NXA̱DI 22
¿ʼBepu dä za gi xiʼu miʼra nuʼä na Nhman Ojä?
Nangeʼä xkä päpu̱ ja Biblia dä zatho gi mbëni: “¡Genhma ga̱ʼtho yu̱ jäʼi ja dä bädi nuʼä manʼä Biblia!”. ʼNe geʼä majuäniʼä, ga̱ʼtho yu̱ jäʼi ja dä bädi nuʼä mambu̱ na Nhman Ojä. Pe̱ dä za̱tho jaʼbu̱ gi pe̱sni sa̱ o gi sü gi xiʼu̱ miʼra nuʼä xkä päpu̱ ja Biblia. Nuya gä pähmu̱ nuʼä dä za̱ gi ʼyo̱ʼte pa dä za̱ gi xihna Nhman Ojä nuʼu̱ miʼra.
1. ¿ʼBe̱pu̱ dä za̱ gi xiʼu̱ miʼra nuʼä xkä päpu̱ ja Biblia?
Nuʼu̱ yu̱ disipuloʼä Jesús bi ʼyëna: “Geʼtho jatho gä manhme ʼbe̱ʼä xtä nuhe ʼne ʼbe̱ʼä xtä o̱hme” (Hechos 4:20). Nuʼu̱ yu̱ disipulo emme mi johya nangeʼä mi päpu̱ na Nhman Ojä, ʼne emme mi ne dä xiʼu̱ miʼra yu̱ jäʼi nangeʼä mi nxa̱ʼu̱. Xi pa nangeʼi, ¿ha di muui na Nhman Ojä ʼne gi ne gi xiʼu̱ miʼra nuʼä xkä pädi? Janangeʼä, dä mi xiʼu̱ ni amigo ʼne ni familia nuʼä xkä pädi, pe̱ horbu̱thoho gi xifi (dä mi nu Colosenses 4:6).
Nuʼä dä za̱ gi ʼyo̱ʼte pa gi ñahu̱ʼu̱ mi ʼra
-
Nuʼbu̱ gä ñahu̱ ʼna ni familia dä mi xifi nangeʼä mambu̱ ja Biblia, dä za̱ gi ʼyëmbi “Emme mahotho nuʼä dä pädi nuna semana jabu̱”.
-
Nuʼbu̱ gä nu ge ʼna ni amigo xi nʼu̱ o tü na mu̱i, dä mi xifi ʼna texto ge dä hyürpä na mu̱i.
-
Nuʼbu̱ ʼna jäʼi ge ʼrarbu̱ gi mpe̱hmi dä ʼya̱nniʼi ʼbe̱ʼä gä ʼyo̱ʼte nuʼbu̱ nsabadu o ndomingo, dä za̱ gi xifi nuʼä xkä päpu̱ ja ni nxa̱di nangeʼä Biblia o nuʼä gä päpu̱ ja mpe̱ti.
-
Dä mi ʼyüʼtu̱ ni amigo ʼbe̱pu̱ dä za̱ dä yu̱rbu̱ ja internet pa dä hyandi nuʼä jw.org.
-
Nuʼbu̱ bi sa̱nniʼi nangeʼä Biblia, dä mi imbita ʼna ni amigo o toʼo manʼna gi mpähmi pa dä hyu̱nʼi nuʼbu̱ gä nxa̱di ʼne dä mi ʼyüti ʼbe̱pu̱ dä za̱ dä ʼya̱di ge ʼbu̱ʼä dä xa̱mbi nangeʼä Biblia, nubu̱ jw.org.
2. ¿Hanja mahotho ʼne jaʼtse̱di ge ʼrarbu̱ gi predikahu̱ʼu̱ yu̱ kü ʼyobu̱ ja kongregasion?
Nuʼu̱ yu̱ disipuloʼä Jesús, hingä ho̱ntho bi xifi na Nhman Ojä nuʼu̱ yu̱ familia ʼne yu̱ amigo. Nuʼä Jesús “bi me̱nhni ʼrai yoho bu̱ ja yu̱ dähnini” nuʼu̱ yu̱ disipulo pa dä xifi na Nhman Ojä nuʼu̱ miʼra yu̱ jäʼi (Lucas 10:1). Nange ʼbe̱pu̱ nuʼä Jesús bi mandabiʼu̱ yu̱ disipulo ge dä ʼyombä na Nhman Ojä, geʼä bi ʼyo̱ʼte ge xi ngü yu̱ jäʼi dä ʼyo̱de nuʼä na Nhman Ojä. ʼNepu̱ya, nuʼu̱ yu̱ disipulo emme bi njohya ge ʼrarbu̱ bi predikahu̱ʼu̱ na kü (Lucas 10:17). Kextä nuʼi dä za̱ ʼrarbu̱ gi predikahu̱ʼu̱ yu̱ kü ʼyobu̱ ja mpe̱ti.
GÄ PÄHMU̱ MANʼNA NANGEHNA
Nuya gä pähmu̱ ʼbe̱ʼä dä ze̱ʼi pa hingi pe̱sni sa̱ o hingi sü gi xiʼu̱ miʼra nangeʼä na Nhman Ojä.
3. Nuʼä Jeoba dä ze̱ʼi
ʼBu̱ʼu̱ ʼra yu̱ jäʼi ge sü ʼbe̱ʼä dä bëni o dä manʼu̱ miʼra yu̱ jäʼi geʼbu̱ dä ʼyombä na Nhman Ojä.
-
Xiʼe ¿ha gi sü o gi pe̱sni sa̱ gi xuʼu̱ miʼra nangeʼä na Nhman Ojä? ¿Hanja?
Dä mi nuui ä BIDEO ʼne manhmi nangehna:
-
¿ʼBe̱ʼä bi ʼyo̱ʼtu̱ yu̱ hmüte ʼne yu̱ ʼtsu̱nʼtu̱ pa ge hindi nsü?
Dä mi nuui Isaías 41:10 ʼne manhmi nangehna:
-
¿Hanja ja gi orabi Ojä geʼbu̱ gi sü gi predikabiʼu̱ miʼra?
¿Ha mi päkena?
Xi ngüʼu̱ yu̱ testigo ä Jeoba ge mi mbëni ge njämʼbu̱ xtä za̱ dä ʼyombä na Nhman Ojä. Tengü bi thogi ʼna ra nʼyohu̱ na thü Sergey, nuʼä, mi mbëni ge te mi muuiʼä ʼne emme mi sü di ñauiʼu̱ yu̱ jäʼi. Pe̱ ʼna ra pa nuʼä Sergey bi mu̱di bi nxa̱ʼä Biblia. Nuʼä, bi ʼyëna: “Madägeʼä emme mi nsü, pe̱ dä nzamu̱i ʼne dä xiʼu̱ miʼra nuʼä mi nxa̱pu̱ ja Biblia. ʼNe geʼä bi ze̱ki ge manʼna gä nzamu̱i ʼne kextä manʼna bi zo̱rbu̱ ja ma mu̱i nuʼä mi päpu̱ ja Biblia”.
4. Gi nʼyëspäteʼbu̱ gä mambä na Nhman Ojä
Nuʼbu̱ gä xifi na Nhman Ojä ʼna ra jäʼi hingä ho̱ntho gi mbëni ʼbe̱ʼä gi xifi, kextä emme jaʼtse̱di ʼbe̱pu̱ gi xifi o gi huanhni xi nho nuʼä gi ma. Dä mi nuui 2 Timoteo 2:24 ʼne 1 Pedro 3:15, ʼne manhmi nangehna:
-
¿ʼBe̱pu̱ dä za̱ gi te̱nni nuya yu̱ nʼtsofo nuʼbu̱ gä xiʼu̱ miʼra na Nhman Ojä?
-
Dä za̱tho ʼbu̱ʼu̱ ʼra ni familia o ni amigo ge hingi numanho nuʼä gi ëʼkyëi. Pe̱ ¿ʼbe̱ʼä dä za̱ gi ʼyo̱ʼte? ¿ʼNe ʼbe̱ʼä hingi ja ge gi ʼyo̱ʼte?
-
¿Hanja ja gä ëspähu̱ʼu̱ miʼra nuʼbu̱ dä xihmu̱ na Nhman Ojä ʼne hingi ja gä ʼbe̱pfu̱ dä ʼyëʼkyëi nuʼä di ëʼkyëihu̱?
5. Gä njohyahu̱ nuʼbu̱ gä xihmu̱ʼu̱ miʼra nuʼä na Nhman Ojä
Nuʼä Jeoba bi mandabiʼä Jesús ge di predika. ¿ʼBe̱ʼä mi mbënʼä Jesús nangeʼä ra ʼbe̱fi mi o̱ʼte? Dä mi nuui Juan 4:34 ʼne manhmi nangehna:
-
Nuʼä Jesús bi ʼyëna ge nuʼbu̱ mi o̱rpe na pa̱ha̱ʼä na Ta, tengüthoʼbu̱ mi si ʼna ra nʼtsihme ge xi nku̱hi, ko nangeʼä bi ma, bi ʼyüdi ge emme mi ho dä ʼyombä na Nhman Ojä.
-
¿ʼBe̱ʼä ma njäpi gi hyäni nuʼbu̱ gi xiʼu̱ miʼra nangeʼä na Nhman Ojä?
Nuʼä dä za̱ gi ʼyo̱ʼte
-
Nuʼbu̱ gä mbabu̱ ja yu̱ mpe̱ti dä mi u̱rpä gue̱nda ʼbe̱ʼä manʼu̱ yu̱ kü pa dä du̱ʼmi dä xihna Nhman Ojä nuʼu̱ miʼra yu̱ jäʼi.
-
Dä mi ʼya̱nni nuʼä xa̱nnäʼä Biblia ʼbe̱ʼä ja gi ʼyo̱ʼte pa dä za̱ gi partisipa o gi thopu̱ ja yu̱ mpe̱ti. Nuʼu̱ yu̱ asignasion ge dä ʼtaʼi geʼu̱ dä ze̱ʼi gi pädi ʼbe̱pu̱ dä za̱ gi xiʼu̱ miʼra nuʼä na Nhman Ojä.
-
Dä mi nxa̱di nuʼä bä ʼyëpu̱ “Nuʼä ʼbe̱ʼä manʼu̱ ʼra yu̱ jäʼi” ʼne “Nuʼu̱ yu̱ nʼta̱nni o̱ʼtu̱ ʼra yu̱ jäʼi” pa dä za̱ gi pädi ʼbe̱pu̱ dä za̱ gi thädi nuʼbu̱ jaʼä bi ʼta̱nniʼi.
NUʼU̱ YU̱ NʼTA̱NNI O̱ʼTU̱ ʼRA YU̱ JÄʼI: “¿ʼBe̱ʼä gi ja? ¿ʼBe̱ʼä xkä ʼyo̱ʼte?”.
-
Nuʼbu̱ ʼbu̱ʼä toʼo dä ʼya̱nniʼi ngübu̱, ¿ʼbe̱ʼä dä za̱ gi ma pa gi xifi nuʼä xkä päpu̱ ja Biblia?
NUʼÄ MANʼNA JAʼTSE̱DI
Nuʼbu̱ di xihmu̱ʼu̱ miʼra nangeʼä na Nhman Ojä emme di johyahu̱, pe̱ dä za̱tho jaʼbu̱ di mbënhmu̱ ge xi nhëi gä xihmu̱ʼu̱ miʼra nuʼä na Nhman Ojä. Pe̱ nuʼbu̱ gä fu̱di gä xiʼu̱ miʼra nuʼä xkä pädi gi nu ge hingi hëi di predika ʼna.
Nuʼä dä pähmu̱
-
¿ʼBe̱ʼä dä ze̱ʼi gi ne gi xiʼu̱ miʼra yu̱ jäʼi nangeʼä na Nhman Ojä?
-
¿ʼBe̱pu̱ dä za̱ gi nʼyëspäte nuʼbu̱ gä xiʼu̱ miʼra na Nhman Ojä?
-
¿ʼBe̱ʼä dä ze̱kju̱ ge hingä nsühu̱ nuʼbu̱ dä xihmu̱ʼu̱ miʼra na Nhman Ojä?
DÄ MI PÄDI MANʼNA
Dä mi bëni ʼbe̱pu̱ dä za̱ gi hyoni nuʼä tarjeta de kontakto ge jw.org pa gi predikabiʼu̱ miʼra.
Nuʼä dä za̱ gi ʼyo̱ʼte pa gi ünʼä tarjeta ge kontakto ge jw.org (1:43)
Dä mi pädi ʼbe̱ʼä dä ze̱ʼi ʼne nuʼä dä za̱ gi ʼyo̱ʼte pa dä za̱ gi xiʼu̱ miʼra na Nhman Ojä.
“¿Ha ʼraʼtä gi sa̱nni gi hyonʼu̱ yu̱ jäʼi pa dä ʼyëʼkyëi?” (La Atalaya, septiembre ge 2020)
Dä mi pädi nangeʼä ʼna ejemplo bä ʼyëpu̱ ja Biblia ge di ze̱kju̱ gä nzamu̱ihu̱ gä xihmu̱ʼu̱ miʼra nangeʼä na Nhman Ojä madägeʼä gi ʼtsu̱nʼtu̱tho o gi hmütetho.
Dä mi pädi ʼbe̱pu̱ dä za̱ gi xifi nangeʼä Biblia nuʼä ni familia ge hingi pädi nangeʼä Jeoba.
