NXA̱DI 15
¿Toʼoʼä Jesús?
Emme xtä o̱hmu̱ nangeʼä Jesús, pe̱ ʼbu̱hyu̱ jäʼi ge ho̱nʼtho pärpä na thüʼä pe̱ hingi pädi xi nho nuʼä ʼbe̱ʼä bi ʼyo̱ʼte, hanja bä ëkua Ha̱i. ʼNe nuʼu̱ miʼra yu̱ jäʼi di hye̱ʼtsi ʼbe̱ʼä mbëni nangeʼä Jesús. Pe̱ ¿ʼbe̱ʼä xa̱ngähu̱ʼä Biblia nangeʼä Jesús?
1. ¿Toʼoʼä Jesús?
Nuʼä Jesús ʼna ra anxe̱ ge emme ja na ʼtse̱di ge bi ʼbu̱pu̱ mahëʼtsi. Nuʼä Jeoba mu̱ditho bä hoʼkä Jesús ante ge di hoki ga̱ʼtho ʼbe̱ʼä ja. Nubu̱ ja Biblia ma “nu ra Cristo mi ʼbu̱ na mu̱ditho, ʼbu̱ te mi jaua”, janangeʼä geʼä na mu̱di ʼtsu̱nʼtu̱ʼä Ojä (Colosenses 1:15). ʼNe kextä, nuʼä Jesús ʼtëmbi na “ʼra ʼTsu̱nʼtu̱” Ojä, geʼtho nuʼä Jeoba bi ʼnase̱ nuʼbu̱ mi hoʼkä na ʼtsu̱nʼtu̱ (Juan 3:16). Mʼbe̱fa nuʼä Jesús bi ze̱ʼä na Ta Jeoba, pa di hoki ga̱ʼtho ʼbe̱ʼä ja (dä mi nu Proverbios 8:30). Desde mayaʼbu̱tho nuʼä Jeoba ʼne nuʼä Jesús emme di nsixmanhoʼu̱, geʼtho nzäntho ʼrarbu̱ bi mpe̱ʼu̱. Nuʼä Jesús ʼtëmbi “ra Nhma” o na po̱ngäneʼä Ojä, geʼtho geʼä xiʼu̱ miʼra nuʼu̱ yu̱ nʼtëdi ʼne nuʼu̱ yu̱ nʼtsofoʼä na Ta (Juan 1:14).
2. ¿Hanja bä ëkua Ha̱iʼä Jesús?
Ma 2,000 nje̱ya, nuʼä Jeoba bi hyonʼä na espiritu santo pa dä ʼyo̱ʼtä ʼna milagro, bi ʼyo̱ʼte ge nuʼä Jesús di mʼbu̱kua ha̱i tengü ʼna ra ʼue̱re. Pa ge di njaʼä, bi huanhni ʼna hmüte ge hinmi nthäti ge na thü María pa ge dä dinʼä Jesús, ʼne nangeʼä nuʼä Jesús bi za̱ bi mʼbu̱kua ha̱i tengü ʼna ra jäʼitho. (dä mi nu Lucas 1:34, 35). Nuʼä Jesús geʼä ra Cristoʼä o Mesías ge mi mambu̱ ja Biblia ge bä ëkua Ha̱i, ʼne ge bä ëhë pa dä ñambä na teʼu̱ yu̱ jäʼi. a Ga̱ʼthoʼu̱ yu̱ profesia ge nʼtoʼtibu̱ ja Biblia nangeʼä ra Mesías bi njaʼu̱. Njabu̱, bi fädi xi nho ge geʼä na ʼTsu̱nʼtu̱ Ojäʼä (Mateo 16:16).
3. ¿Hapu̱ ʼbu̱ʼä Jesús nuʼu̱ yu̱ pa jabu̱?
Madägeʼä bi düʼä Jesús, pe̱ nuʼä Ojä bi xoʼtsi ʼne nuʼä bi bengbu̱ mahëʼtsi. Nubu̱ Biblia ëna: “Geʼe na nthahniʼi Ojä ge ra Cristo, na ʼTsu̱nʼtu̱ʼi Ojä i ʼbu̱i” (Filipenses 2:9). Nuʼu̱ yu̱ pa jabu̱ya nuʼä Cristo di mandabu̱ mahëʼtsi; pe̱ ho̱nʼtä Jeoba manʼna nuixtetho ra nʼtëdi.
GÄ PÄHMU̱ MANʼNA NANGEHNA
Gä nuhu̱ hanja jaʼtse̱di gä pähmu̱ xi nho toʼoʼä Jesús ʼne nuʼä bi ʼyo̱ʼte.
4. Nuʼä Jesús hingä geʼä Ojäʼä
Madägeʼä nuʼä Jesús ja ra ʼtse̱dibu̱ mahëʼtsi, nubu̱ ja Biblia ma ge ho̱nʼtä Jeoba geʼä manʼna ja ra ʼtse̱diʼä. Janangeʼä, nuʼä Jesús nzäntho o̱ʼte nuʼä na pa̱ha̱ʼä Jeoba, geʼtho geʼä na Taʼä ʼne na Ojäʼä. ¿Hanja di manhmu̱ ngübu̱? Dä mi nuui ä BIDEO pa gi pähmi nuʼä mambu̱ ja Biblia ʼne ge ʼbe̱pu̱ di hye̱ʼtsä Jesús ko nuʼä Ojä ge bä hoki ga̱ʼtho.
Nuʼu̱ yu̱ texto gä nuhu̱ya dä ze̱kju̱ gä pähmu̱ ʼbe̱pu̱ di hye̱ʼtsi nuʼä Jeoba ʼne nuʼä Jesús. Dä mi nuui ʼna ngü ʼnaʼu̱ yu̱ texto ʼne mahnmi nangehna:
Dä mi nuui Lucas 1:30-32.
-
Nangeʼä bi manʼä ra anxe̱, ¿toʼoʼä Tätethoho ra ʼtse̱di ʼne ʼbe̱ʼä na njauiʼä Jesús?
Dä mi nuui Mateo 3:16, 17.
-
¿ʼBe̱ʼä bi manʼä bä ñabu̱ mahëʼtsi nuʼbu̱ mi nxixñaʼä Jesús?
-
¿Toʼo gi mbëni bä ñabu̱ mahëʼtsi?
Dä mi nuui Juan 14:28.
-
¿Toʼo manʼna thogi ja ra nʼtëdi ʼna ra ta o ʼna ra ʼtsu̱nʼtu̱?
-
¿Hanja nuʼä Jesús bi ʼyëmbi na Taʼä Jeoba?
Dä mi nuui Juan 12:49.
-
¿Ha bi ʼyënʼä Jesús ge nuʼä, ʼne na Ta ʼna njäʼi mi koʼu̱? ¿ʼBe̱ʼä gi mbënge?
5. Nuʼä Jesús bi ʼyüdi ge geʼä ra Mesías
Nuʼu̱ yu̱ profesia bä ʼyëpu̱ ja Biblia di ze̱ʼu̱ yu̱ jäʼi pa dä bädi toʼoʼä ra Mesías, nuʼä xi huanhnä Ojä pa dä ñambä yu̱ te yu̱ jäʼi. Dä mi nuui ä BIDEO, ʼne gi pädi ʼra yu̱ profesia ge bi nja nangeʼä Jesús nuʼbu̱ mi nʼyoua Ha̱i.
Dä mi nuui nangeʼu̱ yu̱ profesia ʼne manhmi nangehna:
Dä mi nuui Mateo 2:4-6 pa gä pähmu̱ hapu̱ di mʼbu̱ʼä ra Mesías. b
-
¿Ha bi njana profesia nuʼbu mi mʼbu̱ʼä Jesús? (Mateo 2:1).
Dä mi nuui Salmo 34:20 ʼne Zacarías 12:10 pa gä pähmu̱ nuʼä manʼä profesia ge nangeʼbu̱ mi düʼä Mesías.
-
¿Ha bi njaʼu̱ yu̱ profesia dä nuhu̱ya? (Juan 19:33-37).
-
¿Ha jaʼä bi ʼyo̱se̱he̱ʼä Jesús pa di njaʼu̱ yu̱ profesia ge mambu̱ ja Biblia?
-
Nangeʼä dä nuhu̱ ya, ¿ʼbe̱ʼä gi mbëni nangeʼä Jesús?
6. Nuʼbu̱ gä pähmu̱ʼä Jesús gä hänhmu̱ yu̱ njäpi
Nuʼä Biblia ürkähu̱ ge emme mahyoni gä pähmu̱ nangeʼä Jesús ʼne nangeʼä ra ʼbe̱fi bi ünna Ojä. Dä mi nuui Juan 14:6 ʼne 17:3, ʼne manhmi nangehna:
-
¿Hanja emme jaʼtse̱di ge gä pähmu̱ nangeʼä Jesús?
Nuʼä Jesús bi ʼyürkähu̱ ra ʼyü pa ge dä za̱ gä o̱thu̱ ma amigohu̱ʼä Ojä ʼne bi xa̱ngähu̱ʼä majuäni nangeʼä Jeoba. ʼNepu̱ya, dä za̱ gä hänhmu̱ ra te pa nzäntho nangeʼä Jesús.
NUʼÄ ʼBE̱ʼÄ MANʼU̱ ʼRA YU̱ JÄʼI: “Nuʼu̱ yu̱ testigo ä Jeoba hingi ëʼkyëiʼä Jesucristo”.
-
¿ʼBe̱ʼä gi thädi nuʼbu̱ ʼbu̱ʼä dä xiʼi ngübu̱?
NUʼÄ MANʼNA JAʼTSE̱DI
Nuʼä Jesús ʼna ra anxe̱ ge ja ra ʼtse̱di, geʼä ra Mesías ʼne nuʼä na Taʼä geʼä Ojä Jeoba.
Nuʼä dä pähmu̱
-
¿Hanja mambu̱ ja Biblia ge nuʼä Jesús na mu̱di ʼTsu̱nʼtu̱ Ojäʼä?
-
¿ʼBe̱ʼä mi o̱ʼtä Jesús ante ge bä ëkua Ha̱i?
-
¿Hanja di pähmu̱ ge nuʼä Jesús geʼä ra Mesíasʼä?
DÄ MI PÄDI MANʼNA
Dä mi pädi ʼbe̱ʼä manʼna üdi ge nuʼä Jesús geʼä na mʼbe̱hniʼä Ojä.
Dä mi pädi geʼbu̱ ya mambu̱ ja Biblia ge nuʼä Jesús bi ʼyo̱tna taʼä Ojä tengü ʼbu̱ tinhyu̱ ʼtu̱hni o yu̱ bätsi yu̱ jäʼi.
“¿Hanja ʼtëmbi ge nuʼä Jesús na ʼTsu̱nʼtu̱ Ojäʼä?” (Bä ʼyëpu̱ jw.org)
ʼBu̱hyu̱ jäʼi ëna ge hñü yu̱ ojä ʼbu̱i, nuʼä Ojä, nuʼä Jesús ʼne nuʼä espiritu santo, geʼä ëmbi trinidad, pe̱ nuʼä manʼu̱ himbä ʼyëpu̱ ja Biblia.
Dä mi pädi hanja ge ʼna xisu bi pa̱di nuʼä ra nʼtëʼkyëi nuʼbu̱ mi bädi xi nho nuʼä mambu̱ ja Biblia nangeʼä Jesús.
“ʼNa xisu ge mi judia ma hanja bi pa̱di nuʼä mi ëʼkyëi” (¡Despertad!, mayo ge 2013)
