“Ga̱ʼtho xi ndü dä nanʼtsi” (Hechos 24:15, Ra ʼDaʼyonhogui nangue ma Hmuhu̱ ra Jesucristo, ko yu̱ letra ge nuʼä ñuhü ja ya).

Dä hyürkähu̱ ma mu̱ihu̱ nuʼbu̱ i tü nuʼä toʼo emme di huëkju̱ (2 Corintios 1:3, 4).

Hingä sühu̱ ge gä tühu̱ (Hebreos 2:15).

Di njaju̱ ʼna nthüʼtämu̱i ge majuäni gä nuhu̱ maho̱nʼä nuʼu̱ di huëkju̱ ge bi dü (Juan 5:28, 29).

Ähä, geʼtho:

• Ojä geʼä bi hyoʼkä ra te. Nuʼä Biblia ëna ge Jeoba “geʼä di üni ra te ʼne di ünni ra nzaki ga̱ʼtho toʼo i ʼbu̱i” (Hechos 17:24, 25). Nuʼä bi za̱ bi ünni ra te ga̱ʼtho ʼbe̱ʼä i ʼbu̱i, njabu̱ hindi hyonyathohu̱ ge ja na ʼtse̱di pa di ünna te maho̱nʼä nuʼu̱ toʼo bi dü.

• Mayaʼbu̱ Ojä bi xoxu̱ ʼda xi dü. Nuʼä Biblia i ma ge Ojä bi ünni ra te hñato yu̱ jäʼi, ʼda yu̱ nʼyohu̱ ʼne ʼda yu̱ bo̱mbe ge ʼdahma ʼnanʼyo yu̱ je̱ya mi pe̱ʼtsi ʼne maho̱nʼä bi mʼbu̱kua Ha̱i. Nuʼu̱ ʼda hinna yaʼä xi dü; pe̱ ʼna nʼyohu̱ ya xi thogi goho pa ge xi dü (Juan 11:39-44).

• Ojä emme i ne ge di ünni na te maho̱nʼä nuʼu̱ bi dü. Jeoba di u̱kpi nuʼä ndäte geʼtho tengüʼbu̱ na nsu̱iuiʼä (1 Corintios 15:26). Emme i ne ge di juadi nuna na nsu̱iui ʼne dä ʼyo̱ʼte nuʼbu̱ bi ünni na te maho̱nʼäʼu̱ xi ndü. Ojä i nepe ge di mʼbu̱i maho̱nʼä nuua Ha̱i nuʼu̱ toʼo i obu̱ na nʼyomfëniʼä (Job 14:14, 15).