NXA̱DI 26
¿Hanja emme ja ra nʼu̱mbi ʼne ra nʼtso?
Nuʼbu̱ thoʼä ʼna ra ʼyänthi xi ngü yu̱ jäʼi di ʼya̱nni hanja ngübu̱ thogi. Pe̱ emme hürkähu̱ ma mu̱ihu̱ ge nuʼä Biblia ma hanja thoʼu̱ yu̱ ʼyänthi.
1. ¿ʼBe̱pu̱ bä du̱ʼma Zithü nuʼä ra nʼtso jaua nximha̱i?
Nuʼä Zithü bi be̱spä na nʼtëdiʼä Ojä, geʼtho nuʼä mi ne ge kextä di mandaʼä. Janangeʼä, bi hya̱ʼtu̱ yu̱ mu̱di jäʼi, nuʼä Adán ʼne Eva, pa kextä neʼu̱ dä be̱spä na nʼtëdiʼä Jeoba (Génesis 3:1-5). Nuʼä Zithü bi japi ge nuʼu̱ Adán ʼne Eva dä bëni ge nuʼä Jeoba mi dondo ʼne hinmi nepe di mʼbu̱manhoʼu̱. Ge manʼna di mʼbu̱manho Adán ʼne Eva nuʼbu̱ dä be̱spi ʼne hindä de̱nnu̱ yu̱ nʼtëdiʼä Jeoba. Nuʼä ra mu̱di fe̱hni bi manʼä Zithü geʼbu̱ mi ʼyëmʼpä Eva ge hindä dü. Janangeʼä, nubu̱ ja Biblia ëna ge nuʼä Zithü geʼä ra mambe̱thäniʼä, geʼä na taʼu̱ yu̱ mambe̱thäni (Juan 8:44).
2. ¿ʼBe̱ʼä bi ʼyo̱ʼtu̱ Adán ʼne Eva?
Nuʼä Jeoba emme mi huëʼku̱ Adán ʼne Eva. Nuʼä, bi ʼyëmʼpu̱ Adán ʼne Eva ge mi sa̱ dä za ʼbe̱ ga̱ʼtho yu̱ nda̱ʼta̱ mi jabu̱ ja nhuädo̱ni, pe̱ ho̱nʼtä ʼnanza hinmi ja dä zapi yu̱ nda̱ʼta̱ (Génesis 2:15-17). Pe̱ nuʼu̱ himbi ʼyo̱de, bi za ra nda̱ʼta̱ ge ra za xi ʼtëmbi ge hindä za. Nuʼä Eva “bi du̱kä ʼna ra nda̱ʼta̱ ʼne bi za”. ʼNe mʼbe̱fa nuʼä Adán kextä bi zaʼä nda̱ʼta̱ (Génesis 3:6). Nuʼu̱ yoho himbi ʼyo̱ʼte nuʼä bi mandabiʼä Ojä. Nuʼu̱, te ma ʼtsoki mi jaʼu̱, njabu̱ nzäntho mi o̱ʼte nuʼä mi po̱manho. Pe̱ nuʼu̱ bi nese̱ dä be̱spä na nʼtëdiʼä Ojä, ʼne gepu̱ bi mu̱di bi nja yu̱ ʼtsoki. ʼNe ngübu̱ bi ʼyüdi ge hinmi ne ge geʼä Ojä di mandaʼu̱. Pe̱ nuʼä bi ʼyo̱ʼtu̱ bä hämbä xi ngü yu̱ nʼu̱mbi (Génesis 3:16-19).
3. ¿ʼBe̱ʼä di nuhu̱ya nangeʼä bi ʼyo̱ʼtu̱ Adán ʼne Eva?
Nuʼbu̱ mi be̱spä na nʼtëdi Ojä nuʼu̱ Adán ʼne Eva, bi mu̱di bi nja yu̱ ʼtsoki, ʼne bi thokpä ra ʼtsoki ga̱ʼthoʼu̱ yu̱ ʼtu̱hni. Nuʼä Biblia ëna: “Pe̱ ʼnathomahä ra nʼyohu̱ bi du̱mp ra ʼtsoki ua ja ra ximha̱i, ge nu ra Adán. ʼNe bi du̱mp ra ndäte nange ra ʼtsoki ä bu̱ya. ʼNe geʼä ga̱ʼtho ra ndäte bi thoʼku̱ yu̱ jäʼi ä bu̱ya. Geʼtho tengüʼbu̱ ʼraʼtä dä o̱thu̱ ra ʼtsoki ra Adán” (Romanos 5:12).
Pe̱ xiya, ¿hanja di nʼu̱mbähu̱? Geʼtho jaʼbu̱ hingi po̱manho nuʼä di huanhnu̱ o nuʼä di sa̱nhnu̱ gä o̱thu̱. ʼNe kextä jaʼbu̱ ʼnandi di nʼu̱mbähu̱ nangeʼä o̱ʼtu̱ miʼra yu̱ jäʼi o ge o̱rkähu̱ yu̱ nʼtso, ʼne geʼtho jaʼbu̱ thohyu̱ ʼyänthi (dä mi nu Eclesiastés 9:11).
GÄ PÄHMU̱ MANʼNA NANGEHNA
Gä pähmu̱ hanja hingi sa̱ gä ënhmu̱ ge ra ʼtsoki Ojä yu̱ nʼu̱mbi ʼne yu̱ nʼtso jaua nximha̱i, ʼne kextä gä pähmu̱ ʼbe̱ʼä mbënʼä Ojä nuʼbu̱ nu ge di nʼu̱mbähu̱.
4. ¿Toʼo na ʼtsokiʼu̱ yu̱ nʼu̱mbi di thohmu̱?
Xi ngü yu̱ jäʼi mbëni ge nuʼä Ojä di manda ra nximha̱i. Pe̱ ¿ha majuäniʼä? Dä mi nuui ä BIDEO.
Dä mi nuui Santiago 1:13 ʼne 1 Juan 5:19, ʼne manhmi nangehna:
-
¿Ha geʼä Ojä na ʼtsoki ra nʼu̱mbi ʼne ra nʼtso jaua Ha̱i?
5. Nuʼä xi thogi nangeʼä ge di mandaʼä Zithü
Dä mi nuui Génesis 3:1-6 ʼne manhmi nangehna:
-
¿ʼBe̱ʼä ma fe̱hni bi manʼä Zithü? (Dä mi nuui yu̱ 4 ʼne 5).
-
¿ʼBe̱ʼä bi manʼä Zithü pa dä japi dä bënʼä Eva ge nuʼä Jeoba hinmi nepe di mʼbu̱manhoʼu̱?
-
Nuʼä Zithü ëna ge nuʼu̱ yu̱ jäʼi hingi hombä na mfa̱ʼtsi Ojäʼu̱ pa di mʼbu̱manhoʼu̱. ¿Ha majuäniʼä?
Dä mi nuui Eclesiastés 8:9 ʼne manhmi nangehna:
-
Ga̱ʼthoʼu̱ yu̱ pa xi thogi ge hingä geʼä Jeoba di mandaua ximha̱i, ¿ha ʼbu̱manhoʼu̱ yu̱ jäʼi?
-
Nuʼu̱ Adán ʼne Eva hinmi ja yu̱ ʼtsokiʼu̱, mi ʼbu̱pu̱ ja ra nhuädo̱ni, pe̱ manʼna bi ʼyu̱rpä gue̱nda nuʼä bi xiʼä Zithüʼu̱ ʼne bi be̱spä na nʼtëdiʼä Jeoba.
-
Nuʼbu̱ mi be̱spä ra nʼtëdi Ojäʼu̱ Adán ʼne Eva, bi nxänʼtä ra ʼtsoki, ra nʼu̱mbi ʼne ra ndäte.
-
Nuʼä Jeoba dä ʼuekyu̱ ʼtsoki, ra nʼu̱mbi ʼne ra ndäte. Maho̱nʼä dä zo̱nʼä ra pa ge nuʼu̱ yu̱ jäʼi ya hindi nja yu̱ ʼtsoki ʼne di mʼbu̱manho nubu̱ ʼna ra nhuädo̱ni.
6. Tü na mu̱iʼä Jeoba nuʼbu̱ handi ge di nʼu̱mbähu̱
¿Ha u̱rpä gue̱nda Ojä nuʼbu̱ di nʼu̱mbähu̱? Dä mi hyandi nuʼä bi manʼä ʼTsu̱ʼtabi David ʼne nuʼä apostol Pedro. Dä mi nuui Salmo 31:7 ʼne 1 Pedro 5:7, ʼne manhmi nangehna:
-
¿ʼBe̱ʼä gi mbëni ge nuʼä Jeoba u̱rpä gue̱nda nuʼbu̱ gi nʼu̱mbi ʼne gi thohyu̱ hëi?
7. Nuʼä Ojä dä ʼueke o dä ʼbe̱di ga̱ʼtho yu̱ nʼu̱mbi
Dä mi nuui Isaías 65:17 ʼne Apocalipsis 21:3, 4, ʼne manhmi nangehna:
-
Nuʼä Jeoba ma ge dä ʼbe̱di o dä ʼueke ga̱ʼthoʼu̱ yu̱ nʼu̱mbi thohyu̱ jäʼi. ¿Ha hüʼtä ni mu̱i nuʼä manʼä Ojä ge dä ʼyo̱ʼte? ¿Hanja?
¿Ha mi päkena?
Nuʼbu̱ mi manʼä ra mu̱di fe̱hniʼä Zithü, gepu̱ bi hyo̱spä ra fe̱hniʼä Jeoba. Nangeʼä bi manʼä Zithü, bi ʼyo̱ʼte ge hindä hnumanho ge ʼTsu̱ʼtabiʼä Jeoba. Ya mi ʼtsu̱tho nuʼä Jeoba dä juadi ga̱ʼthoʼu̱ yu̱ nʼu̱mbi ge ja, nuʼbu̱ bi ʼyo̱ʼte ngübu̱ dä ʼtëspä na thü ʼne dä ʼyüdi ge ʼna ra hogä ʼTsu̱ʼtabiʼä. ʼNe ngübu̱ dä fädi ge ho̱nʼtä Jeoba ja ra nʼtëdi ge di ʼTsu̱ʼtabiʼä. Nuʼä manʼna thogi jaʼtse̱di ge ga̱ʼtho ra noho ra nximha̱i geʼä ge dä ʼtëspäʼä Ojä ʼne ge hindä hma yu̱ fe̱hni nangeʼä (Mateo 6:9, 10).
NUʼÄ ʼBE̱ʼÄ MANʼU̱ ʼRA YU̱ JÄʼI: “Ya geʼä bä sa̱nnä Ojä ge gä nʼu̱mbähu̱”.
-
Xiʼe ¿ʼbe̱ʼä gi mbëni?
NUʼÄ MANʼNA JAʼTSE̱DI
Nuʼä Zithü ʼne nuʼu̱ ma mu̱di tahu̱ geʼu̱ yu̱ ʼtsokiʼu̱ ga̱ʼtho ra nʼtso jaua ximha̱i. Nuʼä Jeoba emme tü na mu̱i nuʼbu̱ handi ge di nʼu̱mbähu̱ ʼne mi ʼtsu̱tho dä juadi ga̱ʼtho nuʼä ra nʼu̱mbi ja.
Nuʼä dä pähmu̱
-
¿ʼBe̱ʼä ma fe̱hni bi xiʼä Zithüʼä Eva?
-
¿ʼBe̱ʼä ma nʼu̱mbi di nuhu̱ ya nangeʼä bi ʼyo̱ʼtu̱ Adán ʼne Eva?
-
¿Hanja di ënhmu̱ ge nuʼä Jeoba tü na mu̱i nuʼbu̱ handi ge di nʼu̱mbähu̱?
DÄ MI PÄDI MANʼNA
Dä mi pädi nuʼä mambu̱ ja Biblia nangeʼä ra ʼtsoki.
Dä mi pädi manʼna nangeʼä ra fe̱hni bi manʼä Zithü nubu̱ nhuädo̱ni Edén.
“¿Hanja nuʼä Ojä he̱gi ge di njaʼä ra nʼu̱mbi?” (La Atalaya, 1 enero ge 2014)
Dä mi pädi nangeʼä ʼna ra nʼta̱nni ge hürkä ma mu̱ihu̱.
“¿Hanja bi hye̱ʼä Ojä ge dä tho xi ngü yu̱ judio?” (Bä ʼyëpu̱ jw.org)
Dä mi pädi ʼbe̱ʼä bi ja ʼna ra nʼyohu̱ ge emme mi thohyu̱ nʼu̱mbi.
