ਯਿਸੂ ਨੂੰ ਯੂਹੰਨਾ ਕੋਲੋਂ ਬਪਤਿਸਮਾ ਲਏ ਨੂੰ ਹੁਣ ਤਿੰਨ ਸਾਲ ਤੋਂ ਉੱਪਰ ਹੋ ਗਏ ਸਨ। ਉਸ ਨੇ ਕਈ ਥਾਵਾਂ ਤੇ ਸਫ਼ਰ ਕੀਤਾ ਸੀ। ਉਹ ਜਿੱਥੇ ਵੀ ਜਾਂਦਾ ਸੀ, ਉੱਥੇ ਦੇ ਬੀਮਾਰ ਲੋਕਾਂ ਨੂੰ ਠੀਕ ਕਰਦਾ ਸੀ।

ਹੁਣ ਹਰ ਸ਼ਹਿਰ ਤੇ ਪਿੰਡ ਵਿਚ ਬਸ ਯਿਸੂ ਦੇ ਚਮਤਕਾਰਾਂ ਦੀਆਂ ਗੱਲਾਂ ਹੋ ਰਹੀਆਂ ਸਨ। ਲੋਕੀ ਲੰਗੜਿਆਂ, ਅੰਨ੍ਹਿਆਂ, ਬੋਲਿਆਂ ਅਤੇ ਕਈ ਹੋਰ ਬੀਮਾਰਾਂ ਨੂੰ ਉਸ ਕੋਲ ਲੈ ਕੇ ਆਉਂਦੇ ਸਨ। ਉਹ ਉਨ੍ਹਾਂ ਸਾਰਿਆਂ ਨੂੰ ਠੀਕ ਕਰ ਦਿੰਦਾ ਸੀ।

ਇਕ ਦਿਨ ਯਿਸੂ ਸਬਤ ਵਾਲੇ ਦਿਨ ਲੋਕਾਂ ਨੂੰ ਸਿੱਖਿਆ ਦੇ ਰਿਹਾ ਸੀ। ਸਬਤ ਯਹੂਦੀਆਂ ਦੇ ਆਰਾਮ ਕਰਨ ਦਾ ਦਿਨ ਸੀ। ਤਸਵੀਰ ਵਿਚ ਜਿਸ ਤੀਵੀਂ ਨੂੰ ਤੁਸੀਂ ਦੇਖ ਰਹੇ ਹੋ, ਉਹ ਬਹੁਤ ਬੀਮਾਰ ਸੀ। ਆਪਣੀ ਬੀਮਾਰੀ ਕਰਕੇ ਉਹ ਪਿਛਲੇ 18 ਸਾਲਾਂ ਤੋਂ ਸਿੱਧੀ ਖੜ੍ਹੀ ਨਹੀਂ ਹੋ ਪਾ ਰਹੀ ਸੀ। ਯਿਸੂ ਨੇ ਉਸ ਉੱਤੇ ਆਪਣੇ ਹੱਥ ਰੱਖੇ, ਤਾਂ ਉਹ ਹੌਲੀ-ਹੌਲੀ ਸਿੱਧੀ ਖੜ੍ਹੀ ਹੋ ਗਈ। ਵਾਹ! ਉਹ ਬਿਲਕੁਲ ਠੀਕ ਹੋ ਗਈ ਸੀ!

ਇਹ ਦੇਖ ਦੇ ਧਾਰਮਿਕ ਆਗੂਆਂ ਨੂੰ ਗੁੱਸਾ ਚੜ੍ਹ ਗਿਆ। ਉਨ੍ਹਾਂ ਵਿੱਚੋਂ ਇਕ ਨੇ ਭੀੜ ਨੂੰ ਝਿੜਕਿਆ: ‘ਛੇ ਦਿਨ ਹੁੰਦੇ ਹਨ ਕੰਮ ਕਰਨ ਲਈ, ਜੇ ਠੀਕ ਹੋਣਾ ਹੈ ਤਾਂ ਉਦੋਂ ਆਇਆ ਕਰੋ, ਨਾ ਕਿ ਸਬਤ ਦੇ ਦਿਨ!’

ਪਰ ਯਿਸੂ ਨੇ ਉਨ੍ਹਾਂ ਨੂੰ ਜਵਾਬ ਦਿੱਤਾ: ‘ਓ ਭੈੜੇ ਬੰਦਿਓ। ਤੁਹਾਡੇ ਵਿੱਚੋਂ ਕੌਣ ਆਪਣੇ ਗਧੇ ਨੂੰ ਸਬਤ ਵਾਲੇ ਦਿਨ ਪਾਣੀ ਨਹੀਂ ਪਿਲਾਵੇਗਾ। ਤਾਂ ਫਿਰ ਕੀ ਇਸ ਵਿਚਾਰੀ ਔਰਤ, ਜੋ 18 ਸਾਲਾਂ ਤੋਂ ਬੀਮਾਰੀ ਨਾਲ ਲੜ ਰਹੀ ਸੀ, ਨੂੰ ਸਬਤ ਦੇ ਦਿਨ ਠੀਕ ਕਰਨਾ ਗ਼ਲਤ ਹੈ?’ ਇਹ ਸੁਣ ਕੇ ਆਗੂ ਸ਼ਰਮਿੰਦਾ ਹੋ ਗਏ।

ਬਾਅਦ ਵਿਚ ਯਿਸੂ ਅਤੇ ਉਸ ਦੇ ਚੇਲੇ ਯਰੂਸ਼ਲਮ ਨੂੰ ਚਲੇ ਗਏ। ਰਾਹ ਵਿਚ ਯਿਸੂ ਨੇ ਆਪਣੇ ਚੇਲਿਆਂ ਨੂੰ ਦੱਸਿਆ ਕਿ ਯਰੂਸ਼ਲਮ ਵਿਚ ਉਸ ਨੂੰ ਮਾਰਿਆ ਜਾਵੇਗਾ ਅਤੇ ਬਾਅਦ ਵਿਚ ਉਸ ਨੂੰ ਜੀ ਉਠਾਇਆ ਜਾਵੇਗਾ। ਜਦ ਉਹ ਯਰੀਹੋ ਦੇ ਬਾਹਰ-ਬਾਹਰ ਦੀ ਲੰਘ ਰਹੇ ਸਨ, ਤਾਂ ਉੱਥੋਂ ਦੇ ਦੋ ਅੰਨ੍ਹੇ ਮੰਗਤਿਆਂ ਨੂੰ ਪਤਾ ਲੱਗਾ ਕਿ ਯਿਸੂ ਆ ਰਿਹਾ ਸੀ। ਉਹ ਯਿਸੂ ਨੂੰ ਆਵਾਜ਼ ਮਾਰਨ ਲੱਗੇ: ‘ਯਿਸੂ, ਸਾਡੀ ਮਦਦ ਕਰ!’

ਯਿਸੂ ਨੇ ਇਨ੍ਹਾਂ ਅੰਨ੍ਹਿਆਂ ਨੂੰ ਕੋਲ ਬੁਲਾ ਕੇ ਪੁੱਛਿਆ: ‘ਦੱਸੋ ਮੈਂ ਤੁਹਾਡੇ ਲਈ ਕੀ ਕਰਾਂ?’ ਉਨ੍ਹਾਂ ਨੇ ਜਵਾਬ ਦਿੱਤਾ: ‘ਪ੍ਰਭੂ, ਸਾਡੀਆਂ ਅੱਖਾਂ ਖੋਲ੍ਹਦੇ।’ ਯਿਸੂ ਨੇ ਉਨ੍ਹਾਂ ਦੀਆਂ ਅੱਖਾਂ ਨੂੰ ਛੂਹਿਆ ਅਤੇ ਉਹ ਉਸੇ ਵਕਤ ਠੀਕ ਹੋ ਗਏ! ਕੀ ਤੁਸੀਂ ਜਾਣਦੇ ਹੋ ਯਿਸੂ ਨੇ ਇਹ ਸਭ ਚਮਤਕਾਰ ਕਿਉਂ ਕੀਤੇ ਸਨ? ਕਿਉਂਕਿ ਉਹ ਲੋਕਾਂ ਨੂੰ ਬਹੁਤ ਪਿਆਰ ਕਰਦਾ ਸੀ ਅਤੇ ਉਹ ਚਾਹੁੰਦਾ ਸੀ ਕਿ ਲੋਕ ਉਸ ਤੇ ਨਿਹਚਾ ਰੱਖਣ। ਯਿਸੂ ਦੇ ਇਨ੍ਹਾਂ ਚਮਤਕਾਰਾਂ ਨੂੰ ਧਿਆਨ ਵਿਚ ਰੱਖਦੇ ਹੋਏ ਅਸੀਂ ਯਕੀਨ ਨਾਲ ਕਹਿ ਸਕਦੇ ਹਾਂ ਕਿ ਜਦ ਉਹ ਰਾਜਾ ਬਣੇਗਾ, ਤਾਂ ਉਹ ਸਾਡੀਆਂ ਸਾਰੀਆਂ ਬੀਮਾਰੀਆਂ ਨੂੰ ਦੂਰ ਕਰ ਦੇਵੇਗਾ।