ਜ਼ਕਰਯਾਹ 7:1-14
7 ਰਾਜਾ ਦਾਰਾ ਦੇ ਰਾਜ ਦੇ ਚੌਥੇ ਸਾਲ ਦੇ ਨੌਵੇਂ ਮਹੀਨੇ ਯਾਨੀ ਕਿਸਲੇਵ* ਮਹੀਨੇ ਦੇ ਚੌਥੇ ਦਿਨ ਯਹੋਵਾਹ ਦਾ ਸੰਦੇਸ਼ ਜ਼ਕਰਯਾਹ ਨੂੰ ਆਇਆ।+
2 ਬੈਤੇਲ ਦੇ ਲੋਕਾਂ ਨੇ ਸ਼ਰਾਸਰ ਅਤੇ ਰਗਮ-ਮਲਕ ਤੇ ਉਸ ਦੇ ਆਦਮੀਆਂ ਨੂੰ ਯਹੋਵਾਹ ਤੋਂ ਰਹਿਮ ਦੀ ਭੀਖ ਮੰਗਣ ਲਈ ਘੱਲਿਆ
3 ਅਤੇ ਸੈਨਾਵਾਂ ਦੇ ਯਹੋਵਾਹ ਦੇ ਘਰ* ਦੇ ਪੁਜਾਰੀਆਂ ਅਤੇ ਨਬੀਆਂ ਨੂੰ ਇਹ ਕਹਿਣ ਲਈ ਕਿਹਾ: “ਕੀ ਮੈਂ ਪੰਜਵੇਂ ਮਹੀਨੇ ਵਿਚ ਰੋਵਾਂ+ ਅਤੇ ਵਰਤ ਰੱਖੀ ਜਾਵਾਂ ਜਿਵੇਂ ਮੈਂ ਇੰਨੇ ਸਾਰੇ ਸਾਲਾਂ ਤੋਂ ਕਰਦਾ ਆਇਆ ਹਾਂ?”
4 ਸੈਨਾਵਾਂ ਦੇ ਯਹੋਵਾਹ ਦਾ ਇਹ ਸੰਦੇਸ਼ ਦੁਬਾਰਾ ਮੈਨੂੰ ਆਇਆ:
5 “ਦੇਸ਼ ਦੇ ਸਾਰੇ ਲੋਕਾਂ ਅਤੇ ਪੁਜਾਰੀਆਂ ਨੂੰ ਕਹਿ, ‘70 ਸਾਲਾਂ ਦੌਰਾਨ+ ਜਦੋਂ ਤੁਸੀਂ ਪੰਜਵੇਂ ਮਹੀਨੇ ਅਤੇ ਸੱਤਵੇਂ ਮਹੀਨੇ ਵਿਚ ਵਰਤ ਰੱਖਿਆ ਸੀ+ ਅਤੇ ਵੈਣ ਪਾਏ ਸਨ, ਤਾਂ ਕੀ ਤੁਸੀਂ ਸੱਚੀਂ ਮੇਰੇ ਲਈ ਵਰਤ ਰੱਖਿਆ ਸੀ?
6 ਅਤੇ ਜਦੋਂ ਤੁਸੀਂ ਖਾਂਦੇ-ਪੀਂਦੇ ਸੀ, ਤਾਂ ਕੀ ਤੁਸੀਂ ਆਪਣੇ ਲਈ ਨਹੀਂ ਖਾਂਦੇ-ਪੀਂਦੇ ਸੀ?
7 ਕੀ ਤੁਹਾਨੂੰ ਉਹ ਗੱਲਾਂ ਨਹੀਂ ਮੰਨਣੀਆਂ ਚਾਹੀਦੀਆਂ ਜੋ ਯਹੋਵਾਹ ਨੇ ਪਹਿਲੇ ਨਬੀਆਂ ਰਾਹੀਂ ਕਹੀਆਂ ਸਨ+ ਜਦੋਂ ਯਰੂਸ਼ਲਮ ਅਤੇ ਇਸ ਦੇ ਆਲੇ-ਦੁਆਲੇ ਦੇ ਸ਼ਹਿਰ ਆਬਾਦ ਸਨ ਤੇ ਇਨ੍ਹਾਂ ਵਿਚ ਸ਼ਾਂਤੀ ਸੀ ਅਤੇ ਜਦੋਂ ਨੇਗੇਬ ਤੇ ਸ਼ੇਫਲਾਹ ਆਬਾਦ ਸਨ?’”
8 ਯਹੋਵਾਹ ਦਾ ਇਹ ਸੰਦੇਸ਼ ਦੁਬਾਰਾ ਜ਼ਕਰਯਾਹ ਨੂੰ ਆਇਆ:
9 “ਸੈਨਾਵਾਂ ਦਾ ਯਹੋਵਾਹ ਇਹ ਕਹਿੰਦਾ ਹੈ, ‘ਸੱਚਾਈ ਅਨੁਸਾਰ ਨਿਆਂ ਕਰੋ+ ਅਤੇ ਇਕ-ਦੂਜੇ ਨਾਲ ਅਟੱਲ ਪਿਆਰ ਕਰੋ+ ਤੇ ਦਇਆ ਨਾਲ ਪੇਸ਼ ਆਓ।
10 ਵਿਧਵਾ ਜਾਂ ਯਤੀਮ*+ ਅਤੇ ਪਰਦੇਸੀ+ ਜਾਂ ਗ਼ਰੀਬ+ ਨਾਲ ਠੱਗੀ ਨਾ ਕਰੋ; ਅਤੇ ਆਪਣੇ ਦਿਲਾਂ ਵਿਚ ਇਕ-ਦੂਜੇ ਖ਼ਿਲਾਫ਼ ਸਾਜ਼ਸ਼ਾਂ ਨਾ ਘੜੋ।’+
11 ਪਰ ਉਹ ਗੱਲ ਸੁਣਨ ਤੋਂ ਇਨਕਾਰ ਕਰਦੇ ਰਹੇ+ ਅਤੇ ਉਨ੍ਹਾਂ ਨੇ ਢੀਠ ਹੋ ਕੇ ਉਸ ਵੱਲ ਪਿੱਠ ਕਰ ਲਈ+ ਅਤੇ ਆਪਣੇ ਕੰਨ ਬੰਦ ਕਰ ਲਏ ਤਾਂਕਿ ਉਹ ਉਸ ਦੀ ਗੱਲ ਨਾ ਸੁਣਨ।+
12 ਉਨ੍ਹਾਂ ਨੇ ਆਪਣੇ ਦਿਲ ਹੀਰੇ* ਵਾਂਗ ਕਰ ਲਏ+ ਅਤੇ ਉਹ ਕਾਨੂੰਨ* ਅਤੇ ਗੱਲਾਂ ਨਹੀਂ ਮੰਨੀਆਂ ਜੋ ਸੈਨਾਵਾਂ ਦੇ ਯਹੋਵਾਹ ਨੇ ਆਪਣੀ ਪਵਿੱਤਰ ਸ਼ਕਤੀ ਰਾਹੀਂ ਪਹਿਲੇ ਨਬੀਆਂ ਜ਼ਰੀਏ ਦੱਸੀਆਂ ਸਨ।+ ਇਸ ਲਈ ਸੈਨਾਵਾਂ ਦੇ ਯਹੋਵਾਹ ਦਾ ਗੁੱਸਾ ਭੜਕ ਉੱਠਿਆ।”+
13 “‘ਜਿਸ ਤਰ੍ਹਾਂ ਉਨ੍ਹਾਂ ਨੇ ਮੇਰੀ ਨਹੀਂ ਸੁਣੀ ਜਦੋਂ ਮੈਂ* ਉਨ੍ਹਾਂ ਨੂੰ ਪੁਕਾਰਿਆ ਸੀ,+ ਉਸੇ ਤਰ੍ਹਾਂ ਮੈਂ ਵੀ ਨਹੀਂ ਸੁਣਿਆ ਜਦੋਂ ਉਨ੍ਹਾਂ ਨੇ ਮੈਨੂੰ ਪੁਕਾਰਿਆ,’+ ਸੈਨਾਵਾਂ ਦਾ ਯਹੋਵਾਹ ਕਹਿੰਦਾ ਹੈ।”
14 ‘ਅਤੇ ਮੈਂ ਉਨ੍ਹਾਂ ਨੂੰ ਹਨੇਰੀ ਨਾਲ ਸਾਰੀਆਂ ਕੌਮਾਂ ਵਿਚ ਖਿੰਡਾ ਦਿੱਤਾ ਜਿਨ੍ਹਾਂ ਨੂੰ ਉਹ ਨਹੀਂ ਜਾਣਦੇ ਸਨ+ ਅਤੇ ਪਿੱਛੋਂ ਦੇਸ਼ ਵੀਰਾਨ ਹੋ ਗਿਆ ਅਤੇ ਉਸ ਵਿੱਚੋਂ ਦੀ ਕੋਈ ਨਹੀਂ ਲੰਘਦਾ ਸੀ ਤੇ ਨਾ ਹੀ ਉਸ ਵਿਚ ਕੋਈ ਵਾਪਸ ਆਉਂਦਾ ਸੀ;+ ਕਿਉਂਕਿ ਉਨ੍ਹਾਂ ਨੇ ਸੋਹਣੇ ਦੇਸ਼ ਦਾ ਉਹ ਹਸ਼ਰ ਕੀਤਾ ਕਿ ਲੋਕ ਦੇਖ ਕੇ ਕੰਬ ਉੱਠਦੇ ਸਨ।’”
ਫੁਟਨੋਟ
^ ਵਧੇਰੇ ਜਾਣਕਾਰੀ 2.15 ਦੇਖੋ।
^ ਜਾਂ, “ਮੰਦਰ।”
^ ਇਬ, “ਜਿਸ ਦੇ ਪਿਤਾ ਦੀ ਮੌਤ ਹੋ ਗਈ ਹੋਵੇ।”
^ ਜਾਂ ਸੰਭਵ ਹੈ, “ਇਕ ਸਖ਼ਤ ਪੱਥਰ” ਜਿਵੇਂ ਲੋਹੇ ਦੀ ਧਾਰ ਨੂੰ ਤਿੱਖਾ ਕਰਨ ਵਾਲਾ ਪੱਥਰ।
^ ਜਾਂ, “ਸਿੱਖਿਆ।”
^ ਇਬ, “ਉਸ ਨੇ।”
