Mair-irap so situasyon na saray agagi tayo tan saray arum nin totoo diad saray syudad na Mariupol, Kharkiv, Hostomel lapud tuloytuloy nin pambobomba diad Ukraine. Say arum et manga sakey simba lan agni akapaway ed saray basement da odino diad saray panaamotan da. Nanaupot met lay suplay na naakan, tan mair-irap ya nakontak iray agagi lapud manandi so kuryente, koneksion na Internet, tan anggan saray cellular network.

Makapaermen ta inatey si Brother Dmytro Rozdorskyi, 28 años ya elder diad Myrnohrad, lapud graben sugat to ta akagatin na bomba ya akaamot ed dalin. Ipipikasi tayo iramay naandian na inarod bilay tan saray agagi tayon walad lugar ya grabe so nagagawan panagbomba.—2 Tesalonica 3:1.

Nia ray bilang ya inreport anggad Marso 7, 2022 manlapud Ukraine:

• 2 ya manangipalapag so inatey

• 8 ya manangipalapag so asugatan

• 20,617 ya manangipalapag so tinmaynan ed kaabungan da tan linmad mas safe iran lugar diad loob lanlamang na Ukraine

• 25 ya abung so agaygay

• 29 ya abung so aderal ya maong

• 173 ya abung so medyo aderal

• 5 ya Kingdom Hall so aderal

• 27 ya Disaster Relief Committee (DRC) so onkikiwas ed Ukraine

• 6,548 ya manangipalapag so direktan atulongan na saray DRC pian makaanap na mas safe ya napanayaman

• 7,008 ya manangipalapag so linmad arum ya bansa tan tutulongan ira na saray kaagian da

• 1 ya Assembly Hall tan manga 30 ya Kingdom Hall ed western Ukraine, singa saramay walad rehyon na Chernevtsi, Ivano-Frankivsk, Lviv, tan Transcarpathian, so inayos pian napanayaman na saray refugee