Nen Pebrero 24, 2022 inataki na Russia so Ukraine. Masulok ya 129,000 ya Tasi nen Jehova tan saray ananak da so manaayam ed Ukraine. Angorganisa so branch office na 27 ya Disaster Relief Committee (DRC) ya ontulong ed saray agagi tayo. Ontan met, lapud Kristianon panangaro, gagawaen la na saray agagi so anggaay nayarian da pian natulongan tan naligliwa day sakey tan sakey pati saray arum nin totoo legan na sayan krisis.

Maslak ed saray agagi tayo et nansiansia ed Ukraine, balet wala ray nandesisyon ya onalis. Saramay inmalis et kaukolan day ondalan ed customs pero andukdukey iray pila, say arum et inmabot ed 30 kilometro so karukey to, tan asabi day talora anggad apatiran agew ditan. Inanap na saray agagi ya asingger ditan iray akapila ya agagi tayo pian naikdan da ray naakan tan nainum tan arum nin praktikal ya tulong. Nen akalampas lad border na saray kaabay ya bansa iray agagi tayo, inabet ira na arum nin Tasi ya walay awi-awit dan karatula ya akasulat so jw.org, tan akaparaan iran manligliwa tan ontulong.

• Makapaermen ta nen Marso 1, 2022 inatey so sakey ya emel ya brother ed Kharkiv tan asugatan na grabe so asawa to lapud asabogan ira na bomba

• 3 ya sister so asugatan met

• Tinaynan na masulok ya 5,000 ya manangipalapag so kaabungan da

• 2 ya abung so agaygay

• 3 ya abung so aderal ya maong

• 35 ya abung so medyo aderal

• 2 ya Kingdom Hall so aderal

• Dakel ya manangipalapag so naandian na kuryente, heating, telepono, tan danum

• 27 ya DRC so binuo diad Ukraine

• 867 ya manangipalapag so tinulongan na saray DRC ya makalmo na napanayaman diad mas safe iran lugar

• Pansasagpotan na saray DRC ya itarya iray nakaukolan na agagi, singa say naakan tan danum

Saray wadia ya bilang et initial report ni labat.

Ipipikasi tayo ray agagi tayo ya komon ta tuloytuloy iran nawalaan na karunongan tan pakatalos pian nasarag da ray mair-irap ya situasyon tan saray pakakaaburidoan da, tan tuloytuloy dan nipanengneng so panangaro da ed sakey tan sakey.—Proverbio 9:10; 1 Tesalonica 4:9.