NXA̱DI 07

¿ʼBe̱pu̱ ngüʼä Jeoba?

Tso̱ke ge

¿ʼBe̱pu̱ gi mbëni ngüʼä Jeoba? ¿Ha gi mbëni ge emme thogi ja ra ʼtse̱di ʼne njämʼbu̱ dä za̱ gi pädi o gi nsixui? ¿Ha gi mbëni ge Ojä tengütho ʼna ra hue̱i ge ho̱ntho ja na ʼtse̱di pe̱ te sa̱ ʼne te mbëni? Pe̱, ¿ʼbe̱pu̱ njuäntho ngü na njaʼä o na nʼto̱ʼteʼä Jeoba? Nubu̱ Biblia xikju̱ ʼbe̱pu̱ ngü na njaʼä Jeoba. Ma ge u̱rkähu̱ gue̱nda ʼne tü na mu̱i nangekju̱.

1. ¿Hanja hingi sa̱ gä nuhu̱ʼä Ojä?

Geʼtho nuʼä Ojä hindi nekiʼä (Juan 4:24). Nuʼä Jeoba hingi ja na ngo̱ʼkyëi o yu̱ doʼyo tengügähu̱. Nuʼä Ojä Jeoba, tengü ʼna ra ndähi ge bi ʼbu̱pu̱ mahëʼtsi ʼne hingi sa̱ gä nuhu̱.

2. ¿Ndaʼu̱ ʼra yu̱ nʼto̱te o na hogä njaʼä Jeoba?

Madägeʼä hingi sa̱ gä nuhu̱ʼä Jeoba, pe̱ nuʼbu̱ dä pähmu̱ xi nho, emme di nehu̱ʼä o di mähmu̱ʼä, geʼtho majuäni ʼbu̱ʼi. Nubu̱ Biblia ëna: “Nuʼä Jeoba emme di ho dä ʼyo̱ʼte nuʼä xi nho ʼne hindä zoʼu̱ nuʼu̱ hingi he̱gi” (Salmo 37:28). Kextä nuʼä Ojä emme ja ra nhuëkäte, ra mäte ʼne ra nyemu̱i, pe̱ manʼna di huëʼku̱ yu̱ jäʼi ge di nʼu̱mbi (Santiago 5:11). Jeoba hingi soʼu̱ tü yu̱ mu̱i o xi nʼu̱ mbëni, ʼne hürpä na mu̱iʼu̱ xi nxo̱mu̱i nange ga̱ʼtho ra nʼu̱mbi thogi (Salmo 34:18). Xiʼe ¿ha mi päke ge dä za̱ gä johyabähu̱ na mu̱iʼä Jeoba o dä za̱ gä o̱thu̱ ge dä dü na mu̱i nangeʼä di o̱thu̱? ʼNa ra jäʼi ge o̱ʼte nuʼä xi nʼtso o̱ʼte ge dä dü na mu̱iʼä Ojä ʼne xi nʼu̱ dä bëni (Salmo 78:40, 41). Pe̱ ʼna ra jäʼi ge o̱ʼte nuʼä xi nho, o̱ʼte ge emme di njohya na mu̱iʼä Ojä (dä mi nu Proverbios 27:11).

3. ¿ʼBe̱pu̱ ürkähu̱ʼä Jeoba ge di huëgähu̱ o ge di mäkju̱?

Nuʼä manʼna mahotho nangeʼä Jeoba, geʼä na nhuëkäte o na hmädi. Nubu̱ Biblia ëna ge “nuʼä Ojä ra nhuëkäteʼä” (1 Juan 4:8). Ko nangeʼä Biblia ʼne ga̱ʼtho ʼbe̱ʼä xi hoʼkä Jeoba, ürkähu̱ na nhuëkäte o na hmädi (dä mi nu Hechos 14:17). Tengü, dä mi bëni ʼbe̱pu̱ bi hogähu̱. Bi hogähu̱ pa dä za̱ gä njohyahu̱ nuʼbu̱ dä sa̱hu̱ ʼrahmi ʼnanʼyo yu̱ tu̱hu̱, nuʼbu̱ dä o̱hmu̱ yu̱ ʼbe̱i, o nuʼbu̱ dä hänthu̱ yu̱ do̱ni ge ʼrahmi ʼnanʼyo yu̱ ku̱hu̱ ja. Nuʼä Jeoba ne ge gä njohyahu̱.

GÄ PÄHMU̱ MANʼNA NANGEHNA

Mba gä pähmu̱ ʼbe̱ʼä honʼä Jeoba pa dä ʼyo̱ʼte ho̱nʼtä ga̱ ʼbe̱ʼä ge emme mahotho. ʼNe mʼbe̱fa gä pähmu̱ ʼbe̱pu̱ ürkähu̱ʼu̱ yu̱ hogä nja o yu̱ hogä nʼto̱ʼteʼä Jeoba.

4. Nuʼä ra ʼtse̱di honʼä Ojä, geʼä ra espiritu santo

Nuʼbu̱ jaʼä di pe̱hmu̱ di honhmu̱ ma ʼye̱hu̱, pe̱ nuʼbu̱ jaʼä o̱ʼtä Jeoba honʼä na espiritu santo. Nuʼä Biblia hingi ma ge nuʼä ra espiritu santo ʼna ra jäʼiʼä, ma ge geʼä ra ʼtse̱di honʼä Ojä pa dä ʼyo̱ʼte ga̱ʼthoʼä ne. Dä mi nuui Lucas 11:13 ʼne Hechos 2:17, ʼne manhmi nangehna:

Nuʼä Ojä dä ünnä na espiritu santo nuʼu̱ toʼo dä ʼya̱pi. Nangeʼä, xiʼe ¿ʼbe̱ʼä gi mbënge? ¿Ha gi mbëni ge nuʼä ra espiritu santo ʼna ra jäʼi o geʼä na ʼtse̱di Ojä ge honi pa dä ʼyo̱ʼte nuʼä ga̱ʼtho ʼbe̱ʼä ne? ¿Hanja ngübu̱ gi mbëni?

Nuʼä Jeoba honʼä na espiritu santo pa dä ʼyo̱ʼte ho̱nʼtä go ʼbe̱ʼä ne. Dä mi nuui Salmo 33:6 ʼne 2 Pedro 1:20, 21, ʼne manhmi nangehna:

¿ʼBe̱pu̱ ni hyoni na espiritu santoʼä Jeoba?

5. Nuʼu̱ yu̱ hogä nja o yu̱ hogä nʼto̱ʼteʼä Jeoba o̱ʼte gä ne gä te̱nhnu̱ʼä

Nuʼä Moisés, nzäntho mi o̱ʼte na ʼbe̱fiʼä Ojä. Madägeʼä nzäntho mi o̱ʼte na pa̱ha̱ʼä Ojä, pe̱ nuʼä Moisés, mi ne manʼna dä bädi xi nhoʼä Jeoba. Nangeʼä nuʼä bi ʼyëmbä Ojä: “Dä mi ʼyürkäʼu̱ ni ʼyü pa dä za̱ gä päʼi” (Éxodo 33:13). Nuʼä Jeoba bi däti ʼne bi xifi nangeʼu̱ ʼra yu̱ hogä nja o yu̱ hogä nʼto̱ʼte ge jaʼä. Dä mi nuui Éxodo 34:4-6 ʼne manhmi nangehna:

¿Ndaʼu̱ yu̱ hogä nja o yu̱ hogä nʼto̱ʼte bi xiʼä Jeobaʼä Moisés?
¿Ndaʼu̱ yu̱ hogä nja o yu̱ hogä nʼto̱ʼteʼä Jeoba ge manʼna gi ho?

6. Nuʼä Jeoba u̱rpä gue̱ndaʼu̱ yu̱ jäʼi

Nuʼbu̱ mayaʼbu̱ nuʼä na hniniä Ojä, nuʼu̱ yu̱ ebreo, bi nʼyëhë ʼne bi mba ma u̱mbibu̱ Egipto. ¿ʼBe̱ʼä mi mbëni o ʼbe̱ʼä mi sa̱ʼä Jeoba nuʼbu̱ mi nu ge mi pa ma u̱mbiʼä na hnini? Dä mi ʼyo̱hmi ä AUDIO ʼne te̱nhnu̱ ä mambu̱ ja Biblia, o ho̱ntho dä mi nuui Éxodo 3:1-10. ʼNe mʼbe̱fa manhmi nangehna:

AUDIO: Emme bi sa̱ ma nʼu̱ʼä Jeoba ge mi pa ma u̱mbiʼä na hnini (2:45)

¿ʼBe̱ʼä gi pädi nangeʼä o̱ʼtä Jeoba nuʼbu̱ handi ge di nʼu̱mbäʼu̱ yu̱ jäʼi? (Dä mi nuui yu̱ bersikulo 7 ʼne 8).
¿Ha gi ëʼkyëʼi ge Jeoba majuäni ne dä ze̱ʼu̱ yu̱ jäʼi? ¿Ha majuäni dä za̱ dä ze̱di? ¿Hanja gi mbëni ngübu̱?

7. Di nuhu̱ yu̱ hogä nʼto̱ʼteʼä Jeoba nangeʼä ga̱ʼtho xi hoki

Nuʼä ga̱ʼtho bi hoʼkä Jeoba ürkähu̱ nuʼu̱ yu̱ hogä nja ʼne nuʼu̱ yu̱ hogä nʼto̱ʼteʼä. Dä mi nuui ä BIDEO. Mʼbe̱fa dä mi nuui Romanos 1:20 ʼne manhmi nangehna:

BIDEO: Nuʼä ga̱ʼtho xi hoʼkä Jeoba ürkähu̱ na nhuëkäte o na hmädi: Nuʼä ra ngo̱ʼkyëi (1:57)

¿ʼBe̱ʼä ma hogä nja o ma hogä nʼto̱ʼte gi nu nangeʼä ga̱ʼtho ʼbe̱ʼä xi hoʼkä Jeoba?

NUʼÄ ʼBE̱ʼÄ MANʼU̱ ʼRA YU̱ JÄʼI: “Nuʼä Ojä ʼna ʼtse̱dithoʼä ʼne ho̱mbu̱ go hapu̱ ʼbu̱i ʼne njämʼbu̱ dä za̱ gä pähmu̱ʼä”.

¿ʼBe̱ʼä gi mbënge nangehna?
¿Hanja ngübu̱ gi mbëni?

NUʼÄ MANʼNA JAʼTSE̱DI

Nuʼä Jeoba hingi sa̱ gä nuhu̱ʼä, geʼtho nja tengü ʼna ra ndähi. Nuʼä ja na hogä nʼto̱ʼte o yu̱ hogä nja ge emme mahotho. Pe̱ nuʼä manʼna thogi mahotho geʼä na nhuëkäte o na hmädi.