Jeoba xi ʼrakju̱ ʼna hogä regalo, nuʼä Biblia, nubu̱ bä ʼyëpu̱ 66 yu̱ libro. Pe̱ dä za̱tho gi nʼya̱nni: “¿Hapu̱ bä nekiʼä Biblia? ¿Toʼo na mbe̱tiʼä bä ʼyëpu̱?”. Pa gä thähmu̱ nuya yu̱ nʼta̱nni, mu̱di gä nuhu̱ ʼbe̱pu̱ bi zo̱ho̱ nuʼä na nhman Ojä nuʼu̱ yu̱ pa di ʼbu̱hmu̱.

1. Geʼbu̱ nuʼä Biblia bi ʼyoʼti yu̱ nʼyohu̱, ¿hanja di ënhmu̱ ge na mbe̱ti Ojäʼä?

40 yu̱ nʼyohu̱ bi ʼyoʼtä Biblia. Nuʼu̱ ho̱nʼtä go ʼbe̱ʼä ma ʼbe̱fi mi pe̱ʼu̱, ʼbu̱ʼu̱ mi hyoya o mi membe̱ti. Bi mu̱di bi ʼtoʼtä Biblia nuʼä je̱ya 1513 ante di mʼbu̱ʼä Cristo ʼne bi guadi nuʼä je̱ya 98 ge ya xi mʼbu̱ʼä Cristo. Janangeʼä, pa dä mba ma juadi dä ʼtoʼti bi thogi 1,600 nje̱ya. Pe̱ madägeʼä, nuʼä Biblia hindi nthe̱kpi. ¿Hanja ngübu̱ bi thogi? Geʼtho geʼä Ojä na mbe̱tiʼä (dä mi nu 1 Tesalonicenses 2:13). Nuʼu̱ yu̱ nʼyohu̱ bi ʼyoʼtä Biblia, himbi ʼyo̱ʼti nuʼä bi bënse̱. “Pe̱ gese̱ʼä ra hogä ndähi Ojä bi bëmbi ʼbe̱ʼä bi ʼyotbu̱ mi ʼyoʼträ nhman Ojäʼu̱” (2 Pedro 1:21). a Ko nangeʼä na espiritu santo, nuʼä Ojä bi bëmbäʼu̱ yu̱ nʼyohu̱ nuʼä ʼbe̱ʼä mi ja dä ʼyo̱ʼti (2 Timoteo 3:16).

2. ¿Toʼoʼu̱ dä za̱ di nja ʼna na Biblia?

Yu̱ jäʼi ge ga̱ʼtho yu̱ dähnini, yu̱ ʼtu̱hnini ʼne ho̱nʼtä go ma ne ña yu̱ jäʼi, dä za̱ dä bädi nuʼu̱ yu̱ hogä nhma bä ʼyëpu̱ ja Biblia (dä mi nu Apocalipsis 14:6). Nuʼä Ojä o̱ʼte ge dä mba ma hokiʼä Biblia xi ngü yu̱ ne ge ñaʼu̱ yu̱ jäʼi. ʼNe geʼä ra libro ge xi mba ma thoki xi ngü yu̱ ne ge ñaʼu̱ yu̱ jäʼi. ʼBe̱ ga̱ʼtho yu̱ jäʼi ʼbu̱kua ha̱i dä za̱ dä bädi nuʼä ʼbe̱ʼä manʼä Biblia, madägeʼä ho̱mdbu̱ go ndabu̱ ʼbu̱i o ho̱nʼtä go̱ ʼbe̱ʼä ma ne ñaʼu̱ yu̱ jäʼi.

3. ¿ʼBe̱ʼä bi ʼyo̱ʼtä Jeoba pa di jamansüʼä Biblia?

Nuʼä Biblia bi ʼtoʼti nubu̱ ja yu̱ su̱kuä ge hingi ha̱ʼti o ʼnahmantho ʼya. Bi thoni yu̱ royo ge yu̱ xizate ʼne yu̱ xiʼu̱ yu̱ za ge na thü papiro. Pe̱ nuʼu̱ yu̱ nʼyohu̱ mi ëspäʼä Biblia ʼne mi ne di jamansü na Nhman Ojä, bi ʼyoʼti xi ngü yu̱ kopia ʼne horbu̱tho i hyäki. Madägeʼä xi ngü yu̱ jäʼi ge mi ja yu̱ nʼtëdi mi ne xti juaʼä Biblia, kextä xi ngüʼu̱ bi ne dä ʼye̱nyu̱ te pa di jamansüʼä Biblia. Nuʼä Jeoba hinxi hye̱gi ge ʼbu̱ʼä dä zänhmi ge dä zokju̱ nangeʼä na Nhma. Nuʼä Biblia ëna: “Nuʼä na nhmanʼä ma Ojähu̱ di nja pa nzäntho” (Isaías 40:8).

 GÄ PÄHMU̱ MANʼNA NANGEHNA

5. Himbi za̱ bi mba ma ʼbe̱diʼä Biblia

 6. ʼNa libro pa ga̱ʼtho yu̱ jäʼi

Nuʼä Biblia geʼä ʼna libro ge xi mba ma thoki miʼra yu̱ ne o idioma ʼne xi ngü xi mba ma daʼti. Dä mi nuui Hechos 10:34, 35 ʼne manhmi nangehna:

• ¿Hanja nuʼä Ojä ne ge dä mba ma hoki miʼra yu̱ ne o idioma nuʼä na Nhma ʼne dä mba daʼti xi ngü yu̱ hnini?

• ¿ʼBe̱ʼä manʼna gi ho nangeʼä Biblia?

 NUʼÄ MANʼNA JAʼTSE̱DI

Nuʼä Biblia geʼä na Nhman Ojäʼä, ʼne nuʼä, xi ʼyo̱ʼte ge ga̱ʼtho yu̱ jäʼi dä za̱ dä manʼä Biblia.

Nuʼä dä pähmu̱

• ¿ʼBe̱ʼä ne dä ma ge nuʼä Ojä bi bëmbäʼu̱ yu̱ nʼyohu̱ ge dä ʼyoʼtä Biblia?

• ¿ʼBe̱ʼä manʼna gi ho nangeʼä ʼbe̱pu̱ xi bonʼkä Biblia madägeʼä xi ngüʼu̱ bi ne bi ʼbe̱di? ¿ʼBe̱ʼä gi mbëni ge xi mba ma thoki miʼra yu̱ ne o yu̱ idiomaʼä Biblia ʼne ge xi mba ma daʼti?

• Nuya ge gä pädi nuʼä ga̱ʼtho xi ʼyo̱ʼtä Ojä pa dä zoʼi nangeʼä Biblia, ¿ʼbe̱ʼä gi mbëni gi ʼyo̱ʼte?