEO ʼne manhmi nangehna:
-
¿Hanja gi mbëni ge Jeoba ne ge dä färpäʼä na thü?
Nuʼä Jeoba ne ge nuʼu̱ yu̱ jäʼi dä mambäʼa na thü. Dä mi nuui Romanos 10:13 ʼne manhmi nangehna:
-
¿Hanja emme jaʼtse̱di gä mambähu̱ na thüʼä Jeoba?
-
¿ʼBe̱ʼä gi mbëni nuʼbu̱ ʼbu̱ʼä nzoi nangeʼä ni thü?
-
¿ʼBe̱ʼä gi mbëni ge sa̱ʼä Jeoba nuʼbu̱ gi no̱mbäʼä na thü?
5. Nuʼä Jeoba ne gi ʼyo̱tni amigoʼä
ʼNa xisu na thü Soten, ge mengübu̱ Camboya, bi ʼyëna ge emme mahotho ʼne emme di muui ge gä pähmu̱ʼä na thü Ojä. Dä mi nuui ä BIDEO ʼne manhmi nangehna:
-
Nangeʼä gä nubu̱ bideo, ¿ʼbe̱pu̱ bi ze̱ʼä Soten nangeʼä ge bi bäʼä na thü Ojä?
Pa ge ʼbu̱ʼä dä za̱ gi ʼyo̱tni amigo, mu̱dithoho ja gi pädi nuʼä na thü. Dä mi nuui Santiago 4:8a ʼne manhmi nangehna:
-
¿ʼBe̱ʼä ne Jeoba ge gi ʼyo̱ʼte?
-
¿Ha gi mbëni ge nuʼbu̱ gi pädi ʼne gi mambä na thüʼä Ojä dä ze̱ʼi gi ʼyo̱tni amigo? ¿Hanja?
NUʼÄ ʼBE̱ʼÄ MANʼU̱ ʼRA YU̱ JÄʼI: “Ho̱nʼtä go ʼbe̱ʼä ma thü dä za̱ gä xihmu̱ʼä Ojä, ngütho ʼnatho ʼbu̱ʼi ʼne pädi ge geʼä di nzoʼä”.
-
¿Ha gi ëʼkyëi ge nuʼä na thü Ojä geʼä Jeoba?
-
¿ʼBe̱pu̱ dä za̱ gi xiʼu̱ miʼra ge nuʼä Ojä numanho ge gä no̱mbähu̱ na thü?
NUʼÄ MANʼNA JAʼTSE̱DI
Nuʼä Ojä majuäni, geʼä Jeoba, geʼä na thüʼä. Nuʼä ne, ge gä pähmu̱ na thü, ne ge gä nzohmu̱ nangeʼä na thü pä dä za̱ gä o̱thu̱ ma amigohu̱.
Nuʼä dä pähmu̱
-
¿ʼBe̱pu̱ di hye̱ʼtsä Jeoba ko nuʼu̱ yu̱ dähmü o yu̱ ojä ge thänneʼu̱ yu̱ jäʼi?
-
¿Hanja ja gä honhmu̱ o gä no̱mbähu̱ na thüʼä Ojä?
-
¿Ha ne Jeoba ge gi ʼyo̱tni amigo? ¿Hanja gi mbëni ngübu̱?
DÄ MI PÄDI MANʼNA
5 yu̱ nʼtüti ge ürkähu̱ ge majuäni ʼbu̱ʼä Ojä.
Dä mi pädi hanja sa̱ gä ëʼkyëihu̱ ge nuʼä Ojä nzäntho xi mʼbu̱i.
Dä mi pädi hanja ja gä no̱mbähu̱ na thüʼä Ojä madägeʼä hindi pähmu̱ ʼbe̱pu̱ mi hma nuʼbu̱ na mu̱di.
¿Ha nʼtu̱ʼti gue̱nda ʼbe̱ʼä ma thü di xihmu̱ Ojä nuʼbu̱ di nzohmu̱? Dä mi pädi hanja di ënhmu̱ ge nuʼä Ojä ja na thüʼä.
a Nubu̱ apéndice A4 ge La Biblia. Traducción del Nuevo Mundo gi timbu̱ miʼra yu̱ nhma ge nangeʼä ʼbe̱ʼä ne dä ma nuʼä na thüʼä Ojä ʼne hanja bi mba ma ʼuekpe na thü nubu̱ miʼra yu̱ Biblia.
