ਅੱਜ-ਕੱਲ੍ਹ ਟੀ.ਵੀ., ਫ਼ਿਲਮਾਂ ਅਤੇ ਇਸ਼ਤਿਹਾਰਾਂ ਵਿਚ ਹਰ ਵੇਲੇ ਸੈਕਸ ਬਾਰੇ ਹੀ ਦੱਸਿਆ ਜਾਂਦਾ ਹੈ। ਇੱਦਾਂ ਲੱਗਦਾ ਹੈ ਕਿ ਸਿਰਫ਼ ਇੱਕੋ ਜਗ੍ਹਾ ਹੈ ਜਿੱਥੇ ਸੈਕਸ ਬਾਰੇ ਗੱਲ ਨਹੀਂ ਹੁੰਦੀ, ਉਹ ਹੈ ਮਾਪਿਆਂ ਤੇ ਬੱਚਿਆਂ ਵਿਚਕਾਰ। ਕੈਨੇਡਾ ਵਿਚ ਰਹਿਣ ਵਾਲਾ ਨੌਜਵਾਨ, ਮਾਈਕਲ, ਕਹਿੰਦਾ ਹੈ: “ਕਾਸ਼ ਮੇਰੇ ਮੰਮੀ-ਡੈਡੀ ਨੂੰ ਪਤਾ ਹੁੰਦਾ ਕਿ ਉਨ੍ਹਾਂ ਨਾਲ ਸੈਕਸ ਦੇ ਬਾਰੇ ਗੱਲ ਕਰਨੀ ਮੈਨੂੰ ਕਿੰਨੀ ਔਖੀ ਲੱਗਦੀ ਹੈ। ਪਰ ਇਸ ਬਾਰੇ ਕਿਸੇ ਦੋਸਤ ਨਾਲ ਗੱਲ ਕਰਨੀ ਜ਼ਿਆਦਾ ਸੌਖੀ ਹੈ।”

ਅਕਸਰ ਮਾਂ-ਬਾਪ ਵੀ ਇਸ ਵਿਸ਼ੇ ਬਾਰੇ ਆਪਣੇ ਬੱਚਿਆਂ ਨਾਲ ਗੱਲਬਾਤ ਕਰਨ ਤੋਂ ਹਿਚਕਿਚਾਉਂਦੇ ਹਨ। ਇਕ ਸਿਹਤ ਸੰਭਾਲ ਦੀ ਸਿੱਖਿਅਕ ਆਪਣੀ ਕਿਤਾਬ ਵਿਚ ਲਿਖਦੀ ਹੈ: “ਮੈਨੂੰ ਕਿੰਨੇ ਹੀ ਮਾਪਿਆਂ ਨੇ ਦੱਸਿਆ ਹੈ ਕਿ ਉਨ੍ਹਾਂ ਨੇ ਆਪਣੇ 11 ਜਾਂ 12 ਸਾਲਾਂ ਦੇ ਬੱਚਿਆਂ ਨੂੰ ਸਰੀਰ ਵਿਚ ਹੁੰਦੇ ਬਦਲਾਅ ਅਤੇ ਸੈਕਸ ਬਾਰੇ ਕਿਤਾਬਾਂ ਲਿਆ ਕੇ ਦਿੱਤੀਆਂ ਹਨ। ਉਹ ਚੁੱਪ-ਚਾਪ ਇਹ ਕਿਤਾਬਾਂ ਆਪਣੇ ਬੱਚਿਆਂ ਦੇ ਕਮਰੇ ਵਿਚ ਰੱਖ ਦਿੰਦੇ ਹਨ ਤਾਂਕਿ ਉਨ੍ਹਾਂ ਨੂੰ ਇਸ ਬਾਰੇ ਹੋਰ ਗੱਲ ਨਾ ਕਰਨੀ ਪਵੇ।” ਇਹ ਸਿੱਖਿਅਕ ਕਹਿੰਦੀ ਹੈ ਕਿ ਇਸ ਤਰ੍ਹਾਂ ਕਰਨ ਨਾਲ ਬੱਚਿਆਂ ਨੂੰ ਸਾਫ਼ ਪਤਾ ਲੱਗਦਾ ਹੈ: “ਅਸੀਂ ਚਾਹੁੰਦੇ ਤਾਂ ਹਾਂ ਕਿ ਤੁਹਾਨੂੰ ਆਪਣੇ ਸਰੀਰ ਅਤੇ ਸੈਕਸ ਬਾਰੇ ਪਤਾ ਲੱਗੇ, ਪਰ ਅਸੀਂ ਤੁਹਾਡੇ ਨਾਲ ਇਸ ਬਾਰੇ ਗੱਲ ਨਹੀਂ ਕਰਨੀ ਚਾਹੁੰਦੇ।”

ਮਾਪੇ ਹੋਣ ਦੇ ਨਾਤੇ ਤੁਹਾਡੇ ਲਈ ਇੱਦਾਂ ਕਰਨਾ ਕਾਫ਼ੀ ਨਹੀਂ ਹੈ। ਇਹ ਬਹੁਤ ਜ਼ਰੂਰੀ ਹੈ ਕਿ ਤੁਸੀਂ ਆਪ ਆਪਣੇ ਬੱਚਿਆਂ ਨਾਲ ਸੈਕਸ ਬਾਰੇ ਗੱਲ ਕਰੋ। ਆਓ ਆਪਾਂ ਇਸ ਦੇ ਤਿੰਨ ਕਾਰਨ ਦੇਖੀਏ:

1. ਹੁਣ ਮੌਖਿਕ ਸੰਭੋਗ ਅਤੇ ਗੁਦਾ-ਸੰਭੋਗ ਤੋਂ ਇਲਾਵਾ ਕੰਪਿਊਟਰ ਅਤੇ ਮੋਬਾਇਲਾਂ ਰਾਹੀਂ ਗੰਦੀਆਂ ਗੱਲਾਂ ਕੀਤੀਆਂ ਜਾਂਦੀਆਂ ਅਤੇ ਗੰਦੀਆਂ ਤਸਵੀਰਾਂ ਦੇਖੀਆਂ ਜਾਂਦੀਆਂ ਹਨ।”

2. ਸ਼ੀਲਾ ਨਾਂ ਦੀ ਮਾਂ ਦੱਸਦੀ ਹੈ: “ਸਕੂਲ ਸ਼ੁਰੂ ਕਰਦੇ ਹੀ ਬੱਚਿਆਂ ਨੂੰ ਸੈਕਸ ਬਾਰੇ ਗੰਦੀਆਂ ਗੱਲਾਂ ਸੁਣਨੀਆਂ ਪੈਂਦੀਆਂ ਹਨ।”

3.   ਬ੍ਰਾਜ਼ੀਲ ਵਿਚ 15 ਸਾਲਾਂ ਦੀ ਆਨਾ ਕਹਿੰਦੀ ਹੈ: “ਜੇ ਸੱਚ ਦੱਸਾਂ, ਤਾਂ ਮੈਨੂੰ ਨਹੀਂ ਪਤਾ ਕਿ ਮੈਂ ਸੈਕਸ ਬਾਰੇ ਆਪਣੇ ਮਾਪਿਆਂ ਨਾਲ ਗੱਲ ਕਿਵੇਂ ਸ਼ੁਰੂ ਕਰਾਂ।”

ਮਾਪਿਓ, ਰੱਬ ਨੇ ਤੁਹਾਨੂੰ ਜ਼ਿੰਮੇਵਾਰੀ ਦਿੱਤੀ ਹੈ ਕਿ ਤੁਸੀਂ ਆਪਣੇ ਬੱਚਿਆਂ ਨਾਲ ਸੈਕਸ ਬਾਰੇ ਗੱਲ ਕਰੋ। (ਅਫ਼ਸੀਆਂ 6:4) ਇਹ ਸੱਚ ਹੈ ਕਿ ਤੁਹਾਡੇ ਲਈ ਅਤੇ ਬੱਚਿਆਂ ਲਈ ਇਸ ਬਾਰੇ ਗੱਲ ਕਰਨੀ ਔਖੀ ਹੈ। ਬਹੁਤ ਸਾਰੇ ਨੌਜਵਾਨ 14 ਸਾਲਾਂ ਦੀ ਡੈਨੀਏਲ ਨਾਲ ਸਹਿਮਤ ਹਨ, ਜੋ ਕਹਿੰਦੀ ਹੈ, “ਅਸੀਂ ਸੈਕਸ ਬਾਰੇ ਆਪਣੇ ਮੰਮੀ-ਡੈਡੀ ਤੋਂ ਜਾਣਨਾ ਚਾਹਾਂਗੇ ਨਾ ਕਿ ਕਿਸੇ ਟੀਚਰ ਕੋਲੋਂ ਜਾਂ ਕਿਸੇ ਟੀ.ਵੀ. ਪ੍ਰੋਗ੍ਰਾਮ ਤੋਂ।” ਤਾਂ ਫਿਰ ਤੁਸੀਂ ਆਪਣੇ ਬੱਚਿਆਂ ਨਾਲ ਇਸ ਅਹਿਮ ਅਤੇ ਔਖੇ ਵਿਸ਼ੇ ਬਾਰੇ ਕਿੱਦਾਂ ਗੱਲ ਕਰ ਸਕਦੇ ਹੋ?

ਅਸਲ ਵਿਚ ਛੋਟੀ ਉਮਰ ਤੋਂ ਹੀ ਬੱਚੇ ਸੈਕਸ ਬਾਰੇ ਗੱਲਾਂ ਸੁਣਨ ਲੱਗ ਪੈਂਦੇ ਹਨ। ਇਸ ਬਾਰੇ ਸੋਚ ਕੇ ਹੀ ਡਰ ਲੱਗਦਾ ਹੈ ਕਿ ਇਨ੍ਹਾਂ “ਅੰਤ ਦਿਆਂ ਦਿਨਾਂ ਵਿੱਚ” ਦੁਸ਼ਟ ਲੋਕ “ਬੁਰੇ ਤੋਂ ਬੁਰੇ ਹੁੰਦੇ” ਜਾ ਰਹੇ ਹਨ। (2 ਤਿਮੋਥਿਉਸ 3:1, 13) ਦੁੱਖ ਦੀ ਗੱਲ ਹੈ ਕਿ ਕਈ ਲੋਕ ਬੱਚਿਆਂ ਨੂੰ ਆਪਣੀ ਹਵਸ ਦਾ ਸ਼ਿਕਾਰ ਬਣਾਉਂਦੇ ਹਨ।

ਇਸ ਲਈ ਬਹੁਤ ਜ਼ਰੂਰੀ ਹੈ ਕਿ ਤੁਸੀਂ ਆਪਣੇ ਬੱਚਿਆਂ ਨੂੰ ਛੋਟੀ ਉਮਰ ਤੋਂ ਇਸ ਵਿਸ਼ੇ ਬਾਰੇ ਸਿਖਾਓ। ਜਰਮਨੀ ਵਿਚ ਰਹਿਣ ਵਾਲੀ ਰੀਨਾਟੇ ਨਾਂ ਦੀ ਮਾਂ ਕਹਿੰਦੀ ਹੈ: “ਜੇ ਤੁਸੀਂ ਉਨ੍ਹਾਂ ਨਾਲ ਉਦੋਂ ਗੱਲ ਕਰੋਗੇ ਜਦੋਂ ਉਹ ਥੋੜ੍ਹੇ ਵੱਡੇ ਹੋ ਜਾਣਗੇ, ਤਾਂ ਸ਼ਾਇਦ ਉਹ ਤੁਹਾਡੇ ਨਾਲ ਖੁੱਲ੍ਹ ਕੇ ਗੱਲ ਕਰਨੀ ਨਾ ਚਾਹੁਣ।” ਬਿਹਤਰ ਇਹੀ ਹੈ ਕਿ ਤੁਸੀਂ ਬੱਚਿਆਂ ਨੂੰ ਉਨ੍ਹਾਂ ਦੀ ਉਮਰ ਮੁਤਾਬਕ ਜਾਣਕਾਰੀ ਦਿਓ।

ਸਕੂਲ ਸ਼ੁਰੂ ਕਰਨ ਤੋਂ ਪਹਿਲਾਂ: ਬੱਚਿਆਂ ਨੂੰ ਸਰੀਰ ਦੇ ਗੁਪਤ ਅੰਗਾਂ ਦੇ ਸਹੀ ਨਾਂ ਦੱਸੋ ਅਤੇ ਸਮਝਾਓ ਕਿ ਕਿਸੇ ਨੂੰ ਇਨ੍ਹਾਂ ਨੂੰ ਹੱਥ ਨਹੀਂ ਲਾਉਣਾ ਚਾਹੀਦਾ। ਮੈਕਸੀਕੋ ਵਿਚ ਯੂਲੀਆ ਨਾਂ ਦੀ ਮਾਂ ਕਹਿੰਦੀ ਹੈ: “ਮੇਰਾ ਮੁੰਡਾ ਸਿਰਫ਼ ਤਿੰਨ ਸਾਲਾਂ ਦਾ ਸੀ ਜਦੋਂ ਮੈਂ ਉਸ ਨੂੰ ਇਸ ਬਾਰੇ ਥੋੜ੍ਹਾ-ਥੋੜ੍ਹਾ ਸਿਖਾਉਣ ਲੱਗ ਪਈ। ਮੈਨੂੰ ਬਹੁਤ ਫ਼ਿਕਰ ਹੁੰਦਾ ਸੀ ਕਿ ਟੀਚਰ, ਉਸ ਦੀ ਦੇਖ-ਭਾਲ ਕਰਨ ਵਾਲੇ ਲੋਕ ਜਾਂ ਵੱਡੇ ਬੱਚੇ ਕਿਤੇ ਉਸ ਨਾਲ ਗ਼ਲਤ ਕੰਮ ਨਾ ਕਰਨ। ਉਸ ਨੂੰ ਆਪਣੀ ਹਿਫਾਜ਼ਤ ਕਰਨੀ ਸਿੱਖਣ ਦੀ ਲੋੜ ਸੀ।”

ਪ੍ਰਾਇਮਰੀ ਸਕੂਲ ਜਾਣ ਵਾਲੇ ਬੱਚੇ: ਇਨ੍ਹਾਂ ਸਾਲਾਂ ਦੌਰਾਨ ਆਪਣੇ ਬੱਚਿਆਂ ਦਾ ਗਿਆਨ ਹੌਲੀ-ਹੌਲੀ ਵਧਾਓ। ਪੀਟਰ ਨਾਂ ਦਾ ਪਿਤਾ ਸੁਝਾਅ ਦਿੰਦਾ ਹੈ: “ਤੇਲ ਦੇਖੋ, ਤੇਲ ਦੀ ਧਾਰ ਦੇਖੋ। ਬੱਚਿਆਂ ਨਾਲ ਗੱਲ ਕਰ ਕੇ ਪਤਾ ਕਰੋ ਕਿ ਉਹ ਕਿੰਨਾ ਕੁ ਜਾਣਦੇ ਹਨ ਤੇ ਉਹ ਹੋਰ ਕੀ ਕੁਝ ਜਾਣਨਾ ਚਾਹੁੰਦੇ ਹਨ। ਪਰ ਉਨ੍ਹਾਂ ਨੂੰ ਗੱਲ ਕਰਨ ਲਈ ਮਜਬੂਰ ਨਾ ਕਰੋ। ਜੇ ਤੁਸੀਂ ਪਹਿਲਾਂ ਤੋਂ ਹੀ ਆਪਣੇ ਬੱਚਿਆਂ ਨਾਲ ਖੁੱਲ੍ਹ ਕੇ ਗੱਲ ਕਰਦੇ ਹੋ, ਤਾਂ ਇਸ ਬਾਰੇ ਗੱਲ ਕਰਨੀ ਤੁਹਾਡੇ ਲਈ ਸੌਖੀ ਹੋ ਸਕਦੀ ਹੈ।”

ਨੌਜਵਾਨਾਂ ਲਈ: ਇਸ ਉਮਰ ਵਿਚ ਜ਼ਰੂਰੀ ਹੈ ਕਿ ਤੁਹਾਡੇ ਬੱਚੇ ਨੂੰ ਦੱਸਿਆ ਜਾਵੇ ਕਿ ਸਰੀਰ ਤੋਂ ਇਲਾਵਾ ਸੈਕਸ ਕਰਨ ਨਾਲ ਜਜ਼ਬਾਤਾਂ ’ਤੇ ਵੀ ਅਸਰ ਪੈਂਦਾ ਹੈ। ਨਾਲੇ ਦੱਸੋ ਕਿ ਸਿਰਫ਼ ਪਤੀ-ਪਤਨੀ ਵਿਚਕਾਰ ਹੀ ਇਹ ਰਿਸ਼ਤਾ ਹੋਣਾ ਚਾਹੀਦਾ ਹੈ। ਪੰਦਰਾਂ ਸਾਲਾਂ ਦੀ ਆਨਾ ਦਾ ਪਹਿਲਾਂ ਵੀ ਜ਼ਿਕਰ ਕੀਤਾ ਗਿਆ ਸੀ। ਉਹ ਇਹ ਵੀ ਦੱਸਦੀ ਹੈ: “ਮੇਰੇ ਸਕੂਲ ਵਿਚ ਮੁੰਡੇ-ਕੁੜੀਆਂ ਸੈਕਸ ਕਰਦੇ ਹਨ। ਇਕ ਮਸੀਹੀ ਵਜੋਂ ਮੈਨੂੰ ਵੀ ਸੈਕਸ ਬਾਰੇ ਜਾਣਕਾਰੀ ਹੋਣੀ ਚਾਹੀਦੀ ਹੈ। ਭਾਵੇਂ ਕਿ ਇਸ ਬਾਰੇ ਗੱਲ ਕਰਦਿਆਂ ਮੈਨੂੰ ਸ਼ਰਮ ਆਉਂਦੀ ਹੈ, ਪਰ ਫਿਰ ਵੀ ਇਸ ਬਾਰੇ ਜਾਣਨਾ ਬਹੁਤ ਜ਼ਰੂਰੀ ਹੈ।” *

ਸਾਵਧਾਨੀ: ਸ਼ਾਇਦ ਨੌਜਵਾਨ ਸਵਾਲ ਪੁੱਛਣ ਤੋਂ ਹਿਚਕਿਚਾਉਣ ਕਿਉਂਕਿ ਉਨ੍ਹਾਂ ਨੂੰ ਡਰ ਹੁੰਦਾ ਹੈ ਕਿ ਉਨ੍ਹਾਂ ਦੇ ਮਾਪੇ ਕਿਤੇ ਇਹ ਨਾ ਸੋਚਣ ਕਿ ਉਹ ਕੁਝ ਗ਼ਲਤ ਕਰ ਰਹੇ ਹਨ। ਸਟੀਵਨ ਨਾਂ ਦਾ ਇਕ ਪਿਤਾ ਕਹਿੰਦਾ ਹੈ: “ਸਾਡਾ ਮੁੰਡਾ ਸਾਡੇ ਨਾਲ  ਸੈਕਸ ਬਾਰੇ ਗੱਲ ਕਰਨੀ ਨਹੀਂ ਸੀ ਚਾਹੁੰਦਾ। ਸਾਨੂੰ ਬਾਅਦ ਵਿਚ ਪਤਾ ਲੱਗਾ ਕਿ ਉਹ ਸੋਚਦਾ ਸੀ ਕਿ ਅਸੀਂ ਉਸ ਉੱਤੇ ਸ਼ੱਕ ਕਰ ਰਹੇ ਸੀ। ਅਸੀਂ ਉਸ ਨੂੰ ਸਮਝਾਇਆ ਕਿ ਅਸੀਂ ਉਸ ਉੱਤੇ ਸ਼ੱਕ ਨਹੀਂ ਕਰਦੇ ਸੀ, ਪਰ ਅਸੀਂ ਚਾਹੁੰਦੇ ਸੀ ਕਿ ਲੋੜ ਪੈਣ ਤੇ ਉਹ ਗ਼ਲਤ ਕੰਮਾਂ ਦੇ ਲਈ ਸਾਫ਼ ਨਾਂਹ ਕਹਿ ਸਕੇ।”

ਇਹ ਸੱਚ ਹੈ ਕਿ ਬੱਚਿਆਂ ਨਾਲ ਸੈਕਸ ਬਾਰੇ ਗੱਲ ਕਰਨੀ ਮਾਪਿਆਂ ਲਈ ਸਭ ਤੋਂ ਔਖੀ ਗੱਲ ਹੋ ਸਕਦੀ ਹੈ। ਪਰ ਇਸ ਦੇ ਫ਼ਾਇਦੇ ਵੀ ਹਨ। ਡਾਇਐਨ ਨਾਂ ਦੀ ਇਕ ਮਾਂ ਕਹਿੰਦੀ ਹੈ: “ਸਮਾਂ ਬੀਤਣ ਦੇ ਨਾਲ-ਨਾਲ ਤੁਹਾਡੀ ਝਿਜਕ ਜਾਂਦੀ ਰਹਿੰਦੀ ਹੈ ਅਤੇ ਆਪਣੇ ਬੱਚੇ ਨਾਲ ਸੈਕਸ ਬਾਰੇ ਗੱਲ ਕਰ ਕੇ ਤੁਹਾਡਾ ਰਿਸ਼ਤਾ ਹੋਰ ਵੀ ਮਜ਼ਬੂਤ ਹੁੰਦਾ ਹੈ।” ਸਟੀਵਨ, ਜਿਸ ਦਾ ਅੱਗੇ ਵੀ ਜ਼ਿਕਰ ਕੀਤਾ ਗਿਆ ਸੀ, ਮੰਨਦਾ ਹੈ: “ਜੇ ਤੁਸੀਂ ਆਮ ਕਰਕੇ ਆਪਣੇ ਪਰਿਵਾਰ ਵਿਚ ਕਿਸੇ ਵੀ ਵਿਸ਼ੇ ’ਤੇ ਖੁੱਲ੍ਹ ਕੇ ਗੱਲ ਕਰਨ ਦੀ ਕੋਸ਼ਿਸ਼ ਕਰਦੇ ਹੋ, ਤਾਂ ਸੈਕਸ ਬਾਰੇ ਗੱਲ ਕਰਨੀ ਵੀ ਥੋੜ੍ਹੀ ਸੌਖੀ ਹੋ ਸਕਦੀ ਹੈ। ਇਸ ਬਾਰੇ ਗੱਲ ਕਰਨੀ ਆਸਾਨ ਤਾਂ ਨਹੀਂ ਹੈ, ਪਰ ਖੁੱਲ੍ਹ ਕੇ ਗੱਲ ਕਰਨ ਨਾਲ ਇਕ ਮਸੀਹੀ ਪਰਿਵਾਰ ਸੁਖੀ ਹੋ ਸਕਦਾ ਹੈ।” (w10-E 11/01)