Tuloytuloy ni so pantutulongan na saray agagi tayod Ukraine. Tuloytuloy da met ya ipapanengneng so agmakasarilin panangaro ed sakey tan sakey.

Si Sister Olena et 81 lay taon da. Nen Hunyo 6, walay sinmabog ya bomba ya pigaran metro labat so kaarawi tod abung da. Dineral na bomba so kaabay dan abung, tan lapud satan et walay intilak ton baleg ya abot ya pitoran metro so kaaralem to. Agaylay kasil to man ya insabog kanian aderal ya maong pati samay abung di Sister Olena.

Oniay imbaga da: “Nanaugip ak, insan walay tinmumban padir diad mismon uloan ko. Grabe deket tan kapal na sapok. Pinmupulasi iray salming tan bato. Agaylay pisasalamat kod si Aman Jehova ta mabilay ak.” Sinmabin tampol iray agagin taga diman pigaran minuto labat kayari na insabog, kaibad sikara so sakey ya brother ya aderal met ya maong so abung to. Onia ni intuloy nen Sister Olena: “Nen sinmabi ray agagi, ataktakot ira kanian ag-ira makasalita. Apaseseg ak ta sinmabi ira. Balibali liknaan ko ta wala rad abay ko.”

Oniay imbaga nen Serhii, sakey ya elder ya lanang ya ombibisita ed si Sister Olena kaiba iray kabataan ed kongregasyon da: “Nen naamtaan kon walay sinmabog diad asingger ed abung di Sister Olena, ataktakot ak tan aburido ak ya maong. Nainawaan ak labat nen anengneng kon ag-ira masyadon asugatan, wala ra labat so asireg ya parte na laman da. Makapadinayew ta say sankaunaan ya aanapen nen Sister Olena kayarin aderal so abung da et amay literatura na Biblia ya naawat da pigaran agew ni labat.”

Maong labat ta niyanapan ira na kakanayon da na balon napanayaman. Tuloytuloy nin susuportaan na kongregasyon si Sister Olena, tan inagew-agew ya kokontaken na saray elder. Inyanapan met ira na agagi na hearing aid pian narengel dan maong iray aral na kongregasyon. Imbaga nen Sister Olena: “No maminsan anggapoy biskeg ko, pero pakakasilen ak na saray aral. Lanang ak ya tatawagan na saray agagi, tan pisalamatan kon maong itan.”

Walay sanasawan inistorya day agawad sikara legan iran onaamot ed basement na sakey a Kingdom Hall ya kaiba da ray 200 ya arum nin manangipalapag. Oniay insulat na asawan bii: “Say talagan pandinayewan ko et say panangasikaso na saray maaron elder. Nanononotan kod sikara si David, ya inarap toy patey nen akilaban ed leon tan oso pian naprotektaan iray karnero. Singa met onaarap ed patey iray elder ya kaiba mid basement kada no mangaala iray naakan tan danum, tan pati petrolyo pian walay silew mi. Salamat ed satan ta naikokondukta iray aral na kongregasyon mi tan saray pantitipon parad lawak na kimeyan. Anggano pinasyay panagbomba, regular nin bibisitaen na sarayan elder iray agagin walad kaabungan da, iyaawitan da ray naakan tan inumen da, tan liligliwaen da ra. Aralem so respetok ed sarayan elder. Antis na sarayay nagagawa natan, kabat ko la ra bilang managbangat tan managpulong, balet natan et akabat ko ra bilang pastol ya nailaloan. Misalamat ak ya maong ed alimbawa ra ta makpel, maasikaso, tan nailaloan ira!”

Nansulat ed Ukraine branch iray manangipalapag ed sakey ya kongregasyon ed Ukraine nipaakar ed saramay mangidadaulo ed pangiiter na relief, oniay kuan da: “Napnapnoy puso mi na pisasalamat. Pandinayewan mi panguusar nen Aman Jehova ed saray agagi tayo pian naasikaso kami. Talagan naeksperiensya mi may imbaga nen Jesus: ‘Diad saya et naamtaan na amin a sikayo iray disipulok—no manaaroan kayo.’”—Juan 13:35.

Nia ray bilang ya inreport anggad Hunyo 21, 2022 manlapud Ukraine. Imbase iraya ed saray akompirman report manlapud saray agagi ed Ukraine. Balet nayarin mas atagey ni so aktual ya bilang, lapud mair-irap ya pansiansiaen so komunikasyon ed amin ya lugar diad bansa.

• 42 ya manangipalapag so inatey

• 83 ya manangipalapag so asugatan

• 31,185 a manangipalapag so tinmaynan ed kaabungan da tan linmad mas safe iran lugar

• 495 ya abung so agaygay

• 557 ya abung so aderal ya maong

• 1,429 ya abung so medyo aderal

• 5 ya Kingdom Hall so aderal

• 8 ya Kingdom Hall so aderal ya maong

• 34 ya Kingdom Hall so medyo aderal

• 27 ya Disaster Relief Committee (DRC) so onkikiwas ed Ukraine

• 52,348 ya manangipalapag so direktan atulongan na saray DRC pian makaanap na mas safe ya napanayaman

• 23,433 ya manangipalapag so linmad arum ya bansa tan tutulongan ira na saray agagi diman