NXA̱DI 11

¿ʼBe̱ʼä ja gä o̱thu̱ pa manʼna dä ze̱kju̱ʼä Biblia?

Tso̱ke ge

Dä mi bëni ge gi ne gi uähi ʼna däpo pa gi ʼyo̱tni huähi, pe̱ hingi pädi hapu̱ gi du̱mbi. Dä za̱tho gi du̱mbäbu̱ e̱mme hëti, geʼtho manʼna hingi hëi di uäpibu̱. Njarbu̱tho ko nuʼä Biblia. Dä za̱tho gi mbëni ge emme xi nhë ʼne hingi pädi hapu̱ gi du̱ʼmi gi ma, ʼne gi nʼa̱nni: “¿Hapu̱ dä za̱ gä du̱mbi gä manʼä Biblia?”. Nuua nxa̱di gä pähmu̱ ʼra yu̱ nʼtsofo ge dä ze̱ʼi gi ho gi ma ʼne gi nxa̱ʼä Biblia.

1. ¿Hanja xi nho gä manhmu̱ʼä Biblia ga̱ʼtho yu̱ pa?

ʼNa ra jäʼi ge manʼä Biblia ga̱ʼtho yu̱ pa o manʼä “na nʼtëdiʼä Jeoba” di njohya ʼne di mʼbu̱manho (dä mi nu Salmo 1:1-3). Dä za̱ gi du̱ʼmi gi manʼä Biblia ʼra yu̱ minutothoho ga̱ʼtho yu̱ pa. Nuʼbu̱ manʼna gä pädi nangeʼä Ojä, manʼna gi ho gi manʼä Biblia.

2. ¿ʼBe̱ʼä dä za̱ dä ze̱ʼi pa manʼna gi nu yu̱ nho nuʼbu̱ gä manʼä Biblia?

Pa manʼna gä nuhu̱ yu̱ nho ʼne dä ze̱kju̱ nuʼbu̱ di manhmu̱ʼä Biblia, mahyoni o jaʼtse̱di gä o̱rpähu̱ nʼyomfëni nuʼä di manhmu̱. Hingä ho̱ntho ja gä manhmu̱ʼä Biblia, ja kextä gä oṟpähu̱ nʼyomfëni (Josué 1:8). Nuʼbu̱ gä ma o gä lee dä mi ʼyo̱ʼtyu̱ nʼta̱nni tengü ya: “¿ʼBe̱ʼä ne dä xiʼkä Jeoba nuua yu̱ bersikulo? ¿ʼBe̱pu̱ dä za̱ gä te̱nni nuya yu̱ nhma nubu̱ ja ma mʼbu̱i? ¿ʼBe̱pu̱ dä za̱ gä honhya yu̱ texto pa gä ze̱ʼu̱ miʼra?”.

3. ¿ʼBe̱ʼä dä za̱ gi ʼyo̱ʼte pa gi hyäkni tiempo gi manʼä Biblia?

¿Ha gi hëi gi hyäkni tiempo pa gi manʼä Biblia? Dä za̱tho xi ngüʼu̱ thogi ngübu̱. Pe̱ dä mi ʼyo̱ʼtä ʼtse̱di gi hyäkni tiempo pa nuʼä manʼna jaʼtse̱di (Efesios 5:16). Dä za̱ gi hyäki ʼna ora ga̱ʼtho yu̱ pa, pa gi ma o gi ʼyo̱ʼthoʼä Biblia. ʼBu̱ʼu̱ di ho dä manʼä Biblia nubu̱ xüditho, ʼbu̱ʼu̱ miʼra di ho dä ma nuʼbu̱ bi nde, o dä za̱tho nuʼbu̱ bi nsu̱nya pa di nsihmë. Xi ʼbu̱ʼu̱ miʼra manʼa Biblia nuʼbu̱ bi nxüi ante ge di nʼähä. Xiʼe ¿ʼbe̱ʼä ma ora dä za̱ gi manʼä Biblia?

GÄ PÄHMU̱ MANʼNA NANGEHNA

Gä nuhu̱ ʼbe̱ʼä manʼna dä za̱ gi ʼyo̱ʼte pa gi ho gi manʼä Biblia. Nuua nxa̱di gi tini ʼra yu̱ nʼtsofo ge dä ze̱ʼi gi nsa̱ xi nho pa nuʼbu̱ bi xa̱nʼniʼi ni xa̱mbäte, ʼne manʼna gi nu yu̱ nho nangeʼä gi nxa̱ʼä Biblia.

Tengüthoho ge ʼrahmiʼtsu̱ di sa̱manku̱hihu̱ ʼra yu̱ nʼtsihmë, njarbu̱thoho ʼrahmi ʼtsu̱ dä za̱ gä hohu̱ gä manhmu̱ʼä Biblia.

4. Dä mi pädi ʼbe̱ʼä dä za̱ gi ʼyo̱ʼte pa gi ho gi manʼä Biblia

Dä za̱tho gi hëi gi du̱ʼmi gi manʼä Biblia. Tengüthoho ge ʼrahmiʼtsu̱ di hohu̱ ʼna tu̱hu̱ ge janageʼä di sa̱hu̱, kextä njarbu̱thoho, ʼrahmiʼtsu̱ ga hohu̱ gä manhmu̱ʼä Biblia. Dä mi nuui 1 Pedro 2:2 ʼne manhmi nangehna:

Xiʼbu̱ gi sa̱pi gi manʼä Biblia ga̱ʼtho yu̱ pa, ¿ha gi mbëni ge mʼbe̱fa gi hose̱ gi ma?

Dä mi nuui ä BIDEO pa gi pädi ʼbe̱ʼä bi ʼyo̱ʼtu̱ ʼra yu̱ hmüte ʼne yu̱ ʼtsu̱nʼtu̱ pa di ho dä manʼä Biblia. Mʼbe̱fa manhmi nangehna:

BIDEO: Nuʼä bi ʼyo̱ʼtu̱ ʼra yu̱ ʼts̱unʼtu̱ ʼne yu̱ hmüte pa di ho dä manʼä Biblia (5:33)

¿ʼBe̱ʼä ma hëi mi thoʼu̱ ʼra yu̱ nʼtsu̱nʼtu̱ ʼne yu̱ hmüte?
¿ʼBe̱ʼä bi ze̱ʼu̱ pa hindi nxo̱mu̱i ge dä manʼä Biblia?
¿ʼBe̱ʼä bi ʼyo̱ʼtu̱ pa manʼna di ho dä manʼä Biblia?

Nuʼä dä za̱ gi ʼyo̱ʼte:

Dä mi huanhni ʼna Biblia ge dä za̱ gi ka̱mfëni ʼne hingi hëi di ma. Dä za̱ gi ma nuʼä Biblia Traducción del Nuevo Mundo geʼbu̱ ja nuʼä ne o idioma gi ña.
Dä za̱ gi du̱ʼmi gi ma nuʼä bä ʼyëpu̱ Biblia ge manʼna gi ho. Dä za̱ gi te̱nni nuʼä bä ʼyëpu̱ “Nuʼä dä za̱ gi ʼyo̱ʼte pa gi du̱ʼmi gi manʼä Biblia”.
Dä za̱ gi honʼä ʼna lista nubu̱ gi mepia nuʼä gi ma. Dä mi te̱nni nubu̱ ʼtoʼti “Mepia nuʼbu̱ ga juadi gä manʼä ʼna kapitulo ge Biblia”.
Dä za̱ gi hyoni JW Library^®. Ge̱ʼbu̱ gi käʼmi nubu̱ ni telefono o nubu̱ hapu̱ dä za̱, dä za̱ gi manʼä Biblia o gi ʼyo̱ʼtho ho̱mbu̱ go hapu̱ gi ʼbu̱i.
Dä za̱ gi hyoni nuʼu̱ yu̱ mfa̱ʼtsi bä ʼyëpu̱ nubu̱ na mu̱di ʼne na nze̱gi ge nuʼä xe̱ki secciones adicionales ge nuʼä Biblia Traducción del Nuevo Mundo. Nubu̱, bä ʼyëpu̱ yu̱ mapa, yu̱ lista ʼne bä ʼyëpu̱ ʼbe̱ʼä ne dä ma ʼra yu̱ nhma ge xi nhëi di pädi, nuya dä ze̱ʼi manʼna gi pädi xi nho nuʼä mambu̱ ja Biblia.

5. Dä mi nsa̱ ante dä sa̱nniʼi nuʼä Biblia

Dä mi nuui Salmo 119:34 ʼne manhmi nangehna:

¿Hanja mahyoni ge gi ora ante gi manʼä Biblia o gi ora nuʼbu̱ gä nsa̱ pa dä sa̱nnaʼä Biblia?

¿ʼBe̱ʼä dä za̱ gi ʼyo̱ʼte pa gi nu yu̱ nho nuʼbu̱ gä nxa̱ʼä Biblia? Nuʼbu̱ gä nsa̱ pa ʼna ngü ʼna yu̱ nxa̱di, dä mi sa̱pi gi te̱nni nuya yu̱ nʼtsofo:

Dä mi ma ga̱ʼtho yu̱ parrafo ge bä ʼyëpu̱ ra mu̱di xe̱kiʼä nxa̱di.
Hyoni ga̱ʼtho yu̱ texto, ʼne sa̱pi gi nu ʼbe̱pu̱ ni nthe̱uiʼu̱ nuʼä bä ʼyëpu̱ ja nxa̱di.
Mepia o marka nuʼu̱ yu̱ nhma ge thäʼu̱ yu̱ nʼta̱nni. Nubu̱ gi ʼyo̱ʼte ngübu̱ dä ze̱ʼi pa nuʼbu̱ gä nxa̱hmiʼä ni xa̱mbäte.

¿Ha mi päkena?

Nuje ge di testigo ä Jeobahe, xtä honhme xi ngü yu̱ Biblia, pe̱ manʼna di hohe nuʼä Traducción del Nuevo Mundo ge̱ʼtho po̱manho ʼne hingi hëi di pädi, kextä hüxpu̱ nuʼä na thü Ojä (dä mi nubu̱ jw.org: “¿Ha jase̱ na Bibliaʼu̱ yu̱ testigo ä Jeoba?”).

NUʼÄ ʼBE̱ʼÄ MANʼU̱ ʼRA YU̱ JÄʼI: “Emme xi nhëi gä manʼä Biblia, hingi pongi ʼne hindi ne”.

Nuʼi ¿ʼbe̱ʼä gi mbëni?

NUʼÄ MANʼNA JAʼTSE̱DI

Pa gi nu yu̱ nho nuʼbu̱ gä manʼä Biblia, dä mi sa̱nnä ʼna ora pa gi ma, ʼya̱ʼpä mfa̱ʼtsiʼä Ojä ge dä ze̱ʼi gi pädi nuʼä gi ma ʼne dä mi nsa̱ ante dä sa̱nniʼi nuʼä Biblia.