ਪਰਮੇਸ਼ੁਰ ਨੂੰ ਜਾਣੋ

‘ਦਿਲਾਸੇ ਦਾ ਪਰਮੇਸ਼ੁਰ’

2 ਕੁਰਿੰਥੀਆਂ 1:3, 4

ਜ਼ਿੰਦਗੀ ਵਿਚ ਕਈ ਗੱਲਾਂ ਹਨ ਜੋ ਸਾਨੂੰ ਉਦਾਸ ਕਰਦੀਆਂ ਹਨ ਜਿਵੇਂ ਕੋਈ ਦੁੱਖ, ਨਿਰਾਸ਼ਾ, ਜਾਂ ਇਕੱਲਾਪਣ। ਇਨ੍ਹਾਂ ਸਮਿਆਂ ਤੇ ਤੁਸੀਂ ਸ਼ਾਇਦ ਸੋਚੋ ਕਿ ‘ਮੈਂ ਮਦਦ ਲਈ ਕਿਸ ਕੋਲ ਜਾਵਾਂ?’ 2 ਕੁਰਿੰਥੀਆਂ 1:3, 4 (ERV) ਵਿਚ ਪਾਏ ਜਾਂਦੇ ਪੌਲੁਸ ਰਸੂਲ ਦੇ ਸ਼ਬਦਾਂ ਤੋਂ ਪਤਾ ਲੱਗਦਾ ਹੈ ਕਿ ਯਹੋਵਾਹ ਪਰਮੇਸ਼ੁਰ ਸਾਨੂੰ ਦਿਲਾਸਾ ਦੇਣ ਲਈ ਹਮੇਸ਼ਾ ਤਿਆਰ ਹੈ।

ਆਇਤ 3 ਵਿਚ ਪਰਮੇਸ਼ੁਰ ਨੂੰ ‘ਦਇਆ ਨਾਲ ਭਰਪੂਰ ਪਿਤਾ’ ਕਿਹਾ ਗਿਆ ਹੈ। ਇਸ ਦਾ ਕੀ ਮਤਲਬ ਹੈ? “ਦਇਆ” ਲਈ ਵਰਤੇ ਯੂਨਾਨੀ ਸ਼ਬਦ ਦਾ ਮਤਲਬ ਦੂਸਰਿਆਂ ਦੇ ਦਰਦ ਨੂੰ ਸਮਝਣਾ ਹੋ ਸਕਦਾ ਹੈ। * ਇਸ ਸ਼ਬਦ ਬਾਰੇ ਇਕ ਕਿਤਾਬ ਕਹਿੰਦੀ ਹੈ ਕਿ ਇਸ ਦਾ ਮਤਲਬ “ਤਰਸ ਖਾਣਾ” ਜਾਂ “ਬਹੁਤ ਪਰਵਾਹ ਕਰਨੀ” ਵੀ ਹੋ ਸਕਦਾ ਹੈ। ਪਰਮੇਸ਼ੁਰ ਦੀ ਦਇਆ ਉਸ ਨੂੰ ਸਾਡੇ ਲਈ ਕੁਝ ਕਰਨ ਲਈ ਮਜਬੂਰ ਕਰਦੀ ਹੈ। ਪਰਮੇਸ਼ੁਰ ਦੇ ਇਸ ਗੁਣ ਬਾਰੇ ਜਾਣ ਕੇ ਕੀ ਅਸੀਂ ਉਸ ਦੇ ਹੋਰ ਨਜ਼ਦੀਕ ਨਹੀਂ ਆਉਣਾ ਚਾਹੁੰਦੇ?

ਪੌਲੁਸ ਯਹੋਵਾਹ ਨੂੰ ‘ਦਿਲਾਸੇ ਦਾ ਪਰਮੇਸ਼ੁਰ’ ਵੀ ਕਹਿੰਦਾ ਹੈ। ਇੱਥੇ ਪੌਲੁਸ ਜੋ ਸ਼ਬਦ ਵਰਤਦਾ ਹੈ, ਉਸ ਦਾ ਮਤਲਬ ਹੈ “ਕਿਸੇ ਮੁਸ਼ਕਲ ਵਿੱਚੋਂ ਲੰਘ ਰਹੇ ਜਾਂ ਦੁਖੀ ਵਿਅਕਤੀ ਨੂੰ ਲਫ਼ਜ਼ਾਂ ਰਾਹੀਂ ਦਿਲਾਸਾ ਦੇਣਾ ਅਤੇ ਕੁਝ ਕਰ ਕੇ ਹੌਸਲਾ ਦੇਣਾ।” ਇਕ ਹੋਰ ਬਾਈਬਲ ਕਹਿੰਦੀ ਹੈ: “ਅਸੀਂ ਉਦੋਂ ਦੁਖੀ ਇਨਸਾਨ ਨੂੰ ਦਿਲਾਸਾ ਦਿੰਦੇ ਹਾਂ ਜਦੋਂ ਅਸੀਂ ਦੁੱਖ ਸਹਿਣ ਲਈ ਉਸ ਦਾ ਹੌਸਲਾ ਵਧਾਉਂਦੇ ਹਨ।”

ਤੁਸੀਂ ਸ਼ਾਇਦ ਪੁੱਛੋ, ‘ਰੱਬ ਸਾਨੂੰ ਕਿਵੇਂ ਦੁੱਖ ਸਹਿਣ ਲਈ ਦਿਲਾਸਾ ਅਤੇ ਹੌਸਲਾ ਦਿੰਦਾ ਹੈ।’ ਉਹ ਖ਼ਾਸ ਕਰਕੇ ਆਪਣੇ ਬਚਨ ਬਾਈਬਲ ਅਤੇ ਪ੍ਰਾਰਥਨਾ ਰਾਹੀਂ ਦਿਲਾਸਾ ਦਿੰਦਾ ਹੈ। ਪੌਲੁਸ ਦੱਸਦਾ ਹੈ ਕਿ ਪਰਮੇਸ਼ੁਰ ਨੇ ਪਿਆਰ ਨਾਲ ਸਾਨੂੰ ਆਪਣਾ ਬਚਨ ਦਿੱਤਾ ਹੈ ਤਾਂਕਿ ਅਸੀਂ “ਧਰਮ ਪੁਸਤਕ ਦੇ ਦਿਲਾਸੇ ਤੋਂ ਆਸਾ ਰੱਖੀਏ।” ਇਸ ਦੇ ਨਾਲ-ਨਾਲ ਪ੍ਰਾਰਥਨਾ ਰਾਹੀਂ ਸਾਨੂੰ “ਪਰਮੇਸ਼ੁਰ ਦੀ ਸ਼ਾਂਤੀ ਜੋ ਸਾਰੀ ਸਮਝ ਤੋਂ ਪਰੇ ਹੈ” ਮਿਲਦੀ ਹੈ।— ਰੋਮੀਆਂ 15:4; ਫ਼ਿਲਿੱਪੀਆਂ 4:7.

ਯਹੋਵਾਹ ਕਿਸ ਹੱਦ ਤਕ ਆਪਣੇ ਲੋਕਾਂ ਨੂੰ ਦਿਲਾਸਾ ਦਿੰਦਾ ਹੈ? ਪੌਲੁਸ ਕਹਿੰਦਾ ਹੈ ਕਿ ਪਰਮੇਸ਼ੁਰ “ਸਾਡੀਆਂ ਸਾਰੀਆਂ ਬਿਪਤਾਂ ਵਿੱਚ ਸਾਨੂੰ ਦਿਲਾਸਾ ਦਿੰਦਾ ਹੈ।” (2 ਕੁਰਿੰਥੀਆਂ 1:4) ਭਾਵੇਂ ਸਾਡੇ ’ਤੇ ਕੋਈ ਵੀ ਦਬਾਅ ਜਾਂ ਦੁੱਖ ਆਵੇ ਪਰਮੇਸ਼ੁਰ ਸਾਨੂੰ ਇਸ ਨੂੰ ਸਹਿਣ ਦੀ ਤਾਕਤ ਦੇਵੇਗਾ। ਇਹ ਜਾਣ ਕੇ ਸਾਨੂੰ ਕਿੰਨਾ ਹੌਸਲਾ ਮਿਲਦਾ ਹੈ।

ਜਦੋਂ ਪਰਮੇਸ਼ੁਰ ਤੋਂ ਸਾਨੂੰ ਦਿਲਾਸਾ ਮਿਲਦਾ ਹੈ, ਤਾਂ ਇਸ ਤੋਂ ਸਿਰਫ਼ ਸਾਨੂੰ ਹੀ ਫ਼ਾਇਦਾ ਨਹੀਂ ਹੁੰਦਾ। ਪੌਲੁਸ ਅੱਗੇ ਦੱਸਦਾ ਹੈ ਕਿ ਪਰਮੇਸ਼ੁਰ ਸਾਨੂੰ ਇਸ ਲਈ ਦਿਲਾਸਾ ਦਿੰਦਾ ਹੈ ਤਾਂਕਿ “ਅਸੀਂ ਉਸੇ ਦਿਲਾਸੇ ਤੋਂ ਜਿਹ ਨੂੰ ਅਸਾਂ ਪਰਮੇਸ਼ੁਰ ਵੱਲੋਂ ਪਾਇਆ ਹੈ ਓਹਨਾਂ ਨੂੰ ਹਰ ਬਿਪਤਾ ਵਿੱਚ ਦਿਲਾਸਾ ਦੇਣ ਜੋਗੇ ਹੋਈਏ।” ਬਿਪਤਾ ਵੇਲੇ ਦਿਲਾਸਾ ਪਾਉਣ ਤੋਂ ਬਾਅਦ ਅਸੀਂ ਦੂਸਰਿਆਂ ਨਾਲ ਵੀ ਹਮਦਰਦੀ ਜਤਾ ਸਕਦੇ ਹਾਂ ਅਤੇ ਉਨ੍ਹਾਂ ਦੀ ਮਦਦ ਕਰ ਸਕਦੇ ਹਾਂ।

‘ਦਿਲਾਸੇ ਦਾ ਪਰਮੇਸ਼ੁਰ’ ਹੋਣ ਦੇ ਨਾਤੇ ਜ਼ਰੂਰੀ ਨਹੀਂ ਕਿ ਯਹੋਵਾਹ ਸਾਡੀਆਂ ਮੁਸ਼ਕਲਾਂ ਜਾਂ ਦੁੱਖਾਂ ਨੂੰ ਦੂਰ ਕਰ ਦੇਵੇਗਾ। ਪਰ ਸਾਨੂੰ ਇਸ ਗੱਲ ਦਾ ਯਕੀਨ ਹੈ: ਜੇ ਅਸੀਂ ਦਿਲਾਸੇ ਲਈ ਉਸ ਵੱਲ ਤੱਕੀਏ, ਤਾਂ ਉਹ ਸਾਨੂੰ ਜ਼ਿੰਦਗੀ ਵਿਚ ਆਉਂਦੇ ਕਿਸੇ ਵੀ ਦੁੱਖ ਜਾਂ ਮੁਸ਼ਕਲ ਨੂੰ ਸਹਿਣ ਦੀ ਤਾਕਤ ਦੇਵੇਗਾ। ਵਾਕਈ, ਸਾਨੂੰ ਅਜਿਹੇ ਪਿਆਰ ਕਰਨ ਵਾਲੇ ਪਰਮੇਸ਼ੁਰ ਦੀ ਭਗਤੀ ਅਤੇ ਮਹਿਮਾ ਕਰਨੀ ਚਾਹੀਦੀ ਹੈ। (w08 9/1)

[ਫੁਟਨੋਟ]